Sefaniya 3
3
Vidoda vya Yerusalemu na kukombolwa
1Mwee wantu wa Yerusalemu hamshiwoni, toziya wantu wakuyi wanjimira ndiri neni mana wafira kutenda vidoda na kuwatabisiya wantu. 2Mpikanirandiri likalapiru lyoseri ama kujimira libeliziwu. Pota kumtumbira Mlungu gwaku. 3Wakulu wakuyi waguguma gambira simba, watoza wakuyi ndo gambira liminyi yakana njala pashimihi, walekandiri shoseri mpaka mandawira. 4Wambuyi wakuyi ndo wantu yawalishera ndiri shintu na wapayira. Watambika wakuyi watenda vidoda ata Mnumba ya Mlungu 5Kumbiti Mtuwa Mlungu yakawera mnganti mwakuyi ndo mwaminika, yomberi katendandiri mlandu mdoda. Kila mandawira kalanguziya shakalongiti, kila papalangala kashitenda shakatakuliti. Kumbiti wakontola waherasoni kwa galii yawagatenditi. 6“Mtuwa Mlungu kalonga hangu, hanihagamiziyi maisi, vibambaza vyawu vya kulishinga viweri mahami. Hanihalibisiyi njira zawu na kwahera yoseri yakapita amu. Miji yawu iwera mahami.” 7Nongiti kuwera nakaka wantu awa hawanguwili na kugajimira makalapira, shakapanu hapeni niwakomangi kayi mala zoseri, kumbiti wantu wakuyi waweriti wakali wana matamata za kutenda vidoda.
8“Shakapanu Mtuwa Mlungu kalonga hangu, munheperi lishaka pangoloka na kulaviya toza. Amuwa kugajojonira maisi na falumi, su wavimani kuwera nana maya nentu na wantu woseri pasipanu hawalunguziwi kwa motu.”
9Shaka ashi haniwagalamburi wantu wa maisi gamonga na weni hawanguwiri neni. 10Kulawa kumwambu mwa nshemba za Kushi yayiwera Isopiya leru wantu waneni yawanduwa wapalasiwa hawanjegeri tambiku. 11Lishaka ali hapeni guweri na soni, toziya ya matendu gaku ga kung'alambuka, mana haniwawusiyi muwamu mwaku walii yawalitumba na kulikwisa na gwenga hapeni guweri na mtiti kayi mulugongu lwangu. 12Hanikulekeri wantu wananaga na wagweka, weni hawatugiri uponera kwa neni Mtuwa Mlungu. 13“Masigala ga Israeli hapeni gatendi madoda ama kutakula mpayu, kwa womberi hapeni kawoneki mpayira yoseri. Hawaliyi na kugonja na kwahera muntu gwakuwatiriziya.”
Lwimbu lwa Nemeru
14Gwee Sayuni, gwimbi kwa makakala, gwee Israeli gubotangi.
Gwee Yerusalemu! Gusekeleri na kufyapilira kwa moyu gwaku goseri,
15Mtuwa Mlungu kakuwusilira toza yaku yaguweriti nayu,
kawawusilira kutali wankondu waku woseri.
Mtuwa Mlungu, mfalumi gwa Israeli ka pamuhera na gwenga
hapeni gutiri kayi madoda. 16Lishaka ali, mji gwa Yerusalemu hagugambirwi hangu,
Gwee Sayuni, “Nagutira
Naguperuwa makakala.” 17Mtuwa Mlungu, Mlungu gwaku ka pamuhera na gwenga,
yomberi ndo mgangamala yakakujegera ukanka.
Yomberi hakakunemeleri kwa nemeru nkulu,
kwa ufiru wakuyi hakakakupanani ukomu wa syayi.
Hakakunemeleri na kukwimbira gwenga,
18gambira lishaka lya msambu. Mtuwa Mlungu kalonga hangu,
hanikuwusiliri madoda gaku
na gwenga hapeni guwoni soni kwajili yakuyi.
19Shaka ashi, haniwakomangi woseri yawakuyonera.
Haniwalopoli vibyeketu
na kuwawuziya yawawera kuwuhamisiwu,
na kugalambula soni yawu kuwera ligoya,
na pasipanu poseri hawamkwisi.
20“Shaka ashi haniwajojoniri na kuwawuziya ukaya
haniwawuziliri kayi ntambu yenu iherepa,
na mwenga hamuwoni maweni kuwera neni Mtuwa Mlungu ntakula.”
The Bible version in the Pogoro Language. @The Word for The World International and Pogoro Language translation. All rights reserved.