Thlǝr 7
7
Ndǝr Kǝra Sitivinu Na Anǝ Njir Pathla
1Kǝ pubu kǝra a ndiya ǝnga dǝgalǝ yiwa Sitivinu ji na, “Kariya, sǝ kǝ nju na ar kǝra gǝ kau, jiri nga nyi ya?”
2Sitivinu shaɗǝwa, ji na, “Zamǝˈyar ǝkkǝˈyi tadaˈyar, sǝya ɗa mǝ himi. Hyal wu kadakadarkur nyi canǝ nyi kǝr anǝ ǝjir mǝn Ibrahimu pǝci kǝra ja wu ˈyiˈyir Masopotomiya, kadivira ja shili wu Haranu. 3Hyal na anǝ nyi, ‘Ga piyari ˈyiˈyi ngau ǝnga nji gǝ hyi, ga maˈyi a ndu ˈyiˈyi kǝra yu nda canǝ ngau.’
4“Kǝ ǝjir mǝn hyaˈari sara wu ˈyiˈyir Kaldiya ji sa nggya wu ˈyiˈyir Haranu. Ayukuɗa tǝr dǝnyi, kǝ Hyal sǝwa nyi a shili ar ˈyiˈyi kǝ hya vǝr nggya a gwa kabangǝkǝ kau. 5Ama Hyal aˈyi nǝ nyi ˈyiˈyi kǝ anǝ Ibrahimu mai, alaga bǝla hi pathlǝu ar viya nǝnyi mai. Ama kǝ Hyal hǝr alkawal abǝr ju nǝ nyi ˈyiˈya nyi anǝ Ibrahimu ǝnga njir ki nyi, alaga kǝ Ibrahimu aˈyi uya zǝr kwatahǝ mai.
6Hyal na abǝr, culi nǝ Ibrahimu wu nda nggya mǝthlǝpi ar vanyi ˈyiˈyi, ndu nda nggya mafa nji kau, ndu nda nǝ nda ɓwaɓwatǝ gagaɗǝ nǝ fa gharu foɗǝu. 7Ama kǝ Hyal ɓǝra na, ‘Yu nda mǝliya nyi numa nǝ ɓwaɓwatǝ tsu anǝ ˈyiˈyi kǝ fuwa nda wu mafakur kau. Ayukuɗa nyi nda dzǝgwa biya nda sa dlǝvǝ ɗa ar ˈyiˈyi kau.’ 8Kǝ Hyal nǝ nyi alkawal mbamba nǝ thla pǝlzha anǝ Ibrahimu. Ca ngǝ ɗa ayukuɗa Ibrahimu yabiya Ishaku, ǝnggǝra ji kar pida cisu kǝ ji thlana nyi pǝlzha. Kǝ Ishaku yabiya Yakubu, Yakubu tsu ji yabiya ǝjir mǝn ˈyar kumo apǝ mǝthlǝu.
9“Ama ǝjir mǝn ˈyar kau, hyaˈari ǝnga shishikur ar kǝra zamǝr nda Yusufu, ba ndǝ ɗǝlna nyi, ba nji maˈyi ǝnga ja a vwu Masaru. Ama Hyal aˈyi ǝnga ja, 10ǝnga kǝ Hyal hǝbiya nyi sara wu ɓwaɓwatǝ nyi patǝu. Hyal tsu ji mǝliya nyi ji ɗa ndǝ hahangǝ, ndǝra uya mayiwakur wu mwar Firaˈauna tǝlǝr Masaru. Firaˈauna tsu mǝliya Yusufu ji ɗa gwamna wu ˈyiˈyir Masaru ǝnga tsu ndǝr tǝɗǝmwa anǝ nji patǝ wu ki nyi.
11“Kǝ wuɓǝ thlakǝr shili ar ˈyiˈyir Masaru ǝnga Kanaˈana, daɓǝ ǝnga ɓwaɓwatǝ gagaɗau, kǝl ta ǝjir mǝn ˈyar tini sǝr sǝm.
12Ənggǝra Yakubu nggari abǝr sǝr sǝm aˈyi wu Masaru, kǝ ji sǝwa wazha nyi, nanda ngǝ ǝjir mǝn ˈyar a vwu Masaru. Naja kǝ ngǝ biya ɓǝr nda nǝ tanggǝrma. 13Ar pǝcir biyar nda nǝ mǝthlǝkura nyi ngǝ Yusufu cabiya kǝrnyi anǝ zamǝ nyi ˈyar, ǝnggau ngǝ Firaˈauna sǝnibiya njir ki gǝ Yusufu.
14Ayukuɗa kǝ ngǝ Yusufu sǝwa nyi anǝ Yakubu dǝnyi aga ja shili ǝnga ki dǝnyi patǝu, nanda mǝɗǝfǝ kumunyi apǝ tǝfu. 15Kǝ Yakubu maˈyi a vwu Masaru. A vwuna nga ji tau ǝnga ǝjir mǝn ˈyar. 16Ayukuɗa nyi, kǝ nji faˈari kumǝr dza nda a shili wu ˈyiˈyir Shekemu, nji sa haɗǝna nda ar vir haɗǝ nji kǝra Ibrahimu ɗǝlbiya ara wazha Hamuwa wu Shekemu ǝnga gǝnna nyi.
17“Ənggǝra pǝci kǝra Hyal fiya aga ja nyabiya alkawal kǝra ji hǝri anǝ Ibrahimu ɗa lǝhǝu, gangǝkura njir mǝn wu Masaru tsu a cakǝr dzǝ gagaɗau. 18Ayukuɗa nyi, kǝ vanyi tǝl hyaˈari wu Masaru kǝra gǝra sǝni tara wa ngǝ Yusufu. 19Tǝl kǝ dlǝrbǝri ǝjir mǝn ˈyar lagu pampamǝ gangǝu ǝnga ji nǝ nda ɓwaɓwatǝ gagaɗau ǝnga ji cuwa nda aga nda pǝna wazha yiɗiɗǝu ma ndǝ ya aga nda kuɗau.
20“Ar pǝci kǝ nga nji yabiya Musa, zǝrkura ja aˈyi ǝnggǝr alenyi wazha mai. Njir ya nyi hǝ nyi wu huɗa kir nda nǝ hya makǝru. 21Ayukuɗa ndǝ biya fiya Musa a biya, ba kwar Firaˈauna nǝr nyi, ba ji hǝr nyi ba ji hǝr nyi ar viya zǝr nyi. 22Nji highiɓǝri nyi anǝ Musa hahangǝkur nǝ njir Masaru patǝu. Ndǝr nyi ǝnga sǝr mǝla ja ǝnga dǝnama gagaɗau.
23“Ənggǝra far ya nyi kar foɗǝ kumunyi, kǝ ji na wu ɗǝfuwa ja, ja maˈyi ja nda tsamiya nggyabiya zamǝ nyi ˈyar, njir Izirayila. 24Ənggǝra ji lari ndǝr Masaru a vǝr lǝ ɓwaɓwatǝ anǝ ndǝr Izirayila, kǝ ji maˈyi a nda dlǝwa nyi aga ja kibiya nyi, ba ji tsǝya ndǝr Masaru ǝnga dǝgau. 25Wu ɗǝngar Musa, nji nyi nda kyaga sǝni abǝr Hyal ngǝ sǝwa nyi aga ja sa faˈabiya nda wu ɓwaɓwatǝu. Ama nandǝ nggabiya mai. 26Əzǝgǝkura nyi, ba ji thlǝwa njir Izirayila mǝthlǝ a vǝr pa. Ju yiwu aga ja ɓasǝwa nda, ju na, ‘Taguˈyi, nji zǝmǝ nga hyi. Mi ngǝ ɗa hyu pa wu pamǝ ka?’
27“Ama ndǝ kǝ a vǝr kura vi kau, ji jahǝna Musa a ndar batiti, ju na, ‘Wa ngǝ mǝliya ngǝ ndǝr tǝɗǝmwa ǝnga ndǝr thla numa ar kǝra ˈya? 28Nagau, gu yiwu ga tsǝya ɗa ǝnggǝra kǝra gǝ tsǝya ndǝr Masaru na ta ya?’ 29Ənggǝra Musa nggari abangǝ, kǝ ji hwinakǝr a vwu ˈyiˈyir Midiyanu, vira ji nggya ari ar viya mǝthlǝpi. A ndǝna ba ji yabiya wazha shili mǝthlǝu.
30“Ayukuɗa fa foɗǝ kumunyi tǝrabiya, kǝ waladi canǝ nyi kǝr anǝ Musa lagu kyara uˈu sara wu kǝdlǝl kǝra mbar uˈu. Sǝ kǝ ɗarkǝr ar tagǝu nǝ mǝ Sǝnayu. 31Ənggǝra Musa lari abangau, ba ɗa sǝ dǝdǝgur anǝ nyi gagaɗau ara sǝra ji lari. Ta ji ɓar dzǝ aga ja lari tara mi ngau, kǝ ji nggari ɗaha Thlagǝu, wu na, 32‘Nayi ngǝ Hyal nǝ ǝji ngǝ ˈyar, Ibrahimu ǝnga Ishaku ba ǝnga Yakubu.’ Kǝ Musa mbar tsǝdzau ara hivǝr ǝnga tsu naji ɗa tsaˈa aga ja tsamǝ lagu ta mai.
33“Kǝ Thlagǝ na anǝ nyi, ‘Ga zǝɗǝna ɓiɓi kǝra wu hiya gǝ kau, ara vi kǝra gǝ taˈyi ar kau, ˈyiˈyi cici ngau. 34Nayi ǝnga kǝrɗa, a lari yi culi ɓwaɓwatǝ kǝra nji ɗa, njir Izirayila, a gwa wu ˈyiˈyir Masaru. A nggari yi tiwir nda. Ca nga yi shida aga ya sa pǝlbiya nda sara wu ɓwaɓwatǝu. Agabangau, ga pabǝr kǝrngau yu ɓǝra sǝwa ngǝ a vwu Masaru.’
35“Musa ta ndǝ piyari ta, ndu na anǝ nyi, ‘Wa ngǝ fiya ngǝ ndǝr tǝɗǝmwa ǝnga ndǝr thla numa ar kǝra ˈya?,’ naja ngǝ ndǝra Hyal sǝwa aga sa ɗa dǝgalǝr nda ǝnga ndǝr mbǝɗa nda, lagu waladi kǝra canǝ nyi kǝr wu kǝdlǝl. 36Ji lǝbiya nda sara wu Masaru. Ji canǝ nda sǝ dǝdǝgur ǝnga mǝtsamǝ gangǝ pampamǝu wu Masaru ǝnga ar Tsadǝ Dǝzǝu ǝnga ar tagǝ nǝ fa foɗǝ kumunyi.
37“Musa kǝ ngǝ nar nyi anǝ njir Izirayila abǝr, ‘Hyal wu nda sǝwa hyi nabi ǝnggǝr nayi sara wu pama nji gǝ hyi.’ 38Musa aˈyi ja wu pama njira tsǝmiya dzǝ a gwa tagǝu, ǝnga aˈyi ja ǝnga waladi ta ndǝr anǝ nyi ar mǝ nǝ Sǝnayu, ba nga aˈyi ja ǝnga ǝjir mǝn ˈyar tsu. Naja ngǝ dlǝwuri ndǝr Hyal kǝra ǝnga pi ba ji nǝ mǝn.
39“Ama kǝ ǝjir mǝn ˈyar nggǝl ara mǝl thlǝr ǝnga ndǝr nyi. Ndǝ shini nyi yi ǝnga ndǝ sha a vwu Masaru wu ɗǝfuwa nda. 40Kǝ ndǝ nar nyi anǝ Haruna, ‘Mǝliya ˈya hyalǝr ˈyar kǝra wu maˈyi a dumwar ˈya, ariya Musa ndǝra lǝbiya ˈya sara wu Masaru, naˈyu sǝni sǝra ɗa ǝnga ja mai!’ 41Ar pǝci kau, nga ndǝ mǝliya katǝ hyal a papa zǝr thla. Ndǝ dla ǝnga sǝr ngguɗǝ sǝ anǝ nyi ǝnga ndǝ dumwa ǝnga caguli gagaɗau, ariya sǝra ndǝ mǝliya ǝnga tsa nda. 42Ariya sǝ kǝ ngǝ Hyal shabiya nda yi, ji piyari nda aga nda dlǝvǝ shashilgaˈyar kǝra a dǝmǝlmau. Ba sǝ kǝ dla kakalǝ ǝnga sǝra tsǝtsǝfǝ wu lǝkakaɗǝ nǝ nabiˈyar abǝr,
“ ‘Nahyi njir Izirayila,
anǝ ɗa nga hyi tsa maˈwiˈyar
ǝnga sǝr saɗaka kǝra hyi
shili ǝni nǝ
fa foɗǝ kumunyi
a gwa tagǝ kǝ ya?
43Ənga kwapatǝ nǝ katǝ Molekǝu
nga hyi dumwa ǝnga ɓau,
ǝnga hyi hǝri shashilga nǝ hyalǝr hyi
kǝra nju ngga ǝnga Rifanu,
naja ngǝ katǝ hyal kǝra
hyi mǝliya ǝnga tsa hyi
aga hya dlǝvau.
Agabangau, nayau, yu
kǝdlǝbiya hyi
a ndar tagǝ mashi
a biyabanga Babilanu.’
44“Ɗǝɗǝmǝu, ǝjir mǝn ˈyar aˈyi nda ǝnga kwapatǝ nǝ sakida kǝra cabiya abǝr Hyal aˈyi ǝnga nda a gwar tagǝ mashi. Naja kǝ ngǝ kwapatǝ kǝra Hyal canǝ nyi anǝ Musa aga ja liya. Nji mǝliya kwapatǝ kǝ kakalǝ ǝnggǝr kǝra Hyal canǝ nyi aga ja liya. 45Ayukuɗa ǝjir mǝn ˈyar dlǝwuri naja ka kwapatǝu, ar pǝcira Jashuwa ngǝ a vǝr tǝɗǝmwa, ba ndǝ shili ǝni wu ˈyiˈyi kǝra ndǝ mbǝliya ara nda, ǝnggǝra Hyal kǝdlǝbiya njira a gwa gwa kaɗǝ a biya. Kwapatǝ kǝ nggya ǝnggau baˈa shili wu pǝcir ǝjir mǝn Dawuda. 46Dawuda ndǝra uya mayiwakur wu mwar Hyal, kǝdi aga ja hǝriya nyi vir nggya anǝ Hyal nǝ ǝjir mǝn Yakubu. 47Ama Solomanu ngǝ sa hǝriya ki kǝ anǝ Hyal.
48“Alaga kǝ, Hyala Dǝ ǝnga kǝrnyi aˈyi wu nggya wu ki kǝra ndǝ ngǝ hǝriya ǝnga tsi mai. Ənggǝr kǝra nabi nana,
49“ ‘Dǝmǝlmǝ ngǝ tsǝkafǝ
nǝ tǝlkur ɗa
ǝnga gyi wu ˈyi ngǝ
vir fǝ hiya yau.
Wa thlǝmǝ culi ki
kǝra hyu sǝni hǝriya ɗa?’ ǝngwar Thlagǝu.
‘Əndǝga ǝmani ngǝ vir
ɓǝlsar ɗa wu sǝni ɗa?
50Aˈyi nayi ngǝ mǝliya
sǝˈyar kǝ patǝ wa?’
51“Nahyi nji ɓaɓal kǝr, nji ɓaɓal ɗǝfu, nji gǝra nggar sau! Kakalǝ nga hyi ǝkkǝˈyi ǝjir hyi ˈyar, nahyi aˈyi wu sǝ himi sǝra Mambǝl Cicau wu na mai. 52Wu pama nabiˈyar patǝu, kǝra aˈyi kǝra ǝjir hyi gǝra ɗa nda ya? Patǝr njira ndǝr ar kǝra shili nǝ ndǝ Tsapǝ nga ndǝ tsǝya nda. Nahyi tsu ba hyi sa thlana hiya ja ǝnga hyi tsǝya nyi. 53Nahyi ngǝ njira dlǝwuri dlaɗǝˈyar sara ara waladiˈyar, ama nahyi aˈyi ɓǝlar mai.”
Nji Tsǝya Sitivinu Ənga Tsǝka Vavaka
54Ənggǝra ndǝ nggari abangau, kǝ huɗa nda ndzǝ gagaɗau, kǝl ta ndǝ dzǝguya ɗǝ hira nda ara huɗǝ ndzǝndzau. 55Ama Sitivinu, nyinyau ǝnga Mambǝl Cicau, hyaˈana kǝr a dǝmǝlmau, ba ji lari kadakadarkur nǝ Hyal, ǝnga Yesu taˈyi lagu mazǝma Hyal. 56Əngwar Sitivinu, “Tsama mau, yi lari dǝmǝlmǝ pahǝnakǝr ǝnga Zǝr Ndǝ taˈyi lagu tsi mazǝma Hyal.”
57Ama kǝ ndǝ dzǝguya wau ǝnga dǝnama ar kǝra ja, ndǝ dari himiya nda, kǝ ndǝ pǝnggǝr nyi dzǝ patǝu. 58Ndǝ hǝbiya nyi a biyar ya mǝlmau, ndǝ biya vavaka nyi ǝnga tsǝka aga nda tsǝya nyi. Njir lǝ sakida dzǝgwa fiya kar har nda a dzǝr vanyi zǝr baduwari kǝra nja ngga ǝnga Suwalu.
59Ar pǝcira nda vǝr vavaka Sitivinu ǝnga tsǝka, kǝ ji kǝdi Hyal, ji na, “Thlagǝ Yesu, dlǝwuri piya yau.” 60Kǝ ji ɓǝliya undi, ji hyaˈana ɗahǝu ǝnga dǝnama ji na, “Thlagǝu, ga sara jiga bikǝr nda kǝ ar kǝra nda mai.” Ənggǝra ji nana abangau, ba piya ja biya.
©2024 Initiative for the Translation and Development of African Languages and Margi Tiwi Nga Təm