Santiagu 5
5
Paala-ala tu Mágkayaman hide
1Nadid, hikam a mágkayaman hide, pakatandaan moy i kagiyán kuwáy, magsanget kam ti husto dipo tu garabi a hirap a dumemát nikam. 2Nágkabuyok dán u kayamanan moy hide sakay kinákkan dán nu ipás hide u badu moy hide. 3Kinalawang dán u pilak sakay u ginto moy hide, sakay u kalawang a ina u mangpatunay a intagu moy la u kayamanan moy sakay awan moy intulung tu te kailangan hide. Káddemát nu dimodyan a aldew a umatubang kitam tu Diyos, u kalawang nu kayamanan moy u kuman a magsida nikam konna tu pagsida nu apoy dipo ina u mangpatunay a dapat kam a maparusaan. Dipo tu dimodyan a aldew u kayamanan moy la u pinappospos moy.#5:2-3 Basaán tu Mateo 6:19. 4U tolay hide a pinagtarabaho moy tu araduwan moy ay mágdadaingán tu Diyos dipo awan moy binayaden. Nadid nasaneg dán nu Diyos a makapangyariyan tu atanan u daing de hide.#5:4 Basaán tu Deuteronomio 24:14-15. 5Nabiyag kam ti sagana sakay nágpapasarapán kam la ti biyag moye ti munduwan iye. Pero tu dimodyán a aldew ay te pananagutan kam. Kumán kam a u hayup a tumabe dipo makpal a makan, pero awan na tukoy a bunuwán bál siya. 6Pinarusaan moy sakay pinabuno u tolay hide a awan ti kasalanan, maskin awan hide linumaban nikam.
Magtiyaga tu Pánnalangin
7Kákkapatkákka ko hide, magtiyaga kam be a maguhay tu káddemát nu Panginoon. Konna tu mágmula a nagtiyaga a maguhay tu uden sakay tu págbunga nu mula na hide. 8Konna labe nikitam, dapat kitam be a magtiyaga sakay begsákkan tam u isip tam dipo adene dán a dumemát u Panginoon.
9Kákkapatkákka ko hide, dyan kamon mamágsidaan tánni awan kam hatulan nu Diyos. Dipo adene dán u pághatul nu Diyos tu atanan a tolay. 10Kákkapatkákka ko hide, ahigán tam u prupeta hide a nangaral tu Upos nu Diyos, nagtiyaga hide a nagtiis tu kahirapan de hide. 11Awan beman kákkagiyán tam a mapalad u tolay hide a mágtatiisán ti hirap. Nasaneg moy dán u tungkul ni Job tu págtiis na ti madágge a hirap, sakay tukoy moy dán be a tu katapusan ay pinagpala siya nu Panginoon. Ketan tam he a makákkagbiyán sakay mabait u Panginoon.#5:11 Basaán tu Job 1:21-22, 2:10, Awit 103:8, 111:4.
12Higit tu atanan kákkapatkákka ko hide, dyan kamon sumumpa, ni magpangako kam. Dyan moy kagiyán a, “Tistigu ko u langet!” oni “Tistigu ko u luta,” oni ánya paman a kabagay. Kagiyán moy dálla a “on ni on,” oni “awan ni awan,” tánni awan kam hatulan nu Diyos.#5:12 Basaán tu Mateo 5:37.
13Tehhod beman nikam a maghirap? Dapat magdasal siya tu Diyos. Tehhod beman nikam a masaya? Dapat magkansiyon siya ti papure tu Diyos. 14Tehhod beman a te saket nikam? Dapat pauwet na u pupuno hide nu mánnampalataya hide tánni ipagdasal de siya sakay pahidan ti langis tu ngahan nu Panginoon.#5:14 Basaán tu Markos 6:13. 15U panalangin a te pánnampalataya ay makapagpapiyya tu te saket, sakay pabegsákkán siya nu Diyos sakay patawadán na ni te kasalanan siya.
16Kanya itapat moy tu balang essa u kasalanan moy hide sakay ipagdasal moy u balang essa tánni magpiyya kam. Dakál u magimet nu panalangin nu tolay a pirme a sumunud tu kagustuwan nu Diyos. 17Konna ni Elias, maskin prupeta siya ay tolay padi siya a konna nikitam. Pero nikuna a nagdasal siya a dyan nakwa maguden, ay awan ngane naguden ti tállo a taon ay ti kalahate.#5:17 Basaán 1 Hare 17:1, 18:1, Lukas 4:25. 18Nikuna a nagdasal siya a huway para maguden ay naguden dan sakay nagtubu u mula nu tolay hide sakay nagbunga.#5:18 Basaán tu 1 Hare 18:42.
19Kákkapatkákka ko hide, ni tehhod a essa nikam a nehiwalay tu tatahoden ay maganda ni maakit moy siya a huway. 20Dapat moy a matukuyan a u mánggiya tu tolay a makasalanan para iwahak na u makasalanan na a kákkabiyag ay nangligtas tu kaliduwa ni iye tu kamatayan. Sakay siya be u dahilan nu kapatawaden nu makpal a kasalanan ni tolayan itod.#5:20 Basaán tu Kawikaan 10:12, 1 Pedro 4:8.
S'ha seleccionat:
Santiagu 5: MBJC
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
Pahanan Agta New Testament © Philippine Bible Society and Wycliffe Bible Translators, Inc., 2017.