ᐋᐴᓯᑕᓖᑦ ᐱᓂᐊᕐᓂᖏᑦ 23
23
1ᐸᐅᓗᓯ ᔫᑎᑦ ᐃᖅᑲᕐᑐᐃᔨᕐᔪᐊᖏᓐᓄᑦ ᑕᑯᓴᓪᓗᐊᕐᓗᓂ ᐅᖃᐅᑎᕔᑦ, “ᔫᑎᐅᖃᑎᒃᑳ, ᐃᓅᓚᐅᕐᐳᖓ ᐃᓅᓯᕆᔭᓐᓂ ᒎᑎᐅᑉ ᓵᖓᓂ ᐃᓱᒫᓗᑎᒃᓴᖃᕐᓇᖓ ᐃᓱᒪᒃᑯᑦ ᐅᓪᓗᒥᒧᑦ ᑎᑭᓪᓗᒍ.” 2ᑍᒤᓕᖕᒪᑦ, ᑐᓂᕐᕈᓯᕐᑎᑦᓯᔩᑦ ᐊᖓᔪᖅᑳᖓᑦᑕ ᐊᓇᓁᐊᓯᐅᑉ, ᐸᐅᓗᓯ ᓴᓂᐊᓃᑦᑐᓄᑦ ᖃᓂᕈᕐᑕᐅᖁᕚ. 3#ᒫᑎᐅᓯ 23:27,28.ᐸᐅᓗᓯᐅᑉ ᐅᖃᐅᑎᕚ, “ᒎᑎᐅᑦᑕᐅᖅ ᐊᓇᐅᓂᐊᕆᕚᑎᑦ, ᓱᓕᓐᖑᐊᕐᑐᐊᓘᔪᑎᑦ! ᑕᕝᕙᓂ ᐃᒃᓯᕙᔪᑎᑦ ᐱᖁᔧᑦ ᒪᓕᒡᓗᒋᑦ ᐅᕙᓐᓂᒃ ᐃᖅᑲᕐᑐᐃᔭᕆᐊᖃᕋᕕᑦ, ᐱᖁᔧᑦ ᒪᓕᖕᓇᒋᑦ ᖃᓂᕈᕐᑕᐅᖁᕙᕐᒪ.”
4ᐸᐅᓗᓯᐅᑉ ᓴᓂᐊᓂ ᓇᖏᕐᑐᑦ ᐅᖃᕐᐳᑦ, “ᓱᔪᐊᓘᕕᑦ, ᑐᓂᕐᕈᓯᕐᑎᑦᓯᔨᓄᑦ ᒎᑎᐅᑉ ᐊᖓᔪᖅᑳᖁᑎᖓ ᐅᖃᕐᓂᕐᓗᒡᕕᒋᕕᐅᒃ?”
5 #
ᒨᓯᓯ ᐂᑉᐸᖏᑦ 22:28. ᐸᐅᓗᓯ ᐅᖃᕐᐳᖅ, “ᐃᓚᒃᑳ, ᖃᐅᔨᒪᕋᑖᖏᓐᓇᒪ ᑐᓂᕐᕈᓯᕐᑎᑦᓯᔨᓄᑦ ᐊᖓᔪᖅᑳᕆᔭᐅᖕᒪᖔᑦ; ᑎᑎᕋᕐᓯᒪᖕᒪᑦ: ᐃᓅᖃᑎᕕᑦ ᐊᐅᓚᑦᓯᔨᒋᔭᖏᓐᓄᑦ ᐅᖃᐅᓯᕐᓗᒃᑐᒃᓴᐅᓐᖏᓚᑎᑦ.”
6 #
ᐋᐴᓯᑕᓖᑦ 26:5; ᐱᓕᐱ 3:5. ᐸᐅᓗᓯ ᖃᐅᔨᒪᒐᒥ, ᐃᓚᖏᑦ ᓵᑦᔪᓰᐅᖕᒪᑕ ᐃᓚᖏᓪᓗ ᐹᕆᓯᐅᖕᒪᑕ, ᐃᖅᑲᕐᑐᐃᔨᕐᔪᐊᓄᑦ ᐅᖃᕐᐳᖅ, “ᐃᓚᒃᑳ, ᐹᕆᓯᐅᕗᖓ, ᐹᕆᓯᒧᑦ ᐃᕐᓂᕆᔭᐅᕗᖓ; ᒫᓐᓇ ᓇᖏᕐᐳᖓ ᐃᖅᑲᕐᑐᕐᑕᐅᓪᓗᖓ, ᓂᕆᐅᒋᔭᖃᕐᓂᕋ ᐱᑦᔪᑎᒋᓪᓗᒍ ᑐᖁᖓᔪᑦ ᒪᑭᑦᓱᒫᕐᓂᖏᓐᓂᒃ.”
7ᑍᒫᒡ ᐅᖃᕐᒪᑦ, ᐹᕆᓯᑦ ᓵᑦᔪᓰᓪᓗ ᐂᕙᖃᑎᒌᓕᕐᐳᑦ; ᑲᑎᒪᔪᑦ ᐊᕕᒃᓗᑎᒃ ᒪᕐᕈᐃᓕᕗᑦ. 8#ᒫᑎᐅᓯ 22:23; ᒫᑯᓯ 12:18; ᓘᑲᓯ 20:27.ᓵᑦᔪᓰᑦ ᐅᖃᕐᒪᑕ ᒪᑭᕝᕕᒃᓴᖃᖏᓐᓂᕅᓪᓗᑎᒃ, ᐂᖏᓖᖃᖏᓐᓂᕅᓪᓗᑎᒡᓗ ᐊᓂᕐᓂᕐᑕᖃᖏᓐᓂᕅᓪᓗᑎᒡᓗ, ᐹᕆᓯᓪᓕ ᐅᖃᕐᒪᑕ ᑖᒃᑯᓂᖓ ᑍᒤᓐᓂᒃ ᐱᑕᖃᕐᓂᕅᓪᓗᑎᒃ. 9ᑖᒃᑯᐊ ᓂᐱᖅᑯᕐᑐᔪᐊᓘᓕᕐᐳᑦ ᐱᖁᔭᓂᒡᓗ ᐃᓕᓮᔩᑦ ᐹᕆᓯᓄᑦ ᐃᓚᒋᔭᐅᔪᑦ ᓇᖏᕐᓯᓪᓗᑎᒃ ᓵᓚᖃᕆᐊᓪᓚᕆᒡᓗᑎᒃ ᐅᖃᕐᐳᑦ, “ᐃᓅᑉ ᑖᑦᓱᒪ ᓈᒻᒪᖏᑦᔪᑎᖓᓂᒃ ᓇᓂᓯᓐᖏᓚᒍᑦ. ᐃᒻᒪᖄᓕ ᐂᖏᓕᒧᑦ ᐊᓂᕐᓂᕐᒧᓪᓘᓐᓃᑦ ᐅᖃᕐᕕᐅᓐᓂᕐᐳᖅ.” 10ᐂᕙᔪᑦ ᑲᑉᐱᐊᓇᕐᓯᖕᒪᑕ ᐅᓇᑕᕐᑐᒃᓮᑦ ᐊᖓᔪᖅᑳᖓᑦ ᐊᑦᑕᕈᓱᓕᕋᒥ ᐸᐅᓗᓯ ᐊᓕᒃᑐᕐᑕᐅᓂᐊᕋᓱᒋᓪᓗᒍ ᑖᒃᑯᓄᖓ, ᐅᓇᑕᕐᑐᒃᓴᖁᑎᓂ ᑎᓕᕔᑦ, ᐸᐅᓗᓯᒥᒃ ᐂᒃᓯᖁᓪᓗᒋᑦ, ᐋᑕᐅᖁᓪᓗᒍ ᐅᓇᑕᕐᑐᒃᓮᑦ ᐃᒡᓗᖓᓐᓄᑦ.
11ᐅᓐᓄᐊᖑᓕᕐᑎᓪᓗᒍᓕ ᐸᐅᓗᓯᐅᑉ ᓴᓂᐊᓂ ᐊᑕᓂᖅ ᓇᖏᕐᓗᓂ ᐅᖃᕐᐳᖅ, “ᓯᕘᕋᓂᐊᕐᓇᒃ, ᔨᕉᓴᓕᒻᒥ ᐅᖃᐅᓯᖃᓚᐅᕋᕕᑦ ᐅᕙᓐᓂᒃ, ᑍᒫᒃᑕᐅᖅ ᕉᒪᒥ ᐅᖃᐅᓯᕆᔭᕆᐊᖃᕆᕙᕐᒪ.”
ᐸᐅᓗᓯᐅᑉ ᐃᔨᕋᕐᑐᕐᑐᓄᑦ ᑐᖁᑕᐅᓇᓱᐊᕐᓂᖓ
12ᖃᐅᑎᓪᓗᒍ ᐅᓪᓛᒃᑯᑦ, ᔫᑎᑦ ᑲᑎᒪᕗᑦ ᐊᖏᖃᑎᒌᒍᑎᓕᐅᕐᐳᓪᓗ ᓱᓕᒻᒪᕆᒡᓗᑎᒃ ᓂᕆᔪᒪᓇᑎᒃ ᐃᒥᕈᒪᓇᑎᒡᓗ ᐸᐅᓗᓯᒥᒃ ᑐᖁᑦᓯᓚᐅᖏᓐᓂᕐᒥᖕᓂ. 13ᑖᒃᑯᐊᓗ ᐊᖏᖃᑎᒌᒃᑐᑦ ᐊᖑᑎᑦ 40 ᐅᖓᑖᓂᑉᐳᑦ. 14ᑐᓂᕐᕈᓯᕐᑎᑦᓯᔩᓪᓗ ᐊᖓᔪᖅᑳᖏᓐᓄᐊᕐᐳᑦ ᔫᑎᓪᓗ ᐊᖓᔪᖅᑳᖏᓐᓄᑦ ᐅᖃᕐᓗᑎᒃ, “ᓴᖑᑎᓐᓂᐊᓐᖏᑕᑦᑎᓐᓂᒃ ᐊᖏᖃᑎᒌᒃᐳᒍᑦ ᓂᕆᔪᒪᓇᑕ ᓱᓇᑐᐃᓐᓇᕐᒥᒃ ᐸᐅᓗᓯᒥᒃ ᑐᖁᑦᓯᓚᐅᖏᓐᓂᑦᑎᓐᓂ. 15ᑍᒤᒻᒪᑦ ᔫᑎᓄᑦ ᐃᖅᑲᕐᑐᐃᔨᐅᔪᓯ ᐱᖁᔨᓚᐅᕆᑦᓯ ᐅᓇᑕᕐᑐᒃᓮᑦ ᐊᖓᔪᖅᑳᖓᓐᓂᒃ, ᐸᐅᓗᓯ ᓵᑦᓯᓐᓂ ᐊᐱᕐᓱᕈᒪᓂᕋᕐᓗᒍ ᑐᓴᕐᕕᒋᑦᓯᐊᒃᑲᓐᓂᕈᒪᓐᖑᐊᕐᓗᒍᓗ. ᐅᕙᒍᓪᓕ ᐅᐸᓗᖕᒊᕐᓯᒪᓂᐊᕐᐳᒍᑦ ᑐᖁᑦᓱᒪᓪᓗᒍ ᑕᕝᕗᖓ ᑎᑭᓚᐅᖏᓐᓂᖓᓂ.”
16ᐸᐅᓗᓯᐅᓪᓕ ᐅᔪᕈᖓ ᑐᖁᑦᓯᔪᒪᔪᓂᒃ ᑐᓴᕋᒥ: ᐅᓇᑕᕐᑐᒃᓮᑦ ᐃᒡᓗᖓᓐᓄᐊᕐᐳᖅ ᐸᐅᓗᓯᓗ ᐅᖃᐅᑎᓪᓗᓂᐅᒃ. 17ᐸᐅᓗᓯ ᐅᓇᑕᕐᑐᒃᓮᑦ ᐊᖓᔪᖅᑳᖏᑕ ᐃᓚᖓᓐᓂᒃ ᐅᖃᐅᑦᔨᕗᖅ, “ᐅᓇ ᐃᓅᓱᒃᑐᖅ ᐅᓇᑕᕐᑐᒃᓮᑦ ᐊᖓᔪᖅᑳᖓᓐᓄᐊᕈᑎᓯᐅᒃ, ᐅᖃᐅᓯᒃᓴᖃᕐᒪᑦ ᑖᑦᓱᒧᖓ.” 18ᑕᕝᕙ ᑖᑦᓱᒪ ᐅᓇᑕᕐᑐᒃᓮᑦ ᐊᖓᔪᖅᑳᖓᓐᓄᑦ ᐋᑉᐹ ᐅᖃᕐᓗᓂ, “ᑎᒍᔭᐅᓯᒪᔫᑉ ᐸᐅᓗᓯᐅᑉ ᐅᓇ ᐃᓅᓱᒃᑐᖅ ᐃᓕᖕᓄᐊᕐᑎᑕᐅᖁᖕᒪᒍ, ᐅᖃᐅᓯᒃᓴᖃᕐᒪᒡᒎᖅ ᐃᓕᖕᓄᑦ.”
19ᑕᕝᕙ ᐅᓇᑕᕐᑐᒃᓮᑦ ᐊᖓᔪᖅᑳᖓᑦᑕ ᐃᓅᓱᒃᑐᖅ ᐊᒡᒐᖏᑎᒍᑦ ᑎᒍᓪᓗᒍ ᐃᓄᑑᖃᑎᒋᓕᕐᓗᒍ ᐊᐱᕆᕚ, “ᖃᓄᖅ ᐅᕙᓐᓄᑦ ᐅᖃᐅᓯᒃᓴᖃᕋᕖᑦ?”
20ᐃᓅᓱᒃᑐᖅ ᐅᖃᕐᐳᖅ, “ᔫᑎᑦ ᐊᐅᓚᑦᓯᔨᖏᑦ ᐊᖏᖃᑎᒌᒃᓯᒪᕗᑦ ᖃᐅᒃᐸᑦ ᐃᓕᖕᓄᑦ ᐅᖃᕈᒪᓪᓗᑎᒃ ᐸᐅᓗᓯ ᔫᑎᑦ ᐃᖅᑲᕐᑐᐃᔨᖏᓐᓄᑦ ᐋᑕᐅᖁᓪᓗᒍ, ᑖᒃᑯᐊ ᓱᓕᓇᑎᒃ ᑐᓴᒃᑲᓐᓂᕈᒪᓐᖑᐊᕐᓂᐊᕐᐳᑦ ᐸᐅᓗᓯᒥᒃ. 21ᐊᖏᕐᑍᓕᒃᑭᑦ; 40ᓂᑦ ᐅᓄᕐᓂᕐᓴᓂᒃ ᐅᑕᖅᑭᔪᖃᕐᒪᑦ ᑍᑯᓐᖓᐅᑦᔭᐅᓕᕐᑎᓪᓗᒍ ᑐᖁᑦᓯᔪᒪᓪᓗᑎᒃ ᐅᐸᓗᖕᒊᕐᓯᒪᔪᓂᒃ, ᑖᒃᑯᐊ ᓴᖑᑎᓐᓂᐊᓐᖏᑕᒥᖕᓂᒃ ᐊᖏᖃᑎᒌᒃᓯᒪᕗᑦ ᓂᕆᔪᒪᓇᑎᒃ ᐃᒥᕈᒪᓇᑎᒡᓗ ᐸᐅᓗᓯᒥᒃ ᑐᖁᑦᓯᓚᐅᖏᓐᓂᕐᒥᖕᓂ; ᒫᓐᓇᓕ ᐅᑕᖅᑭᓕᕐᐳᑦ, ᐊᖏᕐᓂᐊᕐᒪᖔᕐᐱᑦ.”
22ᑕᕝᕙ ᐅᓇᑕᕐᑐᒃᓮᑦ ᐊᖓᔪᖅᑳᖓᑦᑕ ᐊᓂᑎᓕᕋᒥᐅᒃ, ᐅᖃᕐᐳᖅ, ᐃᓅᓱᒃᑐᒧᑦ, “ᓇᒧᑐᐃᓐᓇᖅ ᐅᖃᕐᑍᓕᒋᑦ ᑕᒪᑐᒥᖓ ᐅᕙᓐᓄᑦ ᐅᖃᕐᓂᕋᕐᓗᑎᑦ.”
ᐸᐅᓗᓯᐅᑉ ᐊᐅᓪᓚᕈᑦᔭᐅᓂᖓ ᕉᒪᒧᑦ
23ᐅᓇᑕᕐᑐᒃᓮᑦ ᐊᖓᔪᖅᑳᖓᑦ ᐅᓇᑕᕐᑐᒃᓴᓄᑦ ᐊᖓᔪᖅᑳᖑᔪᖕᓂᒃ ᒪᕐᕉᖕᓂᒃ ᕾᖁᔨᕗᖅ ᐅᖃᐅᑎᓪᓗᒋᑦ, “ᐅᓇᑕᕐᑐᒃᓴᓂᒃ 200ᓂᒃ ᐸᕐᓇᒃᑎᑦᓯᓕᕆᑦᓯᒃ 70ᓂᒡᓗ ᕿᒧᒃᓯᐅᑎᓂ ᐃᑭᒪᓂᐊᕐᑐᓂᒃ, 200ᓂᒡᓗ ᐅᓇᑕᕐᑐᒃᓴᓂᒃ ᐱᓱᖕᓂᐊᕐᑐᓂᒃ, ᒫᓐᓇ ᐅᓐᓄᒃ 9ᒨᕐᐸᑦ ᓯᓴᕆᐊᒧᑦ ᐊᐅᓪᓚᕐᓂᐊᕐᑐᓂᒃ. 24ᕿᒧᒃᓯᐅᑎᓂᒃᑕᐅᖅ ᐸᐅᓗᓯᐅᑉ ᐊᑐᕐᓂᐊᕐᑕᖏᓐᓂᒃ ᖃᓄᐃᖏᓪᓗᓂ ᕉᒪᒥᐅᑦ ᐊᐅᓚᑦᓯᔨᐅᑎᑕᖓᓄᑦ ᕖᓕᒃᓯᒧᑦ ᓯᕗᒧᖁᓪᓗᒍ.” 25ᐅᓇᑕᕐᑐᒃᓮᑦ ᐊᖓᔪᖅᑳᖓᑦ ᑎᑎᕋᕐᐳᖅ ᐃᒫᒃ:
26“ᑲᓚᐅᑎᐊᓯ ᓔᓯᐊᓯᒥᑦ, ᐊᐅᓚᑦᓯᔨᐅᑎᑕᐅᔪᒧᑦ ᕖᓕᒃᓯᒧᑦ; ᑎᑎᕋᕐᕕᒋᕙᒋᑦ. 27ᐅᓇ ᐊᖑᑦ ᔫᑎᓂᑦ ᑎᒍᔭᐅᔪᖅ, ᑐᖁᑕᐅᑲᓴᓕᕐᒪᑦ, ᐅᕙᖓ ᐅᓇᑕᕐᑐᒃᓴᖁᑎᒃᑲᓗ ᓴᐳᑎᓚᐅᕐᐸᕗᑦ, ᖃᐅᔨᓪᓗᑕ ᕉᒪᒥᐅᑕᐅᓂᖓᓂᒃ. 28ᖃᐅᔨᔪᒪᓪᓗᖓ ᓱᖕᒪᑦ ᐸᓯᔭᐅᖕᒪᖔᑦ, ᔫᑎᑦ ᐃᖅᑲᕐᑐᐃᔨᖏᓐᓄᑦ ᐱᑎᓚᐅᕐᐸᕋ. 29ᖃᐅᔨᓚᐅᕐᐳᖓ ᔫᑎᑦ ᐱᖁᔭᖏᑦ ᐱᑦᔪᑎᒋᓪᓗᒋᑦ, ᐸᓯᔭᐅᑦᔪᑎᖃᓚᐅᕐᒪᑦ, ᐸᓯᔭᐅᑦᔪᑎᖓᓕ ᖃᐅᔨᓚᐅᕐᐸᕋ ᑐᖁᑕᐅᓂᕐᒧᑦ ᐱᑦᔪᑎᒃᓴᐅᖏᒻᒪᑦ ᑎᒍᔭᐅᓯᒪᓂᕐᒧᓪᓘᓐᓃᑦ. 30ᐅᖃᐅᑦᔭᐅᒐᒪᓕ ᑍᒃᑯᓇᖓᑦ ᑐᖁᑕᐅᓇᓱᐊᕈᒪᓂᖓᓂᒃ, ᑐᐊᕕᕐᓗᖓ ᐃᓕᖕᓄᐊᕐᑎᑉᐸᕋ, ᐸᓯᒃᓯᕋᓱᐊᕐᑐᑦ ᑖᑦᓱᒥᖓ ᐃᓕᖕᓄᑦ ᓇᖕᒥᓂᖅ ᓇᓗᓁᕐᓯᖁᓪᓗᒋᑦ.”
31ᑕᕝᕙ ᐅᓇᑕᕐᑐᒃᓮᑦ ᐱᖁᔭᐅᓂᑎᒃ ᒪᓕᒡᓗᒍ, ᐸᐅᓗᓯ ᐅᓐᓄᐊᒃᑯᑦ ᐊᐅᓪᓚᕈᑎᕚᑦ, ᐋᓐᑎᐹᑐᕇᓯᒧᐊᕈᑎᓪᓗᒍ. 32ᖃᐅᑎᓪᓗᒍ ᐅᓇᑕᕐᑐᒃᓴᓄᑦ ᕿᒧᒃᓯᐅᑎᓃᑦᑐᓄᑦ, ᐋᑕᐅᖁᕚ, ᐅᓇᑕᕐᑐᒃᓮᑦ ᐱᓱᒃᑐᑦ ᐅᑎᕐᐳᑦ ᐅᓇᑕᕐᑐᒃᓮᑦ ᐃᒡᓗᖓᓐᓄᑦ. 33ᑖᒃᑯᐊ ᓯᓴᕆᐊᒧᐊᕈᑎᕚᑦ, ᕉᒪᒥᐅᑦ ᐊᐅᓚᑦᓯᔨᐅᑎᑕᖓᓐᓄᑦ ᑎᑎᖅᑬᑦ ᑐᓂᓪᓗᒋᑦ, ᐸᐅᓗᓯᓗᑦᑕᐅᖅ ᑖᑦᓱᒧᓐᖓᐅᑎᕚᑦ. 34ᕉᒪᒥᐅᑦ ᐊᐅᓚᑦᓯᔨᐅᑎᑕᖓᑕ ᑎᑎᖅᑬᑦ ᐅᖃᓕᒫᕇᕋᒥᒋᑦ, ᐸᐅᓗᓯ ᓇᓂ ᓄᓇᖃᕐᒪᖔᑦ ᐊᐱᕆᕗᖅ. ᑐᑭᓯᒐᒥ ᐸᐅᓗᓯ ᓯᓕᓯᐊᒥᑦ ᐱᓯᒪᖕᒪᑦ, 35ᐅᖃᕐᐳᖅ, “ᐸᓯᒃᓯᕐᑎᒋᔭᑎᑦ ᑎᑭᑉᐸᑕ ᑐᓴᕐᕕᒋᓇᓱᐊᕐᓂᐊᕐᐸᒋᑦ.” ᐸᐅᓗᓯ ᐅᓇᑕᕐᑐᒃᓴᓄᑦ ᑲᒪᒋᔭᐅᑦᓯᐊᖁᕚ ᐃᕉᑕᓯᐅᑉ ᐃᒡᓗᕐᔪᐊᖓᓂ.
S'ha seleccionat:
ᐋᐴᓯᑕᓖᑦ ᐱᓂᐊᕐᓂᖏᑦ 23: EAIB
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
Eastern Arctic Inuktitut Bible © Canadian Bible Society, 2012, 2021-2023.