Roma 4
4
Ibrahimu Uya Tsapǝr Dzǝ Lagur Mbǝrsa
1Ya, mi nga mǝna na ar kǝra Ibrahimu, ǝjiya ǝjir ˈya? Mi nga ji nggabiya ar kǝra mbǝrsa? 2Maja bǝr Ibrahimu nda uya tsapǝr dzǝ lagur thlǝr nyi, sǝr ɓwadzau aˈyi ara ja, ama aˈyi a dumwar Hyal mai. 3Ndǝr Hyal tsǝtsǝfǝ nana, “Ariya Ibrahimu hǝnggǝri ǝnga Hyal, kǝ Hyal jigǝwa nyi ar viya ndǝ tsapǝu.”
4Ndǝr mǝl thlǝr gǝnna, gǝnna ki nyi aˈyi sǝ kurthlǝ ngǝ mai, ama akkǝri nǝ mǝl thlǝr nyi ngau. 5Ətsu, anǝ ndǝra gǝra mǝl thlǝr, ama ju hǝnggǝri abǝr Hyal nǝ nyi tsapǝr dzǝ anǝ njira gǝra hivǝr Hyal, ba ji jigǝwa mbǝrsa nyi ar viya tsapǝkur. 6Dawuda a nanari tangǝ ǝnggǝr kau, abǝr barka kǝra nji mǝliya anǝ ndǝra Hyal nǝ nyi tsapǝkur, aˈyi lagu thlǝr nyi mai,
7“Njir barka ngǝ njira
nji tǝfǝbiya nda sǝ ɗǝmwaˈyi kǝra ndǝ mǝlna,
njira nji cina nda bikǝr nda.
8Ndǝr barka ngǝ
ndǝra Thlagǝ gǝra jiga bikǝ nyi.”
9Naja ka barkakur anǝ njira nji thlana nda pǝlzha nga nyi waci ya, ǝndǝga ǝkkǝˈyi njira nji gǝra thlana nda pǝlzha ya? Sǝra ˈyu na ca ngǝ, “Ariya Ibrahimu hǝnggǝri ǝnga Hyal, kǝ Hyal jigǝwa nyi ar viya ndǝ tsapǝu.” 10Ya, ǝnuwa nga nji jigǝwa nyi wu nji tsapǝ ka? Ayukuɗa nji thlana nyi pǝlzha, ǝndǝga tsu nji gǝra thlana nyi ya? Aˈyi ayukuɗa nji thlana nyi pǝlzha mai ama kadivira nji thlana nyi pǝlzha.
11Ama ǝnggǝra ji dlǝwuri mǝtsamǝ nǝ thla pǝlzha, kǝ ngǝ cabiya sakida mǝtsamǝ nǝ tsapǝkur nyi lagur mbǝrsa nyi, ar pǝcira tsu nji gǝra thlana nyi pǝlzha. Ariya kau, ngǝ Ibrahimu ɗa dǝya patǝr njira ǝnga mbǝrsa, njira nji jigǝwa nda abǝr nji tsapǝ nga nda, alaga kǝ nji aˈyi thlana nda pǝlzha mai. 12Ənga abangǝ tsu nga ji ɗa tada anǝ njira nji thlana nda pǝlzha, aˈyi njira nji thlana nda pǝlzha waci mai, ama njira ɓau wu culi mbǝrsa nǝ dǝrmǝn Ibrahimu kadivira nja thlana nyi pǝlzha.
Alkawal Hyal Ənga Mbǝrsa Nǝ Ndau
13Aˈyi lagu dlaɗǝ ngǝ Ibrahimu ǝnga culi nyi dlǝwuri alkawal nǝ faˈaki duniya mai, ama lagu tsapǝkur kǝra shili lagur mbǝrsa. 14Ma ɗa njira wu nu dlaɗa nyi ngǝ njir faˈaki duniya wacu, mbǝrsa a ɗar sǝ kurthlǝu, ǝnga alkawal nǝ Hyal a ɗar dzafu. 15Ara dlaɗǝ ngǝ wu shili ǝnga huɗǝ ndzǝndzǝ nǝ Hyal, ama vira dlaɗǝ aˈyi mai, ɓǝl dlaɗǝ aˈyi mai.
16Agabangau, Hyal lǝr alkawal kǝ anǝ njira ǝnga mbǝrsa, aga ja nggya lagu mayiwakur nǝ Hyal, aga ja ɗa cicipǝu anǝ patǝr wazha Ibrahimu. Wazha Ibrahimu aˈyi anǝ njira ǝgya kiɗa dlaɗǝ waci mai, ama anǝ patǝr njira ǝnga mbǝrsa ǝnggǝr kǝra Ibrahimu ǝnga mbǝrsa. Ibrahimu tsu naja ngǝ ar viya dǝrmǝn patǝu. 17Ənggǝr kǝra ja tsǝtsǝfau, abǝr, “Yi fiya ngau aga ga ɗa tada ar kǝra culi nji gangǝu.” Naja ngǝ tada ar kǝra mǝn patǝ wu mwar Hyal, ndǝra ji hǝnggǝri ǝnga ja. Naja ngǝ Hyal kǝra wu lǝ pi anǝ nji tǝtau ǝnga ju mǝliya sǝ sara wu sǝ kǝra aˈyi mai.
18Alaga kǝ ɗa fǝrkǝr nǝ Ibrahimu a ɗar sǝ kurthlǝu, agabangau kǝ ji dumwa ǝnga fǝrkǝr lagur mbǝrsa ba mǝliya ji ɗa dǝya culi nji gangǝu, ǝnggǝr kǝra nji nar nyi, abǝr, “Abangau ngǝ culi ngǝ wu nda ɗa.” 19Naja aˈyi ɗa kukufǝu wu mbǝrsa nyi mai, alaga kǝ hal a thlǝwa nyi ri kau, dza ja a ɗar ǝnggǝr tǝtau, ar pǝci ta fa nyi a kar fa gharu, ǝnga kir ya nǝ mala nyi Saratu a tǝri tsu.
20Alaga abangau, naja aˈyi tǝkǝ kǝr ǝnga alkawal kǝra Hyal mǝliya nyi mai, ama ji cakau ǝnga dǝnama wu mbǝrsa nyi, ju lǝ kadakadarkur anǝ Hyal. 21Ji nggya ǝnga mbǝrsa gagaɗau, abǝr, Hyal wu sǝni nyabiya kalar alkawal nyi. 22Ariya Ibrahimu mbǝrsa ǝnga Hyal, ca ngǝ sǝra ɗa, “Hyal jigǝwa nyi ar viya ndǝ tsapǝu.” 23Naja ka ndǝr kǝra na, abǝr, “nji jigǝwa mbǝrsa nyi ar viya ndǝ tsapǝu,” aˈyi aga naja zhizhi nyi nga nji tsǝfǝ mai.
24Ama nji tsǝfǝri naja ka ndǝr anǝ mǝn tsu, namǝn kǝra Hyal wu nda jigǝwa mǝn wu nji tsapǝu, namǝn nji kǝra hǝnggǝri ǝnga ja ndǝra hyaˈana Yesu Thlagǝr mǝn sara vir tau. 25Hyal ngǝ lǝr Yesu aga nja tsiya nyi ariya sǝr mǝla mǝn kǝra ɗǝmwaˈyu, ǝnga ji hyaˈana nyi ǝnga pi, aga mǝna ɗa nji tsapǝu wu mwa nyi.
©2024 Initiative for the Translation and Development of African Languages and Margi Tiwi Nga Təm