Matayo 16
16
aBafarisaayo n'aBasadukaayo bahema Yeesu echimenyeso
Mariko 8.11-13; Luuka 12.54-56
1Lusiku luguma aBafarisaayo n'aBasadukaayo bahikira Yeesu yi bamugeregeze. Bamuhema abajirire echimenyeso chiyerekene oku obuhashe bwage okuli burhengereere empingu.
2Yeesu abashubiza ntya: «Omu bishanji by'egolo, munaderha ntya: ‹Ebichu bidukwire, omuseezi, lwaba lusiku lwinja.› 3N'omu bishanji by'eseezi munaderha ntya: ‹Ebichu byayiragwire, zeene envula yarhoga.›
«Munamenya ebishanji amango mubwene ebichu. Leero, zino siku muli mo, gurhe murhazimenyere? 4Abantu b'echi gisisi bali babi kandi banali ndyaalya embere za Nnamahanga! Bali bahema echimenyeso, aliko nta chimenyeso bayerekwa girhali chila ch'omuleebi Yoona.» Oku buzinda, Yeesu abaleka anachigendera.
Echachu y'aBafarisaayo n'aBasadukaayo
Mariko 8.14-21
5Amango abigirizwa ba Yeesu bayambukaga enyanja, baliiri bayibirire guheeka emigati. 6Yeesu ababwira ntya: «Mube hoobwe! Muchilange n'echachu#16.6 Echachu eba shaano baalagaliza oku shaano y'ogukwiza emigati, y'erhunda. y'aBafarisaayo n'aBasadukaayo.»
7Abo bigirizwa barhondera kubwirana ntya: «Aderhere ntyo kwenge rhurhaleerhere emigati.»
8Yeesu amenya ebyoola baliiri babwirana. Echo charhuma ababwira ntya: «Munali bantu b'obwemeezi bugeeke! Gurhe muli mwachiderhesa oku murhagwerhe migati? 9Ka murhanaza kumenya? Ka murhayibukire bala bantu bihumbi birhaano, gurhe bayugurhaga ela migati erhaano, na rhurhanda rhunga rhw'emisigala mwagushaga? 10Changwa murhayibukire kandi bala bantu bihumbi bine nabo, gurhe bayugurhaga ela migati mushanvu, na rhurhanda rhunga rhw'emisigala mwagushaga? 11Bulaala gurhe mukengereere oku ebi naliiri naderha biyerekeere emigati? Naliiri nababwira oku muchilange n'echachu y'aBafarisaayo n'aBasadukaayo.»
12Abigirizwa baja bamenya oku arhaliiri ababwira bachilange n'echachu y'emigati, sy'aliko aliiri ababwira bachilange n'enyigirizo z'aBafarisaayo n'aBasadukaayo.
Petero aderha oku Yeesu ye Kirisitu
Mariko 8.27-30; Luuka 9.18-21
13Yeesu abeere ahika olunda lw'eKayizariya Firipi, abaza abigirizwa baage ntya: «Gurhe abantu bali baderha oku nyoono Mwene oMuntu ndi nde?» 14Bamushubiza ntya: «Baguma bali baderha oku wooyo oli Yohaana Mubatiiza, n'abandi bali baderha oku wooyo oli Eliya, n'abandi bali baderha oku wooyo oli Yeremiya changwa muguma w'omu baleebi ba miira.»
15Yeesu aja ababaza ntya: «Nenyu muli mwaderha oku nyoono ndi nde?»
16Simooni Petero amushubiza ntya: «Wooyo oli Kirisitu, Mugala wa Nnamahanga Ozeene.» 17Yeesu ava amubwira ntya: «Simooni mwene Yoona ogishirwe, kwenge nta muntu wakubishuliire ogu mwazi arhali Daarha oli omu mpingu. 18Naani nkubwirire okw'oli Petero, kuli kuderha baale. Na ku linoola baale kunayumbaka echigusho ch'abemeezi baani booshi. N'echo chigusho, obuhashe bw'ekuzimu burhakachihima. 19Nji naguha efunguulo z'oBwami bw'empingu. Byooshi nji waaba oli walahira omu gulu, Nnamahanga naye nj'aba ali abilahira. Na byooshi nji waaba wayemereere omu gulu, Nnamahanga naye nj'abiyemeera.»
20Oku buzinda, Yeesu abuza abigirizwa baage oku nta muntu babwirage oku yeewe ye Kirisitu.
Yeesu aderha elugulu w'ogufa n'ogufuuka kwage
Mariko 8.31; 9.1; Luuka 9.22-27
21Gurhengera mw'amo mango, Yeesu arhondera kubwira abigirizwa baage bwinjabwinja okw'akwaneene kuja eYerusaleema. N'eyo munda abashamuka b'aBayaahudi n'abakulu b'abadaahwa n'abigiriza b'eRhegeko bamulibuza bweneene. N'oku buzinda ayirhwa, n'olusiku lwagasharhu afuuka.
22Petero ava aheeka Yeesu eburhambi n'ogurhondera kumukalihira ntya: «Nnaweerhu, Nnamahanga akulange! Ebyo birhaguhikira chiro n'ehityu!» 23Aliko Yeesu ahindamuka n'okumubwira ntya: «Wooyo Shetaani! Rhenga haburambi bwani, oshondere kungeregeza, kwenge enkengeero zaawe zirharhengeere emwa Nnamahanga, sy'aliko ziri z'omuntu.»
24Yeesu ava abwira abigirizwa baage ntya: «Akaba omuntu ashondere kunkulikira, agihakane yenyine, aheeke omusalaaba gwage anankulikire. 25Bulaala omuntu oshondere guchungula akalamo kaage nj'agaheza. Aliko olaala wahaana akalamo kaage elugulu waani, nj'ashuba gukabona. 26Kali kamaro gachi omuntu kugwarha ebintu byooshi by'egulu aliko aheze akalamo kaage? Na chintu gichi omuntu akagala kandi guhaana y'achungule akalamo kaage?
27«Kwenge nyoono Mwene oMuntu nji nayinja omu bukuuze bwa Daarha haguma na bamalahika baage. Nji nanahemba ngasi muntu gukulikirana n'ebijiro byaage#16.27 Osome Nanga 62.13.. 28Okuli mbabwirire oku baguma mw'aba bantu bali hano, barhagafa barhanaza kubona gurhe nyoono Mwene oMuntu ndi nayinja nka Mwami.»
S'ha seleccionat:
Matayo 16: HAV
Subratllat
Comparteix
Compara
Copia
Vols que els teus subratllats es desin a tots els teus dispositius? Registra't o inicia sessió
©️2025 The Seed Company, Association de Traduction de la Bible et Alphabétisation (ATBA), and the Comittee de Langue Havu