Ansa 16
16
1Kusheshe ku vuma
ki ta̱ a̱ ka̱ɗu ka̱ ni,
ama ku ushuku,
ku Vuzavaguɗu ku ɗa.
2E kene ku vuma uye u ni ra̱ka̱
wi ta̱ derere,
ama Vuzavaguɗu ɗa
u tsu gisangu kusheshe ku ni.
3Zuwaka Vuzavaguɗu ili i na vi a kuyaꞋan,
ofoɓuso a̱ nu tana i ta̱ a̱ kuciya̱ ulyaꞋi.
4Ili i na Vuzavaguɗu u yaꞋin dem,
n koyoku kaꞋa u yaꞋin i ɗa,
ali n aza a gbani-gbani feu
adama a kanna ka atakaci.
5Vuzavaguɗu wi ta̱ e ku ene unata
wa̱ a̱ɗu aza a̱ a̱ra̱ɗi
wi a̱ kuka̱sukpa̱ le a laꞋaka ubuta̱ wa atakaci ba.
6A̱ ubuta̱ u kuyaꞋan kasingai n ucigi
n, a tsu cinukpaka ta̱ vuma u nushi,
kpamu ubuta̱ wovon u Vuzavaguɗu,
vuma u tsu katsukpa ta̱ ka gbani-gbani.
7Makyan ma na vu yaꞋin ili i na
Vuzavaguɗu wi a kuciga,
wi ta̱ a kufuɗa kubonoko
irala i nu yo okpo a̱ja̱Ꞌa̱.
8U laꞋa ta̱ n kugaꞋan vu ciya̱ kenu
a uye u singai,
a na va kuɓolongu uciyi wa̱ a̱bunda̱i
n uye u kalyaꞋa.
9Vuma u tsu sheshe ta̱ a̱ ka̱ɗu ka̱ ni,
ama Ka̱shile ka ka tsu shatangu.
10Kadanshi a una̱ u mogono
ki ta̱ tsu akaka a̱ Ka̱shile,
ayin dem u tsu kiɗa ta̱
afada derere.
11Kagisamkpatsu ka singai,
n kaburuma a Vuzavaguɗu a ɗa,
Ili i na i yi punu ra̱ka̱ a kaburuma kaꞋa i ni i ɗa.
12Ngono n tsu ene unata
u ka gbani-gbani,
adama a zuwa ta̱ tsugono n uye u singai.
13Mogono ma tsu pana ta̱ uyoꞋo
u kadanshi kasingai,
u tsu ciga ta̱ aza a kudansa
ukuna u mayun ka̱u.
14Wupa u mogono u kutuka̱ n ukpa̱ u ɗa,
ama vuza vu ugboji
u tsu yaꞋan ta̱ moloko mana u ta̱na̱ta̱ngu mogono ka̱ɗu.
15A̱shi a singai o mogono wuma u ɗa,
kasingai ka ni ki ta̱ tsu
keleshu kaꞋa kana ka tsu tuka̱
m mini ma gaɗi n lyushi.
16U laꞋa ta̱ kugaꞋan vu ciya̱ cicoꞋo,
a na va kuciya̱ kazanariya,
u laꞋa ta̱ n kugaꞋan vu zagba kuyeve
a na vaku zagba azurufa.
17Uye u vuza vu usuɓi
u tsu katsukpa ta̱ ka gbani-gbani,
vuza na u lapulai uye u ni,
wuma u ni u ɗa wi e ku ere.
18A̱ra̱ɗi a̱ tsu tuka̱ ta̱ n ukpa̱,
kugoyi kpamu ku tsu vakangu ta̱ vuza.
19U laꞋa ta̱ n kugaꞋan
vo okpo vuza vu unambi, n aza a usuɓi
a na va ku okpo a̱ ka̱tsuma̱ ka aza a̱ra̱ɗi
a na e kupece ucanuku u gbani u na a̱ ciya̱i,
ili a̱ ka̱tsuma̱ ke le.
20A̱yi na wu ushuki n odoki,
wi ta̱ a ku laꞋa ka,
vuza vu una̱singai u ɗa
a̱yi na wu ushuki n Vuzavaguɗu.
21Vuza vu ugboji e ci ɗeke yi ta̱ vuza kuyeve,
adama a na kadanshi ku uyoꞋo
ka ɗaɗa uma a tsu laꞋa n kuciga.
22Ugboji ka̱shi ka vuma kaꞋa
a̱ ubuta̱ wa aza a na i n u ɗa,
ama tsulau tsu tsu tuka̱ ta̱ alau n atakaci.
23Vuma vu ugboji u tsu sheshe ta̱ kafu u dansa,
ka̱ta̱ tana ka danshi ka̱ ni ka̱ ciya̱ wu ushuki.
24Kadanshi ku uyoꞋo ki ta̱
tsu kabashi ki ishigi,
n uyoꞋo a̱ ka̱ɗu a̱ ku tuka̱ n ma̱ta̱na̱ i kyamba.
25A ku ene ku vuma uye u ni wi ta̱ mayin,
ama a ukocishi, ukpa̱ u ɗa.
26Kambulu ka tsu zuwa ta̱
vuza zamalinga u dakaka ulinga,
adama a na u lyaꞋatangu ka̱ci ka̱ ni.
27Vuma gbani-gbani u tsu sheshe ta̱
kuyaꞋan ka gbani-gbani,
kadanshi ka̱ ni kpamu
ka tsu ka̱na̱ ta̱ kutasa a na akina.
28Vuma vu kavama u tsu ɗa̱ngusa̱ ta̱ vishili,
vuza kuyun u tsu pece ta̱ a̱ja̱Ꞌa̱ ni ana i ɗeɗevu.
29Vuza vu kavama u tsu ya̱nsa̱ ta̱ vuza vu ni,
ali u vakangi ubuta̱ u wa atakaci.
30A̱yi na u ci yaꞋan iyoci n a̱shi,
kawuya kaꞋa wi a kuciga kuyaꞋan,
vuza na u tsu yaꞋan iyoci n una̱ u ni,
ka gbani-gbani kaꞋa wi a kuciga ku yaꞋan.
31Ka̱nji ka̱ri okolokolo a tsugbayin a ɗa,
katsupu kaꞋa a wuma u vuza vu usuɓi.
32U laꞋa ta̱ n kugaꞋan vu okpo vuza vu uka̱ni u ka̱ɗu,
a na va ku okpo kovonshi,
u laꞋa ta̱ n kugaꞋan vu fuɗa ka̱ci ka̱ nu,
a na va kulyaꞋa likuci.
33Uma a ci yaꞋan ta̱ kazagba
adama a na e yeve i na i gaꞋin,
ama Vuzavaguɗu a̱yi ɗa ka zagbi.
©️2025 Language Development and Translation Initiative (LDTI)