Sealm 25
25
Sealm XXIV (25)
Dauid sang þysne feower and twentigoðan sealm and hine þæron gebæd, þa he to þære reste becom þe he ær wilnode; and eac he witegode on þam sealme be þæs folces gehwyrfnesse of heora hæftnyde, þa hi on Babilonia gehæfte wæron; and swa ylce bi ælcum rihtwisum þonne he ænige reste hæfð æfter his earfoðum; and eac be Criste æfter his æriste.
1To þe ic hæbbe, Drihten, min mod and mine sawle.
2Drihten, min God, to þe ic hopige,
and ic þæs næfre ne sceamige;
ne mine fynd me næfre for ðy ne bysmrian,
3ne nan þæra þe to þe hopað ne wyrð gescended.
Scamien heora ealle þa unrihtwisan þe idelnesse wyrcað.
4Drihten, gedo me þine wegas cuðe,
and lær me þine paðas.
5Geræd me and gerece on þinre soðfæstnesse, and lær me,
for þam þu eart, Drihten, min hælend;
ælce dæge ic anbidige þines fultumes.
6Gemun, Drihten, þinra miltsunga and þinre mildheortnesse
þe fram fruman worlde wæs.
7Þa scylda mines iugoðhades ne gemun þu, Drihten,
ne huru þa þe ic ungewisses geworhte
(þæt synt, þa þe ic wende þæt nan scyld nære),
ac for þinre myclan mildheortnesse beo þu min gemyndig, Drihten. For þinre gōdnesse,
8Drihten, þu eart swete and wynsum and eac rihtwis.
For þam gesette God æ scyldiendum on heora wegum,
9and geriht þa manðwæran on domum,
and him getæceð his wegas.
10Ealle Godes wegas syndon mildheortnes and rihtwisnes
ælcum þæra þe his æ secað and his bebodu lufiað.
11Drihten, for þinum naman beo þu forgifende mina synna,
for þy hi synt swyðe mycele.
12Swa hwylc mann swa Drihten ondræt,
he him geset þa æ,
and him sylð þæt geþeaht on þone weg þe heora ægðrum licað,
ge Gode ge eac þam men.
13His sawl hi gerest softe on monegum goodum,
and his sæd on ece yrfeweardnesse gesit eorðan.
14Drihten is mægen and cræft ælces þæra þe hine ondræt,
and he him getæcð eallum his willan.
15Symle lociað mine eagan to Gode,
for þam he alysð mine fet of gryne.
16Geloca to me, Drihten, and gemiltsa me,
for þam ic eom ana forlæten, yrming.
17And þa earfoðu minre heortan synd swyðe tobræd and gemanigfealdod;
gedo for þi, Drihten, þæt þu me gefriðie æt minre nydþearfe.
18Geseoh mine eaðmetto and mine earfoða,
and forgif ealle mine scylda.
19And geseoh eac mine fynd,
for þam hi synt swyþe gemanigfealdode,
and geseoh hu unrihtlice hi me hatiað.
20Geheald mine sawle and gefriða me,
þæt me ne sceamie þæs þe ic to þe clypige.
21Þa unsceðfullan and þa rihtwisan, þa þe begangað, coman to me,
wendon þæt me sceolde cuman sum fultum and sum frofor fram þe,
for þam ic symle þæs anbidode and wilnode
and wende æt þe, Drihten.
22Gefriða me, Drihten, Israela God, of eallum minum nearonessum.
S'ha seleccionat:
Sealm 25: ASPsa
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
The first 50 psalms are credited to King Alfred the Great and were written in c.890-899 AD, and the last 100 psalms were translated c.900-950 AD by an unknown poet.