Matiwu 13
13
Karapau Ar Kǝra Ndǝr Sǝ Culi
(Markusu 4:1-9; Luka 8:4-8)
1Ar pǝci ta Yesu biya sara wu ki, ji biya nggya ar miya dǝl. 2Dlamir nji gangǝ kaɓau ba ndǝ zǝwari nyi, kǝl ta ji nda gwa wu kwambwal ji gwa nggya gya, ba dlamir nji tataˈyi nǝr nda a miya dǝl. 3Kǝ ji nar nda sǝ pampamǝ lagu karapau, “Nja na, vanyi ndǝr zǝwa maˈyi a gwar fa nyi, a gwa sǝ culi.
4Ənggǝra ja vǝr sǝ culi, kǝ alenyi pǝnakǝr ar lagu. Kǝ ˈyagǝˈyar shili ba ndǝ sa sǝmku nda. 5Kǝ alenyi pǝnakǝr ar vi cacathlǝu, vira ˈyiˈyi aˈyi gangǝ mai. Ba ndǝ tsau aga zǝmǝu, ara ˈyiˈyi kǝra ar kǝra nyi aˈyi tǝdǝɓǝ mai. 6Ama ǝnggǝra pǝci ɗa kwakwaɗǝ gagaɗau, ba ndǝ titiˈwa ba ndǝ ul ara nggyilangǝ aˈyi ara nda gagaɗǝ mai. 7Kǝ alenyi tǝɗǝ a gyi wu pama shikǝɗi, ndǝ hǝ ǝnga nda, ba shikǝɗi kar nda ara pǝli. 8Alenyi culi tsu tǝɗǝ a gyi wu ˈyi kǝra mǝnahǝu, ndǝ hau, ba ndǝ puwali gangǝ gagaɗau, alenyi gharu gharu, ǝnga alenyi kwakumunyi kwakumunyi ǝnga alenyi tsu makǝrkumunyi makǝrkumunyi. 9Ndǝra ǝnga himi nggar sau, bǝgǝ ja nggari.”
Sǝra Karapau Nǝ Sǝ Culi Kǝ Cabiya
(Markusu 4:10-12; Luka 8:9-10)
10Kǝ zǝmbǝlma nǝ Yesu ˈyar shili ndǝ sa yiwa nyi, “Mi ngǝ ɗa gu ndǝr anǝ nda ǝnga karapǝˈyar ka?”
11Kǝ ji shaɗǝwa nda, ji na, “Sǝnibiya sǝ kǝra ɗǝɗǝwa nǝ tǝlkur Hyal a nǝ hyir nji, ama aˈyi anǝ nda mai. 12Ndǝra ǝnga sau nju cakǝri nyi, aga ja uya gangǝu. Ama ndǝra gǝra ǝnga sau, alaga kǝra aˈyi ara ja kushu nju ɓǝra dlǝwuri. 13Kǝja sǝra ɗa yu ndǝr anǝ nda ǝnga karapau,
“Aga ndu tsamǝ ama nandu
tsambiya mai,
ndu sǝ himi ama nandu
nggari mai ǝnga nandu
nggabiya mai.
14Lagu kǝ ngǝ ndǝr nabi Əshaya nyabiya dzǝ ar kǝra nda abǝr,
“ ‘Hyu nda dumwa
ǝnga ngga ama nahyu
nggabiya mai,
hyu nda tsamǝ ama nahyu
tsambiya mai.
15Ara ɗǝfuwa nji kǝ a ɗar ɓaɓalu,
himiya nda tsu wu nggar sǝ mai,
ǝnga ndǝ haɗiya liya nda,
ara nda sara lar sǝ ǝnga liya nda.
Ənga nda nggari ǝnga himiya nda,
ǝnga nda nggabiya ǝnga ɗǝfuwa nda,
nda sha shili ǝgya yau,
ya shilǝgǝbiya nda.’
16Nahyi nǝr hyi, barka anǝ liya hyi ara ndu lar sau, ǝnga himiya hyi ara ndu nggar sau. 17Ya nar hyi jiri, nabiˈyar ǝnga nji tsapǝ gangǝu, a yiwur nda, nda lari sǝˈyar kǝ hya vǝr lar kau, ama nandǝ lari mai. A yiwur nda, nda nggari sǝˈyar kǝ hya vǝr nggar kau, ama nandǝ nggari mai.
18“Kǝja sǝra karapǝ ar kǝra ndǝr sǝ culi kǝ cabiya, 19Ma ndǝ nggar ndǝr nǝ tǝlkur Hyal ama naji nggabiya mai, ba Shatan a shili ja faˈabiya sǝra ji nggari kǝ sara wu ɗǝfuwa ja. Naja kǝ ngǝ cabiya culi kǝra pǝnakǝr ar lagu. 20Kǝra nji sǝna ar vi cacathlǝ ǝtsu, naja ngǝ nju gǝla ǝnga ndǝra nggari ndǝr Hyal tsǝtsǝfǝ ba ji dlǝwuri aga zǝmǝ ǝnga caguli.
21Ama ara naja aˈyi ǝnga nggyilangǝ mai, ba ji sǝkar nǝ pǝci kushu. Ənggǝra ɓwaɓwatǝ shili anǝ nyi ariya ndǝr Hyal tsǝtsǝfǝ ba ji sha a gyi yukuɗǝ ǝnga kusa. 22Culi kǝra nji sǝna wu pama shikǝɗi kǝ tsu, naja ngǝ nju gǝla ǝnga ndǝra nggari ndǝr Hyal tsǝtsǝfau, ama kǝ nggyabiya duniya ǝnga gal gǝnna kari ndǝra nyi ara hau, kǝl ta ji ɗa gǝra ǝnga akkǝri. 23Culi kǝra nji sǝna ar ˈyiˈyi mǝnahǝ kǝ tsu, naja nga nju gǝla ǝnga ndǝra nggari ndǝr Hyal ba ji nggabiya. Ju ɗa ǝnga akkǝri, ju puwali, alenyi gharu gharu, ǝnga alenyi kwakumunyi kwakumunyi ǝnga alenyi tsu makǝrkumunyi makǝrkumunyi.”
Karapau Ar Kǝra Hyanggili
24Yesu ɓǝra nar nda vanyi karapau, “Nja na, kǝja sǝra nja sǝni gǝlabiya tǝlkur Hyal ǝni, ǝnggǝr vanyi ndǝ kǝra thlǝkana culi mǝnahǝu wu fa nyi. 25Ama pǝci kǝra nju ghanyi, ba dawa nyi shili ka sa thlǝkana hyanggili wu fa nyi a ndu pama uhi, ba ji maˈyi sǝ nyi. 26Ar pǝci kǝra uhi kǝra nji thlǝkana kǝ hau, ndǝ mǝliya kǝr, ba hyanggili hyaˈari tsu.
27“Mafa nyi ˈyar shili ndǝ sa na anǝ nyi, ‘Thlagǝr ki, aˈyi culi mǝnahǝ nga gǝ thlǝkana wu fa ngǝ wa? Ya, lagu mani ngǝ hyanggiliˈyar kǝ tsǝ ari ka?’
28“Kǝ ji na anǝ nda, ‘Dawa ngǝ mǝliya abangau.’ Kǝ mafaˈyar kǝ yiwa nyi, ‘Ya, gu yiwu ˈya maˈyi ˈya gwa kukucina nda ya?’
29“Ama kǝ ji shaɗǝwa nda, ‘Awau, ara a vǝr kuci hyanggila nyi, ba hya kucina daɓǝ ǝnga uhi. 30Piyar nda mau nda hǝ gyapǝu kǝl pǝcir fwahǝu. Ar pǝci ta yu nar nyi anǝ njir mǝl thlǝr. Tanggǝrma, nda dzǝguya ǝnga hyanggila nyi ˈyar, nja kaɓiya nja nggyina nda. Ba nja dzǝgwa gǝmna uhi ba nja faˈana a su tsam.’ ”
Karapau Ar Kǝra Culi Bǝla
(Markusu 4:30-32; Luka 13:18-19)
31Yesu ɓǝra nar nda vanyi karapau, “Nja na, tǝlkur Hyal ǝnggǝr culi bǝla nga nyi, kǝra vanyi ndǝ hǝri ji thlǝkana wu fa nyi. 32Naja ngǝ a ndiya patǝr culi ǝnga kushu, ama ma ji hau, ba ja ndiya patǝkura wu kǝra wu masǝm ǝnga dǝgalǝu, ba ˈyagǝˈyar a liya kir nda ar tsa nyi.”
Karapau Ar Kǝra Thlǝlamǝ
(Luka 13:20-21)
33Yesu ɓǝra nar nda vanyi karapau, “Nja na, tǝlkur Hyal ǝnggǝr thlǝlamǝ nga nyi, kǝra mala hǝri ji gwaɗǝbiya ǝpou tasaˈwu tǝkǝ sǝ makǝr ǝni, ba ja dzǝgwa thlǝthlǝ gagaɗau.”
34Yesu nar nyi naja ka ndǝr patǝ anǝ daɓǝr dlami lagu karapau. Sǝ aˈyi ji nar nda zǝmǝ gǝra ǝnga karapǝ mai. 35Lagu kǝ nga ji nyabiya sǝra nabi Əshaya nana abǝr,
“Yu nda pahǝna miya,
yu ndǝr ǝnga karapau,
Yu nda cabiya nyi
anǝ nji sǝra ɗǝɗǝwa
mbar dzǝgwar duniya
aga nda sǝnibiya.”
Yesu Nar Nda Sǝra Hyanggili Wu Fa Uhi Aga Nyi
36Kǝ Yesu piyari dlamir nji, ji maˈyi a vwu huɗa ki. Zǝmbǝlma nyi ˈyar shili ǝgya ja ndǝ sa na anǝ nyi, “Amaya, nar ˈya sǝra karapǝ hyanggili wu fa uhi kǝ aga nyi.”
37Kǝ ji shaɗǝwa nda, ji na, “Ndǝra thlǝkana culi mǝnahǝ naja ngǝ Zǝr Ndau. 38Fa uhi kǝ ca ngǝ duniya, culi mǝnahǝ ca ngǝ wazha nǝ tǝlkur Hyal. Hyanggili kau, ca ngǝ wazha Shatan. 39Dawa kǝra thlǝkana hyanggili kau, naja ngǝ Shatan ǝnga kǝrnyi. Pǝcir fwahǝu ca ngǝ kuɗiyar duniya. Njir gǝm uhi nanda ngǝ waladiˈyar.
40“Ənggǝr kǝra nju tsǝmiya jigwal nja nggyina, abangǝ nga nyi wu nda ɗa pǝcir kuɗiyar duniya. 41Zǝr Ndǝ wu nda sǝwa waladi nyi ˈyar aga nda faˈabiya kalar sǝra wu dla ǝnga bikau ǝnga njir mǝl sǝ ɗǝmwaˈyi sara wu tǝlkur nyi. 42Nda dzǝgwa vakuwa nda a gwu uˈur kǝtsa, a gwuna nda dzǝgwa wau ǝnga ɗǝ hira nda. 43Ar pǝci ta ngǝ nji tsapǝ wu nda mbǝl ǝnggǝr pǝci wu tǝlkur dǝrnda. Njira ǝnga himi nǝ nggar sau, taˈyi nda nggari.
Bǝrba Kǝra Ɗǝɗǝwa
44“Tǝlkur Hyal ǝnggǝr bǝrba nga nyi kǝra nji ɗǝwana wu huɗa fa. Ta vanyi ndǝ nǝri, ba ji ɓǝra ɗǝwana wayu. Ara ǝnggǝra huɗa ji pida, ba ji maˈyi ji nda ɗǝlna patǝr sǝra ara ja, ba ji dzǝgwa ɗǝlbiya fa nyi.
45“Ətsu, tǝlkur Hyal ǝnggǝr ndǝr ɗǝlna sǝ nga nyi kǝra a vǝr gal handzǝlkwa. 46Ta ji thlǝwa kǝra nju ɗǝl ǝnga gǝnna gangǝu, ba ji maˈyi ji nda ɗǝlna patǝr sǝra ara ja, ba ji sa ɗǝlbiya.
Karapau Ar Kǝra Litagǝu
47“Ətsu wayu, nja na, tǝlkur Hyal ǝnggǝr litagǝ kǝra nji fuwa a gwu dǝl nga nyi kǝra mbari culi kalfi pampamǝ gangǝu. 48Ənggǝra ji nyau ǝnga kalfi, kǝ njir tǝm hǝbiya a biya miya dǝl. Kǝ ndǝ dzǝgwa nggya gya ndǝ ɗǝmbiya kalfi kǝra mǝnahǝu ndǝ puwa a gwu bǝng, ba ndǝ dzǝgwa pǝna didiɗi nyi. 49Abangǝ nga nyi wu nda ɗa ar pǝcir kuɗiyar duniya. Waladiˈyar wu nda shili nda sa tǝkǝbiya nji ɗǝmwaˈyi ǝnga nji tsapǝu. 50Ba nja dzǝgwa vakuwa nda a gwu uˈur kǝtsa, a gwuna nda dzǝgwa wau ǝnga ɗǝ hira nda.
51“A nggabiyar hyi sǝˈyar kǝ patǝ ya?” Yesu yiwar nda.
“Angǝ,” ǝngwar nda.
52Kǝ ji na anǝ nda, “Agabangǝ kalar malǝmǝ dlaɗǝ kǝra nji highiɓǝr nyi sǝ ar kǝra tǝlkur Hyal, ǝnggǝr thlagǝr ki nga ja kǝra gwu umbwa nyi, ji gwa faˈabiya bǝrba mafǝliyangǝ ǝnga bǝrba hahal a biya.”
Nji Nggǝl Ara Dlǝwu Yesu Wu Nazǝratu
(Markusu 6:1-6; Luka 4:16-30)
53Ənggǝra Yesu kuɗǝna na karapǝˈyar kau, ba ji piyari vi ta. 54Shilir Yesu wu mǝlmǝ nyi, ba ji dzǝguya highiɓǝ anǝ nji wu umbwa daɓǝ dzǝ nǝ njir Yahudiya. Ba ɗa sǝ dǝdǝgur anǝ nda, ndǝ na, “Əmani ngǝ ndǝ kǝ uya sǝnibiya sǝ ka? Əmani nga ji uya dǝnama nǝ mǝl sǝ dǝdǝgurˈyar ka?” 55“Aˈyi zǝr ndǝr ta wu ta ngǝ wa? Aˈyi mǝnyi nga nju ngga ǝnga Maryamu ta wa? Aˈyi zamǝ nyi ˈyar ngǝ Yakubu ǝnga Yusufu ǝnga Simanu ba ǝnga Yahuda wa? 56Kwamǝ nyi ˈyar aˈyi nda ǝkkǝˈyi mǝn ǝnggǝ wa? Ya, sara mani nga ji uya patǝkura sǝˈyar ka?” 57Ba huɗa nda ndzǝ ǝnga ja. Ama kǝ Yesu na anǝ nda, “Kǝl wu mǝlmǝ nyi, ǝnga wu ki nyi nga nji gǝra hakǝra nabi.”
58Naji ɓǝra mǝl sǝ dǝdǝgurˈyar gangǝ wu pama nda mai, ara ghar mbǝrsar nda.
©2024 Initiative for the Translation and Development of African Languages and Margi Tiwi Nga Təm