John 6
6
11 ပြီးခါ ကိုယ်တော်ယေရှုဟ တိဗေရိအိုင်လောက်လဲခေါ်တဲ့ ဂါလိလဲအိုင်a ရဲ့ တစ်ဖက်ကမ်းကော် ကြွရောက်တော်မူဟယ်။ 2နေမကောင်းပဲဆမားအပေါ်မှာ ကိုယ်တော်ပြတော်မူတဲ့ အံ့ဖွယ်နိမိတ်လက္ခဏာတေကော် မြင်ကြရတဲ့အခါ လူအပေါင်းတော့ဟ ကိုယ်တော်ရဲ့နောက်တော်ကော် လိုက်ပါလာကြဟယ်။ 3ကိုယ်တော်ဟ တောင်ပေါ်ကော် တက်မောက် ဟဲင်းအရပ်မှာ တပဲ့တော်တေနအတူ ထိုင်ကြလေဟယ်။ 4ဂျူးလူမျိုးတေရဲ့ ပသခါပွဲဟလဲ က္လရောက်လုနီးပါးဖြစ်ဟယ်။ 5ကိုယ်တော်ယေရှုဟ မျှော်ကြည့်မောက် လူထုပရိတ်ဆတ်အပေါင်းတော့ ဆူ့နားကော် လာနေကြဟာကော် မြင်တဲ့အခါ၊ ဖိလိပ္ပုကော် "ဟဲင်းလူတေ စားဆောက်ဖော့အတွက် မုန့်ကော် ဖယ်မှာ ဝယ်ရမဟား" လောက် မေးလေဟယ်။ 6ကိုယ်တော်ဟ ဆူဖယ်လဲလုပ်မဲင်ဟာကော် ဆိဆိန ဖိလိပ္ပုကော် စမ်းသပ်လိုညောင်း ဟဲင်းသလဲမေးခြင်းဖြစ်ဟယ်။ 7ဖိလိပ္ပုဟလဲ "လူတိုင်းကော် ပေါင်မုန့်တအုစီ ဖဲ့ပေးနိုင်ဖော့ လုံလောက်တဲ့ပေါင်မုန့်တေ ဝယ်ယူဖော့ ဒေနာရီဒင်္ဂါးb အပြားနှေရာထက် ပိုမောက် ကုန်က္လပါလိမ့်မဲင်" လောက် ပ္လန်လည်လျှောက်တင်လေဟယ်။ 8ကိုယ်တော်ရဲ့တပဲ့တော်တေထဲမှ တစ်ယောက်ဖြစ်သူ ရှိမုန်ပေတရုရဲ့ညီ အန္ဒြေဟ ကိုယ်တော်ကော် 9မုယောမုန့်ငါးလုံးနငါးအငယ်နှေကောင်ရှိတဲ့ လူဆငယ်တစ်ယောက်ရှိပါဟယ်။ ဟဲင်းပေမဲ့ အဲလောက်များတဲ့လူတေအတွက် ဟဲင်းမုန့်ငါးလုံးန ငါးနှေကောင်ဟ မလုံလောက်နိုင်ဘူး" လောက် လျှောက်တင်လေဟယ်။ 10ကိုယ်တော်ယေရှုဟ တပဲ့တော်တေကော် "လူတေကော် ထိုင်ခိုင်းလိုက်ပါ" လောက် မိန့်လေဟယ်။ ဟဲင်းနေရာမှာ မြက်ပင်တေထူထပ်နေဟယ်။ ဟဲင်းကြောင့်လောက် လူအကုန်ဟုန်းတော့ဟ ထိုင်ကြလေဟယ်။ ဟဲင်းလူတေထဲမှာ ယောက်ျားဆားငါးထောင်လောက် ပါရှိလေဟယ်။ 11ပြီးခါ ကိုယ်တော်ယေရှုဟ မုန့်တေကော် ယူမောက် ဘုရားရှင်ရဲ့ဂုဏ်ကျေးဇူးကော် ချီးမွမ်းပြီးခါ ထိုင်နေကြတဲ့လူတေကော် ခွဲဝေပေးတော်မူဟယ်။ ငါးတေကော်လဲ ဟဲင်းနည်းတူလုပ်မောက် ဆူ့တော့အလိုရှိဆလောက် ခွဲဝေပေးတော်မူဟယ်။ 12ဟဲင်းလူတေဟ ဝဝလင်လင်စားဆောက်ကြပြီးခါ ကိုယ်တော်ဟ "အလေအလွင့်မရှိစေဖော့ က္လန်နေတဲ့ အပိုင်းအစတေကော် ကောက်ဆိမ်းကြပါ" လောက် တပဲ့တော်တေကော် မိန့်တော်မူလေဟယ်။ 13ဟဲင်းကြောင့် တပဲ့တော်တေဟလဲ ကောက်ယူဆိမ်းကြခါ လူတေစားခဲ့တဲ့ မုယောပေါင်မုန့်ငါးလုံးမှ အကြွင်းအကျန်တေဟ ဆယ့်နှေတောင်းန အပ္လေ့ရလေဟယ်။ 14လူအများဟ ကိုယ်တော်ယေရှုပြုတော်မူတဲ့ အံ့ဖွယ်အမှုတေကော် မြင်ပြီးတဲ့အခါ "အဲလူဟ လောကကော် ကြွရောက်လာတဲ့ အရိယာဆူတော်စင် အမှန်ပဲ ဖြစ်ရမဲင်" လောက် ပြောဆိုကြလေဟယ်။ 15လူတေဟ ဆူ့ကော် အတင်းအကြပ်တွန်းအားပေးမောက် ဘုရင်အဖြစ်တင်မြှောက်ဖော့ ကြံစည်နေကြောင်းကော် ကိုယ်တော်ယေရှုဆိတော်မူခဲ့လေဟယ်။ ဟဲင်းကြောင့် ကိုယ်တော်ဟ တစ်ပါးတည်းနေချင်ညောင်း တောင်ပေါ်ကော် ပ္လန်ကြွဟားခဲ့လေဟယ်။ 16ညခင်းနီးချိန်ရောက်ခါ တပဲ့တော်တော့ဟ ဂါလိလဲအိုင်ကော် ဆွားကြမောက် 17လှေပေါ်ကော် တက်ပြီးခါ အိုင်ကော်ဖ္လတ်မောက် ကပေရနောင်မြို့ကော် ဆွားကြလေဟယ်။ မိုးချုပ်လာဟာဖြစ်ညောင်း ကိုယ်တော်ယေရှုဟလဲ ဆူ့တော့ရှိနေရာကော် မရောက်လာဆေးပေ။ 18ဟဲင်းအချိန်မှာ လေပ္လင်းတိုက်မောက် လှိုင်းတေထလာလေဟယ်။ 19ဆူ့တော့ဟ ဆုံးလေးမိုင်လောက် လှေကော်လှော်ပြီးခါ ကိုယ်တော်ယေရှုဟ ရေအိုင်ပေါ်မှာ လမ်းလျှောက်မောက် ကြွလာပြီးခါ လှေနားကော် ချဉ်းကပ်လာနေဟာကော် မြင်ကြခါ ဆူ့တော့ဟ အကြီးကျယ်ကြောက်လန့် တုန်လှုပ်ခဲ့ကြလေဟယ်။ 20ဟဲင်းပေမဲ့ ကိုယ်တော်ဟ ဆူ့တော့ကော် "မကြောက်ကြနဲ့။ ငါပဲ ဖြစ်ဟယ်" ဆိုမောက်မိန့်တော်မူဟယ်။ 21ဟဲင်းခါ တပဲ့တော်တေဟ အားရဝမ်းဆာန ကိုယ်တော့်ကော် လှေထဲကော် ခေါ်ယူနေချိန်မှာပဲ လှေဟ ဆူ့တော့ဆွားဖော့ ရည်ရွယ်ဟားတဲ့ အရပ်ကော် တခါတည်း ရောက်ရှိဟားလေဟယ်။ 22နောက်တစ်နေ့မှာ ရေအိုင်တစ်ဖက်ကမ်းမှာ က္လန်နေတဲ့ လူထုပရိတ်ဆတ်တေဟ ဟဲင်းအရပ်မှာ လှေငယ်တစ်စီးမှလွဲမောက် တခြားလှေမရှိခဲ့ကြောင်းကော်ရော၊ ဟဲင်းလှေမှာ ကိုယ်တော်ယေရှုဟ တပဲ့တော်တေနအတူ လိုက်ပါဟားခြင်းမရှိပဲ တပဲ့တော်တေပဲ ထွက်ဟားခဲ့ကြောင်းကော်ရော သတိပြုမိကြဟယ်။ 23ဟဲင်းပေမဲ့ တိဗေရိမြို့မှ တခြားလှေငယ်တေဟ ဘုရားရှင်ရဲ့ကျေးဇူးတော်ကော် ချီးမွမ်းပေးပြီးခါ ဆူ့တော့ မုန့်တေကော် စားဆောက်ခဲ့ကြတဲ့ နေရာအနီးကော် ရောက်လာကြလေဟယ်။ 24ဟဲင်းအရပ်မှာ ကိုယ်တော်န တပဲ့တော်တေမရှိကြဟာကော် လူထုပရိတ်ဆတ်တော့ ဆိကြတဲ့အခါ ကိုယ်တော့်ကော် ရှာဖွေဖော့ ဟဲင်းလှေတေပေါ်တက်မောက် ကပေရနောင်မြို့ကော် ထွက်ခွာကြလေဟယ်။ 25ဆူ့တော့ဟ ကိုယ်တော်ယေရှုကော် ရေအိုင်တစ်ဖက်ကမ်းမှာ တွေ့ကြတဲ့အခါ ကိုယ်တော့်ကော် "ဆရာ၊ ဟဲင်းအရပ်ကော် ဖယ်အချိန်ဟ ကြွလာခဲ့ဟား" လောက် မေးမြန်းကြလေဟယ်။ 26ကိုယ်တော်ယေရှုဟလဲ ဆူ့တော့ကော် "သင်တော့ကော် ငါအမှန်တိုင်းပြောရခါ သင်တော့ငါ့ကော် ရှာဖွေနေကြဟာမှာ နိမိတ်လက္ခဏာတေကော် မြင်ခဲ့ရညောင်းမဟုတ်ပဲ ပေါင်မုန့်ကော် ဝအောင်စားခဲ့ကြရညောင်း ဖြစ်ဟယ်။ 27ပျက်စီးတတ်တဲ့ အစာအတွက် မကြိုးစားကြနဲ့။ အဖဘုရားရှင်ဟ အခွင့်အာဏာပေးထားခံရတဲ့လူ့ဆားတော်ဟ ပေးမဲ့ နိစ္စထာဝရအဆက်ထိ တည်မြဲနေမဲ့အစာအတွက်ပဲ ကြိုးစားကြပါ" လောက် မိန့်တော်မူဟယ်။ 28ဟဲင်းခါ ဆူ့တော့ဟ ကိုယ်တော်ကော် "ဘုရားရှင်ရဲ့အမှုတော်တေကော် လုပ်ဆောင်ဖော့ ကျွန်ုပ်တော့ ဖယ်လဲလုပ်ရမဟား" လောက် မေးလျှောက်ကြလေဟယ်။ 29ကိုယ်တော်ယေရှုဟ ဆူ့တော့ကော် "ဘုရားရှင်ရဲ့အမှုတော်ဟ ဘုရားရှင်စေလွှတ်လိုက်တဲ့လူကော် ယုံကြည်ခြင်းပဲဖြစ်ဟယ်" လောက် မိန့်တော်မူလေဟယ်။ 30ဟဲင်းခါ လူတေဟ ကိုယ်တော်ကော် "ဘုရားရှင်ဟ ကိုယ်တော်ကော် စေလွှတ်တော်မူကြောင်းကော် ပြသတဲ့အမှုကော် လုပ်ပြတော်မူပါ။ ဟဲင်းအရာကော် ကျွန်ုပ်တော့မြင်ရလောက်ရှိခါ ကျွန်ုပ်တော့ဟ ကိုယ်တော်ကော် ယုံကြည်ပါမဲင်။ ကိုယ်တော် ဖယ်လဲအံ့ဖွယ်နိမိတ်လက္ခဏာတေကော် ပြတော်မူမဟား။ 31ကျမ်းစာထဲမှာ "ဆူဟ ရွှေမြို့တော်ဟနေ လာတဲ့မုန့်ကော် ဆူ့တော့စားဆောက်ဖော့ ပေးတော်မူဟယ်' လောက်ရေးဆားထားတဲ့အတိုင်း အကျွန်ုပ်တော့ရဲ့ဖိုးဖေးတေဟ တောကန္တာရထဲမှာ မန္နမုန့်c ကော် စားကြရဟယ်" လောက် လျှောက်တင်လေဟယ်။ 32ကိုယ်တော်ယေရှုဟလဲ "ငါသင်တော့ကော် အမှန်တိုင်းဆိုရခါ ရွှေမြို့တော်ဟမုန့်ကော် သင်တော့နားပေးတဲ့ လူဟ မောရှေမဟုတ်ဘူး။ ရွှေမြို့တော်ဟ စစ်မှန်တဲ့မုန့်ကော် ငါ့ရဲ့အဖဘုရားရှင်ဟပဲ သင်တော့ကော် ပေးတော်မူခဲ့ဟာ ဖြစ်ဟယ်။ 33ဘုရားရှင်နားဟ သင်တော့ကော် ပေးဟားတဲ့ ပေါင်မုန့်ဟ ရွှေမြို့တော်ဟနေ လာမောက် ကမ္ဘာလောကဆားတေကော် အဆက်တာကော်ပေးမဲင်" လောက် ကိုယ်တော်ဟ မိန့်တော်မူခါ 34လူတေဟ ကိုယ်တော်ကော် "အရှင်၊ ဟဲင်းမုန့်ကော် ကျွန်ုပ်တော့ကော် အမြဲတမ်းပေးတော်မူပါ" လောက် လျှောက်ကြဟယ်။ 35ကိုယ်တော်ဟ "ငါဟ အဆက်မုန့်ဖြစ်ဟယ်။ ငါ့နားကော် လာတဲ့လူတိုင်းဟ ဆာလောင်တော့မဲင်မဟုတ်ဘူး။ ငါ့ကော် ယုံကြည်ဆမားတေဟလဲ ရေငတ်ဟာကော် ခံစားရတော့မှာမဟုတ်ဘူး။ 36ဟဲင်းပေမဲ့ သင်တော့ကော် ငါဆိုဟာဟ၊ သင်တော့ဟ ငါ့ကော် မြင်နေတောင် မယုံကြည်ကြဘူး။ 37အဖဘုရားရှင်ဟ ငါ့ကော် ပေးအပ်ထားတော်မူတဲ့ လူအပေါင်းတော့ဟ ငါ့နားကော် လာကြလိမ့်မဲင်ဖြစ်မောက် ငါဟဖယ်အခါမှ ဟဲင်းလူတေကော် အဝေးကော် စေလွှတ်မဲင်မဟုတ်ဘူး။ 38စာလောက်ဟားဆိုခါ ငါဟ ငါ့ရဲ့အလိုတော်ကော် ဆောင်ရွက်ဖော့ မဟုတ်ပဲ ငါ့ကော် စေလွှတ်တော်မူတဲ့ အရှင်ရဲ့အလိုတော်ကော် ဆောင်ရွက်ဖော့ ရွှေမြို့တော်ဟ ဆင်းလာဟာဖြစ်ဟယ်။ 39ပြီးခါ ငါ့ကော်စေလွှတ်တော်မူတဲ့ အရှင်ရဲ့အလိုတော်ဟ ငါ့နား အရှင်ပေးထားတော်မူတဲ့လူတေထဲဟ မဆူ့ကော်မှ ဆုံးရှုံးခံမဲင်မဟုတ်ပဲ နောက်ဆုံးသောနေ့မှာ ဟဲင်းလူတေကော် ပ္လန်မောက် ရှင်သန်ထမြောက်စေဖော့ ဖြစ်ဟယ်။ 40စာလောက်ဟားဆိုခါ အဖဘုရားရှင်ရဲ့အလိုတော်မှာ ဆားတော်ကော်မြင်မောက် ဆူ့ကော် ယုံကြည်ဆမားတိုင်း နိစ္စထာဝရအဆက်ရရှိဖော့ဖြစ်မောက် ငါဟလဲ ဟဲင်းလူတေကော် နောက်ဆုံးသောနေ့မှာ ပ္လန်လည်ရှင်သန်စေမဲင်ဖြစ်ဟယ်" လောက် မိန့်တော်မူလေဟယ်။ 41ပြီးခါ ဂျူးလူမျိုးတေဟ "ငါဟ ရွှေမြို့တော်ဟနေ ဆင်းလာတဲ့မုန့်ဖြစ်ဟယ်" လောက် ကိုယ်တော်မိန့်တော်မူဟာကော် မကျေမနပ်ဖြစ်ကြလေဟယ်။ 42ဟဲင်းကြောင့် ဆူ့တော့ဟ "အဲလူဟ ယောသပ်ရဲ့ဆားယေရှုမဟုတ်ဝါး။ ဆူ့မဲ့နဆူ့ဖကော် ငါတော့ဆိပါဟယ်။ အဲလူဟ 'ငါဟ ရွှေမြို့တော်ဟနေလာဟာ' ဆိုမောက် စာလောက်ပြောနေရဟား" ဆိုမောက် ကဲ့ရဲ့ပြစ်တင်နေဟယ်။။ 43ကိုယ်တော်ယေရှုဟ "သင်တော့အချင်းချင်းကြားမှာ မကျေမနပ်ပြောဆိုမနေကြနဲ့။ 44ဘုရားရှင်အလိုတော်ရှိဆမားတေဟပဲ ငါ့နားကော် လာနိုင်ကြမှာဖြစ်ဟယ်။ ငါဟ အဲလူတေကော် နောက်ဆုံးသောနေ့မှာ ပ္လန်လည်ရှင်သန်စေမှာ ဖြစ်ဟယ်။ 45အရိယာဆူတော်စင်တေရဲ့ကျမ်းတေမှာ 'လူအပေါင်းတော့ဟ ဘုရားရှင်ရဲ့သွန်သင်တော်မူခြင်းကော် ခံကြရဟယ်' လောက် ရေးဆားထားတဲ့အတိုင်း အဖဘုရားရှင်နားမှ ကြားရ၊ မြင်ရတဲ့လူအပေါင်းတော့ဟ ငါ့နားကော်လာကြဟယ်။ 46အဲဟာဟ အဖဘုရားရှင်ကော် တစ်ယောက်ယောက်ဟ မြင်ခဲ့ရပြီလောက် ဆိုလိုဟာမဟုတ်ဘူး။ ဘုရားရှင်နားဟနေ လာတဲ့လူတစ်ယောက်တည်းဟပဲ အဖဘုရားရှင်ကော် မြင်ဖူးဟယ်။ 47ငါအမှန်တိုင်းပြောရခါ ငါ့ကော် ယုံကြည်ဆမားဟ နိစ္စထာဝရအဆက်ကော် ရကြဟယ်။ 48ငါဟပဲ အဆက်မုန့်ဖြစ်ဟယ်။ ။ 49သင့်တော့ရဲ့ဖိုးဖေးတေဟ တောကန္တာရမှာ မန္နမုန့်ကော် စားကြလယ်ဝ ဆေခဲ့ကြဟယ်။ 50ဟဲင်းပေမဲ့ခုမုန့်ဟ ရွှေမြို့တော်ဟလာတဲ့မုန့်ဖြစ်ညောင်း နည်းနည်းလေးပဲ စားတဲ့လူတောင်မှ ဆေခြင်းကော် ရောက်မှာမဟုတ်ဘူး။ 51ငါဟ ရွှေမြို့တော်ဟနေ ဆင်းလာတဲ့ အဆက်မုန့်ဖြစ်မောက် အဲမုန့်ကော် စားတဲ့လူမဆူ့ညင်းညင်း ထာဝရအဆက်ရှင်လိမ့်မဲင်ဖြစ်ဟယ်။ ငါပေးတဲ့မုန့်ဟ လောကီလူဆားတေရဲ့အဆက်အတွက် စွန့်ကြဲတဲ့ငါ့ရဲ့အဆားပဲဖြစ်ဟယ်" လောက် မိန့်တော်မူဟယ်။ 52ဟဲင်းခါ ဂျူးလူမျိုးအကြီးအကဲတေဟ "အဲလူဟ ဆူ့ရဲ့အဆားကော် ငါတော့စားဖော့ ဖယ်လဲပေးနိုင်မဟား" လောက် အချင်းချင်းငြင်းခုံကြဟယ်။ 53ကိုယ်တော်ယေရှုဟ ဆူ့တော့ကော် "ငါအမှန်တိုင်းပြောရခါ လူ့ဆားတော်ရဲ့အဆားကော်မစား၊ အဆွေးကော် မဆောက်ပဲခါ သင်တော့မှာ စစ်မှန်တဲ့အဆက်တာကော် ရရှိကြမှာ မဟုတ်ဘူး။ 54ငါ့အဆားကော်စားမောက် ငါ့အဆွေးကော် ဆောက်ဆမားတိုင်းဟ ထာဝရအဆက်ရှင်ခြင်းကော် ရမောက် ဟဲင်းလူတေကော် ငါဟ နောက်ဆုံးသောနေ့မှာ ပ္လန်လည်ရှင်သန်စေမဲင်ဖြစ်ဟယ်။ 55စာလောက်ဟားဆိုခါ ငါ့ရဲ့အဆားဟ စစ်မှန်တဲ့စားစရာဖြစ်မောက် ငါ့ရဲ့ဆွေးဟ စစ်မှန်တဲ့ဆောက်စရာဖြစ်ဟယ်။ 56ငါ့ရဲ့အဆားကော် စားမောက် ငါ့ရဲ့အဆွေးကော် ဆောက်ဆမားတေဟ ငါနအတူတူရှိမောက် ငါဟလဲ ဟဲင်းလူတေန အတူတူရှိမဲင်။ 56အဆက်ရှင်တော်မူတဲ့ အဖဘုရားရှင်ဟ ငါ့ကော် စေလွှတ်တော်မူမောက် အဖဘုရားရှင်ကြောင့် ငါဟလဲ အဆက်ရှင်ဟယ်။ အဲလဲပဲ ငါ့အဆားကော် စားတဲ့လူတေဟ ငါ့ကြောင့်အဆက်ရှင်မှာပဲ ဖြစ်ဟယ်။ 57အဆက်ရှင်တော်မူတဲ့ အဖဘုရားရှင်ဟ ငါ့ကော် စေလွှတ်တော်မူမောက် အဖဘုရားရှင်ကြောင့် ငါဟလဲ အဆက်ရှင်ဟယ်။ အဲလဲပဲ ငါ့အဆားကော် စားတဲ့လူတေဟ ငါ့ကြောင့်အဆက်ရှင်မှာပဲ ဖြစ်ဟယ်။။ 58အဲမုန့်ဟ ရွှေမြို့တော်ဟနေ ဆင်းလာတဲ့မုန့်ဖြစ်ဟယ်။ သင်တော့ဖိုးဖေးတေစားဆောက်ခဲ့မောက် ဆေဟားတဲ့မုန့်သလဲ မဟုတ်ဘူး။ ဟဲင်းမုန့်ကော် စားတဲ့လူဟ ထာဝရအဆက်ရှင်မှာပဲဖြစ်ဟယ်" လောက် မိန့်တော်မူလေဟယ်။ 59ကိုယ်တော်ဟ ကပေရနောင်မြို့မှာ သွန်သင်တော်မူနေချိန် အဲအကြောင်းအရာတေကော် ဂျူးဓမ္မာရုံdမှာ ဟောပြောခဲ့ဟာဖြစ်ဟယ်။ 60ကိုယ်တော်ယေရှုရဲ့တပဲ့တော်အများစုဟ ဟဲင်းဟောပြောချက်ကော် ကြားခါ "အဲစကားတေဟ လက်ခံနိုင်ဖော့ခက်ခဲညောင်း မဆူ့ဟလက်ခံနိုင်မဟား" လောက် ဆိုကြလေဟယ်။ 61ကိုယ်တော်ရဲ့သတင်းစကားတေကော် တပဲ့တော်တေဟ ဝေဖန်နေကြကြောင်းကော် ကိုယ်တော်ယေရှုဆိတော်မူဟယ်။ ဟဲင်းကြောင့် ကိုယ်တော်ယေရှုဟ "ငါပြောတဲ့သတင်းစကားဟ သင်တော့ရဲ့ယုံကြည်ခြင်းကော် ပျက်စေဟာလား။ 62ဟဲင်းလဲဆိုခါ လူ့ဆားတော်ဟ ဆူလာခဲ့တဲ့နေရာကော် ပ္လန်လည်ကြွတော်မူဟာကော် သင်တော့မြင်ခါ ဖယ်လဲဖြစ်မဟား။ 63ဉာဏ်အလင်းတော်ဟ အဆက်ကော်ပေးထားဟာဖြစ်ဟယ်။ လူတေရဲ့ခွန်အားဟ ဖယ်အရာကော်မှ မလုပ်နိုင်ဘူး။ ငါပြောတဲ့စကားတေဟ ဉာဏ်အလင်းတော်ဟနေ ဆင်းလာဟာဖြစ်မောက် သင်တော့ကော် အဆက်ပေးထားဟာဖြစ်ဟယ်။ 64ဟဲင်းပေမဲ့လဲ သင်တော့ထဲမှာ မယုံကြည်ပဲဆမား တချို့ရှိဟယ်" လောက် မိန့်တော်မူဟယ်။ ကိုယ်တော်ယေရှုဟ မဆူ့ဟ ယုံကြည်ခြင်းကင်းမဲ့မောက် မဆူ့ဟ ဆူ့ကော် သစ္စာဖောက်မဲင်ဆိုဟာကော် အစခါစ ဆိနေဟယ်။ 65ကိုယ်တော်ဟ "အဲအကြောင်းကြောင့် အဖဘုရားရှင်အလိုတော်မရှိပဲလောက်ရှိခါ မဆူ့မှ ငါ့နား မလာနိုင်ဟာကော် သင်တော့ကော် ငါမိန့်ဆိုခဲ့ဟာဖြစ်ဟယ်" လောက် မိန့်တော်မူဟယ်။ 66ဟဲင်းအကြောင်းတော့ကြောင့် တပဲ့တော်တေထဲမှ အများစုဟ ထွက်ဟားကြမောက် ကိုယ်တော်နအတူ လိုက်ပါခြင်းမရှိကြတော့ပေ။ 67ပြီးခါကိုယ်တော်ယေရှုဟ တပဲ့သာဝကe ဆယ့်နှေယောက်ကော် "သင်တော့လဲ ထွက်ခွာချင်ကြလား" လောက် မေးတော်မူခါ 68ရှိမုန်ပေတရုဟ "အရှင်၊ ကျွန်ုပ်တော့ဟ မဆူ့နားကော် ဆွားရမဟား။ နိစ္စထာဝရအဆက်နဆိုင်တဲ့ စကားတေဟ ကိုယ်တော်နားမှာပဲ ရှိပါဟယ်။ 69ကိုယ်တော်ဟ ဘုရားရှင်နားဟနေလာတဲ့ ခရစ်တော်ဆိုတဲ့ မြင့်မြတ်တဲ့အရှင်ဖြစ်ဟာကော် ကျွန်ုပ်တော့ ယုံကြည်ကြပါဟယ်" လောက် လျှောက်တင်လေဟယ်။ 70ကိုယ်တော်ဟလဲ "သင်တော့ဆယ့်နှေယောက်ကော် ငါကိုယ်တိုင်ရွေးချယ်ခဲ့ဟာမဟုတ်လား။ ဟဲင်းပြင်သင်တော့ထဲမှ တစ်ယောက်ဟလဲ မကောင်းဆိုးဝါးတစ်ယောက်ဖြစ်ဟယ်" လောက် မိန့်တော်မူဟယ်။ 71အဲဟာဟ ရှိမုန်ရှကာရုတ်ရဲ့ဆား ယုဒရှကာရုတ်f ကော် ရည်ညွှန်းမောက် မိန့်တော်မူဟာဖြစ်ဟယ်။ ဆူ့ဟ တပဲ့သာဝက ဆယ့်နှေယောက်ထဲမှ တစ်ယောက်ဖြစ်မောက် ကိုယ်တော့်ကော် သစ္စာဖောက်မဲ့လူဖြစ်ညောင်းဖြစ်ဟယ်။
S'ha seleccionat:
John 6: INT
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
This translation of the Intha NT is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.