Levi 20
20
Abantu abenza okubi bazakuphathwa njengobubi babo
1INkosi yathi kuMose: 2Tshono ebantwini bakoIsrayeli uthi: Yilowo lalowo wabakoIsrayeli, loba owabezizweni abahlala koIsrayeli, onikela ngabantwana bakhe kunkulunkulu uMoloki, kabulawe, abantu belizwe bamkhande ngamatshe. 3Minake ngizamelana lalowomuntu, ngimkhuphe ebantwini bakibo, ngoba enikele ngomunye wabantwana bakhe kuMoloki, wangcolisa indlu yami engcwele, wahlambaza ibizo lami elingcwele. 4Uba abantu belizwe bekhangela eceleni nxa lowomuntu enikela ngomunye wabantwana bakhe kuMoloki, bangambulali, 5mina ngizamelana laye labomuzi wakhe, ngibakhuphe ebantwini bakibo, yena labo bonke abamlandelayo abaphinga loMoloki.
6Uba umuntu esiya kulabo abalamadlozi lezanuseni ukuyaphinga labo, ngizamelana laye, ngimkhuphe ebantwini bakibo. 7Zihlambululeni lina libe ngcwele, ngoba ngiyiNkosi uNkulunkulu wenu. 8Gcinani izimiso zami, lizenze. NgiyiNkosi elenzayo libe ngcwele. 9Wonke umuntu othuka uyise ingabe unina uzakubulawa; uthukile uyise ingabe unina, ngakho ufanele ukufa.#Eks 21:17; Mat 15:4; Mark 7:10
10Uba umuntu efeba lomkamakhelwana, bobabili abafebayo kababulawe.#Eks 20:14; Levi 18:20; Dute 5:18 11Umuntu olala lomkayise wambule ubunqunu bukayise; bobabili kababulawe, bafanele ukufa.#Levi 18:8; Dute 22:30; 27:20 12Uba umuntu elala lomalokazana, bobabili kababulawe; benzile ihlazo, bafanele ukufa.#Levi 18:15 13Uba indoda ilala lendoda njengowesifazana, bobabili benzile okubi; kababulawe, bafanele ukufa.#Levi 18:22 14Uba umuntu ethatha umfazi kanye lonina, lokhu kuyibubi. Kabatshiswe ngomlilo, yena labo, ukuba kungabi khona ububi phakathi kwenu.#Levi 18:17; Dute 27:23 15Uba umuntu elala lenyamazana, kabulawe, liyihlabe inyamazana.#Eks 22:19; Levi 18:23; Dute 27:21 16Uba owesifazana esiya enyamazaneni, alale layo, mbulaleni owesifazana lenyamazana; kabulawe lenyamazana, kufanele ukufa.
17Uba umuntu ethatha udadewabo, indodakazi kayise loba ekanina, babonane ubunqunu bakhe, kulihlazo; kabakhutshwe emehlweni abakibo; wambule ubunqunu bukadadewabo, ngakho kathwale ububi bakhe.#Levi 18:9; Dute 27:22 18Uba umuntu elala lowesifazana osemfuleni, ambule ubunqunu bakhe, unqunule umthombo wegazi lakhe, lowesifazana uzambule ubunqunu bakhe, bobabili kabakhutshwe ebantwini bakibo.#Levi 18:19 19Ungambuli wena ubunqunu bukadadewabo kanyoko, loba ubunqunu bukadadewabo yihlo; ngoba ngalokho umuntu wambule ubunqunu besihlobo sakhe; bobabili bazathwala ububi babo.#Levi 18:12–14 20Uba umuntu elala lomkamfowabo kayise, wambule ubunqunu bomfowabo kayise; bazathwala ububi babo, bafe bengelabantwana. 21Uba umuntu ethatha umkamfowabo, kuyikungcola; wambule ubunqunu bukamfowabo, ngakho kabayikuba lomntwana.#Levi 18:16
22Ngakhoke gcinani zonke izimiso zami lezahlulelo zonke zami, lizenze, ukuze ilizwe engiliholela kulo lingalihlanzi. 23Kaliyikuhamba ngamasiko esizwe engisixotshayo phambi kwenu; benza zonke lezozinto, ngakho nganengwa yibo. 24Kodwa ngathi kini: Lizakuthumba ilizwe labo, ngilinike lona libe yilifa lenu, ilizwe eligcwele uchago lenyosi. NgiyiNkosi uNkulunkulu wenu, olahlukanise labezizwe. 25Ngakhoke yahlukanisani inyamazana ezihlambulukileyo lezingahlambulukanga, lezinyoni ezihlambulukileyo lezingahlambulukanga; lingazingcolisi ngezinyamazana loba ngezinyoni loba ngezinto ezihuquzelayo emhlabathini, engizahlukanise lani ngathi zingcolile. 26Wobani ngcwele kimi, ngoba mina Nkosi ngingcwele; ngilahlukanisile labezizwe ukuba libe ngabami.
27Owesilisa lowesifazana abalamadlozi loba abayizanuse, kababulawe, bakhandwe ngamatshe, bafanele ukufa.
S'ha seleccionat:
Levi 20: BE1978
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
Bible Society of Zimbabwe 1978