Zakaliya 2
2
Mawonu ga lugoyi lwa kupimira
1Mumalola gamonga, moniti muntu yakaweriti na lugoyi lwa kupimira muliwoku lyakuyi. 2Nimkosiyiti, “Gwakugenda koshi?”
Yomberi kanankula, “Ng'enda kupima utali na upana mji gwa Yerusalemu.”
3Shakapanu ntumintumi gwa kumpindi ulii yakayoweriti na neni kaweriti kankumgendera ntumintumi gwa kumpindi yumonga mweni kaweriti kankumwizira. 4Ntumintumi gwa kumpindi ayu yakayoweriti na neni kamgambira myaguyi, “Gutugi gwakamgambiri mntemba ulii kuwera Yerusalemu haguweri mji yaguwera ndiri na shimbambaza, toziya hakuweri na wantu wavuwa na mifugu ivuwa amu. 5Mtuwa Mlungu katakula kuwera yomberi hakaweri shimbambaza sha motu kugulolera mji agu wega zoseri na hakalikali amu kwa unanagala wakuyi.”
Yawaweriti muuhamisiwu wankushemwa wawuyi ukaya
6Mtuwa Mlungu katakula hangu, “Mtugi kulawa isi ya Babeli yeni niwapalasiyiti kila uwega. 7Kalongola! Mawoseri mwenga yamlikala muisi ya Babuloni, mtugiri aku kalongola kumjini Sayuni. 8Mtuwa Mlungu yakana makakala goseri kwa makakala gakuyi kandagalira na katakula hangu kwa maisi yagawatoliti mwenga wantu wakuyi.”
Nakaka yanakawashinkuli mwenga kashinkula lisu lyangu. 9“Nakaka hanilikomangi nawa walii yawawatolani kwa makakala na womberi hawatolwi na walii yawawatenditi kuwera wamanda wawu.”
Panu ndo hamvimani kuwera Mtuwa Mlungu yakana makakala goseri ndo yakandagaliriti.
10Mtuwa Mlungu katakula hangu, “Mwenga wantu wa Sayuni, mwimbi na kusekelera toziya nankwiza kukala pakati penu!”
11Shaka ashi Maisi gavuwa hagaweri na neni “Mtuwa Mlungu na womberi hawaweri wantu wangu na neni hanilikali pakati penu. Mirandu ayi payilawira ndo hamvimani kuwera Mtuwa Mlungu gwa Mashonta ndo yakandagalira kwa mwenga. 12Wantu wa Yuda hawaweri kayi lunda yakuyi Mtuwa Mlungu muisi yakuyi na mji gwa Yerusalemu haguweri mji gwakuyi yakagusaguliti.
13Mwenga wantu woseri mnyamali, kulongolu kwa Mtuwa Mlungu, toziya yomberi kankwiza kulawa pahala pakuyi pananagala pakalikala.”
The Bible version in the Pogoro Language. @The Word for The World International and Pogoro Language translation. All rights reserved.