تثنئیه 11
11
ربّی سِوئن
1تارینیز ربّی سِوئن. همئشه اونون بویوردوقلارینا، قایدالارینا، حؤکملرئنه، و امرلرئنه عمل ادئن. 2بو گون بئلئن کی، سئزئن بئلمهیَن و تارینیز ربّئن تَنبِهئنی گؤرمهیَن اؤولادلارینیزلا دانیشمیرام، سئزئنله دانیشیرام. اونون عظمتئنی، قودرتلی الئنی، و اوزانان قولونو گؤروبسونوز. 3مئصئرده، مئصئر پادشاهی فئرعونا و بوتون اؤلکهسئنه اتدئیی علامتلری، اتدئیی ائشلری گؤروبسونوز. 4گؤروبسونوز کی، رب مئصئر قوشونونا، اونلارین آتلارینا، دؤیوش عارابالارینا نه اتدی؛ نجه اونلاری، دالینیزجا دوشَرکَن، قیرمیزی دهنزئن سولاریندا قرق اتدی. نجه اونلاری بوسبوتون محو اتدی. 5گؤروبسونوز کی، صحرادا، بو یره چاتاناجاق سئزئن اوچون نه ادئب. 6گؤردونوز کی، رِعوبئنلی اِلئیابین اوغوللارینا یعنی داتانا و اَبئراما نه اتدی؛ بوتون ائسرایئللیلرئن آراسیندا یری یاردی، اونلاری و اِو اهلئنی چادیرلار و اونلارا عایید اولان بوتون جانلیلاری ائله برابر اودّو. 7گؤزلرئنئز ربّئن اتدئیی بو عظمتلی ائشلرئن هامیسینی گؤروب.
8بو گون سئزه بویوردوغوم امرلرئن هامیسینا عمل ادئن کی، قووّتلی اولاسینیز و مالئک اولماغینیز اوچون اوردون چایینی کچهجیئنئز تورپاغا گئرئب اورایا مالئک اولاسینیز. 9ربّئن آتالارینیزا و اونلارین اؤولادلارینا ورهجیئنی آند ائچدئیی تورپاقدا اوزون عؤمور سورهسئنئز؛ سود و بال آخان تورپاقدا. 10چونکی مالئک اولماق اوچون گئرهجیئنئز تورپاق، چیخمیش اولدوغونوز مئصئر اؤلکهسئنه بنزهمئر. اورادا توخوموزونو اَکئردئنئز، بوستان کئمی آیاغینیزلا سولاییردینیز. 11آمّا مالئک اولماق اوچون گدهجیئنئز تورپاق داغلی-درهلی بئر دئیاردیر. بو تورپاق گؤیون یاغیش سویونو ائچئر. 12اورا تارینیز ربّئن لوطف گؤرستدئیی اله بئر تورپاقدیر کی، ائلئن اوّلئندن آخیرینا قدر تارینیز ربّئن نظری آلتیندادیر.
13رب دیئر: «اگر بو گون سئزه بویوردوغوم امرلره یاخشی قولاق آساسینیز، تارینیز ربّی سِوئب، بوتون اورهیئنئزله و بوتون جانینیزلا اونا خئدمت ادهسئنئز، 14او زامان تورپاغینیزا یاغیشی یعنی یاز یاغیشلا پاییز یاغیشنی واختلی-واختیندا ورهجیم. او واخت تاخیلینیزی، تزه شرابینیزی و زیتون یاغینیزی ییغاجاقسینیز. 15زَمئلرئنئزده حیوانلارینیزا اوت ورهجیم. سئز دویونجا یئیهجکسئنئز.» 16آییق اولون مبادا اورهیئنئز آلدانسین. آزمایین، آیری آللاهلارا قوللوق ادئب، اونلارا پرستئش اتمهیئن. 17یوخسا ربّئن قضبی سئزئن ضئدّئنئزه آلوولانار. او، گؤیلری باغلاییب یاغیش یاغدیرماز، تورپاق محصولونو ورمز و تِزلئکله ربّئن سئزه وردئیی او یاخشی تورپاقدان محو اولارسینیز.
18بونا گؤره ده منئم بو سؤزلرئمی اورهیئنئزده و جانینیزدا ساخلایین؛ اَلئنئزه بئر نئشان کئمی، گؤزلرئنئزئن آراسینا آلین باغی کئمی باغلایین. 19اونلاری اؤولادلارینیزا اؤیرَدئن. اِوئنئزده اوتوراندا، یولدا گِدنده، یاتاندا، دوراندا بونلار بارهده دانیشین. 20اونلاری اِولرئنئزئن قاپی چَرچئوهلرئنه، شهرلرئنئزئن دروازالارینا یازین. 21بله ادهسئنئز، ربّئن آتالارینیزا ورهجیئنی آند ائچدئیی تورپاقلاردا سئزئن ده، اؤولادلارینیزین دا عؤمرو اوزون اولار و گؤی یِر اوستونده دوردوقجا اورادا یاشایارسینیز.
22اگر عمل اتمهیئنئز اوچون سئزه بویوردوغوم بوتون بو امری دئقّتله یرئنه یتئرهسئنئز، تارینیز ربّی سِوئب اونون بوتون یوللاری ائله گدهسئنئز و فقط اونا باغلی قالاسینیز، 23اوندا رب قاباغینیزدان بوتون بو مئلّتلری قوواجاق و سئزدن داها بؤیوک، داها گوجلو مئلّتلرئن تورپاقلارینا مالئک اولاجاقسینیز. 24آیاق باساجاغینیز هر یر سئزئن اولاجاق؛ سرحدئنئز صحرادان لوبنانا، فَرات چاییندان قرب دهنزئنه #11.24 آرالیق دهنزی قدر اوزاناجاق. 25سئزئن قاباغینیزدا هچ کئم دایانا بئلمیهجک؛ تارینیز رب، سئزه وعده وردئیی کئمی، آیاق باساجاغینیز هر یره واهئمه و قورخونوزو یایاجاق.
26باخ، بو گون قاباغینیزا برکت و لعنت قویورام. 27تارینیز ربّئن امرلرئنه، بو گون سئزه بویوردوغوم امرلره قولاق آساسینیز، برکت تاپاجاقسینیز. 28اگر تارینیز ربّئن امرلرئنی اشئتمَیهسئنئز، تانیمادیغینیز آیری آللاهلارین دالینجا گدهرک، بو گون سئزه امر اتدئیئم یولدان آزاسینیز، لعنته دوچار اولاجاقسینیز. 29تارینیز رب مالئک اولماق اوچون گئرهجیئنئز تورپاغا سئزی آپاراندا، گِرئزئم داغیندا برکت، عِیبال داغیندا دا لعنت قویاجاقسینیز. 30مگر بو ائکی داغ اوردون چایینین او بئری تاییندا، یولون شرقئنده یعنی عَرابادا یاشایان کَنَعانلیلار اؤلکهسئنده، گئلگال موقابئلئنده، مورِه پالیدلارینین یانیندا دیئل؟ 31تارینیز ربّئن سئزه ورهجیی تورپاغا مالئک اولماق اوچون اوردون چایینی عنقرئب کچهجکسئنئز. اورانی اَله کچئردئب اورادا یِرلَشَنده 32دئقّتلی اولون کی، بو گون قاباغینیزا قویدوغوم بوتون قایدالار و حؤکملری یرئنه یتئرهسئنئز.
S'ha seleccionat:
تثنئیه 11: SAB
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
@ 2022 Korpu Company