Matiwu 26
26
Mba Miya Aga Tsa Yesu
(Markusu 14:1-2; Luka 22:1-2; Yahwana 11:45-53)
1Ənggǝra Yesu kuɗǝna na patǝ sǝˈyar kau, kǝ ji na anǝ zǝmbǝlma nyi ˈyar, 2“Hyu sǝni abǝr, Lardur Vǝlna a hyiri pida mǝthlǝu, ǝnga tsu nju nda sa lǝri Zǝr Ndau aga nja dlakǝya nyi.”
3Kǝ pubu dǝdǝgalˈyar ǝnga njira nggurǝm nǝ mǝlmǝ kaɓiya dzǝ patǝ ar vir pathla nǝ pubu kǝra a ndiya ǝnga dǝgalǝu, ndǝra nju ngga ǝnga Kayafasu. 4Ndǝ mba miya lagu kǝra nda sǝni uya nda mbar Yesu ari ɗǝɗǝwa aga nda tsǝya nyi. 5Ama kǝ ndǝ na, “Ama aˈyi pǝcir mini kǝ mai, ara ja sara hyaˈana hangǝkala nji.”
Nji Ɓǝsǝya Yesu Ənga Mal Kisǝu Wu Bethlani
(Markusu 14:3-9; Luka 7:37-38; Yahwana 12:1-8)
6Ma tsu Yesu wu Bethlani, wu ki Simanu ndǝra ɗǝɗǝmǝu ndǝr pibi, 7kǝ vanyi mala shili ǝnga pǝla ɓurdi kǝra nju ɗǝl ǝnga gǝnna gangǝ gagaɗau. Mala kǝ shili ji sa pǝnggǝr nyi mala nyi a gyar kǝra ja ar pǝci kǝra nda vǝr sǝm sǝr sǝm.
8Ta zǝmbǝlma nyi ˈyar lari abangau, kǝ huɗa nda ndzau, ndu na anǝ kǝrnda, “Wathlǝmǝ culi naja ka wira sa? 9Ɓurdi kau, nju sǝni ɗǝlna ǝnga gǝnna gangǝu, ba nja dlǝwari nji tǝtǝ dǝnama ǝnga gǝnna nyi.”
10Ariya Yesu wu sǝnibiya sǝra ndu na, kǝ ji na anǝ nda, “Aga mi nga hyu ɓwanǝ nyi kǝr anǝ mala ka? A mǝliya ɗar ja sǝra mǝnahǝu. 11Nji tǝtǝ dǝnama aˈyi nda ǝkkǝˈyi hyi parangǝu, ama nayau aˈyi yi ǝkkǝˈyi hyi parangǝ mai. 12Ɓurdi kǝ ji pǝnggǝr ɗa kau, nǝ pabǝ dzǝ nǝ haɗǝ ɗa ngau. 13Yu nar hyi jirkura nyi, kalar vira nju nda tǝtǝlna ndǝshigu kǝ ari wu duniya patǝu, nju nda ndǝr ar kǝra sǝ kǝ ji mǝliya kau, aga ɗǝngari ǝnga ja.”
Yahuda Dlǝwunggǝri Aga Ja Thlǝna Hiya Yesu
(Markusu 14:10-11; Luka 22:3-6)
14Kǝ pathlǝu wu pama zǝmbǝlma nyi kumo apǝ mǝthlǝu, kǝra nju ngga ǝnga Yahuda Isikarayoti, ji maˈyi a ndǝgya pubu dǝdǝgalˈyar, 15ji nda yiwa nda, “Amaya, yiɗawu nga hyu kina ɗa ma yi sǝni lǝr hyi nya?” Kǝ ndǝ jigabiya gǝnna sulayi makǝrkumunyi. 16Mbari ar pǝci kau, ngǝ Yahuda wu gal lagu kǝra ja sǝni thlǝna hiya Yesu ari.
Yesu Sǝm Lardur Vǝlna Ənga Zǝmbǝlma Nyi ˈYar
(Markusu 14:12-21; Luka 22:7-13,21-23; Yahwana 13:21-30)
17Ar pǝci nǝ tanggǝrma nǝ Lardur Macikǝl Gǝra Thlǝlam, kǝ zǝmbǝlma nyi ˈyar shili ndǝ sa yiwa nyi, “Amaya, ǝmani nga gu yiwu ˈya pabǝri ngǝ vir sǝm Lardur Vǝlna ka?”
18Kǝ ji shaɗǝwa, ji na, “Maˈya mau a vwu huɗa mǝlmau, hyu vwa thlǝwa vanyi ndǝ a vwuna, ba hya nar nyi, ‘Malǝmǝ ngǝ na, abǝr, pǝci nyi a ɗar lǝhǝu. Ju sa sǝm Lardur Vǝlna ǝkkǝˈyi zǝmbǝlma nyi ˈyar wu ki ngau.’ ” 19Kǝ zǝmbǝlma nyi ˈyar mǝliya ǝnggǝra ji nar nda ta, ba ndǝ pabǝri vir sǝm Lardur Vǝlna nyi.
20Ənggǝra wagǝ ɗa, Yesu nggya aga ja sǝm sǝr sǝm ǝkkǝˈyi zǝmbǝlma nyi ˈyar kumo apǝ mǝthlǝu. 21Ma tsu nda vǝr sǝm sǝr sǝm, kǝ Yesu na anǝ nda, “Jiri nga yu na anǝ hyi, pathlǝu wu pama hyu nda thlǝna hiya yau.”
22Kǝ ɗǝfuwa nda ndzǝ gagaɗau, kalar ndu dzǝgwa na anǝ nyi wu pama nda, “Ənga jiri, nayi ngǝ ya, Thlagǝu?”
23Kǝ Yesu shaɗǝwa, “Ndǝra a vǝr fǝ tsi wu cala ǝnga yi kau, ngǝ wu nda thlǝna hiya yau. 24Zǝr Ndǝ wu tǝ ǝnggǝra nji tsǝfǝri ar kǝra ja, ama sǝr tǝhuɗǝ anǝ ndǝra wu nda thlǝna hiya Zǝr Ndau. Wu a ndiya ǝnga mǝnahǝ anǝ ndǝ kau, maja bǝr aˈyi nji yabiya nyi mai.”
25Kǝ Yahuda ndǝra wu nda thlǝna hiya ja na, “Malǝmǝ, ǝnga jiri nayi ngǝ ya?”
Yesu shaɗǝwa, ji na, “Angǝ, nagǝ ǝnga kǝrngǝ ma, a nabiyar gau.”
26Tsu nda vǝr sǝm sǝr sǝm, kǝ Yesu hǝri macikǝl, kǝ ji lǝr usaku, ba ji ɓǝɓǝlǝwa, kǝ ji nǝ nyi anǝ zǝmbǝlma nyi ˈyar, ju na, “Dlǝwura mau hya sǝm. Naja kǝ kumǝr dza yi ngau.”
27Kǝ ji hǝri kyakiwa nǝ ˈyimir wur inabi, kǝ ji lǝr usaku anǝ Hyal, kǝ ji nǝr nda, ju na, “Patǝkura hyi, hya sa. 28Naja kǝ mashi ɗa ngau nǝ nyabiya alkawal mbamba mafǝliyangǝ, kǝra nju nda pǝna aga tǝfǝbiya bikǝ nǝ nji patǝu. 29Yu nar hyi, tsu yu ɓǝra sa ˈyimir yayar wur inabi mai, kǝl pǝci kǝra yu nda sa mafǝliyangǝ ǝnga hyi wu tǝlkur nǝ Dǝɗa.”
30Ayukuɗa ndǝ kuɗǝna thlǝ na, kǝ ndǝ maˈyi a dar Mǝ Wur Zayitunu.
Yesu Nana Ənggǝra Biturusu Wu Nda Kǝpalna Sǝni Nyi
(Markusu 14:27-31; Luka 22:31-34; Yahwana 13:36-38)
31Kǝ Yesu na anǝ nda, “Vuˈyi ǝshina kau, patǝ hyi, hyu nda tǝtǝlnakǝr ariya sǝra wu nda ɗa ǝnga yau. Ara tsǝtsǝfǝ nga nyi wu lǝkakaɗǝ nǝ Hyal, abǝr,
“ ‘Yu nda tsar
kǝra ndǝr ɓǝla,
ba ɓǝla nǝ tǝmahǝu
a tǝtǝlnakǝr.’
32Ama ayukuɗa yi hyaˈari sara vir tau, yu tǝrabiya wu mwar hyi a vwu Galili.”
33Əngwar Biturusu anǝ nyi, “Alaga nji patǝ hwinakǝr ndǝ piyari ngau, nayu piyari ngǝ nǝɗa mai.”
34Kǝ Yesu shaɗǝwa nyi, ji na, “Yu nar ngǝ jirkura nyi, ǝshina vuˈyi kau, kadivira vǝgǝmǝ wu nda wau, gu kǝpalna sǝni ɗa ar kǝr ar kǝr makǝru.”
35Kǝ Biturusu ɓǝra na, “Alaga nji tsǝya ɗa daɓǝ ǝnga gau, nayu kǝpal sǝni ngǝ mai.” Kǝ patǝkura alenyi zǝmbǝlma nyi ˈyar nana abangǝ tsu.
Yesu Kǝdi Hyal Wu Gyatsimani
(Markusu 14:32-42; Luka 22:39-46)
36Kǝ Yesu ǝkkǝˈyi zǝmbǝlma nyi ˈyar maˈyi a ndar vanyi vi kǝra nju ngga ǝnga Gyatsimani, kǝ ji nda na anǝ nda, “Nggya mǝ nǝr hyi ǝnggau, yu maˈyi a ndu mwa ya nda kǝdi Hyal.” 37Kǝ ji hǝri Biturusu ǝnga wazha Zabadi mǝthlǝ ǝnga ja, nanda ngǝ Yakubu ǝnga Yahwana, ji gwu huɗǝ kyakyar gagaɗau ǝnga ɓwaɓwatǝ ara sǝra ja a gwa. 38Kǝ ji na anǝ nda, “Huɗǝ ndzǝndzǝ kǝra yi a gwa a sǝni tsǝya ɗa. Nahyi hya nggya ǝnggau hya ɓǝla ǝnga yau.”
39Ji ɓar dzǝ kushu, ba ji dla lagu bama a gyi wu ˈyi, ja vǝr kǝdi Hyal, ju na, “Tada, maja bǝr yiwu ca ngǝ uya, bǝgǝ ga hǝna naja ka ɓwaɓwatǝ ar kǝra yau. Alaga abangau, aˈyi yiwur huɗa yi mai, ama bǝgǝ yiwur huɗa ga ɗa.”
40Ba ji sha shili ara zǝmbǝlma nyi ˈyar, ba ji sa thlǝwa nda wu ghanyi. “Mi nga ma? Aˈyi hyu sǝni nggya nǝ ɓǝla ǝnga yi alaga nǝ saka pathlǝ wa?” ji yiwa Biturusu. 41“Hya nggya ǝnga ɓǝla ǝnga hya kǝdi Hyal ara hya sara tǝɗau a gwu dzau. Mambǝl wu yiwu nǝnyi, ama kumǝr dzǝ a tǝwari.”
42Kǝ ji ɓǝra maˈyi nǝ mǝthlǝkura nyi, ji nda kǝdi Hyal, ji na, “Tada, ma aˈyi ɗa tsaˈa aga ɓwaɓwatǝ kǝ a hǝnakǝr mai, ama kǝl yi tǝwari, taˈyi yiwu huɗa gau a ɗa.”
43Ənggǝra ji sha shili, kǝ ji ɓǝra thlǝwa nda wu ghanyi, ara ghanyi tǝdǝɓǝu ar liya nda. 44Kǝ ji piyari nda, ba ji maˈyi sǝ nyi nǝ makǝrkura nyi, kǝ ji nda kǝdi Hyal, ji ɓǝra nana sǝˈyar ta.
45Ji ɓǝra sha shili ǝgya zǝmbǝlma nyi ˈyar, kǝ ji na anǝ nda, “Tsu hyu ghanyi ya, hyu ɓǝlsar ya? Lara mau, pǝci a ɗar nju nǝ nyi Zǝr Ndau a gwu tsa njir bikau. 46Hyaˈara mau, mǝna maˈyi! Kǝja ndǝr thlǝ hiya yi ta a shiliri!”
Nji Mbar Yesu
(Markusu 14:43-50; Luka 22:47-53; Yahwana 18:3-12)
47Tsu Yesu a vǝr ndǝr, kǝja Yahuda, pathlǝu wu pama zǝmbǝlma nyi ˈyar kumo apǝ mǝthlǝu, shili ǝnga nji gangǝu ǝnga katsakǝr ba zǝwa wu tsa nda. Pubu dǝdǝgalˈyar ǝnga njira nggurǝm nǝ mǝlmǝ ngǝ sǝwa nda. 48Ndǝr thlǝ hiya ja kau, a dǝgar ndar ja mǝtsamǝ, “Ma ndǝra yi bǝrpiya nyi, naja ngau, mbari nya mau.” 49Ənggǝra Yahuda dla, ba ji maˈyi tǝwar a ndǝra Yesu, kǝ ji usar nyi, ji na, “Usi Malǝmǝ,” kǝ ji bǝrpiya nyi.
50Əngwar Yesu anǝ nyi, “Bazhi ɗa, mǝliya sǝra hǝ nga shili.”
Kǝ nja nyi shili ndǝ sa mbari Yesu, kǝ ndǝ sǝɓǝya nyi ɓaɓalu. 51Ənggǝra ndǝ lari abangau, kǝ pathlǝ wu pama njir ɓǝ Yesu tǝsǝbiya katsakǝr nyi, ba ji thlana himiya mafa pubu kǝra a ndiya ǝnga dǝgalǝ ǝni.
52Əngwar Yesu anǝ nyi, “Shabiya katsakǝr ngau a vwu ki nyi, ariya kalar ndǝra tsǝbiya katsakǝr, katsakǝr ngǝ wu nda tsa nyi. 53Hyu nggani abǝr aˈyi yu sǝni ngga Dǝɗa, ba ja sǝwa ɗa alaga bwata waladiˈyar kumo apǝ mǝthlǝ wa? 54Ama lagu mani ngǝ sǝra tsǝtsǝfau wu ndǝr Hyal tsǝtsǝfǝ kǝ wu nyabiya dza, ma bǝr aˈyi ji ɗa lagu kǝ mai ya?”
55Ar pǝci ta, Yesu na anǝ dlamir nji, “Nayi ngǝ ndǝr tǝɗǝmwa anǝ njir gwaɗǝvi ya, nga hyi sǝbiya katsakǝr ǝnga zǝwa aga hya sa mba ɗa ya? Parangǝu ya vǝr nggya ǝkkǝˈyi hyi wu ki Hyal ya vǝr highiɓau, ama nahyi saya mbar ɗa mai. 56Sǝˈyar kǝ ɗa patǝ aga sǝra nabiˈyar tsǝfǝri a nyabiya dzau.” Kǝ patǝ zǝmbǝlma nyi ˈyar tǝtǝlna dzau, ba ndǝ piyari nyi wu tsa nda.
Yesu Wu Mwar Pathla Nǝ Njir Yahudiya
(Markusu 14:53-65; Luka 22:54-55,63-71; Yahwana 18:13-14,19-24)
57Kǝ njira mbari Yesu hǝri nyi a ndǝra Kayafasu pubu kǝra a ndiya ǝnga dǝgalǝu, vira malǝmǝ dlaɗǝ ˈyar ǝnga njira nggurǝm kaɓǝ ari. 58Kǝ Biturusu nu nyi wu ndǝl wu ndǝl tsatsalǝu, tsaˈa vwar huɗa ki pubu kǝra a ndiya ǝnga dǝgalǝu. Ji vwa nggya ǝkkǝˈyi njir sǝkǝ ki aga ja lari ǝnggǝra nju nda ɗa ǝnga ja.
59Pubu dǝdǝgalˈyar ǝnga patǝr njir pathla a vǝr gal sakida nǝ fati kǝra nda sǝni vazǝya Yesu aga nda tsǝya nyi. 60Ama sǝ aˈyi ndǝ uya mai, alaga kǝ nji gangǝu shili ndu thla sakida nǝ fati ar kǝra Yesu.
Ayukuɗa nyi patǝu, kǝ alenyi nji mǝthlǝ biyar babal, 61ndǝ na, “Sal kǝ na, abǝr, ‘Yu sǝni dlana ki Hyal kau, ba ya ɓǝra hǝriya nyi wu pida makǝru.’ ”
62Pubu kǝra a ndiya ǝnga dǝgalǝ hyaˈari aˈyi taˈyau, ji na anǝ Yesu, “Mi ngǝ sǝ kǝ nja vǝr na a miya ndǝla gǝ ka? Sǝ aˈyi gu na a gǝri wa?”
63Ama kǝ Yesu nggya sǝ nyi ɗiyu.
Kǝ pubu kǝra a ndiya ǝnga dǝgalǝ na anǝ nyi, “Yu daɓǝr ngǝ ǝnga thlǝmǝr Hyal mbǝmbǝɗau, nar ˈya ma nagǝ ngǝ Kǝrsiti, Zǝr Hyal.”
64Yesu shaɗǝwa, “Angǝ, abangǝ nga nyi ǝnggǝr kǝra gǝ na kau. Ama taˈyi ya nar hyi patǝ hyi, mbar kabangǝkau, hyu sa lari Zǝr Ndau a vǝr nggya ar tsi mazǝma ndǝ dǝgalǝ dǝnama, a vǝr shida wu dlama sara dǝmǝlmau.”
65Kǝ pubu kǝra a ndiya ǝnga dǝgalǝ tana lǝgutǝ kǝrnyi ǝnga huɗǝ ndzǝndzau, ju na, “A nanar ja ndǝr nǝ diɗa Hyal! Sakida mi mǝnu ɓǝra gala? Kǝja hya nggari ndǝr diɗa vi nyi ǝnga kǝrhyi. 66Mi nga hyu nggana?”
“A ɗar tsaˈa nja tsǝya nyi,” ndǝ shaɗǝwa.
67Kǝ ndǝ tǝfǝwa nyi tuli a vwu bama ja, ǝnga alenyi nji tsu dǝdǝguwa nyi tsi. Alenyi nji nǝ nyi tsi balma 68ndu dzǝgwa na, “Ma nagǝ ngǝ nabi, nana ˈya, Kǝrsiti, tara wa ngǝ dǝgǝr ngǝ ka?”
Biturusu Kǝpalna Sǝni Yesu
(Markusu 14:66-72; Luka 22:56-62; Yahwana 18:15,25-27)
69Ar pǝci kǝra Biturusu a vǝr nggya a biyar huɗǝ ki, kǝ kwar ki kǝ shili ǝgya ja, ji sa na anǝ nyi, “Nagǝ ma, nahyi ngǝ shili ǝkkǝˈyi Yesu ndǝr Galili.”
70Ji kǝpalna nyi wu mwar nda patǝu, ji na, “Nayu sǝni sǝra gu na kǝ mai.”
71Ta ji maˈyi a biya miya kiya nyi, ba ji biya ɓǝ ǝnga vanyi kwar ki, kǝ kwa kǝ lar nyi, kǝ ji na anǝ njira tataˈyi a ndǝna, “Ndǝ kǝ ma, nanda ngǝ shili ǝkkǝˈyi Yesu ndǝr Nazǝratu.”
72Ji ɓǝra kǝpalna nyi daɓǝ ǝnga sǝm fǝla, “Yu sǝni ndǝ kǝ mai!”
73Ɓǝliya sar kushu, njira tataˈyi a ndǝna ndǝ maˈyi a ndǝgya Biturusu, ndǝ nda nar nyi, “Ənga jiri, pathlǝ gǝ wu pama nda, ariya kyara gau a nanar ndǝla gau.”
74Kǝ ji mbari shiˈwa kǝrnyi, ǝnga ji ɓǝra sǝm fǝla anǝ nda, abǝr, “Yu sǝni ndǝ kǝ mai!”
Ənggǝrna kǝ vǝgǝmǝ wau. 75Ənggau kǝ Biturusu ɗǝngari ndǝr kǝra Yesu nar nyi, abǝr, “Kadivira vǝgǝmǝ a wau, gu kǝpalna sǝni ɗa ar kǝr ar kǝr makǝru.” Kǝ ji hwi a biya, ji biya tiwi ǝnga sǝlǝm gagaɗau.
©2024 Initiative for the Translation and Development of African Languages and Margi Tiwi Nga Təm