Ansa 18
18
1Vuza vu na wi a̱ cija̱Ꞌa̱ n vuza ba,
u tsu la̱nsa̱ ta̱ u ciya̱ kulyaꞋa ku kelime ku ni koci,
u tsu iwan ta̱ n odoki a na i a singai.
2Kalau ka tsu pana uyoꞋo u ciya̱ kuyeve ba,
ama u tsu pana ta̱ uyoꞋo u dansa kusheshe ku ni koci.
3Ka gbani-gbani ka uwa ba ci,
ka̱ tsu tuka̱ ta̱ n kugoyi,
ukuna wu ka̱pa̱ɗi u tsu tuka̱ ta̱ n wono.
4Kadanshi ku una̱ u vuma, ki ta̱ an mini ma̱ uga̱vi,
cicoꞋo tankpamu ci ta̱ an kuyene ku na ki e kuyene.
5U gaꞋan vu yaꞋanka vuma vu gbani-gbani kasingai ba,
ko vu kpa̱ɗa̱ kuyaꞋanka vuza vu babu unushi afada a usuɓi ba.
6Kadanshi ku una̱ u kalau ko tsu ronoko yi ta̱ kadama,
una̱ u ni u tsu ronoko yi ta̱ ulapi.
7Kadanshi ka kalau ka tsu una yi ta̱,
una̱ u ni u tsu okpo yi ta̱ maza.
8Kadanshi ka vuza vu kuyun, ki ta̱ ci ilikulyaꞋa yu uyoꞋo,
a̱ kugida̱la̱ a ku uwa a ikyamba i vuma.
9Vuza vu tsurogo a ulinga u ni,
toku vu vuza vu kula̱nga̱su ɗa.
10Kula ku Vuzavaguɗu
ki ta̱ tsu mashilya mu utsura,
vuma vu usuɓi u tsu suma ta̱ a kubana ɗe
u da̱sa̱ngu ma̱ta̱na̱.
11Udukuyan wa aza a uciyi,
ɗaɗa likuci yi ukanji i le,
e kusheshe ku le,
i a kufuɗa kuɓoso mashilya ma ba.
12A̱ra̱ɗi a tsu vakangu ta̱ vuza,
ama vuza vu na baci u goyoi ka̱ci ka̱ ni
wi ta̱ a̱ kuciya̱ ucikpi.
13Vuza na baci u tsu ushuku kakuna
babu u panasaka,
tsulau tsu ɗa n ili i wono wa̱ ni.
14Wuma u vuma i ta̱ a kufuɗa kugbama asuvu nu mɓa̱la̱,
ama vuma vu na ayinviki a̱ ni a kasai,
ka̱ ni ko kotso ta̱.
15Ka̱ɗu ka vuza vu kuyeve ayin tutu ki ta̱
a̱ kula̱nsa̱ uye u kudoku kuyeve,
atsuvu a vuza vu tsu cicoꞋo a̱ tsu la̱nsa̱ ta̱ kuyeve ayin tutu.
16KuneꞋe ku tsu ɓa̱yuwa̱ka̱ ta̱ vuza vu kuneꞋe utsutsu,
ali kubanka yi a̱ ubuta̱ u uma a gbagbaꞋin.
17Vuza vu na u tuka̱i kadanshi ka̱ ni n ugiti,
u tsu okpo ta̱ adanshi a̱yi ɗa vuza vu kamayun,
ali vuza vu yoku wu uta̱ u yaꞋanka yi biꞋi keci.
18Kazagba ka tsu vaꞋanka ta̱ n kananai,
ke ci pece ta̱ aza a̱ vishili.
19Vutoku vu nu vu na a nusakai,
wi ta̱ na atakaci u ka̱na̱ ka̱ɗu ka̱ ni,
tsu likuci i mashilya mu utsura,
kanananai vu tsu pece ta̱ uma
tsu utsutsu u viyum vu vishili.
20Kadanshi ka̱ una̱ u vuma kaꞋa ko tsu tono yi,
ili i na kpamu yi a̱ ku uta̱ a̱ una̱ u ni kaꞋa ke kuneke yi ucuwi.
21Kelentsu ki ta̱ n utsura u wuma n ukpa̱,
aza a na a cigai kaꞋa i ta̱ a kulyaꞋa uciyi u ni.
22Vuza vu na ba ci u ciya̱i vuka, u ciya̱ ta̱ ilisingai,
u ciya̱ ta̱ mapasa ma singai u Vuzavaguɗu.
23Vuza vu unambi u tsu yaꞋan ta̱ ufolu n ka̱la̱ka̱tsu ka asuvayali,
ama vuza vu uciyi u tsu wu ushuku ta̱ kadanshi n utsura.
24Vuza vu a̱ja̱Ꞌa̱ a̱ a̱bunda̱i u tsu na̱mgba̱ ta̱,
ama ka̱ja̱Ꞌa̱ ko yoku ka laꞋa ta̱ toku vu nu ma̱riki.
©️2025 Language Development and Translation Initiative (LDTI)