मत्ती 22
22
बड़ी दावत को उदारण
(लूका 14:15-24)
1अर यीशु ऊं लोगु तैं फिर से अलग-अलग उदारण देण लगि गै। 2वेन बोलि कि, “परमेस्वर को राज एक राजा का जन च, जैन अपणा नौना का ब्यौ की दावत देई। 3अर वेन न्यूत्यां लोगु तैं ब्यौ की दावत मा बुलाणु खुणि अपणा नौकरों तैं भेजि, मगर न्यूतेर लोग औण नि चाणा छा। 4अर वेन दुसरि दौं भि अपणा और नौकरों तैं इन बोलि के भेजि कि, ‘सुणा, न्यूत्यां लोगु कू बोला कि मिन दावत को खाणुक तयार कैरियाली, अर मेरा पळ्यां हटा-कटा जानबर मरयां छिन। अर देखा, सब कुछ तयार च, इलै तुम ब्यौ की दावत मा ऐ जा।’ 5पर न्यूत्यां लोगु न ईं बात पर कुई ध्यान नि देई, अर वु अपणा-अपणा कामों पर चलि गैनी, कुई अपणा पुंगड़ा मा, अर कुई अपणा व्यापार खुणि चलि गै। 6अर कुछ लोगु न राजा का नौकरों तैं पकड़ी अर ऊंका दगड़ा गळत बरतौ कैरी, अर ऊंतैं मारी भि दिनी। 7तब वे राजा तैं भौत गुस्सा ऐ, अर वेन अपणी सेना तैं भेजि के ऊं हत्यारों को नास कैरी दिनी, अर ऊंका नगर तैं फूकी दिनी।
8“तब वेन अपणा नौकरों कू बोलि, ‘ब्यौ को खाणु तयार च, मगर जौं लोगु तैं बुलये गै छौ ऊ लोग ही लैख नि छा। 9इलै सुणा, तुम लोग चौबटो पर जा, अर जथगा भि लोग तुमतै मिलला, ऊं सभ्यों तैं ब्यौ की दावत मा बुलै के ला।’ 10तब वु नौकर सड़कों मा चलि गैनी, अर ऊंतैं जथगा भि लोग मिलिनी, अब चै वु भला हो या बुरा जथगा भि लोग मिलिनी ऊं नौकरों न ऊं सब लोगु तैं इकट्ठा कैरी। अर जै घौर मा ब्यौ होणु छौ उ घौर मैमानोंळ भोरी गै।
11“अर जब राजा मैमानों तैं मिलणु कू भितर ऐ, त वेकी नजर एक आदिम पर पोड़ि, जैका ब्यौ का कपड़ा नि पैरयां छा। 12वेन वेकू बोलि, ‘दगड़्या, तू बगैर ब्यौ का कपड़ा पैरयां इख किलै ऐ?’ अर उ आदिम सन्ट रै गै। 13तब राजा न नौकरों कू बोलि, ‘ये मनखि का हाथ-खुटा बान्धि के भैर अन्धेरा मा डाल द्या, जख रुंण अर दांतों को कड़गिटाण ही होलु।’”
14तब सुनण वळा लोगु खुणि यीशु न इन भि बोलि, “बुलयां त भौत छिन, पर चुण्यां कम ही छिन।”
मुख्य अधिकारीयों की चाल
(मर 12:13-17; लूका 20:20-26)
15तब फरीसी दल का लोग उख बटि चलि गैनी। अर अपणा आपस मा मिली के ऊंन एक सला बणै, कि यीशु तैं वेकी ही बात मा कनकै फसांण। 16तब ऊंन अपणा चेला-चआँटों तैं राजा हेरोदेस का कुछ खास लोगु का दगड़ा यीशु का पास इन बुलणु कू भेजि, कि वेकू बुलयां, “गुरुजी, हम जणदा छां कि तुम सच्चा छाँ, अर सच्चै से परमेस्वर का बाटा का बारा मा सिखौन्द्यां। अर तुम कै से भि नि डऽरद्यां, अर ना ही तुम कै का दगड़ा मा पक्षपात कैरिके बात करद्यां। 17इलै हमतै बता, कि तुम क्या सोचद्यां? हमतै रोमी महाराजा तैं कर देण चयेणु, या नि देण चयेणु?” 18पर यीशु न ऊंका मन का कपट तैं जाण्यालि छौ इलै वेन ऊंकू बोलि, “हे ढोंगियों, तुम मितैं किलै अजमौणा छाँ? 19जौं सिक्कोंळ तुम कर देन्द्यां वु मितैं दिखा।” तब वु लोग वेका पास एक सिक्का लेके ऐनी। 20यीशु न ऊंतैं पूछी, “यां पर कै की छाप अर कै को नौ लिख्यूं च?” 21अर ऊंन वेकू बोलि “रोमी महाराज को।” तब वेन बोलि, “जु रोमी महाराज को च उ महाराज तैं द्या, अर जु परमेस्वर को च उ परमेस्वर तैं द्या।”
22अर या बात सुणी के वु हकदक ह्वे गैनी, अर यीशु तैं छोड़ि के उख बटि चलि गैनी।
मुरदो मा बटि ज्यून्द होण का बारा मा सवाल
(मर 12:18-27; लूका 20:27-40)
23अर वे ही दिन सदूकी दल का लोग यीशु का पास ऐनी अर यू इन मणदिन कि मुरयां लोग फिर से ज्यून्दा नि ह्वे सकदिन इलै ऊंन वेसे पूछी, 24“गुरुजी, मूसा रैबर्या का दियां नियम-कानूनों मा लिख्यूं च कि, #व्यव 25:5-6अगर कै को भै मोरि जौ अर ऊंकी कुई औलाद नि हो, त वेकू भै अपणी भाभी का दगड़ा ब्यौ कैरिके अपणा भै को वंश अगनै बढ़ो। 25त गुरुजी, बात इन च कि, हमरा इख सात भै छा अर जब पैला भै को ब्यौ ह्वे, त बिना औलाद को सुख दिख्यां ही उ मोरि गै। अर वेकी औलाद नि छै, इलै वेका दुसरा भै न भाभी तैं अपणु बणै दिनी, मगर उ भि बिना औलाद को सुख दिख्यां मोरि गै। 26अर फिर तिसरा न भि वीं भाभी का दगड़ा मा ब्यौ कैरी, अर उ भि बिना औलाद को सुख दिख्यां ही मोरि गै। अर ऊं सातों का दगड़ा इन्नि ह्वे। 27अर ऊं सभ्यों का बाद वा जनानि भि मोरि गै। 28त अब हमतै इन बता कि मुरयां लोगु का ज्यून्द होण का दिन पर वा कै की घरवळी होलि? किलैकि वा सातों की घरवळी ह्वे गै छै।” 29तब यीशु न ऊंतैं जबाब दिनी, “तुम बड़ा भरम मा छाँ, किलैकि तुम नऽ त पवित्रशास्त्र तैं जणद्यां, अर ना ही परमेस्वर की ताकत तैं। 30किलैकि ज्यून्दा होण पर वु लोग नऽ त ब्यौ करला, अर ना ही ऊंकी नौनि ब्यौ खुणि दिये जालि, पर स्वर्ग मा वु परमेस्वर का स्वर्गदूतों का जन ह्वे जाला। 31पर मुरयां लोगु का ज्यून्द होण का बारा मा जु वचन परमेस्वर न बोलि छौ, तुमुन वु नि पैढी क्या?
32“परमेस्वर इन बुल्दु कि,
#
निर्ग 3:6,16 ‘मि अब्राहम को परमेस्वर, इसहाक को परमेस्वर अर याकूब को परमेस्वर छौं?’
अर परमेस्वर मुरदो को ना, पर ज्यून्दो को परमेस्वर च।” 33अर जब लोगु न या बात सुणी, त वेका उपदेस तैं सुणी के दंग रै गैनी।
सबसे बड़ी आज्ञा
(मर 12:28-34; लूका 10:25-28)
34अर जब फरीसी दल का लोगु न या बात सुणी की यीशु न सदूकियों की बोलती बन्द कैरियाली, त ऊ सब इकट्ठा ह्वेनि। 35तब ऊंमा बटि एक मनखि जैतैं यहूदी नियम-कानूनों को भौत अच्छु ज्ञान छौ वेन यीशु तैं अजमौणु खुणि वेसे पूछी, 36“गुरुजी, नियम-कानून मा सबसे बड़ी आज्ञा क्वा च?” 37तब यीशु न जबाब देई,
#
व्यव 6:5
“‘तू अपणा प्रभु परमेस्वर तैं अपणा पूरा मनळ, अर अपणी पूरि अकलळ,
अर ठिक उन्नि अपणा पूरा जीवन से प्यार कैर।’
38सबसे बड़ी अर खास आज्ञा त या ही च। 39अर ठिक उन्नि दुसरि आज्ञा या च कि,
#
लैव्य 19:18
‘जन प्यार तू खुद से करदी, ठिक उन्नि प्यार तू सब लोगु#22:39 कुछ कागज्दों मा इख मा पड़ोसी बटि भि प्यार कैरा लिख्यूं च। से भि कैर।’
40“अर यों दुई आज्ञाओं पर ही मूसा का दियां सब नियम-कानून अर परमेस्वर का रैबर्यों की सब शिक्षा टिकी छिन।”
मसीह दाऊद को प्रभु
(मर 12:35-37; लूका 20:41-44)
41अर उख जमा होयां फरीसी दल का लोगु बटि यीशु न इन पूछी, 42“मसीह का बारा मा तुम क्या सोचद्यां? उ कै की पीढ़ी बटि होलु?” ऊंन वेकू बोलि, “राजा दाऊद की पीढ़ी को।” 43यीशु न ऊंकू बोलि, “त फिर दाऊद पवित्र आत्मा मा ह्वेके वे खुणि प्रभु किलै बुल्दु? 44अर उ इन बुल्दु कि,
#
भजन 110:1 “‘परमेस्वर न मेरा प्रभु बटि बोलि,
मेरी दैंणी तरफा बैठ, जबरि तक कि मि तेरा दुसमनों तैं हरै के तेरा अधीन नि कैरी द्यूं।’
45“अर जब राजा दाऊद ही मसीह खुणि ‘प्रभु’ बुल्दु, त फिर उ वेको नौनु कनकै ह्वे सकदु?” 46अर ईं बात तैं सुणी के फरीसी दल का लोग यीशु तैं जबाब नि दे सकिनी, अर ये दिन बटि कै की हिम्मत नि ह्वे कि कुई भि वेतैं अजमौणु खुणि फिर वे बटि सवाल पूछो।
S'ha seleccionat:
मत्ती 22: GBM
Subratllat
Comparteix
Compara
Copia
Vols que els teus subratllats es desin a tots els teus dispositius? Registra't o inicia sessió
© (Active) Wycliffe Bible Translators, Inc. All rights reserved.