Nani 27
27
Isicelo samadodakazi kaZelofehadi
1Kwasekusondela amadodakazi kaZelofehadi kaHeferi kaGileyadi kaMakiri kaManase kaJosefa. Amabizo awo ayengoMahla loNowa loHogila loMilka loTiriza. 2Ema phambi kukaMose loEleyazare umpristi, laphambi kwezikhulu lebandla lonke, ngasemnyango wethente lokuhlangana, athi: 3Ubaba wafela enkangala; wayengekho phakathi kwalabo beqembu likaKora abavukela iNkosi, kodwa wafa ngesakhe isono engelamadodana. 4Kulungile yini ukuthi ibizo likababa liphele phakathi kosendo lwakhe ngoba engelamadodana na? Siphe ilifa phakathi kwabafowabo bakababa.
5UMose wayiletha indaba yawo phambi kweNkosi. 6INkosi yathi kuMose: 7Amadodakazi kaZelofehadi akhulume iqiniso; uwanike ilizwe libe yilifa lawo phakathi kwabafowabo bakayise; ilifa likayise kalinikwe wona. 8Tshono ebantwini bakoIsrayeli uthi: Uba umuntu esifa, engelandodana, ilifa lakhe kalinikwe indodakazi yakhe. 9Uba engelandodakazi, uzanika abafowabo ilifa lakhe. 10Uba engelabafowabo, uzanika abafowabo bakayise ilifa lakhe. 11Uba uyise engelabafowabo, uzanika esinye isihlobo esiseduze laye ilifa lakhe, silidle. Lokhu kuzakuba yisimiso lomthetho ebantwini bakoIsrayeli, njengokutsho kweNkosi kuMose.
UMose ukhetha uJoshuwa ukuba ngumkhokheli
12INkosi yathi kuMose: Khwela lintaba yaseAbarimi, ubone ilizwe engilinike abakoIsrayeli.#Dute 3:23–27; 32:48–52 13Kuzakuthi lapho usulibonile, uzalandela abakini, njengomfowenu uAroni; 14ngoba kalilalelanga ilizwi lami enkangala yaseZini lapho ibandla liphikisana lami, kalingivezanga ngingcwele emehlweni abantu — La ngamanzi aseMeriba laseKadeshi enkangala yaseZini — 15UMose wasesithi eNkosini: 16INkosi, uNkulunkulu wemimoya yakho konke okuphilayo, kayimise umuntu ebandleni, 17ongabahola ekuphumeni kwabo lasekubuyeni kwabo ukuze ibandla leNkosi lingabi njengezimvu ezingelamalusi.#1 Kho 22:17; Hez 34:5; Mat 9:36; Mark 6:34 18INkosi yathi kuMose: Thatha uJoshuwa indodana kaNuni, umuntu olomoya, ubeke isandla sakho phezu kwakhe,#Eks 24:13 19ummise phambi kukaEleyazare umpristi laphambi kwebandla lonke, umlaye phambi kwabo, 20umnike amandla akho, ukuba lonke ibandla labakoIsrayeli lilalele. 21Yena uzakuma phambi kukaEleyazare umpristi ozambuzela ngokwenza inkatho iUrimi phambi kweNkosi; ngelizwi lakhe bazakuphuma, langelizwi lakhe bazakungena, lonke ibandla lakoIsrayeli kanye loJoshuwa.#Eks 28:30; 1 Sam 14:41; 28:6 22UMose wenza njengokutsho kweNkosi kuye. Wathatha uJoshuwa, wammisa phambi kukaEleyazare umpristi laphambi kwebandla lonke, 23wabeka izandla zakhe phezu kwakhe, wamlaya, njengokulaya kweNkosi ngoMose.#Dute 31:23
S'ha seleccionat:
Nani 27: BE1978
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
Bible Society of Zimbabwe 1978