ᐋᐴᓯᑕᓖᑦ ᐱᓂᐊᕐᓂᖏᑦ 15
15
ᐅᒃᐱᕐᑑᖃᑎᒌᑦ ᔨᕉᓴᓕᒻᒥ ᑲᑎᒪᓂᖓᑦ
1 #
ᒨᓯᓯ ᐱᖓᔪᖏᑦ 12:3. ᐊᖑᑏᑦ ᐃᓚᖏᑦ ᑎᑭᓚᐅᕐᐳᑦ ᔫᑎᐊᒥᑦ ᐊᔪᕆᕐᑐᐃᓕᕐᓗᑎᒃ ᐅᒃᐱᕐᑑᖃᑎᒌᓂᒃ ᐃᒫᒃ, “ᑭᐱᔭᐅᖏᒃᑯᑦᓯ ᒨᓯᓯᐅᑉ ᐱᖁᔭᖏᑦ ᒪᓕᒡᓗᒋᑦ ᐱᐅᓕᔭᐅᔪᓐᓇᓐᖏᓚᓯ.” 2ᐸᐅᓗᓯᐅᑉ ᐸᓇᐹᓯᐅᓪᓗ ᐊᖏᔪᒥᒃ ᑖᒃᑯᐊ ᐂᕙᖃᑎᒋᓕᕐᐰᑦ, ᐃᓱᒪᑖᓕᕐᐳᑦ ᐸᐅᓗᓯᓗ ᐸᕐᓇᐹᓯᓗ ᐊᓯᖏᓪᓗ ᔨᕉᓴᓕᒻᒧᐊᖁᓪᓗᒋᑦ; ᐋᐴᓯᑕᓕᖕᓄᑦ ᓯᕗᓕᕐᑎᐅᔪᓄᓪᓗ ᑕᒪᑐᒥᖓ ᐅᖃᖃᑎᒌᒍᑎᖃᖁᓪᓗᒋᑦ.
3ᑖᒃᑯᐊᒃ ᐅᒃᐱᕐᑑᖃᑎᒌᓂᑦ ᑎᓕᔭᐅᒐᒥᒃ ᐱᓃᓯᐊ ᓴᒥᐊᕆᐊᓗ ᐊᖅᑯᓵᕐᐹᒃ, ᐅᓂᒃᑳᕐᓗᑎᒃ ᔫᑎᐅᖏᑦᑐᑦ ᓵᒋᐊᕐᑎᑕᐅᓂᖏᓐᓂᒃ ᒎᑎᒧᑦ ᐊᖏᔪᒥᒃ ᖁᕕᐊᓲᑕᐅᕘᒃ ᐅᒃᐱᕐᑑᖃᑎᒌᓕᒫᓂᑦ. 4ᔨᕉᓴᓕᒻᒧᑦ ᑎᑭᒻᒪᑎᒃ, ᐅᒃᐱᕐᑑᖃᑎᒌᓂᑦ ᑐᓐᖓᓱᒃᑎᑕᐅᕘᒃ ᐋᐴᓯᑕᓕᖕᓂᑦ ᐅᒃᐱᕐᑑᖃᑎᒌᓪᓗ ᓯᕗᓕᕐᑎᖏᓐᓂᑦ, ᑖᒃᑯᐊᒃ ᐅᓂᒃᑳᕐᐴᒃ ᒎᑎᐅᑉ ᐱᓇᓱᐊᕐᓂᖏᓐᓂᒃ ᑖᒃᑯᓄᖓ. 5ᐅᒃᐱᕐᑐᓪᓕ ᐃᓚᖏᑦ ᐹᕆᓯᓄᑦ ᐃᓚᒋᔭᐅᔪᑦ ᐅᖃᓕᕐᐳᑦ, “ᑍᒃᑯᐊ ᑭᐱᔭᐅᔭᕆᐊᖃᕐᐳᑦ ᒨᓯᓯᐅᓪᓗ ᐱᖁᔭᖏᓐᓂᒃ ᒪᓕᖁᔭᐅᓗᑎᒃ.”
6ᐋᐴᓯᑕᓖᓪᓕ ᐅᒃᐱᕐᑑᖃᑎᒌᓪᓗ ᓯᕗᓕᕐᑎᖏᑦ ᑕᒪᑐᒥᖓ ᐃᓱᒪᒃᓴᕐᓯᐅᕈᑎᖃᓕᕐᐳᑦ ᐃᒻᒥᒍᐃᓐᓇᖅ ᑲᑎᒪᓪᓗᑎᒃ. 7#ᐋᐴᓯᑕᓖᑦ 10:1-43.ᐲᑦᑐᕉᓯ ᐅᖃᖃᑎᒌᕕᒡᔪᐊᒻᒪᕆᓚᐅᕐᑎᓪᓗᒋᑦ ᓂᑯᕕᓪᓗᓂ ᐅᖃᕐᐳᖅ, “ᐃᓅᖃᑎᒃᑲ, ᐅᓪᓗᓂ ᐱᒋᐊᓕᕋᑖᕐᑎᓪᓗᑕ, ᒎᑎ ᐅᕙᓐᓂᒃ ᓂᕈᐊᓚᐅᕐᒪᑦ ᐊᔪᕆᕐᑐᐃᖁᓪᓗᖓ ᐅᖃᐅᓯᕐᓂᒃ ᑐᓴᕈᒥᓇᕐᑐᓂᒃ ᔫᑎᐅᖏᑦᑐᓄᑦ, ᑐᓴᖁᓪᓗᒋᑦ ᐅᒃᐱᓕᖁᓪᓗᒋᓪᓗ. 8#ᐋᐴᓯᑕᓖᑦ 10:44; 2:4.ᒎᑎ ᐃᓱᒪᓕᒫᓂᒃ ᖃᐅᔨᒪᔪᖅ, ᓈᒻᒪᒃᓴᕐᓂᕐᒥᓂᒃ ᔫᑎᐅᖏᑦᑐᓂᒃ ᓇᓗᓁᕐᓯᓚᐅᕐᐳᖅ, ᐊᓂᕐᓂᕐᒥᒃ ᐃᑦᔪᕐᓁᑦᑐᒥᒃ ᑐᓂᓯᕕᒋᒐᒥᒋᑦ ᐅᕙᑦᑎᓐᓄᑦ ᑐᓂᓯᓚᐅᕐᓂᕐᒥᑐᑦ. 9ᐊᑦᔨᒌᖏᑦᑑᑎᓚᐅᓐᖏᓛᑎᒍᑦ ᐅᕙᒍᓪᓗ ᔫᑎᐅᖏᑦᑐᓪᓗ, ᐊᔪᕐᓂᖏᓐᓂᒃ ᐃᓱᒪᒋᔪᓐᓁᕐᕕᒋᓚᐅᕐᐰᑦ ᐅᒃᐱᓕᕐᒪᑕ. 10ᒫᓐᓇᓕ ᓱᖕᒪᑦ ᒎᑎ ᐆᒃᑐᕋᓱᐊᕐᐱᓯᐅᒃ, ᐅᖁᒤᓐᓇᕐᑐᓂᒃ ᐃᓕᓯᔪᒪᓪᓗᓯ ᐃᓕᓐᓂᐊᕐᑎᓄᑦ ᓯᕗᓕᕕᓂᑦᑕᓘᓐᓃᑦ, ᐅᕙᒍᓪᓘᓐᓃᑦ ᐊᒡᔭᕈᓐᓇᓚᐅᖏᑕᑦᑎᓐᓃᒃ? 11ᐅᒃᐱᕈᓱᒃᐳᒍᓪᓕ ᐱᐅᓕᔭᐅᓂᐊᕋᑦᑕ ᐊᑕᓂᐅᑉ ᔩᓱᓯᐅᑉ ᐱᑦᓯᐊᕐᓂᖓᑕ ᐱᔪᓐᓇᕐᑎᑦᓯᓂᖓᒍᑦ, ᑍᒃᑯᐊᑦᑕᐅᖅ ᑍᒤᓐᓂᐊᕆᕗᑦ.”
12ᑲᑎᒪᔪᓪᓗ ᓂᐱᖃᕈᓐᓃᕐᐳᑦ; ᓈᓚᒡᓗᑎᒃ ᐸᕐᓇᐹᓯᒃᑯᒃ ᐸᐅᓗᓯᒃᑯᒃ ᐅᓂᒃᑳᕐᑎᓪᓗᒋᒃ ᓇᓗᓁᒃᑯᑕᕐᓂᒃ ᑲᒪᓇᕐᑐᓂᒃᓗ ᒎᑎᐅᑉ ᔫᑎᐅᖏᑦᑐᓄᑦ ᐱᓇᓱᐊᖃᑦᑕᓚᐅᕐᑕᖏᓐᓂᒃ ᑖᒃᑯᒃᑎᒎᓇᖅ. 13ᐅᓂᒃᑳᕆᕐᒪᑎᒡᓕ, ᔧᒥᓯ ᐅᖃᓕᕐᐳᖅ, “ᐃᓅᖃᑎᒃᑲ, ᓈᓚᓚᐅᕐᓯᓐᖓ. 14ᓮᒨᓂ ᐅᓂᒃᑳᕋᑖᕐᒪᑦ ᒎᑎᐅᑉ ᐱᓇᓱᐊᓚᐅᕐᓂᖓᓂᒃ ᓯᕗᓪᓕᕐᐹᒥᒃ ᔫᑎᐅᖏᑦᑐᓂ, ᑖᒃᑯᓇᖓᑦ ᑎᒍᓯᒐᒥ ᓇᖕᒥᓂᕆᓂᐊᕐᑕᒥᓂᒃ. 15ᑕᒪᒃᑯᐊ ᐱᓪᓗᒋᑦ ᓇᓚᐅᑦᑍᔪᑦ ᑕᒪᑐᒥᖓ ᐊᖏᖃᕐᑎᖃᕐᐳᑦ ᑎᑎᕋᕐᓯᒪᖕᒪᑕ;
16 #
ᐂᒨᓯ 9:11,12. ‘ᒪᑐᒪ ᑭᖑᕐᖓᒍᑦ ᐅᑎᓛᕐᐳᖓ, ᐊᑕᓂᖅ ᐅᖃᕐᐳᖅ,
ᑍᕕᑎᐅᓪᓗ ᐊᑕᓂᐅᕕᖓ ᐋᖅᑭᒃᓱᒃᑲᓐᓂᕈᒪᕙᕋ,
ᐃᒡᓗᖏᑦ ᓱᕋᒃᓯᒪᔪᑦ ᓴᓇᔪᒪᕙᒃᑲ ᒪᑭᑎᓪᓗᒋᑦ.
17ᐃᓄᓕᒫᑦ ᐊᑕᓂᕐᒥᒃ ᕿᓂᓕᖁᓪᓗᒋᑦ,
ᔫᑎᐅᖏᑦᑐᑦ ᓇᖕᒥᓂᕆᔪᒪᓪᓗᒋᑦ ᕾᖁᓯᒪᔭᓕᒫᒃᑲ,
18ᑍᒫᒃ ᐊᑕᓂᖅ ᐅᖃᕐᐳᖅ, ᑕᒪᑐᒥᖓ ᓇᓗᓁᕐᓯᓚᐅᕐᑐᖅ ᑍᑦᓱᒪᓂᐊᓗᒃ.’
19“ᑍᒤᒻᒪᑦ ᐃᓱᒪᒋᕙᕋ ᔫᑎᐅᖏᑦᑐᑦ ᒎᑎᒧᑦ ᓵᒋᐊᕐᑐᑦ ᐅᖁᒤᑎᑕᒃᓴᕆᖏᓐᓇᑦᑎᒍ. 20#ᒨᓯᓯ ᐂᑉᐸᖏᑦ 34:15-17; ᒨᓯᓯ ᐱᖓᔪᖏᑦ 18:6-23; ᒨᓯᓯ ᐱᖓᔪᖏᑦ 17:10-16.ᑎᑎᕋᕐᕕᒋᔭᒃᓴᕆᕙᕗᓪᓕ ᐅᖃᐅᑎᓗᒋᑦ ᓂᕆᖃᑕᐅᖁᖏᓪᓗᒋᑦ ᐆᒪᔪᕕᓂᕐᓂᒃ ᒎᑎᓐᖑᐊᓄᑦ ᑐᓂᕐᕈᑕᐅᓯᒪᔪᓂᒃ, ᓄᓕᐊᕐᓂᕐᒥᒡᓗ ᐊᑐᕐᓂᕐᓗᒃᑍᓕᖏᑦᑐᓄᑦ ᐃᓚᐅᖃᑕᖁᖏᓪᓗᒋᑦ, ᓂᕆᖃᑦᑕᖁᖏᓪᓗᒋᓪᓗ ᐆᒪᔪᓂᒃ ᕿᒥᑕᐅᓗᑎᒃ ᑐᖁᑕᐅᓯᒪᔪᓂᒃ, ᐊᐅᒃᑐᖃᑦᑕᖁᖏᓪᓗᒋᓪᓗ. 21ᑍᑲᓐᖓᑦ ᐱᒋᐊᓕᕋᑖᕐᓂᖓᓂᑦ ᓄᓇᓕᓕᒫᓂ ᒨᓯᓯᐅᑉ ᐱᖁᔭᖏᑦ ᐊᔪᕆᕐᑐᐃᑦᔪᑕᐅᒪᑕ ᓴᐸᑎᑕᒫᑦ ᔫᑎᑦ ᐅᒃᐱᕐᓂᕐᒧᑦ ᑲᑎᒪᕕᖏᓐᓂ.”
ᔫᑎᐅᖏᑦᑐᓄᑦ ᐅᒃᐱᕐᑐᓄᑦ ᑎᑎᕋᕐᑕᐅᔪᑦ
22ᐋᐴᓯᑕᓖᓪᓗ ᐅᒃᐱᕐᑐᓪᓗ ᓯᕗᓕᕐᑎᖏᑦ, ᐅᒃᐱᕐᑑᖃᑎᒌᓪᓗ ᐃᓚᒋᓪᓗᒋᑦ ᐊᑲᐅᒃᓴᕋᒥᒃ ᓂᕈᐊᕈᒪᓪᓗᑎᒃ ᐊᖑᑎᓂᒃ ᐃᓚᒥᖕᓂᑦ ᐊᓐᑎᐅᑭᐊᒧᑦ ᑎᓕᓂᐊᕐᑕᒥᖕᓂᒃ, ᐸᐅᓗᓯᐅᑉ ᐸᕐᓇᐹᓯᐅᓪᓗ ᐃᓚᒋᓂᐊᕐᑕᖏᓐᓂᒃ. ᔫᑕᓯ ᓂᕈᐊᕐᐹᑦ ᐹᕐᓴᐸᓯᒥᒃ ᐊᑎᓕᒃ, ᓮᓚᓯᓗ, ᑖᒃᑯᐊᒃ ᐅᒃᐱᕐᑐᓄᑦ ᐅᐱᒋᔭᐅᑦᓯᐊᕐᒪᑎᒃ. 23ᑖᒃᑯᑎᒎᓇᖅ ᑎᑎᖅᑲᓂᒃ ᓇᒃᓴᕐᑎᑦᓯᕗᑦ ᐃᒤᓕᔪᓂᒃ:
“ᐅᒃᐱᕐᑑᖃᑎᑦᑎᓐᓄᑦ, ᐋᐴᓯᑕᓖᑦ ᐅᒃᐱᕐᑑᖃᑎᒌᓪᓗ ᓯᕗᓕᕐᑎᖏᑦ, ᑎᑎᕋᕐᐳᑦ ᐅᒃᐱᕐᑐᓄᑦ ᔫᑎᐅᖏᑦᑐᓄᑦ ᐊᓐᑎᐅᑭᐊᒦᑦᑐᓄᑦ ᓯᕆᐊᒦᑦᑐᓄᓪᓗ ᓯᓕᓯᐊᒦᑦᑐᓄᓪᓗ. 24ᑐᓴᐅᒪᓕᕋᑦᑕ ᐃᓚᑦᑎᓐᓂᑦ ᐃᓱᒪᔮᕐᑎᑕᐅᓯᒪᒐᑦᓯ ᐅᖃᐅᓯᕐᒥᖕᓄᑦ, ᐃᓱᒪᓯ ᓇᓗᓕᑦᑎᓪᓗᒋᑦ, ᑖᒃᑯᐊᓕ ᑍᒤᓕᐅᖁᓗᒋᑦ ᐅᖃᐅᑎᓚᐅᖏᒃᑲᓗᐊᕐᐸᕗᑦ. 25ᐊᑲᐅᓈᕋᓱᒋᒐᑦᑎᒍ ᐊᖏᖃᑎᒌᒃᓗᑕᓗ, ᐊᖑᑎᓂᒃ ᓂᕈᐊᕐᓗᑕ ᐃᓕᑦᓯᓐᓄᓪᓗ ᑎᓕᔪᒪᓪᓗᒋᑦ ᓇᒡᓕᒋᔭᕗᑦ ᐸᕐᓇᐹᓯᒃᑯᒃ ᐸᐅᓗᓯᒃᑯᒃ ᐃᓚᒋᓗᒋᒃ, 26ᑖᒃᑯᐊᒃ ᐃᓅᓯᕐᒥᖕᓂᒃ ᐊᓐᓂᕈᓱᓚᐅᓐᖏᒻᒪᑎᒃ ᐊᑕᓂᕐᒥᒃ ᔩᓱᓯ ᙭ᔅᑑᓯᒥᒃ ᐱᔨᑦᓯᕈᒪᓪᓗᑎᒃ. 27ᑍᒤᒻᒪᓪᓕ ᐃᓕᑦᓯᓐᓄᑦ ᑎᓕᓯᓕᕐᐳᒍᑦ ᔫᑕᓯᒥᒃ ᓮᓚᓯᒥᒡᓗ, ᑖᒃᑯᐊᒃ ᓇᖕᒥᓂᖅ ᐅᖃᐅᑎᓂᐊᕐᒪᓯ ᐅᖃᐅᓯᕆᔭᑦᑕ ᐊᑦᔨᖏᓐᓂᒃ. 28ᐊᑲᐅᒋᔭᐅᔫᔮᕐᒪᑦ ᐊᓂᕐᓂᕐᒧᑦ ᐃᑦᔪᕐᓁᑦᑐᒧᑦ ᐅᕙᑦᑎᓐᓄᓪᓗ ᐅᖁᒤᒃᓴᒃᑲᓐᓂᕐᑎᑕᐅᖁᓇᓯ ᒪᑯᓇᓐᖓᑦ ᐊᑐᕆᐊᖃᕐᑕᑦᓯᓐᓂᑦ: 29ᒎᑎᓐᖑᐊᓄᑦ ᑐᓂᕐᕈᑎᕕᓂᕐᓂᑦ ᓂᕆᖁᓇᓯ, ᐆᒪᔫᓪᓗ ᕿᒥᑕᕕᓂᐅᑉ ᐊᐅᖓᓂᒃ ᓂᕿᖓᓂᒡᓗ ᓂᕆᖁᓇᓯ; ᓄᓕᐊᕐᓂᕐᒥᒡᓗ ᐊᑐᕐᓂᕐᓗᖁᓇᓯ. ᑕᒪᒃᑯᓂᖓ ᐊᑐᕐᑍᓕᒍᑦᓯ ᐊᑲᐅᔪᒥᒃ ᐱᓂᐊᕐᐳᓯ. ᑕᕝᕙᐅᕗᓯ.”
30ᑕᕝᕙ ᑎᓕᔭᐅᔪᑦ ᐊᐅᓪᓚᕐᐳᑦ ᐊᓐᑎᐅᑭᐊᒧᑦ, ᑍᑲᓂᓗ ᐅᒃᐱᕐᑑᖃᑎᒌᑦ ᑲᑎᖁᕔᑦ, ᑖᒃᑯᓂᖓ ᑎᑎᖅᑲᓂᒃ ᑐᓂᓪᓗᒋᑦ. 31ᑖᒃᑯᐊ ᑖᒃᑯᓂᖓ ᐅᖃᓕᒫᕋᒥᒃ, ᐊᖏᔪᒥᒃ ᖁᕕᐊᓱᖕᓂᕐᒥᒃ ᐃᓗᒻᒥᕐᑕᐅᕗᑦ ᐱᕙᓪᓕᕐᑎᑕᐅᒐᒥᒃ. 32ᔫᑕᓯ ᓮᓚᓯᓗ ᓇᓚᐅᑦᑍᓂᕐᒥᒃ ᑐᓂᕐᕈᓯᐊᖃᕋᒥᒃ, ᐊᑯᓂ ᑖᒃᑯᓂᖓ ᐅᖃᖃᑎᖃᕐᐴᒃ ᑲᔪᖏᕐᓮᓪᓗᑎᒃ ᓲᖑᓯᕚᓪᓕᕐᑎᑦᓯᓪᓗᑎᒡᓗ. 33ᐊᑯᓂ ᑍᑲᓃᓚᐅᕐᓗᑎᒃ ᐊᐅᓪᓚᓕᕆᕘᒃ ᖁᕕᐊᓱᑦᓯᐊᕐᓗᑎᒃ ᐅᒃᐱᕐᑑᖃᑎᒌᓄᑦ ᑎᓕᔨᒋᓚᐅᕐᑕᒥᖕᓄᑦ ᐅᑎᓕᕆᓪᓗᑎᒃ. 34ᓮᓚᓯᓕ ᑕᕝᕙᓃᒃᑲᓐᓂᕈᒪᓚᐅᕐᐳᖅ.
35ᐸᐅᓗᓯ ᐸᕐᓇᐹᓯᓗ ᐊᓐᑎᐅᑭᐊᒦᓚᐅᕐᐴᒃ ᐊᑯᓂ, ᐅᓄᕐᑐᓂᒡᓗ ᐊᓯᒥᖕᓂᒃ ᐃᓚᖃᕐᓗᑎᒃ ᐃᓕᓮᕘᒃ ᐊᔪᕆᕐᑐᐃᑦᔪᑎᖃᕐᓗᑎᒡᓗ ᐊᑕᓂᐅᑉ ᐅᖃᐅᓯᖏᓐᓂᒃ.
ᐸᐅᓗᓯᐅᓪᓗ ᐸᕐᓇᐹᓯᐅᓪᓗ ᐊᕕᓐᓂᖏᒃ
36ᐅᓪᓗᐃᑦ ᐊᒥᓱᑦ ᑭᖑᕐᖓᑦᑎᒍᑦ ᐸᐅᓗᓯ ᐸᕐᓇᐹᓯᒧᑦ ᐅᖃᕐᐳᖅ, “ᐅᑎᓚᐅᕐᒥᓗᒃ ᑕᑯᔭᕐᑐᕐᓗᓄᒃ ᓄᓇᓕᖕᓄᑦ ᐊᑕᓂᐅᑉ ᐅᖃᐅᓯᖏᓐᓂᒃ ᐊᔪᕆᕐᑐᐃᕕᒋᓚᐅᕐᑕᑦᑎᖕᓄᑦ, ᖃᓄᐃᓕᕐᒪᖔᑕ.” 37ᐸᕐᓇᐹᓯᐅᓪᓕ ᔪᐊᓇᓯ ᒫᑯᓯ ᐃᓚᐅᖁᕚ, 38#ᐋᐴᓯᑕᓖᑦ 13:13.ᐸᐅᓗᓯᓕ ᐃᓱᒪᖃᕐᐳᖅ ᐃᓚᐅᖁᓇᒍ, ᕿᒤᓚᐅᕐᒪᑦ ᑖᒃᑯᖕᓂᖓ, ᐸᒻᐱᓕᐊᒥ ᐅᐸᒐᓱᐊᕐᑕᖓᑦ ᓱᓕ ᑎᑭᓚᐅᕐᑎᓐᓇᒍ. 39ᑕᕝᕙᓂ ᐊᖏᔪᒥᒃ ᐂᕙᖃᑎᒌᓕᕐᐴᒃ ᐊᕕᓪᓗᑎᒃ; ᐸᕐᓇᐹᓯᐅᑉ ᒫᑯᓯ ᐂᑉᐸᕆᓕᕐᐹ ᐅᒥᐊᕐᑐᓕᕐᓗᑎᒃ ᓮᐳᕋᓯᒧᑦ, 40ᐸᐅᓗᓯᐅᓪᓕ ᓮᓚᓯ ᓂᕈᐊᕐᓗᒍ ᐃᓚᒋᓕᕐᓗᒍ ᐊᐅᓪᓚᕆᕘᒃ, ᐅᒃᐱᕐᑑᖃᑎᒌᓄᑦ ᑐᓂᔭᐅᓪᓗᑎᒃ ᐊᑕᓂᐅᑉ ᐱᑦᓯᐊᕐᓂᖓᑕ ᐱᔪᓐᓇᕐᑎᑦᓯᓂᖓᓄᑦ. 41ᐸᐅᓗᓯ ᓯᕆᐊᒃᑰᕐᐳᖅ ᓯᓕᓯᐊᒃᑯᓪᓗ, ᐅᒃᐱᕐᑑᖃᑎᒌᑦ ᐱᕙᓪᓕᕐᑎᓪᓗᒋᑦ.
S'ha seleccionat:
ᐋᐴᓯᑕᓖᑦ ᐱᓂᐊᕐᓂᖏᑦ 15: EAIB
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
Eastern Arctic Inuktitut Bible © Canadian Bible Society, 2012, 2021-2023.