1 Jn 5
5
Chi je' jak'on ayc'ay masanil tzet man watx'ok
1A' ayon chi jaoc yin co c'ul tol a Jesús, a ton Cristo, ayon ton yuninal onxa Dios. K'inalok tinani', ta chi co camc'ulnej junok mamej, chi co camc'ulnej c'apax eb is yuninal. 2Yuj tu' xan jojtak, ta lanan co camc'ulnen Dios, ta lanan jiken tzet chi yala', lanan ton co camc'ulnelen co ba ayon yuninal onxa ti xin. 3Ta yel wali chi co camc'ulnej Dios, ok jikejlaj is chekbanil. Man yaok jiken tzet chi cheklay co beybalnej. 4A tzet man watx'ok bay yulyibank'inal ti', cannakxa yalan juj ayon yuninal onxa Dios ti'. Yujtol chi jaoc co c'ul yin Cham, xan chi can juntzan tu' yalan juj. 5Asan eb chi yaoc yin c'ul tol a Jesús C'ajol ton Dios, asan eb chi je' yak'oncan tzet man watx'ok tu' yalan.
Chi yak' ba Dios testigoal yin Jesucristo is C'ajol
6Ulnak ec' Jesucristo bay yulyibank'inal ti'. Ul yak'nak bautizar ba. Elnak c'apax is chiq'uil. Man asannejok tol ul yak'nak bautizar ba, palta max el c'apax is chiq'uil. Chi yak' ba Cham Espíritu testigoal tol yel ton juntzan ti'. A Cham Espíritu tu', yelc'al chi yal Cham. 7-8Chi yak' ba Cham Espíritu testigoal yin. Ay c'apax cabxa tzet chi yak' ba testigoal yin, a ton is bautismo, c'al is chiq'uil max eli.*fn* A oxeb ti', jun lajanc'al chalen ba yaloni tol a Jesucristo C'ajol ton Dios. 9Toltax chi co cha' jab tzet chi yal anima bay yulyibank'inal ti'. Akxa wal tzet chi yal Dios, yelxac'al ec'ban yelapnok. A wal caw max yak' testigoal yin is C'ajol. 10A ayon chi jaoc co c'ul yin Cham C'ajol Dios tu', lanan yalon Cham Espíritu yin janimail tol yel ton chi yal Dios yuj is C'ajol tu'. Palta a eb c'am chi yaoc c'ul yin is C'ajol xin, axca tol lek'ti Dios yul sat eb, yujtol c'am chi yaoc eb yin c'ul tzet max yal Cham yin is C'ajol. 11Tixton jun yalnakcan Dios ti', tol chi yak' co k'inal tol ayc'al yin tojbalk'inal. A jun k'inalej tu', a yin is C'ajol tu' ay ocok. 12Yuj tu', ta ayoc Cham C'ajol Dios jin, ay co k'inal yin tojbalk'inal. Axa eb c'amoc Cham yin xin, c'am is k'inal eb yin tojbalk'inal.
Jojtak tol ay co k'inal yin tojbalk'inal
13Chin tz'ibejtok juntzan ti' ayex che yaoc e c'ul yin Cham C'ajol Dios, yet watx' che yojtaknej elok tol ay co k'inal tol ayc'al yin tojbalk'inal.
14Yuj tu', c'am chon xiw co txajli bay Dios, yujtol jojtak tol tzanc'al tzet chi co k'an bay, ok yabej, ta a yochwan chi co k'ana'. 15Jojtak, tol chi yab Cham co txaj; yuj tu', jojtak c'apaxok tol chic'al yak' Cham tzet chi co k'an bay. 16K'inalok ta che yil junok juẍtak, ma junok janab chi yun yobtakil, palta man yetok camich jun yobtakil tu', cax chex txajli yuj, okto yak' Dios is k'inal. Palta ay yobtakil tojolxac'al co cam yuj. C'am tzet chi wal ayex tol chex txajli yuj eb chi unen juntzan tu'. 17Masanil tzet man watx'ok, yobtak yul sat Dios, palta ay yobtakil c'am chon cam yuj.
18Jojtak, ta yel wali tol yuninal onxa Dios, c'amxa chi co beybalnej yobtakil, yujtol taynebil on yuj is C'ajol. Yuj tu' c'amxa chi je' on yetnen nak diablo.
19Jojtak tol yet onxa Dios, axa masanil eb yet yulyibank'inal ti', ayto oc eb yul k'ab nak diablo.
20Yetok c'apaxok, jojtakxa tol max ulic' Cham C'ajol Dios. A' max jakon co nabal, yet watx' chi jojtaknej el Cham acaw Dios. Yuj tu' xan ayonxa oc yin Cham acaw yel, a ton Jesucristo is C'ajol. A is C'ajol tu', caw wal Dios toni. A' chi ak'on co k'inal tol ayc'al yin tojbalk'inal. 21Ex in camc'ulnebil, manchak e yaoc e nabal yin tzet chi al-lay oc diosal.
S'ha seleccionat:
1 Jn 5: ATBYK89
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
Kanjobal (Q’anjob’al) © Sociedad Bíblica de Guatemala 1989