Psalms 73
73
1အကယ်စင်စစ် ဘုရားရှင်သည် အစ္စရေးလူမျိုးတို့အပေါ် စိတ်နှလုံးဖြူစင်သောသူတို့အပေါ် ကောင်းမြတ်တော်မူသည်။ 2သို့သော် ငါမူကား ခြေချော်လုမတတ်၊ ခြေလှမ်းလွဲလုမတတ်ဖြစ်ခဲ့သည်။ 3အကြောင်းမူကား ဆိုးယုတ်သောသူတို့ ကောင်းစားကြသည်ကို ငါမြင်၍ ဝါကြွားတတ်သောသူတို့ကို ငါငြူစူမိသောကြောင့်ဖြစ်သည်။ 4အကြောင်းမှာ ထိုသူတို့သည် သေသည့်အချိန်အထိ ဝေဒနာကို မခံစားကြရပေ။ သူတို့၏ကိုယ်ခန္ဓာသည်လည်း ဝဖြိုးလျက်ရှိသည်။ 5လူတို့ကြုံရသည့်အခက်အခဲပြဿနာမျိုး သူတို့တွင်မရှိပေ။ အခြားသူများကဲ့သို့ ဒုက္ခမရောက်ရကြ။ 6ထို့ကြောင့် မာန်မာနသည် သူတို့၏လည်ဆွဲဖြစ်သည်။ ရက်စက်ကြမ်းကြုတ်မှုအဝတ်သည် သူတို့အားလွှမ်းခြုံထားသည်။ 7သူတို့၏စိတ်နှလုံးမှမကောင်းမှုများကို ထုတ်ဖော်၍ သူတို့၏စိတ်သည် ယုတ်မာသည့် အကြံအစည်များကို တွေးတောလျက်နေကြသည်။ 8သူတို့သည် ပြက်ရယ်ပြု၍ ဆိုးညစ်စွာပြောဆိုတတ်ကြသည်။ ထောင်လွှားသောစိတ်ဖြင့် ဖိနှိပ်ချုပ်ချယ်မှုအကြောင်းကို ပြောဆိုတတ်ကြသည်။ 9သူတို့၏နှုတ်သည် ရွှေမြို့တော်နှင့် ဆန့်ကျင်ဘက်ပြု၍ သူတို့၏လျှာသည်လည်း ကမ္ဘာမြေကြီးကို လှည့်လည်တတ်သည်။ 10ထို့ကြောင့် ကိုယ်တော်၏လူမျိုးတို့သည် သူတို့ဘက်သို့လှည့်သွား၍ သူတို့၏ချမ်းသာကြွယ်ဝခြင်းရေကို သောက်ကြသည်။ 11သူတို့သည် "ဘုရားရှင်သည် မည်သို့သိမည်နည်း။ အမြင့်ဆုံးသောအရှင်၌ အသိပညာရှိပါမည်လော" ဟု ဆိုတတ်ကြသည်။ 12ဤသည်ကား သူယုတ်မာ ပြုကြပုံပင်ဖြစ်ပေသည်။ သို့သော် သူတို့သည် ကောင်းစား၍ အစဥ်ပင် စည်းစိမ်ချမ်းသာတိုးလျက်နေကြသည်။ 13အကယ်စင်စစ် ငါသည် ငါ၏စိတ်နှလုံးကို သန့်ရှင်းစင်ကြယ်စေ၍ ငါ၏လက်ကို အပြစ်ကင်းခြင်းထဲ၌ ဆေးကြောခဲ့သည်မှာ အချည်းအနှီးသာဖြစ်သည်။ 14ငါသည် ထိပါးနှောင့်ယှက်ခြင်းကို တစ်နေ့လုံးခံရသည်။ ဆိုဆုံးမခြင်းကိုလည်း နံနက်တိုင်းခံရသည်။ 15ကျွန်ုပ်သည် "ဤသို့ ပြောဆိုမည်" ဟု ဆိုခဲ့လျှင် ကိုယ်တော့်သားသမီးများအပေါ် သစ္စာဖောက်ရာရောက်ပါလိမ့်မည်။ 16ဤအမှုအား နားလည်ရန် ကျွန်ုပ်စဥ်းစားသောအခါ ကျွန်ုပ်အမြင်၌ ခက်ခဲသောအမှုဖြစ်ပါသည်။ 17ကျွန်ုပ်သည် ဘုရားရှင်၏သန့်ရှင်းရာဌာနတော်ထဲသို့ ဝင်သည့်အခါမှသာ သူတို့၏နိဂုံးကို သိရှိနားလည်ရပါသည်။ 18အကယ်စင်စစ် ကိုယ်တော်သည် ခြေချော်တတ်သောနေရာများတွင် သူတို့ကိုထား၍ ဆုံးပါးပျက်စီးသောအရပ်သို့ သူတို့အား ကျစေတော်မူသည်။ 19သူတို့သည် ချက်ချင်းပင် သေကြေပျက်စီးခြင်းသို့ရောက်၍ ထိတ်လန့်ဖွယ်ရာများဖြင့် အကုန်အစင်ဖယ်ရှားခြင်းခံကြရပါသည်တကား။ 20အို အရှင်၊ အိပ်မက်မှနိုးလာသကဲ့သို့ ကိုယ်တော်နိုးတော်မူသောအခါ သူတို့၏ရုပ်သွင်ကို မေ့ပျောက်တော်မူလိမ့်မည်။ 21ကျွန်ုပ်၏စိတ်နှလုံးသည် ဝမ်းနည်းကြေကွဲဖြစ်၍ ကျွန်ုပ်၏အတွင်းစိတ်သည် မခံချိမသာဖြစ်ရသောအခါ 22ကျွန်ုပ်သည် အသိတရားမဲ့၍ မည်သည့်အရာမျှမသိ။ ကိုယ်တော်၏ရှေ့တော်၌ တိရစ္ဆာန်ကဲ့သို့ဖြစ်ခဲ့ပါသည်။ 23သို့သော် ကျွန်ုပ်သည် ကိုယ်တော်နှင့်အတူ အစဉ်မပြတ်ရှိခဲ့ပါသည်။ ကိုယ်တော်သည် ကျွန်ုပ်၏လက်ယာလက်ကို ကိုင်ထားတော်မူသည်။ 24ကိုယ်တော်၏အကြံဉာဏ်အားဖြင့် ကျွန်ုပ်အား လမ်းပြတော်မူပြီးနောက် ဘုန်းအသရေတော်ထဲသို့ ခေါ်ဆောင်တော်မူလိမ့်မည်။ 25ရွှေမြို့တော်၌ ကိုယ်တော်မှတစ်ပါး ကျွန်ုပ်တွင် မည်သူရှိသနည်း။ ကမ္ဘာမြေကြီးပေါ်၌လည်း ကိုယ်တော်မှတစ်ပါး အခြားမည်သည့်အရာကိုမျှ ကျွန်ုပ်အလိုမရှိပါ။ 26ကျွန်ုပ်၏ကိုယ်ခန္ဓာနှင့် ကျွန်ုပ်၏စိတ်နှလုံးသည် အားအင်ကုန်ခန်းသော်လည်း ဘုရားရှင်သည် အစဉ်အမြဲ ကျွန်ုပ်စိတ်နှလုံး၏အစွမ်းသတ္တိ၊ ကျွန်ုပ်၏ဝေစုဖြစ်တော်မူသည်။ 27ကိုယ်တော်ရှင်အား စွန့်ပစ်ကြသူတို့သည် အကယ်စင်စစ် သေကျေပျက်စီးရကြပါလိမ့်မည်။ ကိုယ်တော်ရှင်အား သစ္စာဖောက်သူတို့ကို ကိုယ်တော်ရှင်သည် သုတ်သင်ဖျက်ဆီးတော်မူလိမ့်မည်။ 28ကျွန်ုပ်အတွက်မူကား ဘုရားရှင်ထံတော်သို့ ချဉ်းကပ်ခြင်းသည် ကောင်းမြတ်ပါသည်။ ကျွန်ုပ်သည် ကိုယ်တော်၏အမှုတော်ရှိသမျှတို့ကို ပြောကြားရန် ကျွန်ုပ်၏အရှင်ဖြစ်တော်မူသော ဘုရားရှင်ကို ကျွန်ုပ်၏ခိုလှုံရာဖြစ်စေပါသည်။
S'ha seleccionat:
Psalms 73: TPV-RV
Subratllat
Comparteix
Compara
Copia
Vols que els teus subratllats es desin a tots els teus dispositius? Registra't o inicia sessió
This translation of the TPV-RV is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.