Liuk 9
9
Jizȯs aseghe mbed loho-iba ȯdȯn̄
(Matiu 10:5-15)
1Uso sin̄, Jizȯs okuo mbed Iseghe loho-iba obono mbie sin̄, Anyi ȯnȯ imi ulu ma unen idibine ima upaha-epo isuȯn̄ȯ in̄wi kille ilaha ikȯk udid ulȯn̄ȯ akeneni. 2Anyi ȯdȯn̄ mbed Iseghe loho-iba ekekurȯ eban̄a ukra anin̄ Ahta-Etie elaha ekȯk in̄wi ulȯn̄ȯ. 3Anyi ȯdȯhȯ imi, «Ikibe ima nze ami sisin̄ idika, iki ibe esan̄, ikibe epe, ikibe ullia. Ikibe ȯkuk, ikinȯn̄ ibe upuhȯ ȯvȯn̄. 4Udun̄ akiluk, aneki anwi okuo ifi idi uvȯk iseghe, idun̄ ki uvȯk ani tutu ifi igbȯ iyak udun̄ anyen. 5Aneki in̄wi udun̄ ani nama edra ifi, igbȯ iyak udun̄ ani. Iken̄ ntite isȯn̄-udun̄ ani iseghe ki upe ifi kini ifi igbȯ. Anyen ma anni ntiontin ȯnȯ in̄wi udun̄ ani kini Ahta-Etie adinȯ imi ufen, kama ifi isan̄a mpȯ ki ufen imi-o. 6Ene, mbed anin̄ Jizȯs esan̄a eluk kudun̄, kudun̄, ȯkurȯ edeghe etie, elaha ekȯk in̄wi ulȯn̄ȯ ki afidefid mbie aki imi eluk.
Erȯd ȯluȯn̄ȯ idikid Jizȯs
(Matiu 14:1-12; Mak 6:14-29)
7Kini Erȯd ami akenni ala uboho ukra ki ipehe Galilii agie aban̄a afidefid mpȯ si Jizȯs ma mbed Iseghe ekenne, akikre eketimede anyi siaki ubiak in̄wi ekedȯhȯ keni Jȯn ȯluȯk-mmȯn̄ esȯdi obod. 8ubiak in̄wi edȯhȯ keni asiakuduak Elaija ȯsȯ asieki onyȯn̄ adi isȯn̄, ubiak in̄wi ngo, edȯhȯ ki Jizȯs akime ini sin̄ kotu ima asiakuduak ami ekepe ki ȯnyȯn̄ȯdeghe ini ȯsȯ ezed ki mpe. 9Ani Erȯd ȯdȯhȯ ile iseghe, «Ekime ini Jȯn siaki ami nki n̄nȯ uje yak epehe Jȯn uboho, onon̄o semeni anwi ami ngie ima utibe mpȯ mban̄a? Ken amakogbo, Erȯd ȯluȯn̄ȯ avan̄ idikid Jizȯs.»
Jizȯs ȯnȯ in̄wi tȯsin iten̄ ullia
(Matiu 14:13-21; Mak 6:30-44; Jȯn 6:1-15)
10Ima Aka-uto anin̄ Jizȯs loho-iba enyȯn̄ edi, imi editan̄ ima mpȯ si imi ekenne enȯ Anyi. Ene Jizȯs ede mbed Iseghe adeghe egbȯn̄ȯ eka adibidibe mbie ami apine udun̄ Bedsaida. 11Ani kini otu-in̄wi efiak ubie ami Jizȯs aka, imi elaha ebine Anyi. Anyi adra imi, alaha atan̄ ȯnȯ imi aban̄a ukra anin̄ Ahta-Etie alaha ȯkȯk in̄wi ulȯn̄ȯ. 12Kini eje ȯtȯn̄ȯ idibre, mbed Iseghe loho-iba eka ebine Anyi ekedȯhȯ, «Ȯgwȯn̄-Etie, mbȯk n̄ne otu-in̄wi ami eyȯn̄ȯ man imi ekeluȯn̄ȯ mbie n̄na ma ullia ki ima udun̄ ami ala apine siaki mbie ami inyin ibak ami anni ofio.» 13Ani Jizȯs ȯdȯhȯ imi, «Ifi inȯ imi mpȯ ellia.» Imi ebrȯ Anyi, Inyin sikime inedeghe inne utȯ mpȯni? Inyin inye uyo itin̄ ma ȯfifȯ eyak iba prepre.» Apatre sin̄ inyin idika ikillie ullia isȯk otu-in̄wi ami. 14Imi eketan̄ sen siaki mpȯ si tȯsin in̄wi n̄nini iten̄ ekebak ki otu-in̄wi. Jizȯs ȯdȯhȯ mbed Iseghe, «Ene otu-in̄wi etiotio ki isȯn̄. Utio sin̄, in̄wi abaloho. 15Ene, mbed Iseghe enne otu-in̄wi etio 16Jizȯs abe uyo itin̄ ma eyak iba, adiaha anye ase ipe-ȯnyȯn̄, ȯnȯ ekȯ, ȯbun̄ ayak ȯnȯ mbed Iseghe edenȯ otu-in̄wi eta. Imi ekei enȯ afidefid in̄wi. 17Afidefid in̄wi eta eyuȯ, mbed Iseghe etan̄ si eketa esuȯhȯ edȯn̄ ȯyȯhȯ igad loho-iba.
Pita ȯdȯhȯ ki Jizȯs anni Krais
(Matiu 16:13-20; Mak 8:27-30)
18Uso sin̄ Jizȯs alahayak otu-in̄wi akabȯn̄ akam Anyi-unȯsin̄. Mbed Iseghi prepre ekebak ma Anyi. Kini Anyi ȯbȯn̄ akam ekre, Anyi abid mbed Iseghe, «In̄wi sedȯhȯ Ami n̄ni onon̄o anwi?» 19Mbed Iseghe ebrȯ Anyi, «Ubiak in̄wi edȯhȯ ki Avi anni Jȯn ȯluȯk-mmȯn̄ ami ȯsȯdi emana, ani ubiak edȯhȯ ki Avi anni asiakuduak Elaija ami ȯsȯsie ki ȯnyȯn̄ adi isȯn̄, ubiak onun̄ in̄wi edȯhȯ ki Avi anni sin̄ kotu ima asiakuduak ami akabak, ami ȯsȯdi emana. 20Ani Anyi abid mbed Iseghe, «Nsi ki ifi kille ifi ikre iban̄a Mi? Onon̄o ki ifi idȯhȯ Ami n̄ni?» Pita ȯbrȯ Anyi, «Avi anni Krais ami asie Ahta-Etie adi.»
Jizȯs ȯdȯhȯ ki Imi mipe isȯ ized ki mpe
(Matiu 16:20-23; Mak 8:30-33)
21Jizȯs ȯdu imi utȯn̄ etieti ȯgȯ, «Ikitan̄ inȯ anwi sisin̄-o.» 22Siaki anasi Ami Oyo Anwi mbȯhȯ udiȯk ufen. Ima ipono in̄wi udun̄, ima ipono igu, ma ima epiek ibed mezin Mi. Megbo Mi, ani Ami ma nzed ki mpe ki ȯyȯhȯ uso ite.
Be krȯs avi kȯn̄ Mi
(Matiu 16:24-27; Mak 8:34-38)
23Ene Anyi ȯdȯhȯ afidefid imi, «Anwi aki ȯluȯn̄ȯ idikȯn̄ Mi dini mbed Ami, anasi anyi asasi anyi ȯluȯn̄o idinne ayak. Anasi anyi eben̄e-ile idibe krȯs iseghe, ȯgbȯki mpe, epe. Anyi ekime idikȯn Mi idini mbed Ami. 24Siaki anwi ami ȯluȯn̄ȯ idinyan̄a uwem iseghe ki oduobod, mataba nsinsi uwem. Ani aneki anwi ayak uwem iseghe ki ntak ami anyi anni mbed Ami, anyi ma anye nsinsi uwem. 25Nsutȯ uduo ki anwi adide aneki anyi anye afidefid unye ki oduobod, ani anyi ataba nsinsi uwem? 26Aneki avi anye epen̄ ki ntak Ami ma upiekmpȯ Ami, Ami Oyo Anwi ma anye epen̄ ma avi ngo kini nsȯndi oduobod ki ugwȯn̄ Ami ma ugwȯn̄ anin̄ Etie, ma aki ilille enjel.
Jizȯs ȯpun̄ȯ udid kȯnyȯn̄ obod
(Mak 9:2-10)
27Ntan̄ apanikwȯ n̄nȯ ifi, ubiak ifi ami ibono kemi mfin idipe, ani ifi mikid ukra anin̄ Ahta-Etie. 28Ki mpȯ si uso itan̄a-eteh amakogbo kini Jizȯs atan̄ ima nsen̄e ani, Jizȯs abe Pita, Jȯn ma Jems enien̄ eka ubȯn̄ akam kȯnyȯn̄ obod. 29Sighi Anyi ȯbȯn̄ akam, anye Iseghe ȯpun̄ȯ udid, ȯvȯn̄-ile Iseghe eliek afia si emineminen̄. 30Inisin̄inisin̄, in̄wi iba egbȯ-ela eneme n̄neme ma Jizȯs. Imi ekeni Moses ma Elaija, ami ekenni ima asiakuduak anin̄ Ahta-Etie ki esie. 31Imi ngo ekeliek afia si emineminen̄. Imi eneme ma Jizȯs eban̄a mpe ami anasi Anyi epe, ma sighi Anyi adinne uduak anin̄ Ahta-Etie ȯgbȯsu kudun̄ Jeruzelem man Anyi ede ugwȯn̄. 32Ki ini ani, Pita ma mbed iba aki ekebak ki illee. Kini imi ezȯ ki ille, ekid Jizȯs sighi ele si emineminen̄ ma ugwȯn̄, elaha ekid in̄wi iba sighi ela ma Anyi. 33Kini Moses ma Elaija eluȯn̄ȯ idilaha iyak Anyi, Pita ȯdȯhȯ Jizȯs, «Ȯgwȯn̄-Etie, ȯfȯ inyin idibak kem. Yak inyin igbȯ eten ite. Sin̄ anye Fi, sin̄ anye Moses, sin̄ anye Elaija.» Ani anyi ekemȯ uboho si anyi atan̄ ani-o. 34Sighi Pita akanye iditan̄ nsen̄e, ntȯn̄-ȯnyȯn̄ etehe adifuk imi. Udulan̄a ȯmȯ mbed Iseghe sighi ntȯn̄ onyȯn̄ etehe adifuk imi. 35Imi egie uje anin̄ Ahta-Etie sighi ȯgbȯ ki ntȯn̄-ȯnyȯn̄ ȯdȯhȯ, «Anyemi ani oyo Mi, aki ami mmek, ipan̄utȯn̄ ilaha igie uje inȯ Anyi. 36Kini uje ani amakatan̄ nsen̄e ekre, mbed ekid Jizȯs anyunȯsin̄ sighi ala ma imi. Ani ima mbed elip si imi ekekid ki obod, etre iditan̄ inȯ in̄wi iban̄a ima utibe mpȯ ani ki ȯnyȯn̄ȯdeghe ini.
Jizȯs ȯkȯk uyetȯ anweni
(Matiu 17:14-21; Mak 9:14-29)
37Ki ndan̄zie uso, Jizȯs asan̄a ma mbed Iseghe ite etehe ki obod edi, opono otu-in̄wi ediebine Anyi. 38Anweni sin̄ kotu-in̄wi ȯpȯk okuo Jizȯs ȯgȯ, «Ȯgwȯn̄-Etie, mbȯk n̄ne sighi akime idinne idinyan̄a oyo anweni ami sin̄ prepre inȯ mi. 39Upaha-epo atuak-tuak asan̄a afana anyi, kini alaha ȯfuk anyi, atuak anyi tutu ȯsuȯn̄ȯ mgbȯ ki inue. Atuak anyi uyruyre ȯnȯ anyi n̄nan ȯyȯhȯ ile, emie-ile idisa anyi iyak. 40Nki mben̄e mbed Avi ebine upaha-epo ani eseghe ani imi ekȯd idibine iseghe. 41Jizȯs ȯbrȯ, Ifi in̄wi ami ebak ki ini anyem ifi ini ima unana mbuȯdile ilaha ini ndiȯk in̄wi, sindi mbak ma ifi mbuk adan̄a deghe nde nyȯ unana mbuȯdile ifi? Ene Anyi ȯdȯhȯ etie oyo ani, «Be oyo avi sȯk Mi.» 42Sighi uyetȯ-anweni ani asan̄a adi abine Jizȯs, upaha-epo aseghe anyi eliek opok ki isȯn̄ alaha atuak anyi mpempe. Ani Jizȯs ȯwu upaha-epo ȯgbȯyak uyetȯ-anweni ani. Jizȯs ȯkȯk anyi ayak anyi ȯnȯ etie iseghe.
Jizȯs ȯnȯn̄ȯsȯ atan̄ aban̄a mpe Iseghe
(Matiu 17:22,23; Mak 9:30-32)
43Afidefid in̄wi ebak ki mpile idikid utȯ opono ulu anin̄ Ahta-Etie ani. Sighi ile-epe in̄wi aban̄a ima utibe mpȯ ami Jizȯs akanye idinne, Anyi ȯdȯhȯ mbed Iseghe loho-iba ȯgȯ, 44«Anasi ifi inen̄ede ipan̄utȯn̄ inȯn̄ ituei si Ami ndȯhȯ ifi, «Edibuhubuk mȯki ediyak Mi Oyo Anwi idio ki ukra ndiȯk in̄wi. 45Ani si Jizȯs atan̄ ekenwan̄a mbed Iseghe. Ekelip imi si nsen̄e ani ȯgbȯ, ene ekȯd enwan̄a imi. Udulan̄a ngo ȯmȯ imi idibid Jizȯs si nsen̄e Iseghe ȯgbȯ.
Onon̄o anwi seni mpo-n̄kie?
(Matiu 18:1-5; Mak 9:33-37)
46Ken amakogbo, mbed Iseghe etȯn̄ȯ idifan̄a mfan̄a ki ufȯd imi iban̄a an̄wi kotu imi ami adini mpo-nkie. 47Ani Jizȯs akafiak si akanye ki azid imi, ene Anyi ȯmȯ uyetȯ sin̄ awa adian iliseghe. 48Ene Jizȯs ȯdȯhȯ mbed Iseghe, «Anwi sisin̄ akȯbȯhȯ ulaha uyetȯ ami ki ntak Ami, anyi adra Mi, anwi aki adra Mi, adra Ahta-Etie ami ȯkȯdȯn̄ Mi. Siaki anwi ami ȯsuȯhȯdile ekie kotu ifi, anyi anni mpo-n̄kie ki anye anin̄ Ahta-Etie.
Anwi ami nama enwana ma avi ala ma avi
(Matiu 18:1-5; Mak 9:33-37)
49Ene Jȯn ȯdȯhȯ Jizȯs, «Ȯgwȯn̄-Etie, inyin ikikid anwi sighi ede enyin Avi abine ima upaha-epo ȯsuȯn̄ȯ in̄wi kille, inyin ipan anyi siaki nama anyi esan̄a ma inyin.» 50Ani Jizȯs ȯdȯhȯ imi, Ikipan anyi, siaki anwi aki nama enwanawana ma avi anwamanwam fi.
In̄wi ki udun̄ sin̄ ki Sameria ezin Jizȯs
51Sighi ini apine idibe Jizȯs inyȯn̄ ȯnyȯn̄, anyi abiere idika udun̄ Jeruzelem. Ene Anyi ȯtȯn̄ȯ isan̄ ma mbed Iseghe. 52Anyi ȯdȯhȯ ubiak iyuto ebȯhȯ anye eka. Imi esan̄a eluk udun̄ sin̄ ki Sameria iditam mpodoho ibono inȯ Jizȯs ma imami ekesan̄a ma Anyi edebak ȯkȯ-eje ani. 53Ani kini in̄wi udun̄ Sameria efiak ki Jizȯs ȯluȯn̄ȯ idika udun̄ Jeruzelem man akapono Ahta-Etie, imi etre idiyak Jizȯs ma in̄wi ami Anyi ekede asan̄a ebak ki udun̄ imi. 54Kini mbed Iseghe Jems ma Jȯn egie, imi ebid Jizȯs, «Ȯgwȯn̄-Etie, Avi ȯluȯn̄ȯ inyin ikuo ukan̄ asieki ipe-ȯnyȯn̄ etehe adita imi owod ukem sighi Elaija ekenne? 55Ani Jizȯs eliek ala esuehe ȯnȯ imi alaha ȯdȯhȯ imi, «Ifi ikȯd ifiak nsutȯ sibirid ami ifi inye-o, 56Ami Oyo Anwi ankendi idibiad uwem in̄wi ani nkindi idinyan̄a imi. Ene imi eliek eka onun̄ udun̄.
Idinni mbed Jizȯs anasi epefi mpȯ
(Matiu 8:18-22)
57Sighi Jizȯs ma mbed Iseghe esan̄a eka udun̄ Jeruzelem, anwi sin̄ adidȯhȯ Jizȯs, «Ȯgwȯn̄-Etie, ami ma n̄ni mbed Avi n̄nȯn̄ nkȯn̄ Fi nka puk Avi adikaka.» 58Jizȯs ȯbrȯ anyi, «Egu-ukȯ anye unwan̄ ami ȯdun̄, unun̄ȯ ȯnyȯn̄ anye evȯk, ani Ami Oyo Anwi anye mbie idina isulu ȯkȯ-eje-o. 59Jizȯs ȯdȯhȯ onun̄ anwi, «Kȯn̄ Mi dini mbed Ami. Ani anwi anyeni ȯbrȯ Jizȯs, «Ȯgwȯn̄-Etie, yak mbȯhȯ-anye nka mbe etie mi nluȯk.» 60Ani Jizȯs ȯbrȯ anyi, Imami nama esu-uboho enȯ Ahta-Etie elasi ima ami epe. Yak imi eluȯk imami epe kotu imi. Ani amani avi kakurȯ nȯ in̄wi ban̄a ukra anin̄ Ahta-Etie.» 61Onun̄ anwi ȯnȯn̄ȯsȯ adidȯhȯ Jizȯs, «Ȯgwȯn̄-Etie, ami mben̄ile idikȯn̄ Fi si mbed Avi, ani yak nsan̄a anye nka ndȯhȯ ima uvȯk inyin ki mȯki nka. 62Ani Jizȯs ȯbrȯ, «Aneki anwi sisin̄ akaa ukre ȯtȯn̄ȯ iditȯ mpȯ ki ukȯ edesȯ eliek anye kede, si anyi ȯtȯ edibak ufȯ-o. Ukem sen, aneki anwi ȯtȯn̄ȯ idikȯn̄ Mi si mbed, edesȯ okuozid iseghe ȯsȯbine onun̄ mpȯ, anyi edikȯd inne apan mpȯ ki ukra anin̄ Ahta-Etie.
S'ha seleccionat:
Liuk 9: EBG
Subratllat
Comparteix
Compara
Copia
Vols que els teus subratllats es desin a tots els teus dispositius? Registra't o inicia sessió
Ebughu Bible by Beyond Translation is licensed under Creative Commons Attribution-ShareAlike 4.0 License.