Preritʹ 23
23
Sobha samnere Pol
1Ar Pol marang sobha hate koyoʹketeʹ menkede, "Ingren boihako, tihin dhâbiʹ ing sanam bisoire sâfâ bibekte Issorren proja laka calobanoketeʹ hijuʹkâning. 2Niâ katha atenketeʹ marang purohit Ononiote ekeko Polṭheʹ tengo tahelenako angko metakeʹkoe Pol mocare aghatilaʹ. 3Tâkhni Polte Ononio metakidie, "Bhonḍo, Issorte amho dalmiheʹ. Mosiaʹ ân laka bicârtinglaʹ am naṛe duruʹkanam, kheʹ ing dalenglaʹ metaketeʹto am nijegi ân râputʹdam."
4Ekeko Polṭheʹ tengo tahelenako angkote Pol metakidiako, "Amtedo Issorren marang purohit nangkaketeʹ bang opoman dareyam!"
5Tâkhni Pol menkede, "Boihako, ing bang baṛesâning je, ânido marang purohitkane. Judi baṛeinghoteʹ tahale ana katha ohohoteʹ metaing, karon Pobitro sastrore ol menaʹa, 'Amren jâttren netako alo osommankoam.'"
6Ana marang sobhare je miʹ dol Sudduki ar miʹ dol forisikanako, ana katha baṛeketeʹ Poldo marang sobha talare jorte menkede, "Ingren boihako, ingdo miʹhor forisikâning ar forisiren gidrâkâning. Ingâʹ bicâr hoʹkana karon ing pâtyuʹing je, goiʹonkhoiʹ arho goiʹ khoiʹ jiuitʹ beredoʹkohaʹ."
7Âniaʹ niâ kathate forisi ar Sudduki talare jhagṛa ehobna. Anate marang sobharen âdmiko hâṭingenako, 8karon Suddukikodo menako, "Goiʹonkhoiʹ ar goiʹ khoiʹ jiuitʹketeʹ bang beredoʹako." Niâ bâgiketeʹho arho menako je, sorgodutko se kharap attaho bânuʹkoa, ar jahanaʹ attaho bânuʹa, Kheʹ forisikodo sanamaʹgi pâtyuʹako 9Tâkhni aima golmal ehobna ar forisi dolren koekṭeʹ dhormo masṭar tengoketeʹ aima jore torka torki ehobkedako. Angkodo menkedako, "Aletedo nâi âdmioaʹ jahanaʹ dos bang lelnameʹtayale. Paseʹ jahe kharap atta bangkheʹ jahe sorgodut salaʹ katha mensane."
10Ana jhagṛa nâniʹ marangna je, marang senapoti botorne paseʹ angkote Poldo goiʹgiriyikohaʹ. Anate ânite sonnoko hukum makeʹkoe jate angko caketeʹ âdmiṭheʹ khoiʹ Pol coṭaʹketeʹ âguketeʹ sonnokoaʹ tahanaʹ jagare dohoyako.
11Porahiluʹ nindâ Probhu Polṭheʹ tengoketeʹ menkede, "Sâhusi banop, Jirusalemre alka Ingâʹ bisoite sakkho makadam engkaketeʹgi Romreho am sakkho maʹlaʹ hoʹtamhaʹ.
Pol gojeyaʹ soṛojontro
12Porahiluʹ setaʹbera Jihudiko miṭiʹ soṛojontrokedako ar Pol âuri gojei dhâbiʹ itâʹgi bang jomako mente rikitkedako. 13Cullisṭeʹ khoiʹho bisi âdmi niâ soṛojontrokedako. 14Angkodo marang purohitkoṭheʹ ar harme netakoṭheʹ caketeʹ lâikedako, "Pol âuri goje dhâbiʹ itâʹgi oho jomale mente aledo kâṭhin rikitkadale. 15Nitoʹ ape ar marang sobharen âdmiko niâ beparte arho manjate khoj engeyaʹ bahanate Pol ape samnere âguilaʹte marang senapotiṭheʹ khobor kolpe. Pol naṛe pâhcuʹ laharigi alete âni gojeilaʹte saproketeʹ tahenale."
16Kheʹ Polren mesraren hopontetʹ niâ katha atenketeʹ sonnokoaʹ tahanaʹ jagare cane ar Pol niâ khobor lâiodie. 17Tâkhni Polte miʹhor sotopoti ṭâhuketeʹ metakidie, "Nâi kora marang senapotiṭheʹ idiyi. Âniṭheʹ nâiaʹ thoṛa menaʹ menaʹtaia."
18Tâkhni âni senapotite âni kora marang senapotiṭheʹ idiketeʹ menkede, "Bundi Polte ing ṭâhuketeʹ nâi kora amṭheʹ âguilaʹ metakidinge, karon amṭheʹ bole niaʹ jahanaʹ menaʹ menaʹtaia."
19Marang senapotite tâkhni âni koraoaʹ ti sabketeʹ miʹhate idiketeʹ metakidie, amte ing itâʹ metanglaʹ namdam?"
20Âni kora menkede, "Jihudiko ṭhikkadako, Polaʹ bisoite arho manjate khobor engelaʹte âni gapa marang sobhare enjailaʹte am nehromikohaʹ. 21Am angkoaʹ kathate alo râjiʹam, karon cullisṭeʹ khoiʹho ḍher âdmi Pol laʹte ḍahar bengetʹketeʹ menaʹkoa. Pol bang goje dhâbiʹ angko itâgi oho jomako mente rikitkadako. Angko sapro menaʹkoa, kebol am râjiʹaʹ ḍahar bengetʹdako."
22Marang senapotite âni kora bidâi mai somai niâ hukum makidie, "Niâ katha je amte ing laiokâdiâm ana ekegi alo lâiokoam."
Poldo Koisoriâre kol hona
23Tayomte marang senapotite aiʹren barhor sotopoti ṭâhuketeʹ metakeʹkine, "Barso imni soinno, sohottorṭeʹ ghoṛare deʹ soinno ar barso borsa sab sonno tihin nindâ noṭa somai Koisoriâ caʹlaʹte sapro dohokom. 24Ar Pollaʹteho ghoṛanaʹ bebosthaoipe jate âni manjate marang sasoniʹ Filiksṭheʹ idi jutuʹe." 25Marang senapoti niâ ciṭhi olkede,
26"Ing, Klodio Lusio, manonio sasoniʹ Filiksṭheʹ niâ ciṭhi olding. Ingâʹ subheccha atangting.
27"Jihudikote nai âdmi sabketeʹ prai goiʹgirilidiako, kheʹ ing ingren soinnoko idiketeʹ bacoketeʹ âgukâdiying, karon ing baṛe darekiding ânido miʹhor Romiokane. 28Tayomte ing baṛelaʹ namkiding cekelaʹ âni dosdiâko. Analaʹte angkoaʹ marang sobhaṭheʹ ingte âni idikidiying. 29Ing bujhu darekiding je, angkoaʹ Mosiaʹ ânnaʹ bisoilaʹte angkote âni dosdiâko, kheʹ gojoʹaʹ se jelre caʹ laka nangkanaʹ dos âniaʹ bânuʹtaia. 30Jâkhni ing baṛe darekiding je, âdmiko nâi âdmioaʹ biruddhore soṛojontrodako tâkhnigi ingte âni amṭheʹ kolkidiying. Ekekote âni doseikanako angkoho ingte hukum makeʹkoing jate angko nâiaʹ dosnaʹ bisoite amṭheʹ lâiako."
31Tâkhni soinnoko marang senapotioaʹ hukum laka Pol ako saote engeketeʹ nindâ Antiopatri sohor dhâbiʹ idikidiako. 32Porahiluʹ angkodo ghoṛare deʹ sonnoko salaʹ Pol kolketeʹ sonnokoaʹ tahanaʹ jagare âcur canako. 33Ghoṛare deʹ sonnoko Koisoriâre pâhcuketeʹ ciṭhi marang sasoniʹ makidiako ar Polho âniṭheʹ jimâkidiako.
34Marang sasoniʹ ana ciṭhi paṛhoketeʹ Pol aka jaganiʹ âdmikane ana kulikidie. Pol je Kilikiâ prodisâmniʹ âdmikane ana baṛe dareketeʹ âni menkede, 35"Am ekete dosmikanako angko naṛe pâhcuʹkheʹ tayomte ingte amaʹ katha atentamhuʹ." Tayomte ânite raja herodaʹ raj oraʹre Pol horoketeʹ dohoilaʹ menkede.
S'ha seleccionat:
Preritʹ 23: EKL
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
©️2025 Bible Students Fellowship of Bangladesh