Genesis 30
30
1Kho olwa Raheli yalola mbu shiyeebula abaana ba, Raheli yatiililwa omukhaana wabwe imbalikha; naboolela Yakobo ari Mbeelesia abaana; nebutswa ndakhafwe. 2Yakobo nasinyishila Raheli; naboola mbu Nasi endi mushilenje shiaNyasaye, owakhwima olwibulo noho? 3Raheli namuboolela ari Lola, omukholi wanje Biliha ngwowuno; omuteeshie mbu mana yeebulile khumakulu kanje, nasi enyumbashilwe khululwe. 4Namuha Biliha omukholiwe mbu abe omukhasiwe; mana Yakobo namuteeshia. 5Naye Biliha nahela inda, niyeebula omwana omusiani. 6Raheli naboola mbu Nyasaye yayaasiye habwene; yahuliile omwoyo kwanje; yambeele omwana omusiani; khulwako namukulikha eliira mbu Danj 7Biliha omukholi waRaheli nahela inda khandi, niyeebula omwana omusiani wakhabili. 8Raheli naboola mbu Enwanile nende omukhaana weefwe libwi likhongo, nimukoka; kho namukulikha eliira mbu Nafutali.
9Lea olwa yalola mbu wasinjila okhwibula, nabukula Zilipa omukholiwe, namuheelesia Yakobo mbu abe omukhasiwe. 10Naye Zilipa omukholi waLea niyeebula omwana omusiani. 11Lea naboola mbu Ikhabi indayi! Namukulikha eliira mbu Gadi. 12Zilipa omukholi waLea niyeebula omwana omusiani owakhabili. 13Lea naboola mbu Esangaalile! Okhuba abakhasi balananga mbu omusangaafu; namukulikha eliira mbu Asheri.
14Kho mundaalo tsielichesa lieingano Reubeni yatsia nanyoola tsinduli mubulimo, naleerela Lea nyina. Kho Raheli nasaba Lea ari Umbekhwo khunduli tsiomwanawo etsio. 15Naye namukalusia ari Kho oluutsi mbu nelikhuwa lituutu okhunuula omusaatsa wanje? Kho khandi unuule nende tsinduli tsiomwana wanje? Raheli nasunga ari Kho alakona ninawe eshilo shiolwa leelo khulwa tsinduli tsiomwanawo. 16Yakobo narula mumukunda nibwilile; Lea natsia okhumubukaanila, naboola mbu Okhoyile okhwinjila ewanje, okhuba ekhukulile tsinduli tsiomwana wanje; kho nakona ninaye eshilo shieneshio. 17Nyasaye narechela Lea amarwi, naye nahela inda niyeebula omwana omusiani wakharaano. 18Lea naboola mbu Nyasaye yambeelesiye omurungo kwanje, shichila ndamuheelesia omusaatsa wanje omukholi wanje; namukulikha eliira mbu Isakhari. 19Lea nahela inda khandi, niyeebula omwana omusiani wakhasasaba. 20Lea naboola ari Nyasaye yayamanusiye ebimanusio ebilayi; bulaano omusaatsa wanje alamenyanga ninasi, okhuba ndamwibuliile abaana basasaba; namukulikha eliira mbu Zabuloni. 21Nolunyumakhwo niyeebula omwana omukhaana, namukulikha eliira mbu Dina. 22Ne Nyasaye yali niyeetsulilanga Raheli namurechela eshirwi, namwikula olubeleshelo; 23naye nahela inda, niyeebula omwana omusiani; nasunga mbu Nyasaye yandusiyekhwo tsisoni; 24namukulikha eliira mbu Yusufu; ari OMWAMI yameetekhwo omusiani undi.
Aka Yakobo yalakana nende Labani khukomurungokwe
25Ne olwa Raheli yali niyeebuule Yusufu, Yakobo yaboolela Labani ari Useebule, enzie eweefwe, mushibala shieefwe. 26Umbeelesie abakhasi banje nende abaana banje aba ndakhukholela khulwabo, mbu enzie; okhuba Gmanyile obukholi bwanje shinga olwa ndakhukholela. 27Labani namuboolela mbu Shinyoolile obukoosia mumonitsio? Okhuba endolanga shinga OMWAMI olwa yambeelesiye ikhabi khululwo. 28Naboola mbu Mboolela omurungokwo okwa wenya, nasi nekhuheelesie. 29Naye nakalusia mbu Iwe omwene omanyile shinga olwa ndakhukholeele, khandi shinga emirukochio olwa chiakaasile nindi ninachio. 30Shichila echia wali ninachio chiali emitiiti isie nishili okhwitsa, ne chieemeetile nichiba eminji; ne OMWAMI yakhuheelesiye ikhabi hosi hosi ewa ndabeelenje; kho bulaano nasi ndakheekasilie liina amakhuwa keinzu yanje? 31Nareeba mbu Ekhuheelesie shiina? Yakobo nakalusia mbu Kho orambeelesiakhwo eshindu ta; noba niukholela likhuwa lino kho ndalaayanga ebiayobio khandi, nibilinda. 32Kho nembire mubiayobio leelo, ninzahulamwo buli shiayo shiamakondokondo kata eshiamapalapala, khandi buli limali mumakondi, khandi nende etsiamapalapala nende etsiamakondokondo mumbusi; ne omurungo kwanje kwakhabe khubifwana birio. 33Kho mana obwatoto bwanje bulalolekhanga okhurula olwa leelo, buli olwa oleetsanga khumakhuwa komurungo kwanje okuli ewuwo; ne buli ndala eyirali yamapalapala kata yamakondokondo mumbusi, kata elirali limali mumakondi tawe, nishinyoolekha nindi ninashio, shilabasibwa mbu shieebwa. 34Labani naboola mbu Lola, ndakhachama kabe shinga olwa oboolile. 35Ne inyanga eyo Labani niyaahulamwo tsikhole etsianyakasanga netsiamapalapala, nende tsinyafusi tsiosi etsiali etsiamapalapala nende etsiamakondokondo, nende buli ndala eyali nende eshipala eshilafu, nende amamali kosi akokhumakondi natsihaana mumikhono chiabaanabe abasiani; 36niyeeyahula ehalekhwo nende Yakobo shinga oluchendo lwetsindaalo tsitaru; ne Yakobo niyaaya ebiayo biaLabani ebiali nibisikaale.
37Mana Yakobo nabukula tsisaala tsiomulibina, nende etsiomulusi, nende etsiomwaramoni, natsikhobolakhwo emikhosi emilafu, mbu obulafu bwetsisaala buloleshe. 38Nasinjisia tsisaala etsia yali nakhoboole imbeli webiayo mutsikhwakhwa etsiokhubinyweesiliamwo, omwa ebiayo bieetselanga okhunyweela; nabio biahambinjia olwa bieetsa okhunywa. 39Mana ebiayo biaruumanga nibihambia imbeli wetsisaala, ebiayo nibiibula abaana banyakasanga nabamapalapala nabamakondokondo. 40Ne Yakobo yaahukhasia amakondi, nakachoomia khukali akanyakasanga kata akali amamali mubiayo biaLabani; niyaahula amatuli keke konyene, narakatsokasia nende ebiayo biaLabani tawe. 41Mana ebiali ebiamaani mubiayo olwa bieelukhanga, Yakobo yarekanga tsisaala tsana imbeli webiayo mutsikhwakhwa, mbu mana bihambie hakari wetsisaala etsio; 42ne ebiayo olwa biali nibing'aha, kho shiyabirechelanga tsisaala ta; kho etsialemanga amaani nitsiba etsiaLabani, netsiamaani nitsiba etsiaYakobo. 43Omundu oyo niyeemeeta muno, naba nende ebiayo ebinji, nende abakholi beshikhasi nende abeshisaatsa, nende tsingamia nende tsisishili.
S'ha seleccionat:
Genesis 30: OUV
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
Oluluyia Union Version © Bible Society of Kenya 1975