ᐋᐴᓯᑕᓖᑦ ᐱᓂᐊᕐᓂᖏᑦ 5
5
ᐊᓇᓁᐊᓯᓗ ᓴᐰᕋᓗ
1ᐊᖑᑎᑕᖃᓚᐅᕐᐳᕐᓕ ᐊᓇᓁᐊᓯᒥᒃ ᐊᑎᓕᖕᒥᒃ, ᓄᓕᐊᖃᕐᓗᓂᓗ ᓴᐰᕋᒥᒃ; ᑖᑦᓱᒪ ᐱᖁᑎᓂ ᓂᐅᕐᕈᑎᒋᕔᑦ, 2ᓄᓕᐊᖓ ᖃᐅᔨᒪᑎᓪᓗᒍ ᐊᑭᖏᑕ ᐃᓚᖏᑦ ᐱᓯᒪᕔᑦ, ᐃᓔᓐᓇᖏᑦ ᐋᐴᓯᑕᓕᖕᓄᑦ ᑐᓂᓪᓗᒋᑦ. 3ᐲᑦᑐᕉᓯᐅᑉ ᐅᖃᐅᑎᕚ, “ᐊᓇᓁᐊᓰ, ᓲᖅ ᓵᑖᓇᓯ ᐆᒻᒪᑎᖕᓂ ᐱᕕᒃᓴᕐᑖᕐᑎᑉᐱᐅᒃ? ᓴᒡᓗᑎᒻᒪᑎᑦ ᐊᓂᕐᓂᕐᒧᑦ ᐃᑦᔪᕐᓁᑦᑐᒧᑦ ᑮᓇᐅᔧᑦ ᓂᐅᕐᕈᑎᒋᔭᕕᑦ ᐃᓚᖏᑦ ᐱᓯᒪᔪᒪᓪᓗᒌᑦ? 4ᓂᐅᕕᐊᖑᓚᐅᕐᑎᓐᓇᒍ ᓇᖕᒥᓂᕆᓚᐅᕐᐸᑦ, ᓂᐅᕐᕈᑎᒋᔭᕇᕋᕕᐅᒃ ᑮᓇᐅᔧᑦ ᓇᖕᒥᓂᕆᓚᐅᕐᐸᑎᑦ, ᓱᖕᒪᑦ ᑍᒤᓕᐅᕐᐲᑦ? ᐃᓄᖕᓄᑦ ᓴᒡᓗᓐᖏᓚᑎᑦ, ᒎᑎᒧᓪᓕ.” 5ᐊᓇᓁᐊᓯᐅᑉ ᑕᒪᓐᓇ ᑐᓴᕋᒥᐅᒃ ᐅᕐᕈᕗᖅ ᑐᖁᓪᓗᓂ; ᑐᓴᕐᑐᓕᒫᑦ ᑕᒪᑐᒥᖓ ᓯᕘᕋᓂᕐᔪᐊᖃᓕᕐᐳᑦ. 6ᑕᕝᕙ ᐃᓅᓱᒃᑐᑦ ᐊᖑᑎᑦ ᐅᐸᒃᑲᒥᑦᔪᒃ ᑎᒥᖓ ᐃᒻᒧᓯᕐᓗᒍ ᐊᓐᓂᓯᕚᑦ ᐃᓗᕕᕆᐊᑐᕐᓗᒍ.
7ᐃᑲᕐᕋᑦ ᐱᖓᓱᑦ ᑭᖑᓂᖓᓐᓂ, ᓄᓕᐊᖓ ᐃᑎᕐᐳᖅ ᖃᐅᔨᒪᓇᓂ ᓱᔪᖃᕐᓂᕐᒪᖔᑦ. 8ᐲᑦᑐᕉᓯᐅᑉ ᐊᐱᕆᕚ, “ᐅᖃᐅᑎᓚᐅᓐᖓ, ᐅᐃᓪᓗ ᓂᐅᕐᕈᑎᒋᔭᓯᒃ ᑍᒫᒃ ᐊᑭᖃᓚᐅᕐᐹ?”
ᑖᓐᓇ ᐊᖏᕐᐳᖅ, ᐅᖃᕐᓗᓂᓗ, “ᑍᒫᒃ ᐊᑭᖃᓚᐅᕐᐳᖅ.” 9ᐲᑦᑐᕉᓯᐅᑉ ᐅᖃᐅᑎᕚ, “ᓲᖅ ᐅᐃᓪᓗ ᐊᖏᖃᑎᒌᒃᓯᒪᕕᓰᒃ ᐊᑕᓂᐅᑉ ᐊᓂᕐᓂᖓ ᐆᒃᑐᕈᒪᓪᓗᒎ? ᑕᑯᒋᑦ, ᐊᖑᑏᑦ ᐅᐃᖕᓂᒃ ᐃᓗᕕᕐᓯᖅᑲᐅᔪᑦ ᐃᑎᓕᕐᐳᑦ, ᑖᒃᑯᓇᓐᖓᑦ ᐊᒡᔭᕐᑕᐅᓗᑎᑦ ᐊᓐᓂᓯᔭᐅᓂᐊᕆᕗᑎᑦ.” 10ᑕᕝᕔᓐᓇᖅ ᓵᖓᓂ ᐅᕐᕈᓪᓗᓂ ᑐᖁᕗᖅ. ᐃᓅᓱᒃᑐᑦ ᐊᖑᑎᑦ ᐃᑎᕋᒥᒃ, ᑕᑯᒐᒥᒡᓗ ᑐᖁᖕᒪᑦ, ᐊᒡᔭᕐᓗᒍ ᐊᓐᓂᓯᕚᑦ ᐃᓗᕕᕆᐊᕐᑐᕐᓗᒍ ᐅᐃᖓᑕ ᓴᓂᐊᓄᑦ. 11ᐃᓚᒌᒃᑐᑦ ᐅᒃᐱᕐᑐᖃᑎᒌᓕᒫᑦ ᓯᕘᕋᓂᕐᔪᐊᖃᓕᕐᐳᑦ, ᑕᒪᑐᒥᖓᓗ ᑐᓴᕐᑐᓕᒫᑦ ᓯᕘᕋᓕᕆᕗᑦ.
ᑲᒪᓇᕐᑐᓕᓃᑦ ᓇᓗᓁᒃᑯᑍᓪᓗ
12ᑲᒪᓇᕐᑐᓕᓃᑦ ᓇᓗᓁᒃᑯᑍᓪᓗ ᐊᒥᓱᑦ ᐊᑐᕐᑕᐅᓚᐅᕐᐳᑦ ᐃᓄᖕᓂ ᐋᐴᓯᑕᓕᒃᑎᒍᑦ. ᐅᒃᐱᕐᑑᖃᑎᒌᑦ ᑲᑎᒪᖃᑦᑕᓚᐅᕐᐳᑦ ᓲᓗᒨᓂᐅᑉ ᑐᕐᓲᖓᓂᒃ ᑍᔭᐅᔪᒥ. 13ᐅᒃᐱᕐᑑᖃᑎᒌᑦ ᐃᓚᒋᓐᖏᑕᖏᑦ ᓯᕘᕋᓂᕐᒧᑦ ᐃᓚᓕᐅᑎᔪᓐᓇᓚᐅᓐᖏᓚᑦ, ᑖᒃᑯᓂᖓ ᐅᐱᒍᓱᑦᓯᐊᕋᓗᐊᕐᓗᑎᒃ. 14ᐊᑕᓂᕐᒧᑦ ᐅᒃᐱᓕᕐᑐᑦ ᐊᒥᓱᑦ ᑖᒃᑯᓄᖓ ᐃᓚᓕᐅᑎᕙᓪᓕᐊᓚᐅᕐᐳᑦ ᐊᖑᑎᑦ ᐊᕐᓁᓪᓗ. 15ᖃᓂᒪᔪᑦ ᐊᒡᓛᑦ ᐊᖅᑯᑎᓄᐊᕈᑦᔭᐅᓚᐅᕐᐳᑦ; ᓯᓂᒡᕕᖕᒥ ᓇᓪᓚᖓᑎᓪᓗᒋᑦ ᐊᑭᕋᐅᑎᓃᑦᑐᑦ, ᐲᑦᑐᕉᓯ ᓴᓂᖅᑯᓕᕐᐸᑦ ᑕᕐᕋᖓᓄᑦ ᑖᓪᓕᕐᑕᐅᒍᑎᒃ ᐋᖅᑭᑕᐅᔪᓐᓇᖁᓪᓗᒋᑦ. 16ᐃᓄᒋᐊᒃᑐᕐᔪᐊᑦ ᑎᑭᓚᐅᕐᐳᑦ ᔨᕉᓴᓕᐅᑉ ᖃᓂᒋᔭᖓᓂ ᓄᓇᖃᕐᑐᑦ, ᖃᓂᒪᔪᓂᒃ ᑕᕝᕗᓐᖓᐅᑦᔨᓪᓗᑎᒃ ᐊᓂᕐᓂᕐᓗᖕᓄᓪᓗ ᐃᑎᕐᑕᐅᓯᒪᔪᓂᒃ; ᑕᒪᕐᒥᒃ ᐋᖅᑭᒃᑕᐅᓚᐅᕐᐳᑦ.
ᐋᐴᓯᑕᓖᑦ ᐊᑭᕋᕐᑐᕐᑕᐅᓂᖓᑦ
17ᑐᓂᕐᕈᓯᕐᑎᑦᓯᔨᑦ ᐊᖓᔪᖅᑳᖓᑦ ᐃᓚᒋᔭᓐᖏᓪᓗ ᓵᑦᔪᓰᑦ, ᐃᓱᒪᒋᔭᐅᓐᖏᓗᐊᕋᓱᒋᓕᕋᒥᒃ ᓈᒻᒪᒃᓴᕈᒃᓃᕐᐳᑦ. 18ᐋᐴᓯᑕᓕᖕᓂᒃ ᑎᒍᔭᐅᑎᑦᓯᕗᑦ ᑎᒍᔭᐅᓯᒪᕕᖕᒧᐊᕐᐰᑦ. 19ᐅᓐᓄᐊᖑᓕᕐᑎᓪᓗᒍ ᐊᑕᓂᐅᑉ ᐂᖏᓕᖓᑕ ᑎᒍᔭᐅᓯᒪᕕᐅᑉ ᐅᒃᑯᐊᖏᑦ ᒪᑐᐃᕐᐰᑦ, ᐊᓂᑎᓪᓗᒋᑦ ᐅᖃᐅᑎᕔᑦ, 20“ᑐᒃᓯᐊᕐᕕᒡᔪᐊᕐᒧᑦ ᐂᓕᕆᑦᓯ ᑕᕝᕙᓂᓗ ᐃᓄᓕᒫᓄᑦ ᐅᖃᓪᓚᒋᑦᓯ ᐅᖃᐅᓯᕐᓂᒃ ᐃᓅᓯᕐᑖᕐᓇᕐᑐᓂᒃ.” 21ᑕᒪᓐᓇ ᑐᓴᕋᒥᑦᔪᒃ, ᖃᐅᑎᓪᓗᒍ ᑐᒃᓯᐊᕐᕕᒡᔪᐊᕐᒧᐊᕐᐳᑦ ᐊᔪᕆᕐᑐᐃᓕᕐᓗᑎᒃ.
ᑐᓂᕐᕈᓯᕐᑎᑦᓯᔩᓪᓕ ᐊᖓᔪᖅᑳᖓᑦ ᐃᓚᒋᔭᖏᓪᓗ ᑲᑎᖁᔨᓕᕐᐳᑦ ᐃᓴᕆᐊᓕᒥᐅᑦ ᐊᖓᔪᖅᑳᖏᓐᓂᒃ ᑲᑎᒪᔨᕐᔪᐊᑦ ᑲᑎᒪᖁᓪᓗᒋᑦ; ᐱᖁᔨᓪᓗᑎᒃ ᐋᐴᓯᑕᓖᑦ ᑎᒍᔭᐅᓯᒪᕕᖕᒥᑦ ᐂᔭᐅᖁᓪᓗᒋᑦ. 22ᑎᓕᔭᐅᔪᓪᓗ ᑎᒍᔭᐅᓯᒪᕕᖕᒧᐊᕋᒥᒃ ᐋᐴᓯᑕᓕᖕᓂᒃ ᑭᖑᕅᕗᑦ, ᐅᑎᕋᒥᒃ ᑲᑎᒪᔨᕐᔪᐊᓄᑦ ᐅᖃᕆᐊᕐᑐᕐᐳᑦ. 23ᐅᖃᕐᓗᑎᒃ, “ᑎᒍᔭᐅᓯᒪᕕᖕᒧᑦ ᐃᑎᕋᑦᑕ, ᐅᒃᑯᐊᖏᑦ ᐊᑦᓱᖏᕐᓯᒪᖅᑲᐅᕗᑦ, ᖃᐅᔨᓴᕐᑏᓪᓗ ᐅᒃᑯᐊᑦ ᓴᓂᐊᓂ ᓇᖏᕐᓗᑎᒃ, ᒪᑐᐃᕋᑦᑎᒍ ᐃᓗᐊᓂ ᐃᓄᒃᑕᖃᓐᖏᓚᖅ.” 24ᑐᒃᓯᐊᕐᕕᒡᔪᐊᑉ ᖃᐅᔨᓴᕐᑎᖏᑕ ᐊᖓᔪᖅᑳᖓᑦ ᑐᓂᕐᕈᓯᕐᑎᑦᓯᔩᓪᓗ ᐊᖓᔪᖅᑳᖏᑦ ᑕᒪᑐᒥᖓ ᑐᓴᕋᒥᒃ, ᐊᖏᔪᒥᒃ ᖁᐊᕐᓵᖓᓕᕐᐳᑦ ᖃᓄᖅ ᐱᔪᐊᓘᖕᒪᖔᑕ ᐃᓱᒪᓕᕐᓗᑎᒃ. 25ᐃᑎᕐᑐᖃᕐᐳᖅ ᐅᖃᕆᐊᕐᑐᕐᑐᒥᒃ ᑖᒃᑯᓄᖓ, “ᐊᖑᑏᑦ ᑎᒍᔭᐅᓯᒪᕕᖕᒧᐊᕐᑎᓚᐅᕐᑕᓯ ᑐᒃᓯᐊᕐᕕᒡᔪᐊᒦᑉᐳᑦ ᐊᔪᕆᕐᑐᐃᓪᓗᑎᒃ ᐃᓄᖕᓂᒃ.” 26ᖃᐅᔨᓴᕐᑎᐅᑉ ᐊᖓᔪᖅᑳᖓᑦ ᐅᓇᑕᕐᑐᒃᓴᓂᒃ ᐃᓚᖃᕐᓗᓂ ᐊᓂᕗᑦ ᐋᐴᓯᑕᓖᑦ ᐂᓪᓗᒋᑦ, ᓲᖑᓵᕐᕕᒋᓐᖏᓔᓪᓕᑦ, ᐃᓄᐃᑦ ᓯᕘᕋᒋᒐᒥᒋᑦ ᒥᓪᓗᕐᑕᐅᓂᐊᕋᓱᒋᓪᓗᑎᒃ.
27ᐋᐴᓯᑕᓖᑦ ᑕᕝᕗᓐᖓᐅᑎᒐᒥᑦᔪᒃ, ᑲᑎᒪᔨᕐᔪᐊᑦ ᓵᖓᓐᓄᐊᕐᐰᑦ, ᑐᓂᕐᕈᓯᕐᑎᑦᓯᔨᑦ ᐊᖓᔪᖅᑳᖓᑦᑕ ᐊᐱᕐᓱᕐᐰᑦ, 28#ᒫᑎᐅᓯ 27:25.ᐅᖃᕐᓗᓂ, “ᐊᒃᓱᕈᕐᓗᑕ ᐃᓕᑦᓯᓐᓂᒃ ᐃᓂᕐᑎᕆᓚᐅᕐᐳᒍᑦ ᐊᔪᕆᕐᑐᐃᖃᑦᑕᖁᓇᑕ ᑖᑦᓱᒪ ᐊᑎᖓᓂ, ᐃᓕᑦᓯᓕ ᔨᕉᓴᓕᒻᒥᐅᑦ ᑕᒪᕐᒥᐊᓗᒃ ᑐᓴᕐᑎᓕᕐᐸᓯ ᐊᔪᕆᕐᑐᐃᓂᑦᓯᓐᓄᑦ, ᐅᕙᑦᑎᓐᓂᒃ ᑍᑦᓱᒪ ᑐᖁᑕᐅᓂᖓᓄᑦ ᓵᑕᒃᓴᐅᓂᕅᖃᑦᑕᕐᓗᓯ.” 29ᐲᑦᑐᕉᓯ ᐋᐴᓯᑕᓖᓪᓗ ᑭᐅᕗᑦ, “ᒎᑎᒥᒃ ᓈᓚᒋᐊᖃᕐᐳᒍᑦ, ᐃᓄᖕᓂᐅᖏᑦᑐᖅ. 30ᓯᕗᓕᕕᓂᑦᑕ ᒎᑎᖓᑦᑕ ᔩᓱᓯ ᒪᑭᑎᓚᐅᕐᐹ ᑐᖁᒥᑦ, ᐃᓕᑦᓯ ᑐᖁᓚᐅᕐᑕᓯ ᓂᕕᓐᖓᕐᑎᓪᓗᒍ ᓴᓐᓂᖓᔪᓕᖕᒧᑦ. 31ᒎᑎᐅᑉ ᐊᑕᓂᖑᕐᑎᓚᐅᕐᐹ ᑕᓕᕐᐱᖕᒥᓂ ᓯᕗᓕᕐᑎᖑᕐᑎᓪᓗᓂᐅᒃ ᐱᐅᓕᔨᖑᕐᑎᓪᓗᓂᐅᒡᓗ, ᐃᓴᕆᐊᓕᒥᐅᑦ ᖃᕿᐊᓕᕐᕕᒃᓴᖃᖁᓪᓗᒋᑦ ᐱᐅᖏᑦᑐᓕᓂᖏᓐᓂᑦ ᐃᓱᒪᒋᔪᓐᓁᕐᕕᐅᖁᓪᓗᒋᓪᓗ. 32ᐅᕙᒍᓪᓗ ᑕᑯᓚᐅᕐᑐᒍ ᐅᖃᐅᓯᖃᕐᐳᒍᑦ ᑕᒪᒃᑯᓂᖓ, ᐃᓚᖃᕐᓗᑕ ᐊᓂᕐᓂᖕᒥᒃ ᐃᑦᔪᕐᓁᑦᑐᒥᒃ ᒎᑎᐅᑉ ᑐᓂᕐᕈᑎᒋᓯᒪᔭᖓᓂᒃ ᒪᓕᒃᑎᒥᓄᑦ.”
33ᑕᒪᓐᓇ ᑐᓴᕋᒥᑦᔪᒃ ᓂᓐᖓᕕᒡᔪᐊᕐᐳᑦ ᑐᖁᑦᓯᔪᒪᓕᕐᓗᑎᒃ ᑖᒃᑯᓂᖓ. 34ᐹᕆᓯᓪᓕ ᐃᓚᖓᑦ ᒐᒤᓕᐊᓕᒥᒃ ᐊᑎᓕᒃ, ᐱᖁᔭᓂᒃ ᐃᓕᓮᔨ ᐃᓄᖕᓂᓪᓗ ᑕᒤᓐᓂᑦ ᐅᐱᒋᔭᐅᑦᓯᐊᕐᑐᖅ, ᓂᑯᕕᑉᐳᖅ, ᐋᐴᓯᑕᓖᑦ ᐊᓂᑎᑕᐅᑬᓐᓇᖁᕔᑦ ᑲᑎᒪᕕᖕᒥᑦ, 35ᑲᑎᒪᔨᕐᔪᐊᓄᑦ ᐅᖃᕐᐳᖅ, “ᐃᓴᕆᐊᓕᒥᐅᖑᖃᑎᒃᑲ, ᐃᒃᐱᒍᓱᑦᓯᐊᓚᐅᕆᑦᓯ ᖃᓄᐃᓕᐅᕐᒪᖔᑦᓯ ᐊᖑᑎᓄᑦ ᑖᒃᑯᓄᖓ. 36ᐃᖅᑲᐅᒪᓕᕆᑦᓯ ᒫᓐᓇᐅᔪᓐᓃᕐᑐᖅ ᑎᐅᑕᓯ ᐱᓇᓱᐊᓚᐅᕐᐳᖅ ᐊᔪᖏᑦᑐᐊᓘᔮᕐᓗᓂ, ᒪᓕᒃᑎᖃᓕᓚᐅᕐᐳᖅ 400ᓂᒃ ᐊᖑᑎᓂᒃ; ᑖᓐᓇᓕ ᑐᖁᑕᐅᖕᒪᑦ ᒪᓕᒃᑎᓕᒫᖏᑦ ᐊᒡᒍᓚᐅᕐᐳᑦ ᓄᖑᑐᐃᓐᓇᕐᓗᑎᒃ. 37ᑭᖑᓂᖓᒍᓪᓗ, ᔫᑕᓯ ᒐᓕᓕᐊᒥᐅᖅ ᓴᖅᑭᓚᐅᕆᕗᖅ ᐃᓄᓕᒫᑦ ᓈᓴᕐᑕᐅᑎᓪᓗᒋᑦ, ᐃᓄᖕᓂᒃ ᐊᒥᓱᓂᒃ ᒪᓕᒃᑎᖃᓕᓚᐅᕆᕗᖅ; ᑖᓐᓇ ᑐᖁᑕᐅᓚᐅᕆᕗᖅ ᒪᓕᒃᑎᖏᑦ ᓯᐊᒻᒪᕐᑎᑕᐅᓪᓗᑎᒃ. 38ᑍᒫᒃᑕᐅᖅ ᐅᖃᐅᑎᕙᑦᓯ ᒫᓐᓇᐅᔪᒥ, ᐅᑯᐊ ᐊᖑᑎᑦ ᑲᒪᒋᓐᖏᓚᐅᕐᓯᐅᒃ ᑎᒍᓇᓱᐊᕐᓇᒋᓪᓗ; ᑕᒪᓐᓇ ᐱᓇᓱᐊᕐᑕᖓᑦ ᐃᓄᖕᓂᑦ ᐱᑐᐃᓐᓇᕈᓂ, ᓄᖑᑐᐃᓐᓇᕐᓂᐊᕐᐳᖅ. 39ᒎᑎᒥᓪᓕ ᐱᒃᐸᑦ, ᓵᓚᖃᕈᓐᓇᓐᖏᓚᓯ. ᐊᒡᓛᑦ ᖃᐅᔨᔭᐅᒐᔭᕐᐳᓯ ᒎᑎᒥᒃ ᐊᑭᕋᕐᑐᓕᕐᑎᓪᓗᓯ!”
40ᑲᑎᒪᔨᕐᔪᐊᑦ ᒐᒤᓕᐊᓕᐅᑉ ᐅᖃᐅᓯᖏᓐᓂᒃ ᓈᓚᓚᐅᕐᐳᑦ, ᐋᐴᓯᑕᓖᑦ ᐃᑎᖁᒐᒥᑦᔪᒃ, ᑏᒐᕐᑐᕐᑕᐅᑎᑉᐰᑦ ᐃᓂᕐᑎᒻᒪᕆᒡᓗᒋᑦ ᐊᔪᕆᕐᑐᐃᑦᔪᑎᖃᖃᑦᑕᖁᓇᒋᑦ ᔩᓱᓯᒥᒃ, ᑕᕝᕙᓐᖓᑦ ᐊᓂᖁᕔᑦ. 41ᐋᐴᓯᑕᓖᑦ ᑲᑎᒪᔨᕐᔪᐊᓂᑦ ᐊᓂᒐᒥᒃ ᖁᕕᐊᓱᒻᒪᕆᒃᐳᑦ ᖃᐅᔨᒐᒥᒃ ᐋᓐᓂᐊᑎᑕᐅᔪᓐᓇᕐᓂᑎᒃ ᓈᒻᒪᒋᔭᐅᖕᒪᑦ ᒎᑎᒧᑦ, ᔩᓱᓯ ᐱᑦᔪᑎᒋᓪᓗᒍ. 42ᖃᐅᑕᒫᑦ ᐊᔪᕆᕐᑐᐃᖏᓐᓇᖃᑦᑕᕐᐳᑦ ᑐᒃᓯᐊᕐᕕᒡᔪᐊᒥ ᐃᓄᐃᓪᓗ ᐊᖏᕐᕋᖏᓐᓂ ᐅᖃᐅᓯᖃᕐᓗᑎᒃ ᐊᔪᕆᕐᑐᐃᓪᓗᑎᒡ, ᐅᖃᐅᓯᕐᓂᒃ ᑐᓴᕈᒥᓇᕐᑐᓂᒃ ᔩᓱᓯ ᙭ᔅᑑᓯᒥᒃ.
S'ha seleccionat:
ᐋᐴᓯᑕᓖᑦ ᐱᓂᐊᕐᓂᖏᑦ 5: EAIB
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
Eastern Arctic Inuktitut Bible © Canadian Bible Society, 2012, 2021-2023.