Zakaliya 13
13
1Mulishaka ali, Mlungu hakatendi mashi ga mbwiru ganyililiki na kuwatakasiya vidoda na uhumba wiwuka wa Dawudi na wenikaya wa Yerusalemu. 2Mulishaka ali, hanigawusiyi matawu ga shinyagu kulawa muisi na geni hapeni gaholwi kayi, kalonga Mtuwa Mlungu Yakana Makakala Goseri. Haniwawusi wambuyi wawu pamuhera na rohu ya udoda muisi. 3Payiwera muntu yoseri kalaviya umbuyi wa uzyanga, tati ama mawu gwakuyi hakamgambiri, gufiruwa kuhowa toziya gutunga mpayu kwa litawu lya Mtuwa Mlungu. Pakendereya kutunga walera wakuyi hawamlagi. 4Mulishaka ali, kila mbuyi hakagawoneri soni malola gakuyi. Su hapenikavali nguwu za mibahira kupayira wantu. 5Kila mbuyi hakalongi na mbuyindiri. Namuntu gwa kushamba, weriti kushamba kwanjira untemba wangu. 6Muntu pakamkosiya, vironda avi vyaviwera mnshimba yaku ndo vya shishi? Hakankuli, vironda avi nivipatiti munumba ya waganja wangu.”
Lagalira ya kulaga walolera nkanyama wa Mlungu
7Mtuwa Mlunguyakana makakala goseri katakula hangu, “Gwee ligumba! Gwimuki gumkomangi mlolera nkanyama gwangu, mlolera yakantendera. Gumkomi mlolera na kondolu hawalipalasiyi. Shakapanu hanilitalipisiyi liwoku lyangu na kuwakomanga wantu yawahera makakala, 8Mtuwa Mlungu kalonga, selusi mbili hawalaguwi na selusi yimu hawasigali mngati mwakuyi. 9Selusi yimu ya wantu yawasigaliti haniyijeri kwa kuyitakasiya mumotu gambira muntu ntambu yakagulula feza mumotu na gambira zahabu yayijelwa. Shakapanu womberi hawanduwi na neni haniwankuli. Hantakuli kuwera awa ndo wantu wangu na womberi hawatakuli kuwera neni na Mtuwa Mlungu gwawu”
The Bible version in the Pogoro Language. @The Word for The World International and Pogoro Language translation. All rights reserved.