Ansa 23
23
1Ɗa baci vu da̱sa̱ngi kulyaꞋa
ilikulyaꞋa m mogono,
la̱na̱ ka̱ta̱ vu zuwaka n ili i na yi e kelime ka̱ nu.
2Avu kalyaꞋi ɗa baci,
ka̱na̱ ka̱ci ka̱ nu.
3Ka̱ta̱ vu yaꞋan mali mi ilikulyaꞋa yi uyoꞋo i ni ba,
adama a na i ma̱ya̱nsa̱ka̱ i ɗa.
4Ka̱ta̱ vu takacika ka̱ci ka̱ nu
a̱ kula̱nsa̱ udukuyan ba,
yongo n cicoꞋo vu suma kaꞋa,
5uciyi u nu wi ta̱ an manu,
adama a na u ci yaꞋan ta̱ evelyu,
ka̱ta̱ u imkpa tsu ka̱kuru.
6Ka̱ta̱ vu lyaꞋa ilikulyaꞋa i vuza vu ulyopi ba,
ka̱ta̱ vu yaꞋan mali mi ilikulyaꞋa yu uyoꞋo i ni ba,
7adama a na a̱yi vuza vu yoku ɗa
vuza vu na makyan dem wi ta̱
e kusheshe ilikulyaꞋa i yaꞋan ta̱ ikebe.
Wi ta̱ a kudana wu,<<LyaꞋa vu soꞋo.>>
Ama ka̱ɗu ka̱ ni ki lo n avu ba.
8Vi ta̱ a kushama i kenu i na vu lyaꞋi va,
ka̱ta̱ vu la̱nga̱sa̱ una̱ u nu.
9Ka̱ta̱ vu yaꞋan kadanshi n kalau ba,
adama a na wi ta̱ a kuyaꞋanka
kadanshi ko cicoꞋo ka̱ nu ulami.
10Ka̱ta̱ vu takpa urotu u kureꞋe
ku na ikaya i nu i zuwai ba
ko vu pasa vi isa kashina ka mkpaꞋan ba,
11adama a na ka̱shibi ke le, ki ta̱ n utsura,
wi ta̱ a kushamgba ka le.
12Zuwa ugboji a kadanshi ka̱ va̱,
vu zuwa atsuvu a kadanshi ke kuyeve.
13Ka̱ta̱ vu kpa̱ɗa̱ kugbara maku ba,
vu gbara yi baci n kalangu wi a̱ ku kuwa̱ ba.
14Gbara yi n kalangu,
adama a na vu wawa yi a̱ ukpa̱.
15Maku ma̱ va̱, vi baci n cicoꞋo a̱ ka̱ɗu ka̱ nu,
ka̱ɗu ka̱ va̱ ki ta̱ a kupana uyoꞋo,
16Punu a̱ ka̱ɗu ka̱ va̱
mi ta̱ a kuyaꞋan ma̱za̱nga̱,
una̱ u nu u dansa baci ili i na yi derere.
17Ka̱ta̱ vu yaꞋan cisheꞋe tsu vuza vu unushi ba,
ama ayin tutu vu yongo n ka̱ɗu
ko wovon u Vuzavaguɗu.
18Mayun ukeɗi wa̱ a̱pa̱Ꞌa̱ wi ta̱ kelime adama a̱ nu,
kpamu ukeɗi wa̱ a̱pa̱Ꞌa̱ nu wi o ko okpo gbani ba.
19Maku ma̱ va̱, vo okpo vuza vu cicoꞋo,
zuwa ka̱ɗu ka nu a uye u singai.
20Ka̱ta̱ vu gbaɓa ka̱ci ka̱ nu n osoꞋi ba,
ko aza a kulyaꞋa n a̱bunda̱i,
21adama na osoꞋi n a lyaꞋi n a̱bunda̱i i ta̱ o ko okpo aza a unambi,
vu okpo baci vuza vu kulyaꞋa n alavu koci
vi ta̱ o ku okpo a ku uka akari a akashi.
22Zuwa atsuvu vu panaka esheku a̱ nu,
a̱yi na u nekei nu wuma,
ka̱ta̱ vu goyo a̱na̱ku a̱ nu
a ayin a na u kutsai ba.
23La̱nsa̱ kamayun n cicoꞋo, kuyeve n ugbari.
24Esheku a maku mu usuɓi u ci yaꞋan ta̱ ma̱za̱nga̱,
yaba dem vu na wi n maku mo cicoꞋo u tsu pana ta̱ uyoꞋo u ni.
25Zuwa esheku nu n a̱na̱kpa̱ nu ma̱za̱nga̱,
yaꞋan a̱na̱ku a na a matsai nu a yaꞋan ma̱za̱nga̱.
26Maku ma̱ va̱, panaka mu,
yaꞋan a̱shi a̱ nu e ere uye u va̱,
27adama a na kashakanlai
ki ta̱ tsu kpenle ku uga̱vi,
vuka vu unambi u ma̱riki
wi ta̱ tsu kayinva ka atakaci a ku uwa.
28U tsu bopo ta̱ tsu vuza vu ma̱ga̱la̱ka̱,
a kuzuwa uma n a̱bunda̱i
okpo aza a unambi u ma̱riki.
29Yayi wi a malapa mu una̱?
Yayi wi a̱ una̱mgbuka̱tsuma̱?
Yayi wi n usa̱n ko ili?
Yayi wi n a̱shi a shili?
30Aza a na e geshei o kusoꞋo ma̱ra̱,
aza a na i a̱ kula̱nsa̱ ma̱ra̱ ma na a satarai.
31Ka̱ta̱ vu ka̱sukpa̱ ma̱ra̱ mo olo wu ba,
makyan ma na mi ushili,
makyan ma na vu enei maꞋa o mokoꞋo,
makyan ma na mi a kulaza o ogboroli.
32A ukocishi u ka̱na̱ kuluma yi an koko ko tsukono,
a mataɗaka an kudyaɓu.
33Ka̱ta̱ a̱shi a̱ nu a ka̱na̱ kene ili kakau,
ka̱ta̱ ka̱ɗu ka̱ nu ka̱ ka̱na̱ kusheshe kavama.
34Ka̱ta̱ vo okpo an vuma vu na wi alavu e mere ma mala,
a ivaꞋin a gaɗi vu mgbaganla m kpantsu.
35Ka̱ta̱ vu dana, a lapa mu ta̱, <<Ama n uka usa̱n ba,
a lapa mu ta̱ ama m pana n ɓa̱la̱ ba.
Wannai ɗa ma ku jimgba n soꞋo mo yoku.>>
©️2025 Language Development and Translation Initiative (LDTI)