Matayo 23
23
Yeesu akalihira abigiriza b'amarhegeko n'aBafarisaayo.
Mariko 12.37-40; Luuka 11.39-52; 20.45-47
1Enyuma z'ebyoola, Yeesu aj'abwira echigusho ch'abantu n'abigirizwa baage ntya: 2«Abigiriza b'amarhegeko n'aBafarisaayo bahabirwe akaasi k'okuyigiriza abantu amarhegeko ma Muusa. 3Cho girhumire, muhemerwe kulema mwabakenga n'ogukulikira byooshi balema bababwira.
«Aliko, murhalemaga mwakulikira ebijiro byaabo, kwenge ebi banaderha, birhali bibanajira. 4Banashanira abandi emizigo elemeerere n'okubahesa yo oku birhugo, aliko boowe barhakagala chiro guhira ko omudoke gwabo. 5Byooshi banalema bajira, banabijira yi babonekane embere z'abantu. Boowe banagalihya orhusanduku banashwekera oku malanga changwa oku maboko. 6Omu dinye, basiima kuyikala oku bichumbi by'olukengo. N'omu masinagoogi maabo, basiima kuyikala oku bichumbi by'embere. 7Na ntyo, banalema basiima abantu baleme babalamusa n'obukenge ahantu h'enshimanaano n'oguhamagalwa ‹Mwigiriza!›
8«Aliko mwabo, murhalemaga mwayemera guhamagalwa ‹Mwigiriza!›. Kwenge mweshi muli baguma, munagwerhe mwigiriza muguma yenyine. 9Na ntyo, muno gulu murhalemaga mwahamagala omuntu yeeshi ntya: ‹Daarha›, kwenge mugwerhe Sho muguma yenyine, oli omu mpingu. 10Murhalemaga mwayemera babahamagala ntya: ‹Waliha!›, kwenge mugwerhe mukulu muguma yenyine, ye Kirisitu. 11Leero, oli mukulu mu mwabo, bihemere abe mukozi wenyu. 12Ngasi yeeshi ochikuuza, nj'ayandagazwa. Aliko ochiyandagaza yeewe, nj'akuuzwa.»
Obulyaalya bw'abigiriza b'amarhegeko n'aBafarisaayo
Mariko 12.40; Luuka 11.39-52; 20.45-47
13«Buhanya emwenyu mwe bigiriza b'amarhegeko neenyu Bafarisaayo. Mwabo muli ndyaalya! Mulimwachingira abantu enjira y'okuja omu Bwami bw'empingu, noobo mwabo mwenyine murhaja mo. N'amango abantu yibashonda kuja mw'obo Bwami, mwabo muli mwababuza.
14[«Buhanya emwenyu mwe bigiriza b'amarhegeko n'aBafarisaayo, mwe ndyaalya mwe! Munalya ebikulo by'abashumbakazi n'ogusaliira amasaala maleehere y'abantu bababone. Elugulu w'ebyoola, obuhane bwenyu nji bwaba bunene kulusha.]#23.14 Olu lukere lurhali omu bitaabu binene bya miira.
15«Buhanya emwenyu, mwe bigiriza b'amarhegeko n'aBafarisaayo. Mwabo muli ndyaalya! Muli mwazungula egulu lyooshi chiro n'okuyambuka enyanja, yi mujire chiro muntu muguma kuba w'echigusho chenyu. Oyo muntu, mukamubona, munamujira kuba okwaneene guhanwa kabiri kubalusha eyo kuzimu.
16«Buhanya emwenyu, mwe barhegesi, muli mpumi! Munaderha ntya: ‹Nk'omuntu ajirire endahiro kulengera eziino ly'eNju ya Nnamahanga, eyo ndahiro ntaacho emalire. Aliko nk'ajirire endahiro kulengera eziino ly'ehooro eri elugulu w'eyo Nju ya Nnamahanga, oyo muntu akweneene gukola gukulikirana n'endahiro yaage.› 17Mwabo muli bihwinja na kandi muli mpumi! Gichi chiri ch'akamaro kulusha echindi, k'ehooro eri kw'eyo Nju ya Nnamahanga changwa eNju ya Nnamahanga yonyine? Eyo Nju yerhumire eyo hooro yacheeswa! 18Na kandi muli mwaderha ntya: ‹Nk'omuntu ajirire endahiro oku ziino ly'entuuliro, nta bubi. Aliko nk'ajirire endahiro oku ziino ly'entuulo eri kw'eyo ntuuliro, akwaneene gukola gukulikirana n'endahiro yaage.› 19Mwe mpumi! Gichi chiri ch'akamaro kulusha echindi? K'entuulo changwa eyo ntuuliro yenarhuma eyo ntuulo yacheeswa? 20Cho girhumire, amango omuntu ajirire endahiro oku ziino ly'entuuliro, eri amanajira endahiro n'oku byooshi biri elugulu wa yo. 21N'ojirire endahiro oku ziino ly'eNju ya Nnamahanga, amajira endahiro kw'eyo Nju ya Nnamahanga, amanajira endahiro oku ziino lya Nnamahanga oli mw'eyo Nju. 22N'olaala ojira endahiro oku ziino ly'empingu, eri ajirire endahiro oku ziino ly'entebe y'echaami ya Nnamahanga, n'oku ziino lya Nnamahanga oyikeere ko.
23«Buhanya emwenyu mwe bigiriza b'amarhegeko nenyu Bafarisaayo! Mwabo muli ndyaalya! Munarhuula chiguma ch'ekumi ch'ebirhi by'obulunge. Aliko muli mwaleka ebintu biri by'akamaro omu Rhegeko, nka kujira ebikwaneene embere za Nnamahanga, ogufiira abandi obonjo n'ogurhahemukira abandi. Ebyo bimwalikwaneene kujira buzira kuleka ebyo bindi. 24Mwe barhegesi mpumi! Munashongoola esuusi omu menji menyu m'okunywa, aliko mwanamira engamiya.
25«Buhanya emwenyu mwe bigiriza b'amarhegeko nenyu Bafarisaayo! Mwabo muli ndyaalya! Munacheesa emugongo gw'egumbu n'embale, aliko omu byo muyunjwire ebintu mwabonaga omu bwizi n'enyifinjo zenyu zibi. 26Wooyo Mufarisaayo mpumi! Orhange gucheesa omu ngumbu, na ntyo emugongo gwayo gwanacheeswa.
27«Buhanya emwenyu mwe bigiriza b'amarhegeko nenyu Bafarisaayo! Mwabo muli ndyaalya! Mushushanyizwe nka shinda zishigirwe eshwagara. Ezo shinda, zinabonekana zikwirire embuga, gasi omu zo muyunjwire amagufa m'abafu n'ebindi bintu bibolere. 28Nenyu ntyo ku muli. Mubonekana embere z'abantu nka bantu bakwaneene. Aliko muyunjwire obulyaalya n'obubi.
29«Buhanya emwenyu mwe bigiriza b'amarhegeko nenyu Bafarisaayo! Mwabo muli ndyaalya! Munayumbakira eshinda z'abaleebi, n'oguhira obulimbi oku shinda z'abantu bakwaneene. 30Kandi muli mwaderha ntya: ‹Nka rhwalamaga omu mango ma bashookuluza beerhu, rhurhakajirire akalengane haguma nabo k'ogusheesha eshagama y'abaleebi.› 31Omu kuderha ntyo, mwayerekeene mwenyine oku muli baana b'abantu basheshaga eshagama y'abaleebi. 32Mujaage mwagendekeza n'okuyuusa akaasi bashookuluza benyu barhonderaga! 33Mwabo muli buuko bw'enjoka! Gurhe mwakagala gufuma obuhane bw'omuliro gw'esiku n'amango? 34Cho girhumire, nji nabarhumira abaleebi n'abantu b'obwenge n'abigiriza b'amarhegeko. Mwayirha baguma omu bo, mwabamba abandi oku misalaaba, mwashurha n'abandi enkoni omu masinagoogi menyu n'okubalibisya mu ngasi gishagala. 35Mumenye oku eshagama y'abantu booshi bakwaneene bayirhwaga omu gulu buzira bubi, nji yaaba oku marhwe menyu. Oko kuyirhwa kwarhondereraga oku Abeeli waliiri muntu w'okuli guhika okuyirhwa kwa Zakariya, mwene Barakiya, mwayirhiraga omu Nju ya Nnamahanga ahagarhi k'ahantu hatagatiifu n'aha entuuliro.#23.35 Osome Murhondero 4.8; 2 eByaliiri kujirika 24.20-22. 36Okuli mbabwirire oku ebi binwa byooshi byaaba oku rhwe ly'abantu ba chino gisisi.»
Yeesu alirira aBanyayerusaleema
Luuka 13.34-35
37«aBanyayerusaleema, aBanyayerusaleema! Mwabo munayirha abaleebi n'okubabanda amabaale bala Nnamahanga anabarhumira. Hanene nalishondere kubagusha nka kula engoko egusha ebyaana byaayo omu byuubi, aliko mwabo murhashondaga! 38Mumenye bwinja oku enju yenyu yalekwa mushaka. 39Mbabwirire oku gurhengera zeene murhagachimbona ko guhika amango nji mwaderha ntya: ‹Agishirwe oyuula oyinjire oku ziino lya Nnaweerhu!›#23.39 Osome Nanga 118.26.»
S'ha seleccionat:
Matayo 23: HAV
Subratllat
Comparteix
Compara
Copia
Vols que els teus subratllats es desin a tots els teus dispositius? Registra't o inicia sessió
©️2025 The Seed Company, Association de Traduction de la Bible et Alphabétisation (ATBA), and the Comittee de Langue Havu