Daniel 10
10
Casaa Pueyaso niquitishacari Daniel juhua na maquenujinia
1Ciro jiyanishano camarnuuri Persia jiyajinijinio quijia. Nojuajaari tari jiuujianraca marijia shocotejoriquiaa camarnu na quishacari Babilonia jiyajinia. Pueyasoori jiyacari cua niquitiquiaari casaa. Janiya Danielniqui, janiyari Beltsasarta jiyaniquishaaquiaarijaniuhuaj. Cuno casaa, Pueyaso cua niquitiquiaarini, cunoori seetanujuanaa quiquiaari. Saniniuujia jiyajeneta quiriquiaa cutaraari maatia na niishishaanura casaa na niquitishano tonu paniriquiaa janiyanij. Janiyari jiyanohua niishiriojojuani. Janiyari socua na niishiquiaarinio casaa cua niquishano tonu paniriquiaa janiyani. Naacuatej janiyari naa cua niquishano naajiotaquiaarini:
2“Naa cua tacaashacaritij, janiyari jiuujianraca semaana shocotejoree pueyaracaanu cua taraajesacarini. 3Naa jiyanohua cua miishacaritij, janiyari cua maniniucuasano sumatuucuaca miaquejonu cartereeni. Janiyari shu miaquenu cartereejaniuhuaj, vino ratunujaajanio. Naajuhuaj, majaari cua nanoojonu quijia cua shanohua jaanutaja cuaara cua shocoquiaarijaatijia cuno jiuujianraca semaana. 4Marijia coteeja racajinia, veinticuatro juucajinia, janiyari cuno juuca puereetuuca Tigris jiyanishano moo casaqueeji quiriquiaani. 5Janiyari canashiyaquiji niquirii pueyanoni. Linojiniji shiyosano toqueya cushiriquiaari. Saaque maniniu cushiriquiaari saaja orojiniji shipinishano. 6Na cuaqueyari juhua topacio jiyanishano saajia nenecuariquiaa. Na jiquiocoori shacantuuca quiriquiaa juhua miacanaja. Na namijiaari juhua cuaariococo noshiquioyano niquishano quiriquiaa. Na numatucua, na niohuacacajuhuaj, shacantuucaari quiriquiaa juhua bronceja. Na pocuasacari, na rupaari juhua pueyamaanu rupaa tojishano quiriquiaa.
7“Saa janiyajaari puetunu niojuanaa niquiriini. Cuarta canuu cuata quitiuriquiaani, nojoriiri maja quenaaja na niquitiuniu quirii puetunu nio cua niquishanojanaa. Jiyanohua na shiriiquitiuniuucua, jamaatiuniuucua netecuaturee saajaari. 8Janiyari tamajaaja quiriquiaani puetunu niojuanaa cua niquishacari. Jiyacaritij, janiyari jiyanohua tiijiquiini. Cua cuaqueyari jiyanohua sasequee. 9Cucua na pocuasacari, janiyari cua jiriquiara pojiyareeni. Janiyari cua pojosaquijia cusojoriquiaani. 10Jiyacaritij, juaashiquiaari cua quiareeni. Cua sanareeri. Cua mojoquetaniriiri. Janiyari jiyocua quiatariquiaani. 11Jiyacari naa cua sequereeri: ‘Pueyaso panishano Danielnaa, quiarijia maninia quia tojiri casaa cua sequenutaniya quiajaniyani. Quia nujuare. Janiyacuajaari quiocua jiyarosaareeni.’
“Naa cua tojishacari na sequesanotej, janiyari cua tetecanuta nujuareeni. 12Naa cua sequereeri: ‘Maja puerenu Danielnaa. Pueyasojuanaacuajaari jiyajeneta casaa quia niquishano quia niishiniu paniniuucua quia tacaaniu niishiya. Naa quia tacaashacaritij, quiaari saaja quia Pueyasoocua saariucuaa. Coteenu juucajiniji quia secojosacari, Pueyasocuajaari puetunu quia secojosanojuanaa tojiriucuaa. Naajuhuaj tama quia saniitiosacari quia cuaqueyajaaja niquiriucuaajaariuhuaj. Janiyari naacua quiocua niyareequij. 13Pa paraca Satanaas seruni, cuno Persia jiya jiitianani, nojuajaari veintiun juuca cua tenujurucuaa maja mijiria quiocua cua tajiniuria. Jiyacaritij, Pueyaso seya camarnu Miguelri cucua nimiacuaa quiocua na tajitiniuria janiya. Nojuacuajaari jiyanohua cumaacaraca. Janiyari jiyacari tamajaaja nio Persia jiya camarucua tajinia jateerucuaani. 14Janiyari quiarijia niya quiocua tiuquiriini maninia cua niishitiniuria quiajaniya taa quiarta Judiiocuaca miijiosaanutaniya nio nuhuajini. Puetunu naa quia niquishanojuanaari quia tonu paniya tamacariria, maja quiarijiara.
S'ha seleccionat:
Daniel 10: arl
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 1986, 2008, Wycliffe Bible Translators, Inc. All rights reserved.