खबरदुत 4
4
पाको अगुवालमइ पत्रुस र युहन्नाकाय पक्रओ
1जब पत्रुस र युहन्ना मान्तालमकुस नोःधय खेचतो, केहि पुजारिलम, मन्दिरको पालेलमको कप्तान र केहि सदुकिलम ओउनिसकहाङ वाङाकाय। 2ओउ निसचाक मुख्य चेलानिसइ येसु सिओसय उह्ति च्योक्सास्यावो लेखाले सिओ मान्तालम फेरि उह्ति च्योक्लेनय त दाह्य्ति मान्तालमकाय स्यानोझ्यान्ते ओउ अगुवालम माहा जोक्तो रिस वाङाकाय। 3ओउमयइ पत्रुस र युहन्नाकाय पक्रआकानि, र ओउ दिन राह्म स्यावोझ्यान्ते स्याह्ङ्लो बिहानसम्म झेलकनहाङ काति गमाकानि। 4तर ओउ मुख्य चेलानिसको खबर सायोलममध्ये नाःतो मान्तालमइखे ओउनिसको कुराहाङ बिस्वास जाह्ङाकानि, ओउतझ्यान्ते मोम्चो मान्तालम र बालाखलमकाय थेङ्मात जुदा गोय्चो मान्तालमको सङ्ख्या पोङा हजारच्युक स्यावा।
5स्याह्ङ्लो बिहान सासकलम, पाको अगुवालम र धर्मगुरुलम यरुसलेमको मन्दिरको सभा कोथाहाङ हुमाकाय। 6ओउमयइ हन्नास त मय्ङ्ओ ताह्ङो पुजारि, कय्याफा, युहन्ना,#४:६ युहन्ना कुनय-कुनय सङ्सकरनलमहाङखे इकाय “जोनाथन” त दाह्य्ति तोओ मुना। अलेक्जेन्दर, र ताह्ङो पुजारिको लयको मान्तालमकाय क्रुसाकानि। 7ओउमयइ पत्रुस र युहन्नाकाय लयमयको ङ्हा चिङताकाकानि र ओउनिसकाय ह्वत्सा फाःङाकानि, “निङ्जिइ गाउ जिःङसय अथबा सुको मय्ङसय एतताह्ङो काम जाह्ङ्तेआकाजु?”
8अनि पत्रुसइ पबित्र ग्वालामकसय जिःङ दोःति ओउमयकाय तोआकान, “अ मान्तालमको सासक र पाको अगुवालम, 9दोह निचिइ खोन्द्या मान्ताकाय पेओ काम जाह्ङोझ्यान्ते, निङइ ह्वतो खेतेनय? दोह निङ इ गतहाइति स्याका त दाह्यो कुरा चिःसा चाहतेनय? 10निङ र इस्राएलको जुदा मान्तालमकाय निचिइ केहि कुरा तोसाले परना, इ मान्ता नासरतको येसु ख्रिस्तको जिःङको कारनइ पेतोकुस स्याकाक्तिको निङको ङ्हा चिङ्ति मुना। निङइ येसुकाय क्रुसहाङ योकोति सात्तेआकानि, तर परमेस्वरइखे येसुकाय सिओसय उह्ति च्योक्ताक्सास्यावा। 11धइतिदाह्य्सा येसुको बारेहाङले धर्मसास्त्रहाङ एतदाह्य्ति लेखओ मुना—
‘निङ दकर्मिलमइ काम लागल त दाह्य्ति इन्कार जाह्ङो बाङले,
देङे किमको कुनाको सुरबाङ स्यावा।’#भजन ११८:२२
12अरु सुइमा निकाय दल्ताक्सा खाइलेनिलि, धइतिदाह्य्सा परमेस्वरइ येसुको मय्ङ दुवारा मात्र ल्हाउदयबाङको मान्तालमकाय दल्ताक्सास्याउलेना।”
13जब यहुदि सभाको सदस्यलमइ पत्रुस र युहन्नाको साहस च्यवाकानि, र इनिसपाय पह्राय-लेखाय नाःमालो साधरन मान्तानिस खेनाच त दाह्य्ति चिःति ओउमय माहा जोक्तो ग्याह्ङाकाय र ओउनिस येसुकुसले स्याउचतो त दाह्य्ति तह्याकानि। 14र ओउ स्याको खोन्द्या मान्ताकाय पत्रुस र युहन्नाकुस ब्रकले चिङ्तिमुओ च्यउति ओउमयइ ओउनिसको बिरोतहाङ दोह तोसामा खाइनिलि। 15ओउतझ्यान्ते ओउमयइ पत्रुस, युहन्ना र ओउ स्याको खोन्द्या मान्ताकाय मन्दिरको सभा कोथासय बाहिर ग्ल्युन्साको लागि पालेलमकाय आग्या जाह्ङाकानि, ओहाङसयको लयमय नोकाइसा फाःङाकानि। 16“इ मान्तानिसकाय द्याह निइ दोह हाइनि? निइ ओउनिसइ जाह्ङो ग्याह्ङ्सिओ कामकाय इन्कार जाह्ङ्सा खाइतह्य्निलि, धइतिदाह्य्सा यरुसलेमको जुदा मान्तालमइ ओउ कुरा चिःओ मुना। 17तर ओउ कुरा अझ नाःतो भयभय त स्याउताक्मासाको लागि, येसुको मय्ङहाङ फेरि सुकायमा तोलाम त दाह्य्ति निइ ओउनिसकाय दर्कनि” त दाह्य्ति ओउमय लयमय नोःकायाकाय।
18ओहाङसयको ओउमयइ पत्रुस र युहन्नाकाय फेरि भित्र गोताक्तिको “निङ्जिइ येसुको मय्ङहाङ दोह कुरामा नोःलाम र स्यान्लाम” त दाह्य्ति आग्या जाह्ङाकानि। 19तर पत्रुस र युहन्नाइ ओउमयकाय जवाफ बयाकाचु, “निङइले निर्नय जाह्ङ्नु, निचिइ परमेस्वरकोसय निङको आग्या ग्याओले पेतो स्याउना त दाह्य्ति दोह परमेस्वर चाहसास्याउना र? 20धइतिदाह्य्सा निचिइपाय लयनिसइ च्यवो र सायो दोह कुरामा तोमात मुसा खाइङचुलु।”
21ओउमयइ ओउनिसकाय नाःतोकुस दर्कति भ्याआपछि फेति ल्होकाकानि। ओउनिसकाय गतहाइति दन्द बइसा त दाह्य्ति ओउमयइ निर्नय जाह्ङ्सा खाइनिलि, धइतिदाह्य्सा ओउनिसइ जाह्ङो ग्याह्ङ्सिओ काम च्यउति जुदा मान्तालमइ परमेस्वरको प्रसङ्सा जाह्ङ्धय खेइतो। 22ओउ ग्याह्ङ्सितो तरिकाइ स्याको मान्ताको उमेरखे चालिस बर्ससयमा नाःतो स्यावो खेतो।
साहस दोःसाको लागि बिस्वासिलमको प्राथना
23जब पत्रुस र युहन्ना ओहाङसय छुत्कारा दोःआकाच, ओउनिस लयको बिस्वासि होयालमकहाङ द्याह्नाकाच, अनि मुख्य पुजारिलम र पाको अगुवालमइ लयनिसकाय तोओ जुदा कुरा ल्हाक्ति छ्यानाकाचु। 24जब बिस्वासिलमइ इ कुरा सायाकानि, अनि ओउमय जुदा मिलति परमेस्वरकाय प्राथना जाह्ङाकानि— “अ जुदासय जिःङ नाःओ प्रभु, फेलबाङ र ल्हाउदयबाङ, समुन्द्र र ओहाङ नाःओ जुदा थोकको स्रिस्ति नाङइले जाह्ङ्सास्यावो खेना। 25नाङइ पबित्र ग्वालामकसय नाङको नोकर निको पुर्खा राजा दाउदको म्होतोङ दुवारा एतदाह्य्ति तोसास्यावा—
‘धइति अरु जातिको मान्तालम माहा जोक्तो रिस वाङ्नय?
धइति यहुदिलमइ मुर्ख योजनालम जाह्ङ्ति लयको समय बर्बाद जाह्ङ्नानि?
26प्रभु परमेस्वर र परमेस्वरको ख्रिस्तको बिरोतहाङ,
ल्हाउदयबाङको राजालमइ युद्धको तयारि जाह्ङ्नानि,
र सासकलम ब्रक्त हुम्नय।’#भजन २:१-२
27धइतिदाह्य्सा दोङ्सिले हेरोद एन्तिपास र पन्तियस पिलातस निसचाकमा अरु जातिको मान्तालम र इस्राएलको मान्तालमकुस नाङइ छ्युह्ङ्सास्यावो नाङको पबित्र सेवक येसुको बिरोतहाङ इ सहरहाङले हुमो खेइतो। 28ओउमयइखे नाङइ नाङको जिःङ र ग्यानहाङ एत जाह्ङ्सा त दाह्य्ति ङ्हाखाले निर्नय जाह्ङ्सास्यावो कुराले जाह्ङो खेनय। 29द्याह अ प्रभु, ओउमयइ बयो दाङ्क साइसास्याउपाना, र नाङको खबर प्रचार जाह्ङ्साको लागि नि नाङको सेवकलमकाय साहस बइसास्याउपाना। 30नाङको स्याक्ताको जिःङ ल्होक्सास्याउपाना, र नाङको पबित्र सेवक येसुको मय्ङहाङ ग्याह्ङ्सिओ चिनोलम स्याउपाना।”
31जब ओउमयइ प्राथना जाह्ङ्ति द्युमाकानि, ओउमय हुम्तिमुओ थाउ रिह्ङा। ओउमय जुदाले पबित्र ग्वालामइ भरपुर स्यावाकाय र साहसि स्याउति परमेस्वरको खबर प्रचार जाह्ङ्सा फाःङाकानि।
बिस्वासिलमको साझा सम्पति
32जुदा बिस्वासिलम ल्हुङतुक र मनहाङ यातयज्योले स्यावाकाय। र ओउमयइ लयमयको थोकलमकायमा इपाय ङाको मात्र सम्पति खेना त दाह्याकिलि, ओउतझ्यान्ते लयमयकुस नाःओ जुदा थोकलम यात-अर्काकुस वेःकायाकाय। 33प्रभु येसु सिओसय उह्ति च्योक्सास्यावो मुना त दाह्य्ति मुख्य चेलालमइ ताह्ङो जिःङकुसि गभाइ बयाकानि, र परमेस्वरइ ओउमयकाय महान् आसिक बइसास्यावा। 34ओउमयको समुहहाङ खान्चोहाङ परओ मान्तालम सुमा नाःआकिलि। धइतिदाह्य्सा बेला-बेलाहाङ खेतराङ र किम नाःओलमइ विःन्नितो, र ओउसय वाङो जुदा थेपोलम लात्ति वान्नितो, 35अनि ओउ थेपो वान्ति मुख्य चेलालमकाय ल्हानितो, र ओउमयइ खान्चोहाङ परओलमकाय वेःति बइनितो।
36साइप्रस तापुहाङ नाःओ यातचाक लेबि बङ्सको योसेफ त मय्ङ्ओ मान्ता खेतो। मुख्य चेलालमइ ओउकाय बर्नबास त दाह्य्ति मय्ङ्आकानि, ओउको मानेखे “अरुकाय हउसला बयो मान्ता” खेना। 37ओउइ लयको सम्पतिको भाक यातज्यो खेत विःनाकान, अनि थेपो वान्ति मुख्य चेलालमकाय ल्हाआकान।
S'ha seleccionat:
खबरदुत 4: CHEP
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
© 2024 (Active), Mother Tongue Translators Society and Wycliffe Bible Translators, Inc. All rights reserved.