Roma 13
13
Nu Sǝra Njir Tǝɗǝmwa Nana
1A ɗar tsaˈa anǝ kalar ndǝ ja lǝr kǝrnyi anǝ sǝra njir tǝɗǝmwa nana. Ara vanyi ndǝr tǝɗǝmwa kǝra ǝnga dǝnama tǝlkur aˈyi mai, kǝl ndǝra Hyal ngǝ fiya nyi. Ətsu patǝr njir tǝɗǝmwa kǝra aˈyi, Hyal ngǝ fiya nda.
2Agabangau, kalar ndǝra nggǝl ara gǝnggǝr nyi sǝli anǝ njir tǝɗǝmwa, a nggǝlǝri ja ara nu sǝra Hyal ngǝ mǝliya. Njira wu mǝl abangau, ndu shili ǝnga numa nǝ ɓwaɓwatǝu a dar kǝra nda. 3Ara njir tǝɗǝmwa aˈyi njira nji nǝ nda thlǝr nǝ lǝ hivǝr anǝ njir mǝl sǝra tsatsaˈa mai, ama anǝ njira wu mǝl sǝra aˈyi tsaˈa mai. Gu yiwu ga tǝkǝbiya dzǝ ǝnga hivǝr njira ǝnga dǝnama tǝlkur nǝ tǝɗǝmwa ya? Kǝl ga mǝl sǝra tsatsaˈa, naja tsu ju nda faliya ngau.
4Ara naja ndǝr mǝl thlǝr Hyal kǝra wu mǝliya ngǝ sǝra mǝnahǝu. Ama ma gǝ ndǝr mǝl sǝra ɗǝmwaˈyu, ba ga nggya ǝnga hivǝr, ara naja aˈyi ndǝr tǝɗǝmwa kǝra ǝnga katsakǝr wu tsi nǝ kurthlǝ mai. Naja ndǝr mǝl thlǝr Hyal ngau, ndǝra ǝnga dǝnama nǝ lǝ ɓwaɓwatǝu anǝ njir mǝl sǝra ɗǝmwaˈyu. 5Agabangau, tsaˈa nga nyi hya lǝr kǝrhyi anǝ njir tǝɗǝmwa. Aˈyi aga hya hwinakǝr ara ɓwaɓwatǝ sara ara Hyal wacu mai, ama aga hya uya ɗahǝ ɗǝfu camǝu.
6Naja kǝ tsu ca ngǝ ɗa hyu ki budau, ara njir tǝɗǝmwa njir mǝl thlǝr Hyal ngau, njira lǝr kǝrnda aga mǝl thlǝr nǝ tǝɗǝmwa. 7Hya kina nyi anǝ kalar ndǝ sǝra ju nu hyi. Ma budǝ ngau, ba hya kina. Ma sǝra nju tsǝm ngau, ba hya tsǝmiya. Ma gǝnggǝr sǝli ngau, ba hya gǝnggǝr nda sǝli. Ətsu ma lǝ dǝgalkur ngau, ba hya lǝr nda dǝgalkur.
Yiwudzǝ Anǝ Kuvwar Hyi
8Hya sara sǝɓǝ mǝl ndǝ mai, kuji ja ɗa mǝl nǝ yiwudzau wu pama hyi. Ara ndǝra ca yiwu anǝ kuvwa nyi a nyabiyar ja dlaɗau. 9Dlaɗǝ nana, “A sara ga mǝl sǝsukur mai, a sara ga tsa ndǝ mai, a sara ga hǝl mai, a sara ga ɗa ndǝr suna mai,” ǝnga kalar sǝra alenyi dlaɗǝ ɓǝra nana, patǝkura nda a daɓiyar nda dzau wu dlaɗǝ zǝmǝ kau, “Hya yiwu kuvwar hyi ǝnggǝr kǝrhyi.” 10Ma gu yiwu ndau, naga sǝni mǝliya nyi ɗǝmwaˈyikur mai. Agabangǝ yiwukur ngǝ sǝra nyabiya dlaɗau.
11Ənga hya mǝl abangau, ara hyu sǝnibiya culi pǝci kǝra hya a gwa. Pǝci a shiliri kǝra hya kyaga hyaˈari wu ghanyi, ariya pǝcir mbǝɗǝr mǝn a ɗar lǝhǝu, a ndiya pǝci kǝra mǝn saya hǝnggǝri. 12Vuˈyi a ɗar lǝhǝ ja kuɗau, ba puci a ɗa. Agabangau, bǝgǝ mǝna piyari thlǝr nǝ kuthlǝu, ba mǝna har kar par mǝn kǝra ǝnga mbǝmbǝl.
13Bǝgǝ nggyabiyar mǝn ja ɗa tsaˈa aga njira a vǝr nggya wu mbǝmbǝl nǝ puci, aˈyi daɓǝ ǝnga sa sǝ sasa kǝra wu hǝ ndǝ wu kǝr mai, aˈyi ǝnga nggya wu lagu sǝsukur mai, aˈyi ǝnga pa ba ǝnga ɗa shishikur mai. 14Ar viya kau, bǝgǝ hya hǝr culi nggyabiya nǝ Thlagǝ Yesu Kǝrsiti, ǝnga a sara hya ɗǝnga sǝra ndu cimǝ mai, kǝra wu fuwa hyi wu suna nǝ ndǝndǝkur.
©2024 Initiative for the Translation and Development of African Languages and Margi Tiwi Nga Təm