Génesis 9
9
Diosin Noé yoisharayoni cuscan
1Ascan Diosin Noé yafi ahuun facufo tsain shara yoiyoni isca huaquin, —Facu ichapa caihuacahuun maitio ano inonfo. 2Nantifi yoinafo matoqui onanya iishquin. Nan yoinafo non puiyafo nan mai ano sharaifo yafi nantifi ununhuan muran icafori man apaiyai cuscan man ato huashquin. 3Nantifi yoinafo yafi fanafori man pipaiyaiti man pitiroquin. 4Ascafia nami imiya man pitiroma. Nan imihuunoashu yora nitiro.
5-6Ascataricai man yora rututiroma. Ascan yoinaton yora rutucun nan yoina man rututiro. Unfin ua cuscara yorafo onihuaniquin. Ascan rutumitsamisiton yora rutuafin nan ua cuscarari rutui cafisca huatiroquin. Ascacun nan rutumitsamisiri man rututiro. 7Ascashon facu ichapa caihuacahuun nan maitio inonfo, —ishon Dios ato yoini.
8Asca huatan Diosin Noé yafi ahuun facufo yoiquin isca huani, 9—Un mato yoiai cuscan man icoinra huatiro. Uhuun tsaincai fianananpacunacama. Nan un mato yoiai cuscan nannoricoin uhuun tsain mato funafo un ato yoishquin. 10Ascacun un mato rufofo iquisi yoiyoa cuscan nantifi yoinafo mato fu shashohuan muran iquiafo un ato sharahuai cuscan. Nantifi puiyafo yafi inafo non yoinafo nan maitio anoafo un mato yoia cuscan un atohuunoari yoi.
11Uncai afanan faitahuanun mai fuponacama nantifi yorafo yafi yoinafo nanonfoma. 12Ascacun nahuanfai oinquin man tapitiro un mato rama yoia cuscan iconcoincun. Mato fusti un yoima. Nan chipo cainshquin nantifi yorafoti un mato yoia cuscan icoinran huatirofo. 13Ascashon nanhuanfai un nai coin muran hua afanan faitahuanacamaran ishon man tapinon. Un mato yoia cuscan nantifi maitio anoafoan icoinra huatirofo. 14Unfin coinmanhuan muran nanhuanfai potuincain man oinon. 15Ascashon oinquin man tapitiro uncai mato yoiyoa cuscan un ointiaquimanacama mato yafi yoinafohuunoa un afanan faitahuanun maitio fuponacama cuyononfo. 16-17Ascacun nanhuanfai coin muran oinquin un shinantiro isca huaquin, “Nan yorafoti yafi yoinafotiri mai anoafoti un ato yoiyoa cuscan nanscacoin huaquin un unupacunacamaran,” —ishon Diosin Noé yoini.
Noé yafi ahuun furufohuunoa
18Ascashu Noé yafi ahuun facufo shashohuan murannoashu fonifo. Nan ahuun facufoan ato anu Sem yafi Cam non Jafet. Nan Cam Canaán ahuun apa ini. 19Nan rafu non fusti Noé facu ini. Nanfohuunoashu afanan nan maitio facu ichapa caini.
20Ascashon Noé mau huasho nan fimi uva ichapa fanani. 21Ascano chipo nan uva ichapa fimini. Ascacun nan uvapan ahuun unu ayashu Noé paunni. Nan pauin Noé ahuun pano pushu muran chitoriacoin racani. 22Ascaiton ahuun facu Campan oinquin ahuun ochi rafuqui chanini. 23Ascaino nicafuracani fucashon Sem futan Jafet ahuun racoti fucashon apa chitoria racacun oincasmacaqui fuponifo. Chituquiri focashon apa raconifo chitoria oinonfoma.
24-25Ascashu Noé pauin moinacahuan ahuun facu chipocu Campan chitoria oinquin yoiqui isca huani, —Canaán yafi ahuun funafo chaca iishquin. Canaán funafo min ochi rafutan aton yonomatifo iishcaniran, —ishon Noén Cam yoini. 26Ascashon afanan Noé yoini isca huaquin, —Nocon Ifo Diosin, min fasi sharacoin. Mihuunoa nantifi yorafo yoisharapacunaca. Minfin Sempan Diosiquin. Sem cushusharahuu. Canaán funafo Sempan yonomatifo inonfo. 27Ascatan Jafet arifi mai ichapa fipainon. Ahuun ochi Sem fu mai pashcananshquin. Ascashu Canaán ahuun funafori Sem futan Jafet aton yonomati ipainonran, —ishon Noé yoini.
28Ascan nan faitahuan nashaitian chipo Noé tres cientos cincuenta fari niyopaoni. 29Nantia Noé ahuun fari novecientos cincuenta faria ini. Ascan nanti fariashu nani.
S'ha seleccionat:
Génesis 9: mcd
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
© 2008, Wycliffe Bible Translators, Inc. All rights reserved.