ᐋᐴᓯᑕᓖᑦ ᐱᓂᐊᕐᓂᖏᑦ 12
12
ᐲᑦᑐᕉᓯᐅᑉ ᑎᒍᔭᐅᓂᖓ
1ᑍᑦᓱᒪᓂ ᐊᖓᔪᖅᑳᕐᔪᐊᖅ ᐃᕉᑕᓯ ᐅᒃᐱᕐᑑᖃᑎᒌᓄᑦ ᓂᑲᒍᓱᒐᓂ ᐊᑭᕋᕐᑐᓕᓚᐅᕐᐳᖅ. 2ᔧᒥᓯ ᑐᖁᑕᐅᑎᑉᐹ ᓴᕕᒡᔪᐊᒧᑦ, ᔪᐊᓇᓯᐅᑉ ᐊᖓᔪᐊ; 3ᑐᑭᓯᒐᒥᓗ ᑕᒪᓐᓇ ᔫᑎᓄᑦ ᐊᑲᐅᒋᔭᐅᖕᒪᑦ, ᐲᑦᑐᕉᓯ ᑎᒍᔭᐅᑎᒃᑭᕚ. ᐳᕙᓪᓚᖅᑯᑎᖃᖏᑦᑐᓂᒃ ᓂᐊᖂᔭᓂᒃ ᓇᓪᓕᐅᓐᓂᕐᓯᐅᕐᕕᒃ ᓇᓪᓕᐅᑎᓯᒪᑎᓪᓗᒍ. 4#ᒨᓯᓯ ᐂᑉᐸᖏᑦ 12:1-27.ᑎᒍᒐᒥᐅᒃ, ᑎᒍᔭᐅᓯᒪᕕᖕᒧᐊᕐᑎᑉᐹ, ᑲᒪᒋᔭᐅᑎᓪᓗᒍ ᐅᓇᑕᕐᑐᒃᓴᓄ ᓯᑕᒤᓄᑦ ᐊᕕᒃᑐᕐᓯᒪᔪᓄᑦ ᐊᑐᓂᑦ ᓯᑕᒪᐅᓪᓗᑎᒃ, ᐃᓄᐃᑦ ᓵᖏᓐᓂ ᐃᖅᑲᕐᑐᕐᑕᐅᑎᑦᓱᒪᓪᓗᓂᐅᒃ ᖄᖏᕐᑕᐅᕕᒃ ᐊᓂᒍᕐᐸᑦ. 5ᑍᒤᒻᒪᑦ ᐲᑦᑐᕉᓯ ᑎᒍᔭᐅᓯᒪᕕᖕᒦᓕᓚᐅᕐᐳᖅ; ᐃᓚᒌᒃᑐᓪᓕ ᐅᒃᐱᕐᑑᖃᑎᒌᑦ ᐃᓗᖏᕐᓱᕐᓗᑎᒃ ᒎᑎᒧᑦ ᑐᒃᓯᐊᕈᑎᒋᓚᐅᕐᐹᑦ.
ᐲᑦᑐᕉᓯᐅᑉ ᐊᓂᑎᑕᐅᓂᖓ ᑎᒍᔭᐅᓯᒪᕕᖕᒥᑦ
6ᐅᓐᓄᖕᒥ ᑕᑉᕙᓂ ᐃᕉᑕᓯᐅᑉ ᖃᐅᒃᐸᑦ ᐊᓂᑎᑦᓱᒪᓕᕐᑎᓪᓗᓂᐅᒃ, ᐲᑦᑐᕉᓯ ᐅᓇᑕᕐᑐᒃᓵᒃ ᒪᕐᕉᒃ ᐊᑯᓐᓂᖓᓂ ᓯᓂᓚᐅᕐᐳᖅ, ᐊᕐᓵᕐᑑᔭᓄᑦ ᐊᑦᑐᖏᕐᓯᒪᓪᓗᓂ ᑖᒃᑯᖕᓅᖓ, ᖃᐅᔨᓴᕐᑏᒃ ᑎᒍᔭᐅᓯᒪᕕᐅᑉ ᐃᑎᕐᕕᖓᑕ ᐊᕙᑎᖏᖕᓃᓪᓗᑎᒃ; 7ᑕᑯᒋᑦ, ᑕᕝᕔᓐᓇᖅ ᐊᑕᓂᐅᑉ ᐂᖏᓖᖓ ᓴᖅᑭᑉᐳᖅ, ᑎᒍᔭᐅᓯᒪᕕᐅᓪᓗ ᐃᓗᐊ ᖃᐅᒻᒪᒃᑎᐹ; ᐲᑦᑐᕉᓯ ᑐᐃᖓᒍᑦ ᐊᒃᑐᕐᓗᒍ ᑐᐹᕐᐹ ᐅᖃᐅᑎᓪᓗᒍ, “ᑐᐊᕕᕐᓗᑎᑦ ᒪᑭᒋᑦ.” ᐊᕐᓵᕐᑑᔧᑦ ᐊᒡᒐᐅᑎᖏᖕᓂᑦ ᑲᑕᒃᐳᑦ. 8ᐂᖏᓕᐅᑉ ᐅᖃᐅᑎᕚ, “ᐊᓐᓄᕌᓕᕆᑦ, ᐃᑎᒐᒍᑏᒃᑭᒃ ᐊᑎᓗᒋᒃ.” ᐲᑦᑐᕉᓯᓗ ᑍᒤᓕᐅᕐᐳᖅ. ᐂᖏᓕ ᐅᖃᕆᕗᖅ, “ᐅᓖᑦ ᐊᑎᓗᒍ ᒪᓕᓐᖓ.” 9ᐲᑦᑐᕉᓯᐅᑉ ᐂᖏᓕ ᐊᓂᓕᕐᑎᓪᓗᒍ ᒪᓕᒃᐹ; ᖃᐅᔨᒪᓐᖏᓚᖅ ᓱᓕᓪᓚᕆᒃᑐᒥᒃ ᐂᖏᓕ ᑍᒤᓕᐅᕐᒪᖔᑦ, ᐃᓱᒪᓚᐅᕐᐳᕐᓕ ᑕᑯᑎᑕᐅᓇᓱᒋᓪᓗᓂ. 10ᐅᓇᑕᕐᑐᒃᓮᑦ ᖃᐅᔨᓴᕐᑎᐅᔫᒃ ᓯᕗᓪᓕᕐᐹᒃ ᐂᑉᐸᖏᒡᓗ ᖄᖏᕋᒥᒃᑯᒃ, ᐅᒃᑯᐊᕐᔪᐊᕐᒧᑦ ᓴᕕᕋᔭᖕᒧᑦ ᑎᑭᑉᐴᒃ ᐃᑎᕐᑕᕐᕕᖕᒧᑦ ᓯᓚᓪᓕᕐᐹᒦᑦᑐᒧᑦ, ᐃᒻᒥᓂᒡᓗ ᑖᓐᓇ ᐅᒃᑯᐃᕐᐳᖅ, ᐊᓂᒐᒥᒃ ᐊᑐᕆᐊᒃᑯᑦ ᐱᓱᓕᕐᐳᒃ; ᑕᕝᕔᓐᓇᕐᓗ ᐂᖏᓕᐅᑉ ᐲᑦᑐᕉᓯ ᕿᒪᒃᐹ.
11ᐲᑦᑐᕉᓯ ᖃᐅᔨᑦᓯᐊᓕᕋᒥ ᐅᖃᓕᕐᐳᖅ, “ᒫᓐᓇ ᖃᐅᔨᑦᓯᐊᕐᐳᖓ ᐊᑕᓂᐅᑉ ᐂᖏᓕᓂ ᑎᓕᖕᒪᒍ ᓴᐳᑎᓪᓗᖓᓗ ᐃᕉᑕᓯᒥᑦ ᔫᑎᓪᓗ ᐱᓇᓱᐊᕈᒪᔭᖏᓐᓂᑦ.”
12ᐲᑦᑐᕉᓯᐅᑉ ᑕᒪᓐᓇ ᖃᐅᔨᒐᒥᐅᒃ, ᒥᐊᕆᐅᑉ ᐃᒡᓗᖓᓄᐊᕐᐳᖅ, ᔪᐊᓇᓯᐅᑉ ᒫᑯᓯᒥᒃ ᐊᑎᓕᐅᑉ ᐊᓈᓇᖓᓄᑦ, ᑕᕝᕙᓂ ᐊᒥᓱᑦ ᑲᑎᓐᖓᕗᑦ ᑐᒃᓯᐊᕐᓗᑎᒃ. 13ᐲᑦᑐᕉᓯ ᐅᒃᑯᐊᑉ ᓯᓚᓪᓕᕐᐹᖓᓂ ᑎᒡᓗᒃᑐᕐᒪᑦ, ᐃᓅᓱᒃᑐᖅ ᐊᕐᓇᖅ ᕉᑕᒥᒃ ᐊᑎᓕᒃ ᑕᑯᔭᕐᑐᕐᐳᖅ. 14ᐲᑦᑐᕉᓯᐅᑉ ᓂᐱᖓ ᐃᓕᑕᕆᒐᒥᐅᒃ, ᖁᕕᐊᓱᖕᓂᕐᒧᑦ ᐅᒃᑯᐃᕈᑎᓇᒍ ᐃᓗᒻᒧᑦ ᐅᓪᓚᒃᓯᕗᖅ, ᐅᖃᐅᑎᓪᓗᒋᑦ, ᐲᑦᑐᕉᓯ ᐅᒃᑯᐊᑉ ᓯᓚᑖᓃᓐᓂᕋᕐᓗᓂᐅᒃ. 15ᑖᒃᑯᐊᓕ ᕉᑕᒧᑦ ᐅᖃᕐᐳᑦ, “ᐃᓱᒪᖃᕈᓐᓃᕐᐲ” ᑖᓐᓇᓕ ᓱᓕᓂᕋᕐᐳᖅ. ᑖᒃᑯᐊ ᑭᐅᕚᑦ, “ᐃᓐᓇ ᐲᑦᑐᕉᓯᐅᑉ ᑕᕐᓂᖓ.”
16ᐲᑦᑐᕉᓯ ᓱᓕ ᑎᒡᓗᒃᑐᖃᑦᑍᓐᓇᕐᐳᖅ; ᐅᒃᑯᐃᕋᒥᑦᔪᒃ ᑕᑯᕚᑦ ᑲᒪᓂᐊᕐᓗᑎᒃ. 17ᐲᑦᑐᕉᓯ ᐃᓵᒡᓗᓂ ᓂᐸᖏᖁᕔᑦ, ᐅᓂᒃᑳᕐᕕᒋᕔᓪᓗ ᖃᓄᖅ ᐊᑕᓂᕐᒧᑦ ᐊᓂᑎᑕᐅᓂᕐᒥᓂᒃ ᑎᒍᔭᐅᓯᒪᕕᖕᒥᑦ. ᐅᖃᐅᑎᓪᓗᒋᑦ, “ᔧᒥᓯ ᑕᒪᑐᒥᖓ ᐅᖃᐅᑎᓂᐊᕐᐸᓯ ᐅᒃᐱᕐᑑᖃᑎᒌᓪᓗ,” ᐊᓂᒐᒥ ᐊᓯᐊᓄᐊᓕᕐᐳᖅ.
18ᖃᐅᑎᓪᓗᒍ ᐅᓇᑕᕐᑐᒃᓮᑦ ᐊᖏᔪᒥᒃ ᐅᐃᒪᔮᓕᕐᐳᑦ, ᐲᑦᑐᕉᓯ ᖃᓄᐃᓕᓐᓂᕐᒪᖔᑦ ᖃᐅᔨᓇᓱᒃᓗᑎᒃ. 19ᐃᕉᑕᓯᐅᓪᓕ ᕿᓂᕐᑕᐅᑎᓕᕐᐹ ᓇᓂᔭᐅᔪᓐᓇᖏᒻᒪᓪᓕ, ᐅᓇᑕᕐᑐᒃᓮᑦ ᑲᒪᔨᐅᔪᑦ ᐊᐱᕐᓱᕐᑕᐅᑎᓕᕐᐰᑦ ᐊᐱᕐᓱᕐᑕᐅᔭᕇᕐᒪᑕ ᑐᖁᑕᐅᔭᕐᑐᖁᓕᕐᐰᑦ. ᑕᒪᑐᒪᓗ ᑭᖑᓂᖓᒍᑦ ᐃᕉᑕᓯ ᔫᑎᐊᒥᑦ ᓯᓴᕆᐊᒧᐊᕐᐳᖅ ᑍᑲᓃᓕᕐᓗᓂ.
ᐃᕉᑕᓯᐅᑉ ᑐᖁᓂᖓ
20ᐃᕉᑕᓯ ᓂᓐᖓᒃᓯᒪᓚᐅᕐᐳᖅ ᐃᓄᖕᓄᑦ ᑍᕆᒥᐅᓄᑦ ᓮᑐᓂᒥᐅᓄᓪᓗ; ᑖᒃᑯᐊ ᐃᕉᑕᓯᒥᒃ ᑲᑎᓯᔭᕐᑐᕐᐳᑦ, ᑖᑦᓱᒧᓐᖓᖏᓐᓂᕐᒥᖕᓂᓕ ᐸᓛᓯᑕᔅ ᐃᑲᔪᕐᑎᑖᕆᓇᓱᓚᐅᕐᐹᑦ; ᐊᖓᔪᖅᑳᕐᔪᐊᑉ ᐃᒡᓗᖓᓂᒃ ᑲᒪᔨᐅᔪᖅ, ᐃᕉᑕᓯᒧᐊᕋᒥᒡᓗ ᐃᓅᖃᑎᖃᑦᓯᐊᕈᒪᓪᓗᑎᒃ ᐅᖃᕐᐳᑦ, ᐊᖓᔪᖅᑳᕐᔪᐊᕐᒧᑦ ᑭᓯᐊᓂ ᓄᓇᖁᑎᖓᓂ ᓂᕿᒃᓴᖃᕐᑎᑕᐅᕙᒃᑲᒥᒃ.
21ᐅᓪᓗᒥ ᑲᑎᕕᐅᔪᒪᔪᒥ ᐃᕉᑕᓯᐅᑉ ᐊᖓᔪᖅᑳᕐᔪᐊᕐᓯᐅᑎᓂ ᐊᓐᓄᕌᑦ ᐊᑎᕔᑦ, ᐃᒃᓯᕙᐅᑕᕐᔪᐊᕐᒧᑦ ᐃᖏᓪᓗᓂ, ᑖᒃᑯᓄᖓ ᐅᖃᓪᓚᓕᕐᐳᖅ. 22ᐃᓄᐃᑦ ᕾᒐᓛᕐᐳᑦ, “ᐅᓇ ᐅᖃᓪᓚᑐᖅ ᐃᓄᑐᐃᓐᓇᐅᓐᖏᓚᖅ ᒎᑎᓕ ᐅᖃᓪᓚᒃᐳᖅ!” 23ᑕᕝᕔᓐᓇᖅ ᐊᑕᓂᐅᑉ ᐂᖏᓕᖓᑕ ᐊᓇᐅᕚ, ᒎᑎᒥᒃ ᓂᕐᑐᕐᓇᕐᑎᑦᓯᖏᒻᒪᑦ; ᖁᐱᕐᕈᓄᑦ ᓂᕆᔭᐅᓪᓗᓂ ᑐᖁᕗᖅ.
24ᒎᑎᐅᓪᓕ ᐅᖃᐅᓯᖏᑦ ᓯᐊᒻᒪᕐᐸᓪᓕᐊᕗᑦ ᐱᕙᓪᓕᐊᑐᐃᓐᓇᕐᓗᑎᒃᓗ.
25ᐸᕐᓇᐹᓯᒃᑯᒃ ᓴᐅᓗᓯᒃᑯ ᐅᑎᕐᐴᒃ ᔨᕉᓴᓕᒻᒥᑦ ᐱᓇᓱᐊᒐᒃᓴᑎᒃ ᐱᔭᕇᕋᒥᑦᔪᒃ, ᔪᐊᓇᓯ ᒫᑯᓯᒥᒃ ᑍᔭᐅᔪᖅ ᐃᓚᒋᓪᓗᒍ.
S'ha seleccionat:
ᐋᐴᓯᑕᓖᑦ ᐱᓂᐊᕐᓂᖏᑦ 12: EAIB
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
Eastern Arctic Inuktitut Bible © Canadian Bible Society, 2012, 2021-2023.