متّانین رئوایت 15
15
رسملر و حؤکملر
1او زامان فرئسی فئرقهسئنئن عالئملری و تؤورات موعلّئملری اورشلئم شهرئندن عئسانین یانینا گلئب ددئلر: 2«نه اوچون سنئن شاگئردلرئن، آغساقّاللارین رسمئنی پوزورلار؟ چونکی چؤرک یئین زامان اَللرئنی یومورلار؟» 3عئسا جاوابیندا اولارا ددی: «بس سئز نه اوچون اؤز رسمئزدن اؤتری تارینین حؤکمونی پوزورسوز؟ 4چونکی تاری بویوروب: ”آتا و آنانا حؤرمت اله“ و ”آتاسینا یا دا آناسینا یامان دئین آدام گرک اؤلدورولسون.“ 5آمّا سئز دیئرسئز: ”کئم آتاسینا یا دا آناسینا دسه: مندن سنه یتئشن کؤمک تارییا تقدئم اولونوب، 6آرتیق آتاسینا حؤرمت الهمهیه مجبور دیئل.“ بله ده سئز، اؤز رسملرئزدن اؤتری تارینین سؤزونی باطئل الهیئرسئز. 7ای ائکی اوزلی لر! اِشَعیا پیغمبر سئزئن بارهزده نه یاخشی نبئلئک الهیئب:
8”بو خالق دوداقلاری ائنن منه حؤرمت الهیئر،
آمّا اوَرکلری مندن اوزاقدیر.
9منه بوش یره عئبادت الهیئرلر،
چونکی ائنسان امرلرئنی، احکام آدیندا تعلئم ورئرلر.“»
10عئسا جاماعاتی یانینا چاغیریب، اولارا ددی: «قولاق آسین و آنلایین! 11آغیزا گئرن شی، ائنسانی نجئس الهمز؛ آغیزدان چیخان شیدئر کی، ائنسانی نجئس الهر.» 12او واخت شاگئردلر گلئب، اونا ددئلر: «آیا بئلئرسن کی، فرئسئلر بو سؤزی اشئدن واخت حئرصلَندئلر؟» 13عئسا جاواب وردی: «گؤیدهکی آتامین اَکمهدئیی هر شی، کؤکوندن چیخاریلاجاق. 14اولاری بوراخین. اولار کورلارین کور بلدچئلریدئرلر؛ کور، کورا یول گؤرسدسه، هر ائکئسی ده قویویا دوشر.» 15آمّا پطروس عئسایا ددی: «بئزه بو مثلئن معناسینی آچیقلا.» 16عئسا ددی: «مگر سئز ده حله باشا دوشمهیئبسئز؟ 17مگر آنلامیرسیز کی، آغیزا گئرن هر شی آدامین قارنینا گدئر و دفع اولونور؟ 18آمّا آغیزدان چیخان، اورَکدن چیخار و ائنسانی نجئس الهر. 19چونکی اورَکدن پئس فئکئرلر، آدام اؤلدورمک، زئناکارلیق، عئفّتسئزلئک، اوغورلوق، یالانچی شاهئدلئک و کوفر چیخار. 20ائنسانی نجئس الهین شیلر بولاردیر. یویولمامیش اللر ائنن یمک، ائنسانی نجئس الهمز.»
کَنَعانلی آروادین ائمانی
21عئسا اوردان چیخیب، صور و صِئدون منطقهسئه گتدی. 22کَنَعانلی بئر آرواد او طرفلردن گلئب، چیغیرا-چیغیرا ددی: «آغا، ای داوود اوغلی، منه یازیغین گلسئن. قیزیم ائبلئس روحا توتولوب و پئس بئر حالدادیر.» 23آمّا عئسا جاوابیندا اونا بئر سؤز بله دمهدی. شاگئردلری عئسانین یانینا گلئب اونا یالواردیلار: «بونی مورخّص اله، گتسئن. دالیمیزدان باغیریب گلئر.» 24عئسا جاواب ورئب ددی: «من آنجاق ائسرایئل خالقینین ائتمئش قویونلارینین یانینا گؤندَرئلمئشم.» 25آمّا آرواد یاخینلاشدی و اونا سجده الهیئب ددی: «یارب، منه کؤمک اله.» 26عئسا جاواب ورئب ددی: «اوشاقلارین چؤرهیئنی آلیب، ائتلره آتماق دوز دیئل.» 27آرواد ددی: «حاقلیسان یارب، آمّا ائتلر ده صاحئبلرئنئن سوفرهسئندن دوشَن تئکهلردن یئیرلر.» 28او واخت عئسا جاواب ورئب آروادا ددی: «آرواد، ائمانین بؤیوکدور! سنه ائستهدئیئن کئمی اولسون!» و اونون قیزی او ساعاتدا شفا تاپدی.
عئسا دؤرد مئن نفری دویورور
29عئسا اوردان چیخیب، جلئل گؤلونون یاخینلیغینا گلدی و داغین باشینا چیخیب اوردا اوتوردی. 30اونون یانینا بؤیوک بئر جاماعات ییغیلدی و آرالاریندا چولاقلار، کورلار، علئللر، لاللار و بولاردان باشقا چوخلاری دا وار ائدی. اولاری عئسانین آیاقلارینین یانینا قویدولار و عئسا اولارا شفا وردی. 31خالق لاللاری دانیشان، علئللری صاغ، چولاقلاری یِرئیَن و کورلاری گؤرن زامان تعجّوب الهیئب ائسرایئلئن تاریسینا حمد الهدئلر.
32عئسا شاگئردلرئنی یانینا چاغیریب ددی: «بو خالقا اورهیئم یانیر، چونکی اوچ گوندور کی، یانیمدادیرلار و یِمهیه هچ بئر شیلری یوخدور. ائستهمئرم اولاری آج یولا سالام، اولماسین کی یولدا طاقتدن دوشسونلر.» 33شاگئردلری اونا ددئلر: «چؤللوکده بو قدر جاماعاتی دویورماق اوچون چؤرهیی هاردان تاپاق؟!» 34عئسا اولارا ددی: «نچه چؤرهیئز وار؟» ددئلر: «یدّی چؤرک و بئر نچه کئچئک بالیغیمیز وار.» 35او واخت عئسا خالقا امر الهدی کی، یِره اوتورسونلار. 36یِدّی چؤرک ائنن بالیقلاری گؤتوروب شوکور الهدی و بؤلوب شاگئردلرئنه وردی. شاگئردلر ده جاماعاتین آراسیندا پایلادیلار. 37هامی ییئب دویدی و آرتیق قالان تئکهلردن یدّی دولی زنبئل ییغدیلار. 38یئینلر آروادلار و اوشاقلاردان باشقا دؤرد مئن نفر ائدئلر. 39عئسا خالقی مورخّص الهیندن سورا قاییغا مئنئب مجدل دئیارینا گتدی.
S'ha seleccionat:
متّانین رئوایت 15: CAB
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
@ 2024 Korpu Company