Matiwu 16
16
Gal Mǝtsamǝ
(Markusu 8:11-13; Luka 12:54-56)
1Kǝ njir Farisi ǝnga njir Sadusi shili ǝgya Yesu, aga nda sa dzǝbiya nyi. Kǝ ndǝ na anǝ nyi, aga ja canǝ nda sǝ dǝdǝgur kǝra mǝtsamǝ sara dǝmǝlmau.
2Kǝ ji shaɗǝwa nda, ji na, “Ma wagǝ ɗa, ba hyi lari ndǝla mǝlmǝ a ɗar dǝzǝu, ba hya na, ‘Vi wu sa ɗa jamǝ ǝzǝgǝu.’ 3Ma mudlǝ tsu, ma hyi lari ndǝla mǝlmǝ dǝzǝu ǝnga zǝgutu, ba hya na, ‘Əshina nǝnyi nju nda tǝɗǝ par.’ Nahyi, hyu sǝni tǝkǝbiya pampamǝkura dlama, ama nahyu sǝni tǝkǝbiya pampamǝkura sǝ dǝdǝgur kǝra wu ɗarkǝr kabangǝkǝ mai. 4Njir nggyabiya kabangǝkǝ nji ɗǝmwaˈyu, njira gǝra nu Hyal wu yiwu nda lari sǝ dǝdǝgur. Ama sǝ dǝdǝgur aˈyi nju nda ca anǝ nda mai, kǝl nǝ nabi Yunana.” Kǝ Yesu piyari nda ba ji maˈyi.
Thlǝlamǝ Nǝ Njir Farisi Ənga Njir Sadusi
(Markusu 8:14-21)
5Ənggǝra zǝmbǝlma nyi ˈyar tǝrabiya a biyar ya dǝl, ba ndǝ ɗǝngari nandǝ hǝri macikǝl mai. 6Kǝ Yesu na anǝ nda, “Hya hangǝkal, ǝnga hya tsamǝ ar kǝra thlǝlamǝ nǝ njir Farisi ǝnga njir Sadusi.”
7Kǝ ndǝ thla wu pama nda, ndǝ na, “Ji na abangau, ara kǝ mǝn gǝra hǝri macikǝl kǝ ngau.”
8Ta Yesu sǝnibiya sǝra ndu thla, kǝ ji na anǝ nda, “Nahyi njira ǝnga mbǝrsa tǝtǝwa, mi ngǝ ɗa hyu ndǝr wu pama hyi abǝr ara kǝ hyi gǝra hǝri macikǝl kǝ nga? 9Baˈanǝ kabangǝkǝ nahyi nggabiya mai ya? A far hyi ǝnggǝra yi sǝmǝna nji dubu tǝfu ǝnga lǝgu ɗǝfǝ tǝfu ta ya? Ətsu a far hyi tara tsǝla yiɗau nga hyi nyana ǝnga sǝra hiyau wu miya nji ta ya?
10Əndǝga a far hyi ǝnggǝra yi sǝmǝna nji dubu foɗǝ ǝnga lǝgu ɗǝfǝ mǝɗǝfǝ ǝnga tara tsǝla yiɗau nga hyi nyana ǝnga sǝra hiyau wu miya nji ta ya? 11Mi ngǝ ɗa nahyi nggabiya abǝr aˈyi ar kǝra macikǝl nga ya vǝr ndǝr mai ya? Ama yi na anǝ hyi aga hya hangǝkal ǝnga thlǝlamǝ nǝ njir Farisi ǝnga njir Sadusi.” 12Kǝ ndǝ nggabiya abǝr naja aˈyi a vǝr ndǝr anǝ nda, aga nda hangǝkal ǝnga thlǝlamǝ nǝ ta macikǝl mai, ama ar kǝra highiɓǝ nǝ njir Farisi ǝnga njir Sadusi.
Biturusu Nana Abǝr Yesu Ngǝ Kǝrsiti
(Markusu 8:27-30; Luka 9:18-21)
13Ar pǝci kǝra Yesu shili wu ˈyiˈyir Kayisariya Fǝlipi, kǝ ji yiwa zǝmbǝlma nyi ˈyar, ji na, “Amaya, wa nga nju na nga ya, nayi Zǝr Nda?”
14Kǝ ndǝ shaɗǝwa nyi, “Alenyi nju na Yahwana ndǝr mǝl Baɓǝtizǝma, ǝnga alenyi nji Iliyasu, ǝnga alenyi nji tsu Irimiya ǝndǝga zǝmǝ wu pama nabiˈyar.”
15“Ama kar nahyi tsu, wa nga hyu na nga ya?” ji yiwa nda.
16Kǝ Simanu Biturusu shaɗǝwa, ji na, “Nagǝ ngǝ Kǝrsiti, Zǝr Hyal mbǝmbǝɗau.”
17Kǝ Yesu na anǝ nyi, “Ndǝr barka nga gau, Simanu zǝr Yunana, ariya aˈyi ndǝ ngǝ cabiya ngǝ sǝ kǝ mai, ama Dǝɗa kǝra a dǝmǝlmau. 18Yu na anǝ ngau, nagǝ Biturusu tsǝka nga gau, ar kǝra tsǝka kǝ nga yu hǝr daɓǝ dzǝ njir nu ɗa, njira dǝnama nǝ tau, aˈyi a sǝni sǝm tǝlkur ar kǝra nda mai. 19Yu nǝ ngǝ sǝr pahǝ miya ki nǝ tǝlkur Hyal. Ətsu kalar sǝra gǝ mbiya wu duniya mbamba nga nyi a dǝmǝlmau, ǝnga kalar sǝra gǝ pǝlna wu duniya pǝpǝl nga nyi a dǝmǝlmǝ ǝtsu.” 20Kǝ Yesu tǝɗar himiya zǝmbǝlma nyi ˈyar abǝr nda sara na sǝ kǝ anǝ kalar ndǝ abǝr naja ngǝ Kǝrsiti mai.
Yesu Nana Ənggǝra Ji Wu Nda Tau
(Markusu 8:31; 9:1; Luka 9:22-27)
21Mbari ar pǝci kǝ ngǝ Yesu dzǝguya na anǝ zǝmbǝlma nyi ˈyar, abǝr kǝl ji maˈyi a vwu Urshalima. A vwuna ju vwa lari ɓwaɓwatǝ pampamǝ ara njira nggurǝm nǝ mǝlmau, ǝnga pubu dǝdǝgalˈyar, ǝnga malǝmǝˈyar nǝ dlaɗau, ǝnga nja tsǝya nyi, ama ayukuɗa pida makǝru, ba ja hyaˈari ǝnga pi.
22Kǝ Biturusu hǝr nyi a ndar batiti, ji nda kughiya nyi, ji na, “Wu ɗa mai Thlagǝu, Hyal a tsana sǝ ǝnggǝr kǝ a ɗa ǝnga gau.”
23Ama kǝ Yesu shabiya dzau, ji na anǝ Biturusu, “Tǝkǝ ǝnga yau, Shatan! A ɗar gǝ sǝr thlǝ hi anǝ ɗa, ara ɗǝnga ngau ǝnggǝr nǝ nji nga nyi, aˈyi nǝ Hyal mai.”
24Kǝ Yesu nar nyi anǝ zǝmbǝlma nyi ˈyar, “Kalar ndǝra wu yiwu ja nu ɗa, kǝl ja piyari yiwu kǝrnyi, ba ja hǝri wu dladlakǝ nyi, ba ja nu ɗa. 25Ara kalar ndǝra wu yiwu tsǝrpǝr piya ja, ju nda tini. Ama kalar ndǝra tini piya ja ariya yau, ju nda uya. 26Mi ngǝ akkǝri kǝra ndu uya ma ji uya duniya pata, ba ja tini piya ja? Əndǝga mi ngǝ ndǝ a sǝni lǝri aga bǝlabiya piya ja? 27Ariya nayi Zǝr Ndau, wu nda shili wu kadakadarkur nǝ Dǝɗa ǝnga waladi ɗa ˈyar. Yu sa mǝliya nyi numa anǝ patǝr njir duniya ar lagu kǝra ndǝ mǝl thlǝrǝr nda ari. 28Yu nar hyi jirkura nyi, alenyi nji aˈyi ǝnggau tataˈyu, nandu nda tǝ mai, kǝl ndǝ lar Zǝr Ndau wu shili wu tǝlkur nyi.”
©2024 Initiative for the Translation and Development of African Languages and Margi Tiwi Nga Təm