Malaki 2
2
1Mtuwa Mlungu kalonga hangu kwa watambika, ali ndo likalipiru lyenu. 2“Handa pampikanira ndiri na pamfirandiri kugalambula miyoyu yenu kulipanana ligoya litawu lyangu, haniwapangiri mwenga na hampangiri tekelera zenu, nakaka nizipangira kala, toziya myigalambula ndiri miyoyu yenu na kulipanana ndiri ligoya litawu lyangu ntakula neni Mtuwa Mlungu Yakana Makakala Goseri. 3Haniwakomangi wana wenu na mwenga kulawirana na ukontola wenu na kuvipakaziya vyeni vyenu mavi ga wankanyama wenu wa tambiku. Haniwawingili kutali muwuki kulongolu kwa neni. 4Na mwenga hamvimani kuwera niwajegera lagalira ali su lipatanu lyaneni na Lawi lyendeleyi, kalonga Mtuwa Mlungu Yakana Makakala Goseri.”
5Mulipatanu lyaneni liweriti pamuhera na yomberi, lipatanu lya ukomu na ponga, naneni nimpananiti goseri, su kanguwili na kumpanana ligoya, kumbiti yomberi kaleka kulipanana ligoya litawu lyaneni. 6Kawagambira kuwera shilii shaniwafunditi ndo shanakaka, yomberi katakula unakaka. Watenditi lihengu pamuhera na neni kwa ponga na kwa waminika na yomberi kawagalambula wavuwa kulawa muvidoda. 7Ali ndo lihengu lya watambika kuwafunda wantu umani wa nakaka kuusu Mlungu. Wantu wendereyi kulifunda mafiru gangu kwa womberi, toziya watambika ndo walagilagi wa Mtuwa Mlungu Yakana Makakala Goseri.
8“Kumbiti mwenga watambika mgalambuka na kuyileka njira na kwa mafunda genu mjega wavuwa kulikwala, mhalibisiya lipatanu na Lawi, kalonga Mtuwa Mlungu Yakana Makakala Goseri. 9Su haniwatendi mbeziwi na kusoniziwa kulongolu kwa wantu woseri, toziya mfatandiri njira zangu, su mlanguziya upendelewu muwamu mwa wantu mmirandu ya lagiru.”
Wantu waminika ndiri kwa Mlungu
10Hashi, twawoseri twenga tati gwetu yumu ndiri? Toseri tuumbwa ndiri na Mlungu yumu? Ntambu gaa su tulitendera humba lipatanu lya watati wetu kwa kuwera ndiri waminika kila yumu kwa myaguwi? 11Wantu wa Yuda wahera waminika kwa Mlungu na kutenda nkalaliru mu Israeli na ku Yerusalemu. Wayitula humba numba ya Mtuwa Mlungu yakayifira. Shakapanu wayuga wadala yawaguwira wamlungu wahenga. 12Mtuwa Mlungu kawawusiyi wantu yawatenda mirandu ayi kulawa muwamu mwa wiwuka wa Yakobu. Na hapeni waweri pamuhera mukulaviya ukapitawu na kujega tambiku kulongolu kwa Mtuwa Mlungu Yakana Makakala Goseri.
13Shintu shimonga yamshitenda ndo ashi. Mwankushimemiziya shitalawanda sha mabuhi sha Mtuwa Mlungu kwa masozi, mwankulira na kulwala toziya yomberi kazijimira ndiri tambiku zyenu yamzilaviya. 14Mwankukosiya, ntambu gaa Mtuwa Mlungu kalema tambiku zetu? Toziya Mtuwa Mlungu ndo kapitawu pakati paku na mdala gwa untemba waku na toziya guwera mwaminika ndiri na yomberi, tembera yomberi ndo myagu na mdala gwa lipatanu lya ndowa. 15Hashi, Mtuwa Mlungu kawatenda ndiri womberi kuwera yumu? Mushimba na mu rohu womberi ndo wa Mlungu. Ntambu gaa Mlungu kawatenda muweri pamuhera? Toziya Mlungu kawera kankusakula wiwuka wa kumguwira kulawa kwa mwenga. Hangu mliloleri weni murohu mwenu, muntu nakaleka kuwera mwaminika kwa mdala gwa untemba waku. 16“Mtuwa Mlungu, Mlungu gwa Israeli kalonga. Nkakalira kulekana. Nkalalira yumu gwenu pakamtendera mdala gwakuyi ungesera awu. Mliloleri handa kwahera ata yumu gwenu yakaleka kuwera mwaminika kwa mdala gwakuyi.”
Lishaka lya kutoza lyapakwegera
17Mmtosiya Mtuwa Mlungu kwa visoweru vyenu. Mwenga mkosiya, tumtosiya kwa ntambu gaa? Mumtosiya kwa kulonga, woseri yawatenda madoda waheri pamasu pa Mtuwa Mlungu na yomberi kafiriziwa nawomberi. Wakosiya Mlungu yakatoza kakoshi?
The Bible version in the Pogoro Language. @The Word for The World International and Pogoro Language translation. All rights reserved.