2 Ti 4
4
Xk'eeb'al xna'leb' laj Timoteo
1Chiru li Yos ut li Kristo Jesus li taaraqoq aatin sa' xb'eeneb' li yo'yookeb' ut kamenaqeb', nintz'aama ut nawelaji chawu sa' xk'ab'a' li xk'utb'esinkil rib' ut sa' xk'ab'a' li xnimajwal awab'ejihom: 2chapuktesi li Aatin, chayal aaq'e chi xb'aanunkil a'in naq tixk'e rib' ut naq ink'a'; chatq'usuq, chak'ehaq xna'leb'eb' ut chawaklesi xch'ooleb' rik'in xnimal aakuyum ut aana'leb'.
3Xb'aan naq taawulaq xq'ehil naq eb' li tenamit ink'a' chik te'raj rab'inkil li chaab'il na'leb' ut, xb'aan xrahinkil li k'aru neke'raj xch'ool, q'esaq xxik chi rab'inkil k'iila na'leb', te'sute'q xb'aan jun tuub' chi aj tzolonel; 4te'xkanab' rab'inkil li yaal ut a' chik li seeraq' maak'a' na'ok wi' taawulaq chiruheb'. 5A'ut laa'at aj'ajaq aawu rik'in chixjunil, chakuyaq li rahilal, k'e aach'ool cho'q aj puktesinel re li Chaab'il Esilal, chab'aanu laak'anjel chi tz'aqal re ru.
6Xb'aan naq xwulak xkutankil naq taahoye'q linkik'el jo' mayej;#4,6 Cf. Fil 2,17. li xhonalil linq'ajik ak xnach'ok chaq. 7Xintz'aqonk sa' li xchaq'alil ru yalok u, xinraqe'k chi aanilak, xink'uula linpaab'aal. 8Ut chalen anaqwan ak yo chi woyb'eninkil linmaatan li tinxq'ajkamu wi' li Qaawa' sa' li Kutan a'an, li tiik xch'ool chi raqok aatin; ut moko ka'aj ta wi' laa'in, jo'kaneb' aj b'an wi' chixjunileb' li neke'xyo'oni li xnimal xk'ulunik chi anchaleb' xch'ool.
9Chaseeb'a chaq aawib' chi chalk wik'in chi junpaat: 10laj Demas#4,10 Chirix laj Demas: cf. Kol 4,14; Flm 24. xinxkanab' xb'aan xrahinkil ru li ruuchich'och' a'in ut xkoho Tesalónika. Laj Crescente xkoho Galacia; laj Tito xkoho Dalmacia. 11Ka'aj chik laj Lukas wank wik'in. Chak'am chaq chawix laj Markos,#4,11 Chirix laj Lukas: cf. Kol 4,14. Chirix laj Markos: cf. Kol 4,10. xb'aan naq a'an q'axal nikinxtenq'a sa' li k'anjel. 12Laj Tíkiko#4,12 Chirix laj Tíkiko: cf. Hch 20,3-5; Ef 6,21; Kol 4,7; Tit 3,12. xintaqla Éfeso.
13Naq tatchalq, chak'am chaq linkaap li xinkanab' chaq Tróada, sa' rochoch laj Karpo, ut chak'am ajwi' chaq eb' li tasb'il hu, a' li tz'uum hu li q'axal twaj ru.
14Laj Alejandro, laj tenol ch'iich',#4,14a Chirix laj Alejandro: cf. 1 Ti 1,20. naab'al li rahilal xb'aanu we. Li Qaawa' taa'eeqajunq re jo' chanru li xb'aanuhom.#4,14b Cf. Sal 62,12-13. 15Chakol ajwi' aawib' laa'at chiru a'an, xb'aan naq q'axal ra xreek'a naq xoo'aatinak aran.
16Naq xinb'oqe'k xb'enwa rik'in laj raqol aatin re xkolb'al wib', maa'ani xtenq'ank we, chixjunileb' b'an xine'xkanab' injunes. Mik'ehe'k ta li maak a'in sa' xb'eeneb'. 17Ab'an li Qaawa' xoltenq'anq we ut xk'e xkawub' linch'ool re xpuktesinkil chi yaal li Aatin re naq xe'rab'i chixjunileb' li tenamit. Ut xinkole'k sa' re li kaqkoj.#4,17 Cf. Sal 22,22. 18Li Qaawa' taakoloq we chiru chixjunil li ink'a' us ut tinxxok cho'q re li xnimajwal wankilal sa' choxa. A'an taxaq chiloq'oniiq ru junq'e junq'e kutan. Jo'kan taxaq.
Xraqik li hu
19Chak'e xsahilaleb' xch'ool lix Priska ut laj Akila, jo'kan ajwi' li xjunkab'al laj Onesíforo.#4,19 Chirix lix Priska ut laj Akila: cf. Hch 18,2.18. Chirix laj Onesíforo: cf. 2 Ti 1,16-18. 20Laj Erasto xkanaak chaq Korinto, ut laj Trófimo#4,20 Chirix laj Erasto: cf. Hch 19,22; Ro 16,23. Chirix laj Trófimo: cf. Hch 20,4; 21,29. yaj naq xinkanab' chaq Mileto. 21Chaseeb'a chaq aawib' chi chalk naq toj maji' natiklaak li hab'alq'e. Naxtaqla xsahil aach'ool laj Ewbulo, laj Pudente, laj Lino, lix Klawdia ut chixjunileb' laj paab'anel.
22Li Qaawa' chiwanq taxaq aawik'in. Li rusilal li Yos chiwanq taxaq eerik'in.
S'ha seleccionat:
2 Ti 4: QQC
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
Q'eqchi DC Bible © Bible Society in Guatemala, 2005.