Daniel 11
11
Tamasaca jiyaca camarucua miaquetoojosacarijiniji pohuatasano
2“‘Quiarijia cua tojiri. Nioori seetanujuanaa: Nio Persia jiyajiniani, jiuujianraca camarucuaari sanitiojotoonutaniyajaara. Cuno jiuujianraca Persia jiya camarucua nuhuajini, tamonuuri supuenutaniya. Nojuajaari socua jiyanohua queraatia casami jiitiaja quiniutianiya cuno tariucua nocuajiquinio jiuujianraca camarucuajiniji. Naa queraatia casamiriaca na quiniuucuatej, nojuajaari jiyanohua cumueeca quiriquiano cutara. Naacuatej nojuajaari na pueya shiniujiuniutianiya Grecia jiyajinijinio narta taucuaca camarnu ruutaquenura. 3Cuno Grecia jiya camarnu nuhuaji, socua tamonu camarnuuri quiniutianiya. Nojuaja cutaraari miaquejonu maniniu quiniutianiya. Naa miaquejoru na quiniuucuatej, nojuajaari socua queraatia jiyaca miaquejonu shocotanutaniya. Naacuatej, nojuajaari puetunu tama na panishano miijiajaaja quiniutianiya. 4Puetunu jiyacajinia na jiitiasano pueya jaara tari quiya na tojitiajaca, jiyacaritij nojuajaari na jiitiasano jiyaca jaariutiasaanutaniya. Na jiitiasano pueyari cuatro maanura raquirijitiariquiano. Naa cumaacaraca cuno Grecia jiya camarnu quiniuucuatej, naajaa necohuari maja na shanacusaanu quiniutianiya nojori quiniuria na que niti. Tamasaca cutaraari camarucuara jiyatesaariquiano saa na nitijia. Naacuatej, na jiitiasano jiyacaari maja tari cumaaca na jiitianu quiniutianiya juhua coteenujua. Naa raquirijitiano cuno camarnu jiyaca quiniuucuatej, tamasaca camarucuaari na jiitiariquiano na niti saniniuujia.
5“‘Niquiriyatu cuno cuatro camarucuajinijinioni, nojuajaari jiyaniquishaariquiano pananu muetasamaji muenecara quijia jiyajinijinio camarnu. Cuno camarnuuri jiyanohua cumaacaraca quiniutianiya. Saniniuujia, tamonu na soldadohua jiyaniijiara na jiyatesanoori socua nojuajiniji cumaacaraca quiriquiano. Naacuatej, nojuajaari queraatia jiyaca jiitianutaniya. 6Pasanaataja marijia shocojonu nuhuaji, cuno querajaa camarucuaari coquetooriquiano na pocoojonura. Naa nojori pocoojonuniquitij, cunoori seetanujuanaa tama nojori sequetoosacarijiaaja nojoriiri na pocoojosacari na niishiriojotusano racatariquiano seetanujuanaa. Naacuatej, pananu muetasamaji muenecara quijia camarnuuri neyatu camitiniutianiya narta camarnu, noo pananu muetasamaji miaquetajaacuara quijia camarnutej. Naa miiriquianoori na jiyanishacari naacua miaquejoyaquishaanutaniya naasucua. Naajaa, majaari na jiyanooshaanu quiniutianiya naa neyatu na niquitionuucuatej. Niquiorano niquitiosano maajiiri saaja mosaanutaniya. Nataja cojiritiasaanutaniya puecoonujaariuhuaj neyanu, neyaca, puetunu na seyajanaanio. 7Naa cuno maaji miishaanu nuhuajitij, niquiriyatu niyanujinijinioori pananu muetasamaji miaquetajara quijia camarnu miaquejoriquiano. Naacuatej, pananu muetasamaji miaquetajaacuara quijia camarnuuri na jamaajiara na tiatesanojiniaaco ritiasaariquiano. Jiyacaritij, miaquejonaa soldadohuari cuno camarnu quijia tiaca tiuquitiariquiano tojetaarucuajanaa. 8Naacuatej, na tiuquitianaa na paraari Egipto jiyajiniara pooriquiano cuno camarnu jiyatesano na pueyasohuarano. Cunoori cumueeca casaajiniji shipinijiosano juhua casaa niquishano. Poosaariquianojaariuhuaj oro, platajiniji jiyanohua panishano casami. Naacuatej, cuno querajaa jiya camarucuaari pasanaataja marijia shocotejonutaniyacuara na miaquecuaari pasanaataja marijia shocotejonutaniyacuara na miaquetoojiyaquishacari. 9Na nuhuaji, pananu muetasamaji miaquetajara quijia camarnuuri pananu muetasamaji muenecara quijia camarnu jiya tiuquitianutaniya juucua. Cuno camarnuuri saaja tama na tiacajiniohuarajaaja tacatenutaniuhua.
10“‘Cuno camarnu, pananu muetasamaji miaquetajara quijiani, necohuari saniniuujia jiyanohua queraatia soldadohua rerejotenutaniya na miaquejonura cuno pananu muetasamaji muenecara quijia camarnu. Jiyacaritij, niquiriyatu cuno necohuajinijinioori tariucua pueca quiyano soldadohuata pananu muetasamaji muenecara quijia camarnu tiuquitiariquiano. Jiyacaritij nojoriiri puetunu cuno jiyajinia quijia casaajanaa sesoriquiano. Naa na miitiuniu nuhuajitij, cuno pojoriiri socua pacuteriquiano cuno jiya tiuquitianu. Naacuatej nojoriiri socua tiuquitiariquiano cuno camarnu jamaajia tia. 11Naa pananu muetasamaji miaquetajaacuara quijia camarnu miishanoori jiyanohua juaatiriquiano nocuara pananu muetasamaji muenecaacuara quijia narta camarnu. Naacuatej, pananu muetasamaji muenecara quijia camarnuuri na soldadohua jaatiariquiano na miaquetoojonura na paraata. Nojuajaari jiyacari cuno na paraa shocotariquiano miaquejonu tojetaarucuajanaa. 12Naa na shocotanuucua na paraatej, jiyanohua na shooniuucua na paraa, cuno camarnuuri tama na cuaqueyajaaja timitiariquiano shocotaja na quiniuucua. Naajaa, naa cumaacaraca na quiniuuri maja puera tarishiriquiano. 13Cuno pananu muetasamaji miaquetajaacuara camarnuuri jiyacari socua jiyanohua queraatia soldadohua rerejotenutaniya. Querajaa marijia shocojonu nuhuaji, quiojonutaniuhuari pananu muetasamaji muenecaacuara quijia camarnuucua. Nojuajaari queraatia na reratesano puecootaja casaa jiyatanutaniya.
14“‘Cuno camarnu tiuquitiaaquishacarijia, queraatia pueyari tamasaca jiyacajinijinio cuno pananu muetasamaji muenecaacuara quijia camarnu miaquejonuucua sanetanutaniya saniniuujia. Noojiaqueya juaajiaca miaquejorujuri Judiiocuacajinijinioori tii quiniutianiyajuhuaj, jaarajaaja nojori miaquejonura juucua. Naa quiniutianiyari nio tohuatenura taa quia niquitishaareecuajanij. Nojoriiri saaja shocojotasaanutaniya miaquejonu. 15Jiyacari cutara, pananu muetasamaji miaquetajaacuara quijia camarnuuri niriquiano na tiuquitianura cuno pananu muetasamaji muenecaacuara quijia camarnu. Naa na tiuquitiasacaritij, nojuajaari juhuajaniya na paraa tiaca sohuacaacua juhuacuriquiano cuno tiacajinia quiniaa na miaquejonura. Naa tiuquitiasano tiacajinijinio soldadohuari maja quenaaja na naata quiniutianiya na paraa tenujunu, maja nojori miaquejosaanura.
S'ha seleccionat:
Daniel 11: arl
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 1986, 2008, Wycliffe Bible Translators, Inc. All rights reserved.