Mathāi 28
28
Isuo ei Ānthuirētna
Mk 16:1-14; Lk 24:1-12; Zn 20:1-8
1 #
Lk 8:2
Sabat suona, hapta nikhuo mānsāna, khuonsāl aphut tiang Mari Magdalene lē Mari atei rēt chu thānkhur āen ranga a sē u na. 2#Zn 20:12; Kui 5:19Entā, nīnū ānrikpā a hong a, asik chu Puma vānpalāi khat chu anvān ātā a hong āchum a. Thān makot ātā lung chu a khāi a, a chunga ansut a. 3#Dnl 7:9; Mk 9:3; Zn 20:12A mēl chu khuonlek a phuozek a. A puon ngāi chu sūmtang anga āvār a ni. 4Ama ei ā chi u sika, ārungpū ngāi annōk u na, āthī anga a om u na. 5Tenchu vānpalāiin nupang ngāi kōma, “Ā chi u nō ro. Khrōsa āntār Isuo nei ravān u tī ka riat. 6Ama chu hiva hin om lāi mak. Amā'n ei tī anga han anthuirēt zei. Hong u tānla, ama ei zālna mun chu hong en u ro. 7Hatuka anrapa sē u tānla, a zolāi ngāi kōma, ama chu āthi ngāi ātā anthuirēt zei. En u ro, na maton una Galili rama a lei sē zei. Ama chu sovā son va mu u'n na ti. En u ro, kei na ril u a ni zei,” a tī na. 8Hatuka amāni chu anchī lē rāisān chunga thānkhur ātā a suok u na, a zolāi ngāi kōma thang avā ril ranga a tān u na.
Nupang ngāiin Puma a Mōk u
9 #
Zn 20:14-18
A zolāi ngāi āril ranga a sē u lāi han, entā, Isuo'n amāni chu antongpui a, “Chubai!” a tī na. Hatuka amānī'n a hong pan u na, a kē a sūr a, a mōk u na. 10#Mk 3:34; Zn 20:17; Heb 2:11-13, 17Isuo'n a kōm u na, “Ā chi u nō ro. Sē u tānla, ka paruol ngāi chu Galili rama āsē ranga va ril u ro. Amānī'n hava han na mu u'n ti,” a tī na.
Thānkhur Ārungpū ngāi Chongril
11Amāni chu a sē u lāi han, ārungpū ngāi senkhat chu khopuia a vā lūt u na, ii āni ngāi dōra chu chāizūng ulian ngāi kōma a va manthei u na. 12Hankēng amāni chu pātar ngāi le han anchun u na, anril antāi suo u na, sipai ngāi kōma sum atampā a pēk u na, 13“ ‘Zāna nā in kāra, a zolāi ngāi chu a hong u na, ama chu a hong maruk viak u na,’ ti u ro. 14Hiva rui hi ramoppū kuora a vā tung ten, ama chu koinī'n mantāi in tia, antak nei tēng u rang ātā na huoi bō ma ni,” a ti u na. 15Hantin han ārungpū ngāi chu sum a lāk u na, chāizūng ulian ngāiin ei ti u anga a thō u na. Avian tenpei hiva rui hi Zehudi ngāi kāra ei lā'n thek a ni.
Lupuok Alian
Mk 16:14-18; Lk 24:36-49; Zn 20:19-23
16Hatuka zolāi sōmleikhat ngāi chu Galili rama, Isuo'n ei āruot muola han a sē u na. 17Ama chu a mū u na, a mōk u na. Tenchu senkhat chu malung songankharna a dōn u na. 18#Dnl 7:13-14; Lk 10:22; Zn 3:35; 1Ko 15:27; Efe 1:20-22; Fil 2:9-10Hankēng Isuo chu amāni kōma a sē na, a chongpui a, “Anvān lē phila ningneina dōra chu ka kōma anpēka om zei. 19#Isa 49:6; Mk 16:15-16; Lk 24:47; Kui 1:8; Rōm 6:3-4; Gal 3:27; Kol 2:12Hasikhan, sē u tānla, nam tina mī zolāia sin u ro. Pā, Nāipasal lē Rathā Ānthiang raminga baptisma pēk u ro. 20#Dān 31:6; Hag 1:13; Zn 14:26; Kui 2:42; 18:10Chong kei na pēk u ngāi dōra ātel ranga manchū u ro. En u ro, hun ahek tenpei, na bil una kā om chian,” a tī na. Amen.
Bible in Ranglong, © Bibles International, the Bible society of Baptist Mid-Missions, 2024.