2 Ts 3
3
1Sa' roso'jik, ex qas qiitz'in, chextijoq chiqix re naq li Raatin li Qaawa' chipuktesiiq chi junpaat ut chik'ehe'q xloq'al jo' xk'ulmank sa' eeyanq. 2Chetz'aama ajwi' naq chookole'q chiruheb' li winq yib'eb' ru xna'leb' ut maa'useb', xb'aan naq moko chixjunil ta aj e li paab'ank. 3Tiik xch'ool li Qaawa'; ut a'an tixk'e xkawub' eech'ool ut texxkol chiru li maa'us.
4K'ojk'o li qaanm cherix sa' xk'ab'a' li Qaawa' naq jo'nimal xexqachaq'rab'i wi' yookex chi xpaab'ankil, ut teepaab' ajwi' chi junelik. 5A' taxaq li Qaawa' chib'eresinq leech'ool sa' li xrahom li Yos ut sa' li royb'eninkil li Kriist rik'in xnimal eekuyum.
Tento took'anjelaq
6Ex qas qiitz'in, sa' xk'ab'a' li Qaawa' Jesukriist nekexqachaq'rab'i naq cherisi eerib' sa' xyanqeb' chixjunil li qas qiitz'in li wankeb' chi sachsookeb' xch'ool ut ink'a' neke'xb'aanu jo' chanru leetijb'al eek'ulum qik'in. 7Laa'ex nekenaw chi us chanru teek'am eere qik'in, xb'aan naq moko xoowank ta chaq sa' eeyanq chi sachso qana'leb', 8chi moko xoowa'ak chi maatan rik'in anihaq, xqatawasi b'an qib' chi k'anjelak chi q'eq ut chi kutan, a' xqaj naq maa'ani xqach'i'ch'i'i sa' eeyanq. 9Moko xb'aan ta naq ink'a' ta raj qak'ulub', yal xqaj b'an xk'utb'al cheru chanru li k'anjelak, re naq teek'am eere qik'in.
10Ut naq toj wanko chaq eerik'in, xexqachaq'rab'i chi jo'kan: wi wank junaq ink'a' naraj k'anjelak, ink'a' ajwi' taatzekanq. 11Xb'aan naq xqab'i resil naq wank wankeb' sa' eeyanq li sachsookeb' xna'leb': maak'a' neke'xb'aanu, ab'anan neke'xch'ik rib' yalaq b'ar. 12Eb' a'an naqachaq'rab'i ut naqajultika reheb' sa' xk'ab'a' li Qaawa' Jesukriist naq che'k'anjelaq sa' xyaalalil re naq te'xtaw xwaheb'.
13Ut laa'ex, ex qas qiitz'in, mextitz' chi xb'aanunkil li us. 14Wi wank junaq ink'a' naxpaab' li xqaye sa' li hu a'in, k'ehomaq reetal ut meejunaji eerib' rik'in re naq chixutaanaq. 15Ab'anan moko xik' ta teeril, cheq'usaq b'an jo' eeras eeriitz'in.
Xraqik li hu
16A' taxaq li xQaawa' li tuqtuukil usilal chik'ehoq eere li tuqtuukilal chi junelik ut sa' chixjunil. Chiwanq taxaq li Qaawa' eerik'in chejunilex.
17Laa'in laj Pablo nintz'iib'a li xsahil eech'ool a'in rik'in wuq'.#3,17 Cf. Gal 6,11; 1 Ko 16,21; Kol 4,18. A'in weetalil sa' chixjunil linhu intz'iib'ahom. Jo'ka'in naq nintz'iib'ak.
18Li rusilal li Qaawa' Jesukriist chiwanq taxaq eerik'in chejunilex.
S'ha seleccionat:
2 Ts 3: QQC
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
Q'eqchi DC Bible © Bible Society in Guatemala, 2005.