Matiwu 28
28
Hyaˈarir Yesu Sara Vir Tau
(Markusu 16:1-8; Luka 24:1-12; Yahwana 20:1-10)
1Ayukuɗa Pǝcir Ɓǝlsar nǝ njir Yahudiya tǝrabiya, ǝmudlǝ kaɗǝu pǝci nǝ tanggǝrma nǝ sugu, kǝ Maryamu Magǝdaliya nanda ǝnga vanyi Maryamu maˈyi a nda tsamǝ huwa nyi.
2Kǝ kǝnggǝɗǝ ˈyiˈyi gagaɗǝ ɗarkǝr, ara vanyi waladi nǝ Thlagǝ shida sara dǝmǝlmau, ji sa maˈyi a nda miya huwa nyi, ji nda jahǝna tsǝka kǝra nji haɗiya miya huwa nyi ǝni, ba ji nggya ari. 3Dza ja wu mbǝl wilwilu ǝnga lǝgutǝ ha nyi pǝrtǝ pwahǝu ǝnggǝr ǝpur paˈwa. 4Ənggǝra njir ɓǝla huwa nyi lari nyi, ba hivǝr mbari nda gagaɗau, ǝnga dza nda wu tsǝdzau, kǝra mǝliya ndǝ ɗa ǝnggǝr nji tǝtau.
5Ama kǝ waladiya nyi na anǝ mathlǝkǝˈya nyi, “Hya sara hivǝr mai, ariya yu sǝni abǝr Yesu nga hya vǝr gal, ndǝra nji dlakǝya ta. 6Aˈyi ja ǝnggǝ mai, a hyaˈari ja ǝnggǝr kǝra ji saya nana. Anda mau hya sa lari vira nji saya pina nyi ari ta. 7Maˈya mau ǝnga kusa aga hya nda nar nyi anǝ zǝmbǝlma nyi ˈyar, ‘A hyaˈari ja sara vir tau, ju maˈyi wu mwar hyi a vwu Galili. A vwuna hyu vwa lari nyi.’ Sǝra yi shili aga ya sa nar hyi ngau.”
8Kǝ mathlǝkǝˈya nyi hyaˈari kǝ ndǝ maˈyi ǝnga kusa, nyinyau ǝnga hivǝr ba caguli gagaɗau. Ndǝ hwi a ndǝra zǝmbǝlma nyi ˈyar aga nda nda nar nda sǝra ɗarkǝr. 9Kukuthlǝ kǝ Yesu thlǝwa nda, ba ji nar nda, “Usa mau.” Ndǝ shili ǝgya ja, ndǝ mbari hiya ja ba ndǝ dlǝvǝ nyi. 10Kǝ Yesu nar nda, “Hya sara hivǝr mai, maˈya mau hya vwa nar nyi anǝ zamǝ ɗa ˈyar nda maˈyi a vwu Galili, a vwuna nga ndu vwa lar ɗa.”
Shaɗǝwa Nǝ Njir Ɓǝla Hu
11Ma tsu mathlǝkǝˈyi ta ar lagu, kǝ alenyi njir ɓǝla hu maˈyi a ndu huɗa mǝlmǝ ndǝ nda nar nyi anǝ pubu dǝdǝgalˈyar sǝra ɗarkǝr patǝu. 12Ənggǝra pubu dǝdǝgalˈyar ɓǝ ǝkkǝˈyi njira nggurǝm, ba ndǝ nggya ndǝ mbiya sǝra ndu mǝl, ba ndǝ nǝ nyi madiya gǝnna anǝ njir ɓǝla huwa nyi. 13Ndu na anǝ nda, “Hya nar nyi anǝ nji, abǝr, ‘Zǝmbǝlma nyi ˈyar ngǝ shili ǝvuˈyi ba ndǝ sa hǝlǝr dza ja, ma tsu ˈya wu ghanyi.’ 14Ma ndǝr kǝ gwu himiya gwamna, ˈyu nar nyi ndǝr kǝra wu pina huɗa ja, ba ˈya hǝbiya hyi wu ɓwaɓwatǝu.” 15Kǝ sojaˈyar ta dlǝwuri gǝnna nyi, ba ndǝ mǝliya ǝnggǝra nji dǝgar nda. Kǝ naja ka ndǝr tǝtǝlna dzǝ wu pama njir Yahudiya baˈanǝ ǝshina.
Madiya Thlǝr Kǝra Yesu Piyari Nyi Anǝ Zǝmbǝlma Nyi ˈYar
(Markusu 16:14-18; Luka 24:36-49; Yahwana 20:19-23; Thlǝr 1:6-8)
16Zǝmbǝlma kumo a sǝr tangǝ maˈyi a dar mǝ nǝ Galili vira Yesu nar nda, aga nda maˈyi a dari. 17Ta ndǝ lari nyi, kǝ ndǝ dlǝvǝ nyi, ama alenyi nji wu pama nda wu tǝkǝ kǝr ǝnga ja. 18Kǝ Yesu shili ǝgya nda, ji sa na, “Dǝnama tǝlkur patǝu a dǝmǝlmau ǝnga kǝra a gyi wu ˈyi a nǝ ɗar nji. 19Agabangau, maˈya mau, hya nda mǝliya njir duniya patǝ aga nda ɗa zǝmbǝlma ɗa, hya hǝr nda baɓǝtizǝma wu thlǝmǝr Tada ǝnga Zǝr ba ǝnga Mambǝl Cicau. 20Hya highiɓǝr nda ǝnggǝra ndu ɓǝla sǝr ɓǝla kǝra yi nar hyi. Pakatǝ aˈyi yi ǝnga hyi cumu baˈanǝ kuɗiyar duniya.”
©2024 Initiative for the Translation and Development of African Languages and Margi Tiwi Nga Təm