Levi 23
23
Imikhosi emisiweyo
1INkosi yathi kuMose: 2Tshono ebantwini bakoIsrayeli uthi: Nansi imikhosi yeNkosi elizakuyimemezela ibe zinkonzo ezinkulu, imikhosi yami emisiweyo. 3Umsebenzi uzakwenziwa insuku eziyisithupha; kodwa usuku lwesikhombisa luzakuba liSabatha lokuphumula, lube lusuku lwenkonzo enkulu; lingasebenzi ngalo; luyiSabatha eNkosini kuyo yonke imizi yenu.#Eks 20:8–10; 23:12; 31:15; 34:21; 35:2; Dute 5:12–14
4Nansi imikhosi emisiweyo yeNkosi, izinkonzo ezinkulu elizakuzimemezela ngezikhathi zayzo ezimisiweyo. 5Usuku lwetshumi lane lwenyanga yokuqala, kusihlwa, luliPhasika leNkosi.#Nani 28:16—29:40#Eks 12:1–13; Dute 16:1–2 6Usuku lwetshumi lanhlanu lwaleyonyanga lungumkhosi wesinkwa esingelamvubelo eNkosini; dlanini isinkwa esingelamvubelo insuku eziyisikhombisa. #Eks 12:14–20; 23:15; 34:18; Dute 16:3–8 7Wobani lenkonzo enkulu ngosuku lokuqala; lingasebenzi ngalo. 8Nikelani umnikelo owenzelwe iNkosi ngomlilo insuku eziyisikhombisa. Ngosuku lwesikhombisa kuzakuba khona inkonzo enkulu; lingasebenzi ngalo.
9INkosi yathi kuMose: 10Tshono ebantwini bakoIsrayeli uthi: Lapho selifikile elizweni engilinika lona, livune isivuno salo, lethani isithungo senu sokuqala kumpristi, 11azunguze isithungo phambi kweNkosi ukuba lamukeleke. Umpristi uzakusizunguza ngosuku olulandela iSabatha. 12Ngosuku elizunguza ngalo isithungo, nikelani ngewundlu eliduna elilomnyaka munye, elingelasici, libe ngumnikelo wokutshiswa eNkosini. 13Umnikelo wempuphu ozanikelwa lalowo uzakuba yingxenye yehefa lempuphu ecolekileyo ixubene lamafutha, ube ngumnikelo owenzelwe iNkosi ngomlilo olephunga elimnandi; lomnikelo wokuthululwa ozanikelwa lawo uzakuba ngokwesine kwehini lewayini. 14Kaliyikudla isinkwa, lomumbu okhanzingiweyo, lezikhwebu ezintsha, kuze kufike lolosuku, lingakalethi umnikelo kaNkulunkulu wenu. Lokhu kuyisimiso esingelakuphela ezizukulwaneni zenu, kuyo yonke imizi yenu.
15Kusukela kulolosuku olulandela iSabatha, eliletha ngalo isithungo esizunguzwayo, balani amaviki ayisikhombisa,#Eks 23:16; 34:22; Dute 16:9–12 16libale insuku ezingamatshumi amahlanu emva kweSabatha lesikhombisa; ng’khona lizanikela umnikelo omutsha wempuphu eNkosini. 17Thathani emizini yenu izinkwa ezimbili ezizakuzunguzwa, ezenziwe ngengxenye yehefa lempuphu ecolekileyo, ziphekiwe lemvubelo, lizilethe zibe yingqabutho yezithelo eNkosini. 18Kanye lesinkwa lizanikela amawundlu ayisikhombisa alomnyaka munye, angelasici, lenkunzi, lenqama ezimbili, zibe ngumnikelo wokutshiswa eNkosini, kanye lomnikelo wempuphu leminikelo yokuthululwa eqondene lalezo, kube ngumnikelo owenzelwe iNkosi ngomlilo olephunga elimnandi. 19Lizanikela ngempongo ibe ngumnikelo wesono, lamawundlu amaduna amabili alomnyaka munye abe ngumhlatshelo weminikelo yokuthula. 20Umpristi uzakuzizunguza kanye lesinkwa sengqabutho yezithelo zibe ngumnikelo wokuzunguzwa phambi kweNkosi, lezimvu ezimbili; zizakuba ngcwele eNkosini, zibe ngezompristi. 21Lizamemezela ngalolosuku, lenze inkonzo enkulu, lingasebenzi. Lokhu kuyisimiso esingelakuphela kuyo yonke imizi yenu ezizukulwaneni zenu.
22Lapho livuna isivuno selizwe lakini, lingavuni ngokupheleleyo kuze kufike emngceleni wensimu; futhi lingabuthi okuseleyo lapho seliqedile ukuvuna, kodwa likutshiye kube ngokwabayanga lokwabemzini. NgiyiNkosi uNkulunkulu wenu.#Levi 19:9–10; Dute 24:19–22
23INkosi yathi kuMose: 24Tshono ebantwini bakoIsrayeli uthi: Usuku lokuqala lwenyanga yesikhombisa luzakuba lusuku lokuphumula kini, usuku oluyisikhumbuzo olumenyezelwa ngokutshwaywa kwezimpondo, kube lenkonzo enkulu ngalo. 25Lingasebenzi ngalo; nikelani umnikelo owenzelwe iNkosi ngomlilo.
26INkosi yathi kuMose:#Levi 16:29–34 27Usuku lwetshumi lwenyanga le yesikhombisa luzakuba lusuku lokwenza indlela yokubuyisana, lube yisikhathi senkonzo enkulu; lizakuzithoba, linikele umnikelo owenzelwe iNkosi ngomlilo. 28Ngalolosuku lingasebenzi, ngoba kulusuku lokubuyisana, ukuze lenzelwe lina indlela yokubuyisana phambi kweNkosi uNkulunkulu wenu. 29Umuntu ongazithobiyo ngalolosuku uzakhutshwa ebantwini bakibo. 30Lalowo osebenzayo ngalolosuku ngizakumbhubhisa phakathi kwabantu bakibo. 31Lingasebenzi ngalo. Lokhu kuyisimiso esingelakuphela ezizukulwaneni zenu kuyo yonke imizi yenu. 32Lolosuku luzakuba liSabatha lokuphumula kini, lizithobe; ngosuku lwesificamunwemunye lwenyanga, kusukela kusihlwa kuze kube kusihlwa, lizakugcina iSabatha lenu.
33INkosi yathi kuMose:#Dute 16:13–15 34Tshono ebantwini bakoIsrayeli uthi: Usuku lwetshumi lanhlanu lwenyanga le yesikhombisa luzakuba ngumkhosi wamadumba, ozagcinelwa iNkosi insuku eziyisikhombisa. 35Ngosuku lokuqala kuzakuba lenkonzo enkulu; lingasebenzi ngalo. 36Lizakunikela umnikelo owenzelwe iNkosi ngomlilo insuku eziyisikhombisa. Ngosuku lwesificaminwembili lizakwenza inkonzo enkulu, linikele umnikelo owenzelwe iNkosi ngomlilo. Kuyinkonzo yokucina, ngakho kaliyikusebenza.
37Leyo yimikhosi emisiweyo yeNkosi elizakuyimemezela ibe zinkonzo ezinkulu, ukuba kunikelwe iminikelo eyenzelwe iNkosi ngomlilo, iminikelo yokutshiswa, leminikelo yempuphu, imihlatshelo leminikelo yokuthululwa, kube yilowo lalowomnikelo ngosuku lwawo, 38kanye lamaSabatha eNkosi, leziphiwo zenu, leminikelo yenu yonke yokugcwalisa izithembiso, leminikelo yenu yonke yesihle, elinikela ngayo eNkosini.
39Ngosuku lwetshumi lanhlanu lwenyanga yesikhombisa, lapho selibuthile isivuno selizwe, gcinani umkhosi weNkosi insuku eziyisikhombisa. Usuku lokuqala losuku lwesificaminwembili zizakuba yizinsuku zokuphumula.#Eks 23:16; 34:22 40Ngosuku lokuqala thathani izithelo zezihlahla ezinhle, lezingatsha zamalala, lezingatsha zezihlahla ezilamahlamvu amanengi, lemidubu yemifula, lithabe phambi kweNkosi uNkulunkulu wenu insuku eziyisikhombisa. 41Lizakuwugcina ube ngumkhosi eNkosini insuku eziyisikhombisa ngomnyaka. Lokhu kuyisimiso esingelakuphela ezizukulwaneni zenu; liwugcine ngenyanga yesikhombisa. 42Lizakuhlala emadumbeni, 43ukuze izizukulwana zenu zazi ukuthi ngabahlalisa abantu bakoIsrayeli emadumbeni ekubakhupheni kwami elizweni laseGibithe. NgiyiNkosi uNkulunkulu wenu.
44Ngokunjalo uMose wabatshela abantu bakoIsrayeli ngemikhosi emisiweyo yeNkosi.
S'ha seleccionat:
Levi 23: BE1978
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
Bible Society of Zimbabwe 1978