ရှင်လုကာ 24
24
အခန်း (၂၄)
ကိုယ်တော်ယေရှု အဆောက်င်ဟင်လူးဘွာလ်ခေါမ်
(ရှင်မဿဲ ၂၈:၁-၁၀။ ရှင်မာကု ၁၆:၁-၈။ ရှင်ယောဟန် ၂၀:၁-၁၀)
1နှိုပ်ဆိ့ပတ်ဟှတ်တောလ်ကိ စိပ်စိပ်ဆုံးနှိုပ်၊ အငူတိအောလ် မုတောလှီ့ အာမ်ပြင်ဆင်ခေါမ် အမွှေးနံ့သာသွီးလှီ့ ဈိအယ်ထေ့နား ကိုယ်တော်ယေရှုခိနောက် စူဝေါလ်အာမ်ဈာတ်#24:1 ဂျူးခေါင်ယှီလှီ့ နှိုပ်ဆိ့ပတ်ဟှတ်တောလ် စိပ်စိပ်နှိုပ်ခေါမ် တနင်္ဂနွေနှိုပ်တိရို အာမ်သတ်မှတ်။။ 2အင်မ်လှီ့ အာမ်ခိုက်ယေဟိုဝေါလ် စူပေါက်ကာဝေါလ်ကိ လုံးနူးခေါမ် ပွလ်ဟှတ်ဟှတ်နား အလှောက်တယ်ခန်းနောလ် အလှမ်းမာလ် အမယ်ခေါမ် အာမ်မှူး။ 3အင်မ်လှီ့ စူဒုလ့်ကာလ် အာမ်ဝင်ငယ်ဟိုဝေါလ် ကိုယ်တော်ယေရှုရုတ် မှူးတီးယော်ဟ။ 4အင်မ်လှီ့နား ဟိဘော်ထောလ်နောက်ခေါမ် စဉ်းစားဝေါလ်လောဒ့်ယဟနောလ် အာမ်ထောလ်ဟိုဝေါလ် ဆူဆောက်ဘို့ရွားတိ ခုအယ်ထေ့နား ခေါင်ပွလ်နှိ စါစ်နောက်ကာလ်ပေါ်လူးထေ့နား အင်မ်လှီ့ကာဝေါလ် အာမ်ဟီတုလ်လူး။ 5မုတောလှီ့နား အာမ်ကိအယ်တောင်းခန်းနောလ် သပ့်ကာလ်လူကီအမူနယ်။ အင်မ်ဘော်နားခါ အင်မ်ခေါင်ပွလ်နှိနား “ဘာလ့်တိလှီ့တောဒ့်နောက် စူဒုလ့်ကာလ် ဟိဘော်ဟိုင်ရိုး အဆောက်င်ဟင်တိ နာမ်ဆူလ်လူး။ 6ကိုယ်တော် နီဓိလ်နောလ် မယ်တီးယော်။ ဘာလ့်နောက်ကာလ်ကိ အဆောက်င်ဟင်ဘွာလ်ပါလ်။ အင်မ်နား နာင်မီးဓေါလ်ဟှတောလ် ဂါလိလဲရိုး အမယ်ဟိုဝေါလ် အဟောင်ဟိလ့်ခေါမ် သတိလောဒ့်ဘွတ်စူး။ 7ခေါင်စိုးခေါမ် အပြစ်ဒုစရိုက်ဆော်လှီ့ ကွတ်ဒုလ့်ကာလ် အာမ်အပ်ပိုက်။ အင်မ်လှီ့နား ခေါင်စိုးခေါမ် လက်ဝါးကပ်တိုင်ရိုး တင်ထေ့နား အာမ်ဓုတ်ကိုက်။ အင်မ်ဘော်နားခါ အထုမ်နှိုပ်ပါလ် အဆောက်င်ဟင်လူးဘွာလ်ဝိုက် တိရို အမိန့်ဟိလ့် ဆီးယော်ဝြာ” တိရို အဟီဟောင်။ 8အင်မ်ဟိုဝေါလ် အင်မ်မုတောလှီ့နား ကိုယ်တော်ယေရှု မိန့်ဟိလ့်ခေါမ်လှီ့ သတိလောဒ့်ဘွာလ်ထေ့နား
9စူဝေါလ်ကိ ဈာတ်ဘွာလ်ထေ့နား သာဝက ကုလာဟှတ်လား အစွာခေါင်လှီ့ကိမ်ကိမ်ငေါလ် နီအကြောင်းလှီ့ အာမ်ဆိုက်ယေ။ 10သာဝကလှီ့အောလ် နီအဖြစ်ပျက်လှီ့ ဆိုက်ယေတိလှီ့စေး မာဂဒလလုဆော်နူး မာရိ၊ ယောဟန္န၊ ယာကုပ်နူး မာရိလား အစွာမုတော အချို့လှီ့အောလ် အာမ်ထောလ်။ 11သာဝကလှီ့နား အင်မ်မုတောလှီ့ ဟောင်ခေါမ် ခေခေါလှီ့ အဓိပ္ပာယ်မယ်ယော် တိရို အာခိန်ခန်းနောလ် ယုမ်ယော်ဟ။ 12အင်မ်ဘော်နားခါ ပေတရုခေါမ်ထော့ထေ့နား စူဝေါလ် ဈာလ်ထေ့နား အဓေါ့်ဝေဟိုဝေါလ် ဆူဆောက်လှီ့ယောင် အမယ်ယေဟိလ့်ခေါမ် အမှူး။ အင်မ်ခန်းနောလ် အဖြစ်အပျက်လှီ့ စါစ်နိုးဗာန် အိမ်းမာလ်အဈာတ်ဘွာလ်။
ကိုယ်တော်နားအဓေါင်နယ်ခေါမ်တပည့်တော်ပွလ်နှိ
(ရှင်မာကု ၁၆:၁၂-၁၃)
13အင်မ်နှိုပ်ကုံးငေါလ် ကိုယ်တော်ယေရှု တပည့်လှီ့ဒုလ့်ကာလ်ကိ တပည့်တော်ပွလ်နှိ ဂျေရုဆလင်လုအောလ်ကထု မိုင်ဆိဘောင်လှမ်းတိ ဧမောက်နာမ်းမာလ် အဟီဈာတ်။ 14အင်မ်ဟွဒ့်ပွလ်နှိနား မယ်ဟိလ့်တိနှိုပ်လှီ့အောလ် ထောလ်ဟိလ့်တိလှီ့ ပွလ်ဟှတ်လားပွလ်ဟှတ်ဟောင်ထေ့နား အဟီဈာတ်။ 15အင်မ်ဘော် လာမ်းမာလ် ပွလ်ဟှတ်လားပွလ်ဟှတ် ခေဝေထေ့နား အဟီဆွေးနွေးလှူလှူဟိုဝေါလ် ကိုယ်တော်ယေရှုခေါမ် အင်မ်ဟွဒ့်ကာဝေါလ်လူးထေ့နား အင်မ်ဟွဒ့်ဓေါလ်ဟှတောလ် လာမ်းလျှောက်ကယ်နား အဈာတ်။ 16အင်မ်ဟွဒ်နား ကိုယ်တော်ခေါမ် မှူးနားခါ မှတ်ယော်ဟွဒ့်#24:16 ဖုလော်ရှင်နား အင်မ်ဟွဒ့်နား ကိုယ်တော်ယေရှု မှတ်တောလ်လောဒ့်ယဟနောလ် အစိုင်းခန်းနောလ်ထောလ်။။
17ကိုယ်တော်ယေရှုနား “နာင်ဟီ လာမ်းမာလ်ဈာတ်ဗာန် ဟအီနာဟီဆွေးနွေး” တိရို အဟိ့ဟိုဝေါလ်
အင်မ်ဟွဒ့် လုန်ပွန်ယအောလ်ထောလ်ထေ့နား ဈာတ်ဓိမ်အဟီတုလ်ငယ်ထေ့နား အင်မ်ဟွဒ့်ဟွင်းဓိမ်ခေါမ် လုန်ပွန်ယအောလ်အဟီထောလ်ခေါမ်ပုံအပေါ်။ 18အင်မ်ဟွဒ့်ဒုလ့်ကာလ် ကလောဖ မိန်နိုးတိနား ကိုယ်တော်ယေရှုအောလ် “မယ်ဟိလ့်တိနှိုပ်လှီ့အောလ် ဂျေရုဆလင်လုအောလ် ဟအီလှီ့ ထောလ်ဟိလ့်နောက်ခေါမ် စူးယတိ ခိန်းစေး နာင်ပွလ်ဟှတ်ယောင်နာမယ်” တိရို အဟောင်။
19ကိုယ်တော်နား “ဟအီလှီ့ထောလ်ဟိလ့်” တိရို အဟိ့ဟိုဝေါလ်
အင်မ်ဟွဒ့်နား “နာဇရက်လုဆော် ကိုယ်တော်ယေရှု အကြောင်းလှီ့တား။ အင်မ်နောက်ခေါမ် ပရောဖက်ပါးဟှတ်တောလ်ထေ့နား ဖုလော်ရှင်လား ခေါင်လှီ့မော်ဝေါလ် တန်ခိုးအာဏာဓေါလ်ပြည့်စုံတိ ဆီးတင်ခေခေါလှီ့လား စါစ်နောက်ဟိုင်လှီ့အစိုင်းဟိလ့်။ 20အင်မ်ဘော်နားခါ ကေးမီး ဂျူးပုရောဟိတ်လန်လှီ့လား ဂျူးခေါင်းဆောင်လှီ့နား အင်မ် ရောမအာဏာပိုင်ကွတ်ဒုလ့်ကာလ် အာမ်အပ်ဟိလ့်။ အာဏာပိုင်လှီ့နား ဘာလ့်ဒဏ်အာမ်ပက်ခန်းနောလ် အင်မ် လက်ဝါးကပ်တိုင်ရိုး ချောင်းထီရိုးရိုက်ထေ့နား အာမ်ဓုတ်ဟိလ့်။ 21အင်မ်အရှင်ခေါမ် ကေးမီး အစ္စရေးခေါင်ယှီလှီ့ ရွေးနှုတ် ကယ်တင်တိအောလ်အထောလ်နိုက် တိရို ကာမ်မျှော်လင့်ဟိလ့်နားခါ တုအောလ်စေး နီလှီ့ကိမ်ကိမ် အထောလ်ဟိလ့်ခေါမ် နှိုပ်ထုမ်မယ်ပါလ်။ 22အင်မ်အပြင် ကေးမီးအဖွဲ့ရိုးကိ မုတောအချို့လှီ့နား ကေးမီးရိုး စါစ်နောက်ဟိုင်လှီ့ အာမ်ဟောင်။ အင်မ်လှီ့ အငူတိ စူဝေါလ် အာမ်ဈာတ်ဟိုဝေါလ် 23ကိုယ်တော်ပုန်း မှူးဟိလ့်ယော်ဟ။ အင်မ်ပါလ်နောလ် ဖုလော်ရှင်နောတ်ဒေဝါ ပါးနှိနား ကိုယ်တော်ယေရှု အဆောက်င်ဟင်ဘွာလ်ပါလ် တိရို ဟောင်ခေါမ် အင်မ်လှီ့ အာမ်လူးဘွာလ်ဟိုဝေါလ် ကေးမီးရိုး အာမ်ဆိုက်ဘွာလ်။ 24အင်မ်ခန်းနောလ် ကေးမီးအဖွဲ့ရိုးကိ ခေါင်အချို့နား စူဒုလ့်ကာလ် ဈာတ်ထေ့နား အာမ်ဓေါ့်ဝေဟိုဝေါလ်ခါ အင်မ်မုတောလှီ့ဟောင်ဘော် အင်မ်လှီ့နားခါ ကိုယ်တော်ယေရှု အပုန်းမှူးဟိလ့်ယော်ဟ” တိရို အဟီဆိုက်။
25အင်မ်ပါလ်နောလ် ကိုယ်တော်ယေရှုနား အတပည့်ပွလ်နှိရိုး “ဟိဘော်ဟိုင်ရိုး ရောစူးခွတ်ယော်တီးဟီ။ ပရောဖက်လှီ့ မိန့်ဟိလ့်ခေါမ်လှီ့ယုံဟိုင် ဟိဘော်ဟိုင်ရိုး နာဟီဓီ။ 26မေရှိယနား အဘုန်းတန်းခိုးလှီ့ အလောဒ့်လှောင်နောလ် ဆိတ်ခံလောဒ့်ထေ့နား အဘာလ့်တိုက်နောက်ခေါမ် စူးယော်စုအာ” တိရို အမိန့်။ 27အင်မ်ပါလ်နောလ် ကိုယ်တော်နား ပရောဖက်လှီ့ ကျမ်းစော်လှီ့အောလ် ပူတိလှီ့ကိမ်ကိမ်လား မောရှေပညတ်ကျမ်းရိုး အပုန်းဟို့အကြောင်း ဖော်ပြအယ်ဟိလ့်တိ အနက်ဓိပ္ပါလ်လှီ့ အင်မ်ဟွဒ့်ရိုး အရှင်းပြ။
28အင်မ်ဟွဒ့်ပွလ်နှိ ဈာတ်နောက် ဧမောက်နာမ်းကာဝေါလ် အာမ်ခိုက်ဟိုဝေါလ် ကိုယ်တော် အလှမ်းမာလ် ဈာတ်ဟာမ်းဟိုင်ဘော် အဟီမှူးခန်းနောလ် 29အင်မ်ဟွဒ့်နား ကိုယ်တော်ဝေါလ် “ခူအမီပါလ်ခန်းနောလ် ကေးဟီဓေါလ်ဟှတ်တောလ် တည်းလူးဝြား” တိရို ကိုယ်တော် အဟီဖိတ်။ အင်မ်ဘော်ခန်းနောလ် ကိုယ်တော်ခေါမ် အင်မ်ဟွဒ့်ဓေါလ်ဟှတောလ် တည်းဟိုင် အိမ်းဒုလ့်ကာလ် အဝင်။
30အင်မ်ပါလ်နောလ် ဘုအေနောက် ခုံငေါလ်အာမ်ငွာဟိုဝေါလ် ကိုယ်တော်နား ပေါင်မုန့်ကိုင်ဗာန် ဖုလော်ကျေးဇူးတော် အချီးမွမ်း။ ပေါင်မုန့် ဖတ်ထေ့နား အင်မ်ဟွဒ်ရိုး အပက်။ 31အင်မ်ဟိုဝေါလ် ချက်ချင်းကုံး အင်မ်ဟွဒ့် မှူးခေါမ်အာရုံ ဖွင့်ပက်ဘွာလ်ခန်းနောလ် အင်မ်ဟွဒ့်နား ကိုယ်တော်ယေရှုနောက်ခေါမ် အဟီစုတ်င်ဘွာလ်။ အင်မ်ဘော်နားခါ အင်မ်ခေါင်ပွလ်နှိမော်မှူးအောလ်ကိ ကိုယ်တော်အခိတ်ဓိမ်း။ 32အင်မ်ဟွဒ့်နားခါ “လာမ်းမာလ် ကိုယ်တော်နား ကျမ်းစော်ကြောင်းလှီ့ အရှင်းပြဟိုဝေါလ် ဟီဟိလုန်ဒုလ့်ကာလ် မေးအတော်ဘော်ထောလ်ဟိလ့်ဆီးယော်ဝြာ#24:32 မေးအတော်ဘော်အထောလ်ဟိလ့်နောက်ခေါမ် ခံစားချက်ပြင်းပြခေါမ်ဖော်ပြခေါမ်ငေါလ်ထောလ်။” တိရို အဟီခေဝေတောင်။
33အင်မ်ပါလ်နောလ် အင်မ်ဟွဒ့် ချက်ချင်းထောထေ့နား ဂျေရုဆလင်လုအောလ် အဟီဈာတ်ဘွာလ်ဟိုဝေါလ် သာဝက ကုလာဟှတ်လှီ့ အစွာခေါင်လှီ့ဓေါလ် ဟှတောလ် စုအယ်ခေါမ် အဟီမှူး။ 34စုဝေးထေ့နားမယ်တိလှီ့နား ခိုက်လူးဘွာလ်တိဟွဒ့်ရိုး “ကိုယ်တော်ယေရှု ဘာလ့်ခေါမ်ငေါလ်ကိ အမှန်ကုံးငေါလ် အဆောက်င်ဟင်ဘွာလ်ထေ့နား ရှိမုန်ငေါလ် အဓေါင်နယ်ဟိလ့်ပါလ်” တိရို အာမ်ဆိုက်။ 35အင်မ်ဟိုဝေါလ် ဧမောက် နာမ်းမာလ်ကိ ခေါင်ပွလ်နှိခါလာမ်းမာလ် အဟီခမ်းဟိလ့်ခေါမ်တကလား ပေါင်မုန့်ဖတ်ဟိုဝေါလ် ကိုယ်တော်ယေရှုနောက်ခေါမ် စုတ်င်လောဒ့်ခေါမ်လှီ့ အဟီဆိုက်ဘွာလ်။
ကိုယ်တော်နား တပည့်တော်လှီ့အောလ်အဓေါင်နယ်ခေါမ်
(ရှင်မဿဲ ၂၈:၁၆-၂၀။ ရှင်မာကု ၁၆:၁၄-၁၈။ ရှင်ယောဟန် ၂၀:၁၉-၂၃)
36နီဘော် အတပည့်လှီ့နား အင်မ်အကြောင်းလှီ့ အာမ်ဟောင်ဟိုဝေါလ် ကိုယ်တော်ယေရှု အင်မ်လှီ့ကိုကိုယ်ဝေါလ် စါစ်နောက်ကာလ်ပေါ်လူးထေ့နား အင်မ်လှီ့အောလ် “ဖုလော်ရှင်နား နာင်မီးရိုး ငြိမ်းချမ်းခေါမ် မာနယ်ပက်ဆတ်” တိရို အမိန့်။
37အင်မ်ဘော်နားခါ တပည့်တော်လှီ့နား ကိုယ်တော် အာမ်မူးဟိုဝေါလ် ဖုတ်တိရို အာမ်ခိန်ခန်းနောလ် တပြင်းကုံးစါစ်နိုးထေ့နား အာမ်ကိအယ်တောင်။ 38အင်မ်ဘော်နားခါ ကိုယ်တော်ယေရှုနား “ဟိဘော်ဟိုင်ရိုး နာမ်ကိအယ်။ ဟိဘော်ဟိုင်ရိုး သံသယနာမ်ဝင်လောဒ့်။ 39ကေးကွတ်၊ ခူလှီ့ ဓေါ့်ဝေါလ်။ ကေးယောင်။ ကေးထိစမာလ်။ ဖုတ်နောက်ဟိုဝေါလ်စေး အယိလှီ့အဆော်လှီ့ မယ်ယော်။ ကေးစေး နာမ်မှူးဘော် ကေဆိုး၊ ကေယိမယ်” တိရို အမိန့်။
40အင်မ်ဘော် အဟောင်ပါလ်နောလ် အကွတ်ခူလှီ့အောလ်ကိ အမာရွက်လှီ့ အဓေါင်နယ်။ 41အတပည့်လှီ့နားခါပျော်ဗာန် ယုံခွတ်ယဟနောလ် အာမ်စါစ်နောက်ကြ။ ကိုယ်တော်နား အင်မ်လှီ့အောလ် “နီဓိလ်နောလ် အေဟိုင်အူဟှဟှတ် အမယ်ယား” တိရို အဟိ့။ 42အင်မ်ဟိုဝေါလ် အင်မ်လှီ့နား ငေါဟိုက်ခိလ်ဟှတ် အာမ်ပက်ဟိုဝေါလ်#24:42 တချို့မူရင်းကျမ်းလှီ့အောလ် ငေါဟိုက်လား ခိုသွီးတိရို အပူလ်။ 43ကိုယ်တော်နား အင်မ်လှီ့ မော်ဝေါလ်အအေလှာယ်။
44အင်မ်ပါလ်နောလ် ကိုယ်တော်ယေရှုနား “မောရှေပညတ်ကျမ်းလား ပရောဖက်လှီ့စော်အုပ်၊ ဆာလံကျမ်းလှီ့အောလ် ကေးအကြောင်း ဖော်ပြအယ်ဘော် အမှန်ထောလ်လူးဝိုက် တိရို နာင်မီးဓေါလ် ဟှတ်တောလ်ကေမယ်ဟိုဝေါလ် ကေဟောင်ဟိလ့်ခေါမ် အကြောင်းလှီ့နောက်ခေါမ် တုအောလ်ထောလ်တိလှီ့အောလ်အထောလ်” တိရို အမိန်။
45အင်မ်ပါလ်နောလ် ကျမ်းစော် ရောက်စုတ်င်ဟိုင်တွက်ကာလ် ကိုယ်တော်ယေရှုနား အတပည့်လှီ့ အကူညီပက်။ 46အင်မ်ပါလ်နောလ် အင်မ်လှီ့အောလ် “ကျမ်းစော်ဝေါလ် မေရှိယခေါမ် ဆိတ်ခမ်းစါက်ကယ်ခေါမ်လှီ့ ခံဟိလ့်လောဒ့်ထေ့နား အဘာလ့်ပါလ်နောလ် အထုမ်နှိုပ်ပါလ်စေး ဘာလ့်ခေါမ်ငေါလ်ကိ အဟင်ဘွာလ်ဝိုက်။ 47ကိုယ်တော်မိန်ဓေါလ် နောင်တလောဒ့်ခေါမ်လား ဒုစရိုက်အပြစ်လှီ့တွက် ခွင့်လွှတ်ခေါမ်လောဒ့်ဟိုင် ဂျေရုဆလင်လုအောလ်ကထုစထေ့နား ခေါင်ယှီတကအောလ် အာမ်ဟောဝိုက် တိရို အဖော်ပြအယ်။ 48အင်မ်ခန်းနောလ် နာင်မီးခေါမ် နီအဖြစ်ပျက်လှီ့တွက် သက်သေလှီ့ရိုး နာမ်ထောလ်။ 49ကေး ပေါလ်ဖုလော်နားပက်ခေါမ် ကတိဘော် ကေးနား နာင်မီးစငေါလ် ဉာဏ်အလင်းတော် ကေတိလူးဝိုက်။ အင်မ်ဘော်ခန်းနောလ် နာင်မီးနား ဉာဏ်အလင်းတော်လူးထေ့နား ဟြှားလုအောလ်ကိ တန်ခိုးတော်ပက်ဝေ့ ဂျေရုဆလင်လုအောလ် စောင်ဘွတ်စူး” တိရို အမိန့်။
ကိုယ်တော်ယေရှု ဟြှားလုအောလ် အကွာခေါမ်
(ရှင်မာကု ၁၆:၁၉-၂၀)
50အင်မ်ပါလ်နောလ် ကိုယ်တော်ယေရှုနား အတပည့်လှီ့ ပါနယ်ထေ့နား ဗေသနိနာမ်းပြင်ဓိလ်ဟှတ်တောလ် အဈာတ်။ အင်မ်ဓိလ်နောလ် အာမ်ခိုက်ဟိုဝေါလ် တပည့်တော်လှီ့ ကိမ်ကိမ်တွက် ကွတ်မြှောက်ထေ့နား ဖုလော်ရှင်နား ပွန်တိလှီ့ပက်ဟိုင် ဆုအတောင်ပက်။ 51အင်မ်ဘော် ဆုတောင်ပါလ်နောလ် ကိုယ်တော်ယေရှု အင်မ်လှီ့စငေါလ်ကိ ထွက်ထေ့နား ဟြှားလုအောလ် အကွာဘွာလ်။ 52အင်မ်ခန်းနောလ် တပည့်တော်လှီ့နား ကိုယ်တော်ယေရှု ခခ်ထေ့နား တပြင်းပျော်ဗာန် ဂျေရုဆလင်လုအောလ် အာမ်ဈာတ်ဘွာလ်။ 53အင်မ်လှီ့ ဂျေရုဆလင် အာမ်ခိုက်ဟိုဝေါလ် ဗိမာန်တော်ဝေါလ် ပုံမှန်ဈာတ်ထေ့နား ဖုလော်ရှင်ခေါမ် ပျက်ကွက်ကော်ဝေါလ် ချီးမွမ်းထေ့နားအာမ်မယ်။
S'ha seleccionat:
ရှင်လုကာ 24: CSJ
Subratllat
Comparteix
Compara
Copia
Vols que els teus subratllats es desin a tots els teus dispositius? Registra't o inicia sessió
Chin Songlai (ဆောင်လိုင်) Bible by Beyond Translation is licensed under Creative Commons Attribution-ShareAlike 4.0 License.