Nahumu 1
1
1Neni Nahumu kulawa Elikoni na awu ndo ulagilagi wa Mlungu kwa wantu wa Ninawi.
Maya ga Mtuwa Mlungu kwa wantu wa Ninawi
2Mtuwa Mlungu kana weya kwa wantu yawaguwira wamlungu wamonga,
Mtuwa Mlungu kawawuzilira woseri yawamlema,
pakakalala kawalaga wankondu wakuyi.
3Mtuwa Mlungu kakalalandiri kalongola,
kumbiti kana makakala,
Mtuwa Mlungu hapeni kawaleki yawana makosa.
Guweza kuwona makakala ga Mtuwa Mlungu kupitira shivyulavyula na lipuga,
mawudi kwakuyi ndo gambira lidikudiku mumagulu gakuyi.
4Su pakayikalipira bahali iyuma,
yomberi kayumiziya nshemba zoseri.
Ndundu za lulalanda lya Bashani na lugongu Karimeli ziyuma,
uluwa wa Lebanoni unyala.
5Migongu ilendemera kulongolu kwakuyi,
na vigongu vilumbutuka,
isi ilendemera kulongolu kwakuyi,
pasipanu na vyoseri vyaviwera amu.
6Kwahera yakaweza kulewelera maya ga Mtuwa Mlungu.
Kwahera yakawera mkomu Mlungu pakakalala.
Ngalala yakuyi inyililika gambira motu,
na matalabuwi gapandika kulongolu kwakuyi.
7Mtuwa Mlungu ndo mheri,
tugira shaka sha ntabiku
kawalolera walii yawamtumbira.
8Kumbiti kwa malawa hakagaziyi Ninawi,
hakawafati wankondu wakuyi mpaka kuluwindu.
9Mpangu mdoda goseri gwawapanga kwa Mtuwa Mlungu
Yomberi hakaguleweleri nagutendeka,
ntabiku hapeni ilawili kayi.
10Hawavilingwi pakati pa misontu handa wantu yawalowera divayi yawu.
Hawalunguziwi gambira makota gayuma.
11Kwagwenga Ninawi kalawa yakapangiti makontola kwa Mtuwa Mlungu na kutenda mipangu ya upyota. 12Mtuwa Mlungu kawagambira hangu wantu wakuyi. “Tembera Waashuru wana lishonta likulu na lyana likakala, womberi hawagusiwi na kwagamiziwa. Tembera niwatabisiya mwenga wantu wa Yuda, su hapeni niwakomangi kayi nentu. 13Kumbiti vinu haniwatuli lekeru na kudumula minyololu yoseri yamtawitwi mumagulu.”
14Mtuwa Mlungu kalagalira hangu kuhusu Ninawi. “Hapeni kapati wiwuka wa kwendeleza litawu lyaku. Vinyagu vyaku vya kusongola na vya kulumbuziya hanivimegangi mnumba ya wamlungu waku. Hanikubawiri lisembi lyaku, mana gwenga gufaandiri shintu shoseri.”
15Mloli mwenga wantu wa Yuda. Kankwiza muntu kulawa kulugongu kajega visoweru viheri, mlagilagi mweni kankubwera ponga. Mtendi misambu yenu, mwenga wantu wa Yuda, mtendi shilii shamlongiti, mana wakontola hapeni wawakankali kayi, toziya niwagamiziya nakamu.
The Bible version in the Pogoro Language. @The Word for The World International and Pogoro Language translation. All rights reserved.