2 Thesoloniki 2
2
Chaya tolpi ongnai
1Ani takhukrok, chini Subrai Jisu Khristo phainai arw chwnw jothono baksa khlayoi malairwgwi Bini sakni dayo tilangwi thangnai. Aithani tabok ang nokhnw o joranw lagwi kisa sirwni nayw. Ang nokhnw kabogwi sadok je, 2jwtini kaisachwk chini mwngwi kokmai, phwrwngma, tei koktunni bisingtwi sagw, "Subraini sal phayoi paikha" halai nokh khachwkmani bakha takamajadi tei tasuntolokdi. 3Naidi kaisabw i kothoyw nokhnw banemayatwi. O sal phainai aguo hayungw kaitorni baithe pwital nungjanw. Tei o sumsok chala, jeni nachra ongthai kok, bw saplangjaknai. 4Kaitor hinwi jebwrok tong obwrokni baithe tei lobjaknaini kosol jothoni baithe bachagwi bw saknw gorja khlaywi phunuknai, Keber obwya, Kaitorni noktharw achugwi Bw saknw Kaitor hinwi yachaknai. 5Nokhni tama bakha kaya? Ang nokhni dayo tongphini i tolpi rok ongnw hinwi samani? 6Nokh siyw mwngsachwk pharan o sumsok chalanw theyoi larwkdok, bw o chongjak jorao saplang jaknaitwi. 7Ang imoroknw sadok twmwi hinba chayani o huijak pharan tabokbw i hayungo samung tangwi thangdok. Matwr kaisa tongw jebw i pharannw thepma khlayoi phaidok, jebw chaya pharannw thepma khalaywi phaidok Kaitor bwnw nwlyasak jora Bw omonw theywi larwknai. 8Obwni jerw sumsok chala saplang jaknai. Tei Subrai Jisu Bini bukhokni hanglabai arw chwngsachabai baksa Bw phainaini bisingtwi o sumsok chalanw nachra khalainai. 9O sumsok chala Saitanni pharanbai phainai. Bw o chaya pharanni chubamungbai jatejar banenai amok samung arw sidom phunuknai. 10Jebwrok nachra lamni beruai bw boknw thi hinwi sagwi jatejar jotho kronai kothoyw mwngchanai. Tekhokjakma manni bagwi kwbwi jebw tong jebwrok obwnw hamjakni narang khalaidok bokse o nachra lamni beruai. 11Aithani Kaitor bokni bisingo phala kwrwngsa hokha jebw boknw baneyw, tei jebwni bisingtwi bok misanw paitok. 12Oboni bagwi jebwrok kwbwinw paitokliya, tei chaya kothoyw tongthok laikha khatta gnang hinwi bokni nalchirongnai.
Nokh tekhok jaknaini bagwi saijajak
13Subraini khajani ani takhukrok, nokhni bagwi chwng jwnwm Kaitornw hambai rwthai kalaio. Twmwi himba Phala Kathar nokhnw Bini kathar borog banaidok tei kwbwinw paitokma bai goseyoi lanai bisingtwi nokh tekhokma mannaitwi Kaitor pwilani jimin nokhnw chongjak. 14Nokh chini Subrai Jisu Khristoni chwngsachani bag lamanaitwi, Kothoma jebw chwng pirjak obwni bisingtwi Kaitor nokhnw ringkhojak. 15Othani takhukrok thi khlayoi tongdi tei chwng chini pirnai tei koktun bai nokhnw jebw phwrwngkha obwnw rumoi larwkdi.
16-17Chini Subrai Jisu khristo Sak tei chini Apha Kaitor nokhni khao khabaja rwthwk arw jotho gam samung tei gam kok dayo nokhnw thi tonthwk. Bwse chwnw hamjajak tei khakhamwi molbrumni khabaja arw tonthokma kwplwng khadung rwjak.
©️2025 Bible Students Fellowship of Bangladesh