Amatayo 9
9
Ayesu jwaalamia mundu jwaapolite mmele
Amaluko 2:1-12; Aluka 5:17-26
1Ayesu akakweela mu mtumbwi nkolongwa, na akajomboka litanda na kuhika mu chilambo chabhenji. 2Ngapena bhandu bhajingi ngabhanneta mundu jwaapolite mmele goa, bhabhagonikwe nnani ja njeega. Ayesu pabhakabhona kuhobhalela kwabhenji, nga akaalobholela jonijola mundu jwaapolite, “Mwanangu nchipee ntima! Mabohu ginu gatekulekelelwa.”
3Bhandu bhangi bha bhenibhala bhabhamanyanga Malagilo ga Amusa bhakajemekanga konyananga akaachinabhene, “Hojo mundu atekwaaponja Annoongo!”
4Ayesu akagamanya chibhatenda kuganikia, akaakonyanga, “Kwaniki ntendanga kuganikia mabohu mu mitima jinunji? 5Bholi, nga niki chichibhile changalimba, kulobhola, ‘Ntekulekelelwa mabohu ginu’ au kulobhola, ‘Nnyeme nnyaule?’” 6Nambo, mbala muimanyange yakubhehe mwana jwa mundu akombola kwaalekelela bhandu mabohu gabhe pamba pachilambo. Penapo akaalobholela jonojwe mundu jwapolite mmele, “Nnyimuke ntole njeega chinu, nnyaule kwaachinu.”
7Jonojwe mundu jwaapolite mmele bhakajimuka, na bhakajaula kwaachabhe. 8Bhandu bhoa mu lilubhalo lyela pabhakagalola genago bhakajogopanga, bhakaalumbalila Annoongo bhabhaapekie bhandu machili ga henela.
Ayesu bhaakema Amatayo
Amaluko 2:13-17; Aluka 5:27-32
9Ayesu akabhoka penapo, na pabhakajaula, bhakaabhona mundu jumo bhakemitwa Amatayo, bhatamite panyuumba ja kutochela kodi, Ayesu akaalobholela, “Ngagule nenga.”
Na bhenabho Amatayo bhakajema, na kwaakagula.
10Ayesu paakibha kwaachabhe Amatayo kulyee chakulya, bhakutochanga kodi bhajingi na akaabohu bhakahikanga bhakatama na kulyee nabho na bhabhachijigana bhabhe. 11Mafalisayo pabhakabhona genago, bhakaakonyanga bhabhachijigana bhabhe, “Kwaniki bhannyigana bhinu bhalyee pamo na bhandu bhabhabhilinge na mabohu?”
12Ayesu paakajoha genago, akaalobholelanga, “Bhandu bhanga itamwa bhaapalanga hopo ang'anga, nambo bhenibhala akaatamwa nga bhaapala ang'anga. 13Bahi, nnyaulange nkachijigane maana ga malobhe aga, ‘Mbala kia, ngabha mbeeko,’ kwa maana nangahika kwaakemanga bhandu bhabhilinge bhammbone, nambo bhabhilinge na mabhou.”
Majigano kwa ngani ja kutabha
Amaluko 2:18-22; Aluka 5:33-39
14Penapo bhabhajichigana bha Ayohana ambatichaji bhakaajabhulila Ayesu, bhakaakonya, “Tweenga na Mafalisayo tutenda kutabha mala jijingi, kwa niki bhabhachijigana bhinu ngatabha?”
15Ayesu akaajangulanga, “Bholi, akaageni bhabhalaalikwe ku ulombela bhapakuhumalanga na kutabha pabhabhee pamo na hangwana bha ulombela? Nga henela! Nambo muda gupakuhika hangwana bha ulombela chibhapakubhokekwa nkati jabhenji, gono muda nga pabhapakutabhanga.”
16“Bhandu ngatotela chibhamba cha ngobho jiyono mu ngobho ja lolo. Handa bhatenditinge henela, jenejo ngobho ja lolo jipakujonjokeka lipobhole, na jenejo ngobho jipakuhalibika muno. 17Wala bhandu ngalekelanga divai jiyono mu mihuko jijilalite jijitotitwe na mambendela ga ngondolo. Handa bhatenditinge henela, divai hejo hipakuipapulana yeneyo mihuko jenejo, na divai jipakujitika na mihuko jipakupapuka. Divai jiyono jilekelwa mu mihuko miyono na henela divai na mihuko kubhee maha!”
Amwali bha akolo na mwikege jwalamite
Amaluko 5:21-43; Aluka 8:40-56
18Ayesu paatendita kulobhola genago, akolo jumo Annyahudi akahika, akaatindibhalila majugwa na kulobhola, “Amwali jwangu bhatekujomoka nangocheni. Nambo nhike nkaabhekele lubhoko lwinu na jonojwe apakulama.”
19Ayesu akajimuka na kujaula pamo na bhabhachijigana bhabhe bhakaakagula.
20Na pabhatendita kujaula haikege jumo, atamwa ncholocholo kwa yaaka komi na jibhele, akaakagula Ayesu kuyeto, akaakwaa mbendo ja ngobho jabhe. 21Kwakubhee akachilobholela muntima gwabhe, “Handa ngamwile tu ngobho jabhe, mbakulama.”
22Ngapena Ayesu akatendebhuka akaabhona haikege, akaalobholela, “Amwali, nchipekee ntima! Kuhobhalela kwinu kutekunlamia.” Haikege jonojwe akalama popopo.
23Ngapena Ayesu paakahika kwaachakwe jonijola akolo. Na akaabhona bhandu bhagomba hipenga ya nguto na kuguta muno, 24akaalobholela, “Mmokange pamba! Amwali hojo jwangawee, atekugoloka tu.” Nambo bhandu bhakaaheka. 25Bahi, lilubhalo lya bhandu pabhakaabhoanga panja, Ayesu akajingila nkati, bhakaakamula lubhoko bhena amwali, na bhenabho bhakajema. 26Bhandu bhoa bha chilambo echo bhakajoanga ngani hejo.
Ayesu bhaalamia bhangalola bhabhele
27Ayesu paakabhoka penapo, na pabhatendita kujenda, bhangalola bhabhele bhakaakagula kongo bhabhi kupotanga nyenye, “Mwana jwa Adaudi, ntukolee kia!”
28Ayesu paakajingila mu nyuumba, bhangalola bhabhele bhakaajendelela Ayesu na bhakaakonya, “Bholi, mwahobhalelanga kubhehe nenga ndenda kombola kunnamianga?”
Na bhenaangota bhakaajangula, “Eloo, Hangwana.”
29Penapo Ayesu akakwaanga miho gabhenji, akalobhola, “Na hibhee kwaachinunji handa chinhobhalilinge.” 30Miho gabhenji ngagakajogoka kulola. Na jonojwe Ayesu akaakanikia muno, “Nkotokwaalobholela mundu joajola chilebhe chenjeni.” 31Nambo bhenaangota bhakabhokanga, bhakajaula kutandahaa ngani ya Ayesu mu chilambo chela choa.
Ayesu jwaalamia mundu jwangalongela
32Bhandu pabhatendita kujenda kwaachabhe, bhangi bhakaaleta kwa Ayesu mundu jwangalongela ligongo akibha na mahoka. 33Ayesu pabhakalibhoa lyenilyela lihoka, popopo jonijola mundu jwangalongela akajemeka kulongela kabhele. Bhandu bhakakachanga na kulobhola, “Chilebhe handa chenjeni changabhonekana mu chenje chilambo cha ku Isilaeli.”
34Nambo Mafalisayo bhakalobhola, “Mundu hojo atenda kugabhoa mahoka kwa machili ga akolo bha mahoka.”
Ayesu aabhonela kia bhandu
35Ayesu akatyanga mu hilambo yoa na hijiji, na akajigana mu majuumba gabhenji ga konganilanga Bhayahudi, abhi kulongela Ngani Jammbone ja Umwenye gwa Annoongo, na kulamia bhandu itamwa yoa. 36Ayesu pabhakaabhonanga bhandu mabhoga mabhoga akaakolea kia kwa kubhee bhakibhanga na lipamba na bhangabhee bha kwaajangatila. 37Penapo bhakaalobholelanga bhabhachigana bhabhe, “Hilebhe ya kuhuna nga hijingi ila bhakuhuna nga kachoko. 38Mwajopange jonojwe jwakweti hilebhe ya kuhuna abhatume bhandu bhakahunange hilebhe yabhe.”
S'ha seleccionat:
Amatayo 9: NTNHBL
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
The New Testament in Ndondehamba Language ©The Word for the World International and Ndondehamba Language Translation, All rights reserved.