Bikoluwa ndia Bhakwenda 26
26
Paulo nakyetonganabe kei̱soa Agu̱li̱pa
1Du̱mbi̱ sali̱a Agu̱li̱pa nakingia Paulo bhiyo; “Nikubhali̱sani̱ kwetonganabe.” Paulo nakibhudakisa bhakpa ndibhabhi̱ ka si̱dha-si̱dhana na kibhoko nakigia bhiyo; 2“Sali̱a Agu̱li̱pa, nili na dhedhelua lelu telema kei̱soako ka kwetonganabe nanga musango ndia Bhayu̱daya bhani̱bi̱si̱be, 3nanga ni̱hi̱bi̱ nesi̱ anduwe mindio oi̱bi̱ kulungi asi̱li̱ sa di̱ni̱ ndia Bhayu̱daya na kima ndie bhikiki bhalianaga. Ti̱-no nikibhukunga eti bhunipe bwile ka okianami.”
4Bhayu̱daya poni bhai̱bi̱ bhu̱li̱ki̱ ndiamo ninilia mi̱ki̱ ka nsi ndiamo Ki̱li̱ki̱ya na ka Yelusalemu. 5Bhai̱bi̱a toli̱ bhakitoka pesi̱li̱ami bwakai̱so kabha nibhakabhi eti ni̱bhi̱ ka kpata ndia Bhafali̱sayo toli̱ yeni̱li̱kaga ninigbei̱ si̱ni̱ kilagilo ndia Mambombi̱ ampesi̱a Musa tukilia kala. 6No nili ka koti̱ endindi nanga nili na nihila ka ndia Mambombi̱ abhulaki̱sana bhatatasu̱. 7Ntu̱la komi̱ na bhali poni ndia bhakpa ndibhabho ali na nihila eti Mambombi̱ ada ki̱bhu̱hu̱mbu̱la bhenjo ndibha bhaku̱wa nesi̱ abhulaki̱sana bhatatabho, akidhuaga ndu̱lu̱ bhepesiaku̱ lami̱a Mambombi̱ tolo poni. Sali̱a Agu̱li̱pa, nihila yoho adhu̱ ndu̱lu̱ Bhayu̱daya bhehe nibhakininyegela. 8Bhayu̱daya ndibho bhuli mehe, andiki ndia adhu̱ nibhukukoma hi̱ki̱li̱za eti Mambombi̱ aki̱bhu̱hu̱mbu̱laga ndibha bhaku̱wo?
9“Nemi yeni̱hi̱ki̱li̱zaga eti nikitoka hakani̱za Yesu mindia ka tau̱ni̱ ndia ka Nazaleti̱. 10Toli̱ injo nikola ndu̱lu̱ ka Yelusalemu. Ka mani̱ ndia bhabhembi̱ bhangbeku ndibha Mambombi̱, nibhu̱bi̱sa bhakpa ndibha bhamu̱hi̱ki̱li̱zi̱ Yesu ka nkomo toli̱ nibhakibhucuelia musango sa ku̱wa, nemi ninikibhala. 11Yeni̱lagiliaga eti bhabhufubililie ka Ndabho kindia Bhayu̱daya yabhalami̱li̱aga andu̱lu̱ bhankome Yesu. Yeni̱yaga ka kyalo ndia Bhakpa ndibha kali Bhayu̱daya eni̱sabho bhu̱su̱ nanga hi̱ki̱li̱za Yesu.” 12“Injo adhua ndu̱lu̱ ni̱ni̱ki̱ya ka Damasi̱ko na mani̱ na kilagilo tukai̱ ka bhabhembi̱ bhangbeku ndibha Mambombi̱ ndia akinibhali̱sana gba bhai̱ki̱li̱za. 13Bhia saha nkaga ndia ntangali, sali̱a Agu̱li̱pa ninilia ka nesi̱yo na bhadami, kubha ndia akoli̱ mani atuka gulu naki̱ki̱zi̱ga kindie ki̱bhi̱o. 14Bhesu̱ poni ki̱gu̱wa gwabhi̱mba, du̱mbi̱ ninikioka nkpa nakinigia ka Kuhebbulania eti, Saulo, Saulo, olika eni̱sami bhu̱su̱ nangeki? Kali na mugaso uwe lwani̱sa bhai̱ki̱li̱za.
15“Du̱mbi̱ ninikiolu̱li̱a bhiyo; ‘Anduwe ani, Sali̱a?’ ”
Sali̱a naki̱nsi̱ki̱aku̱ bhiyo; “Andimi Yesu, mindia olika eni̱saki bhu̱su̱. 16Ome, nikuenikiliania bhuwako bhia nkoli̱ mindiamo toli̱ kai̱so sa kima ndio otangi̱o na ndio odakutangia. 17Kikibhala bhakpa ndibha ka Isaleli̱ na Bhakpa ndibha kali Bhayu̱daya kolako zidhi. Nili katikako kindia Bhakpa ndibha kali Bhayu̱daya 18oku̱dhabho i̱so na dhua nibhakituka ka ki̱li̱mi̱ki̱aga andu̱lu̱ bhatangie bemu, bhuwabho ka mani̱ ndia sitani bhasi̱ki̱e ka mani̱ ndia Mambombi̱ du̱mbi̱ Mambombi̱ akibhugani̱li̱a kibi ndiabho toli̱ bhabhe ka bhakpa ndibha bhawelikani̱o nanga hi̱ki̱li̱zami.”
19Du̱mbi̱ Paulo nakitodha nakigia bhiyo; “Sali̱a Agu̱li̱pa, kikoma ndia anienikiliana tukai̱ gulu. 20Niteketa ninikitebeza ka Damasi̱ko du̱mbi̱ ka Yelusalemu na ka Yu̱deya poni toli̱ ninikibhutebezabe Bhakpa ndibha kali Bhayu̱daya ninikibhugia eti bhoponi bhesi̱ki̱eku̱ kibi ndiabho, bhasi̱ki̱e kindia Mambombi̱ toli̱ bhakole kima ndiaki ani̱sa nesi̱ bhesi̱ki̱ku̱. 21Bemoti̱ ka Bhayu̱daya nibhakinigbelia ka Hekalo toli̱ nibhakikabha olami nanga nitebeza bhinjo. 22No Mambombi̱ anikoni̱a doi̱sa tolo yoho, nitelemi̱ mehe tolianu̱ mazima bhenu̱ poni bhatua ngu̱ko na ndibha bhakali na ngu̱ko. Kikiegesaga kima ndietolo poni bhuai̱be injo ndia bhanabbi̱ na Musa bhagia eti ada kienikana 23yabhagiaga eti Masiya bhada kimueni̱sa bhu̱su̱ toli̱ bhamuole, andiye mindia Mambombi̱ ada kiteketa hu̱mbu̱laki, akibhutolia Bhayu̱daya na Bhakpa ndibha kali Bhayu̱daya eti bhazunue toli̱ yoho ali bhia bemu kowabho.”
24Paulo nalia kyetonganabe bhinjo, Fesito nakimuongiliaku̱ namei̱si̱ laso bhiyo; “Paulo ogu si̱le nanga soma si̱ni̱.” 25Paulo naki̱nsi̱ki̱aku̱ bhiyo; “Kigu si̱le, ntua ngu̱ko si̱ni̱ Fesito, ndie nili katolianu̱ andi mazima toli̱ kali kima sa si̱le. 26Sali̱a Agu̱li̱pa ai̱bi̱ kima yoho ndie nili kaongai̱ ndie kili na bhoko nanga ni̱hi̱bi̱ nesi̱ kima yoho ai̱bi̱o toli̱ kima yoho bhakakolilia ka nsobho. 27Paulo nakingia sali̱a Agu̱li̱pa eti, ni̱hi̱bi̱ nesi̱ ohi̱ki̱li̱zi̱ ndia bhanabbi̱ bhahandika.”
28Du̱mbi̱ Agu̱li̱pa nakingia Paulo bhiyo; “Oi̱bi̱ eti okutoka liami dhaka ka bwile nke yoho nibhe Nku̱li̱si̱tayo?”
29Paulo naki̱nsi̱ki̱aku̱ bhiyo; “Ka bwile nke kedha mamadha, nikinsabaga Mambombi̱ eti uwe imamoti̱ na bhoponi ndibha bhaniokiani̱o lelu bhukubha bhaku̱li̱si̱tayo bhia emi no kikabhi̱ bhubhe bhanyankomo bhia emi.”
30Du̱mbi̱ Gavuna Fesito, Sali̱a Agu̱li̱pa na namaki Bbeleni̱ke na ndibhetolo bhatelema nibhakiolukana nibhaki̱ya. 31Ndia bhahu̱wa, bhatandika onga nibhakigia bhiyo; “Muluku miyo kakoli kima ndiaki dhuwa nibhakimuola kedha bi̱saki ka nkomo.” 32Andu̱lu̱ ndia Agu̱li̱pa angia Fesito bhiyo; “Muluku miyo ki̱bhi̱ kindwelia ambe ndia kaju̱li̱li̱a eti bhamu̱i̱se kindia Kai̱sali̱.”
S'ha seleccionat:
Bikoluwa ndia Bhakwenda 26: KWAMBA
Subratllat
Comparteix
Compara
Copia
Vols que els teus subratllats es desin a tots els teus dispositius? Registra't o inicia sessió
© Wycliffe Bible Translators, Inc., 2025