Génesis 15
15
Diosin Abram yoisharayoni cuscan
1Ascashon chipo nocon Ifo Diosin Abram ahuun namapa cuscara yoiquin isca huani, —Abram, ratuyamahuun. Un mia cushui mia ahuusca huanonfoma. Unfin mia fasi shara huaiquin, —ishon yoiaiton. 2-3Abram cumani, —Uhuun Ifon, min nantifi iquina. Ascafia unfin facuomaquin. Ascan ahuara mian inanfiaquicai mian facu inanmisima. Ascacun nan un naitian uhuun facucoin inan huaquin uhuun yonomati Eliezer un ahuara inantiro ahuuna inon. Mian ahuarafo inantirofiacai afocai uhuuna ahuamaran, —ishon yoiaiton.
4Afanan Ifo Diosin yoini, —Min naitiancai aya cuscan min yonomatinin fima. Min facucoin chipo nantifi min aya cuscan ahuunari ishquiran, —ishon yoini.
5Asca huatan Diosin Abram chifi caimani. Caimashon yoiquin isca huani, —Nai ari oinyohuu. Nan fishifo min tanan huatiromainquin tananhuahuu. Nanscarifi min funafo chipo iishquin. Tsoan ato tanan huatiroma ishquinran, —ishon nocon Ifo Diosin Abram yoini.
6Nannori yoiaiton nicaquin Abram Ifo Diosi yoiai cuscan icoinra huani. Icoinra huaiton Diosin yoini, —Abram min ua icoinra huashu min fasi sharacoian, —ishon yoini. 7Ascashon afanan Ifo Diosin Abram yoini isca huaquin, —Unfin min Ifoquin. Un mia Caldeofo aton pushu rasi ahuun anu Ur anoashu mia ihuuni mai futsa shara mia inanshquin mina inon, —huaiton.
8Nannori huaiton nicaquin Abram afanan cumani, —Uhuun Ifon, min nantifi iquina. ¿Ahuuscashomun un tapitiroquin nan mai un fitiro? —huaiton.
9—Ua moipan facu yafi cabra non chashohuan non nan rafu non fusti ina rafu non fusti fari aqui caafo ua fushofain ruhuin rafuri ua fushohuun —ishon Diosin yoini.
10Ascano nan Diosin yoia cuscan nantifi Abram aqui funi. Ascashon nan rafu non fusti ina cashcu rafupacuni. Cashcu rafushon ocuma rafu ratafoqui sutu huani. Nanfo cashcufiaquicai puiyafo cashcunima. 11Asca huano nanfo cotocotonun pipaiyaiton Abram ato ichoni. 12Man faquishpacuaino Abram fasi oshan murancoinni. Ascashon ahuun namapa oian fasi faquishcoincu fasi ratucoinni. 13Ascatan Ifo Diosin yoini, —Abram, un mia yoi min tapifain min ua icoinra huanon. Min funafo mai futsa ano iyoshcani. Nan mai futsa anoafoan aton yonomatifo iishquicani. Cuatro cientos farin ato yonomaqui fasi omitsiscamashcani. 14Ascafia nan mai futsa anoa un yorafori curushcain un ato onaintimashquin. Ascano min funafoan chipo atomaquinoashu focaquin nan mai futsa anoa mafo ichapa foshcani. 15Asca minrifi chipo anifoshtashu min naitian mia mai huashcani. Ascashu min upa yafi min shunifo ufu icafoanno min nocoshquin. Nanno nocoashu min ointi unimacoinshquin. 16Min facufo yafi min shotafo ahuun facufori nuno mai ano nasoshquicani. Mai futsa anoashu fuushcani min nuno icano nan min funafoan ahuun mairi nuno iishquin. Ascano nantia nan Amorreofo fasi chacafo nuno min mai ano iishcani. Ascacun min funafohuunshon nan Amorreofo un ato onaintimashquiran, —ishon nocon Ifo Diosin Abram yoini.
17Man fari caano faquishpacuaiton Abram cutimanhuan muran fiin otashon oinni. Nan fiin cuti muran ina cashcu rafushon ocuma rafu ratani ato nushmancayan cahuanquin. 18Nantian nocon Ifo Diosin Abram yoiyoni isca huaquin,
—Na mai un min funafo inain. Unuhuan Egipto ano shatutan unu Eufrates ano atona inon. 19-21Nan Ceneofo non Cenezeofo non Cadmoneofo non Hititafo non Ferezeofo non Refaítafo non Amorreofo non Cananeofo non Gergeseofo yafi Jebuseofo nanno icafo. Chipo aton mai min funafona inon, —ishon Diosin yoini.
S'ha seleccionat:
Génesis 15: mcd
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
© 2008, Wycliffe Bible Translators, Inc. All rights reserved.