Be ya a Roma 4
4
Adi efka mo chaebi bè jan-gwa ara Ebrayi
1Ekǝnggwa mò a ja jan Ebrayi ebǝ ata mo je, è diben a chu abu nobǝ a no esese chafya mo Ehwya ángá, a ano? 2Adia ano Ehwya è jan-gwa ara Ebrayi jan ga ya ebi a chu mochi a gè bwe ángá, kǝnggwa gà a no ngge mò a gà a séfǝ́ a chu mo nó, tea fwa ye chafya mo Ehwya ra. 3Mò a be Fwaebam jan anga a ano? “Ebrayi è tsǝ́ekǝ̀n a chu Ehwya, ngge a chu shwa enyim mbwe ena, Ehwya è jan ga ya mò esese ebwem chafya mbwe.”
4Asuswana, ano ende akan bwe mochi tse, tse hon a be no ye ángá fwa ye edwe ra, tea a mò e no ara ḿ mbwe ángá. 5Tea ende e bwe ye mochi ra, n nyishwa no a chu Ehwya, Ehwya hon nwene e jan-gwa ya ebgen anga, chaebi mbwe du Ehwya jan ga ya mò esese ebwem a chafya mbwe. 6Dawuda è jan anga mò akan, atan a gè jan fwa a chu etkwa efom mo ende akan a Ehwya jan ga ya esese ebwem, e fwa ye a chu mò a ende hon è bwe anga ra. Gè jan,
7“Esese a be ya
be gwano ara be be edan mo be,
be ya be nacha ara be ebgen mo be.
8Esese a ende a Etsodwe
a ká didi ye ebgen mbwe ra.”
9Esese hon ena a Dawuda è jan fwa a chu mo nó ángá è no kpwà ḿ mo be ya bè tsen ara be tkyà ángá? É yé, gè no ḿ mo be ya bè chà tsen be be tkyà ra gaten. Jè jan bwi anga jan Ehwya è cha ara Ebrayi, jan ga ya esese ebwem, a chu chaebi mo Ebrayi. 10A abu atan engǝ, a bè ti ye jan ga ya ebitete? Atan a bè tsen ara ye tkyà ángá nè, eno e ra, a bè chà tsen be ye nó ra? Gè fwa ye chashin mo tkyà etsǝ́nm mbwe ra tea gè jan nó sangǝ́ be chà tsen ye nó. 11Gè dgyenfon sangǝ́ be chà tsen Ebrayi tkyà. Tkyà etsenm ena no abu echitentì e tú be nobǝ jan Ehwya cha ara ye a chu chaebi a ge no ngge nó a chu Ehwya atan a bè chà tsen be ye tkyà ara ángá. Enona, Ebrayi no ate mo binbin mo be ya e tsǝ́ ara ekǝ̀n tea bè chà tsen be be tkyà ra, abu be e jan ba be ya ebitete ángá. 12Efwe ge no ate mo be ya bè tsen ara be tkyà, fwa ye adia bè tsen ara be tkyà hon tete ra, tea adia be ba echifù mo chaebi a ate je Ebrayi hon è no ngge nó sangǝ́ bè chà tsen ye tkyà ángá gaten.
Be nobǝ nga ya esese ebwem anga a chu shwa enyim mo be a chu Ehwya
13Ehwya è senvǝ ngge Ebrayi tangge be ebi mbwe jan zǝnchaje ena a no ḿ mo be. Ehwya è sen ye vǝ ena adia Ebrayi è tse edon anga ra. Gè bwe nó adia Ebrayi è nyishwa mbwe no a chu Ehwya ngge Ehwya è ti ye jan ga ya esese ebwem chafya mbwe. 14Ano ge è ma no jan be ya e ba edon anga a defǝ́n hon a be, kǝnggwa chaebi fwa ye mò akan ra ngge vǝ-esenm a Ehwya è sen ángá à no mokukwa, 15adia edon hon vǝ́ engo mo Ehwya bwa anga a chu nobǝ. Zǝn a edon fwa ye ra, edon edipinm fwa ye ra.
16Enona, be mò binbin no a chu chaebi a chu Ehwya, evǝa ge e no jan vǝ-esenm ena bwa tén a chu binbin mo be ebi mo Ebrayi adi esese mo Ehwya, fwa ye a chu be ya e tse edon anga kpwà ara ra, tea a chu binbin mo be ya e tsǝ́ekǝ̀n abu Ebrayi è tsǝ́ekǝ̀n ángá. Ge no ate je binbin. 17Abu ge no adi be Fwaebam mo Ehwya. “M bwe o nga ara ate mo be efi embo.” Ge no ate je chafya mo Ehwya, Ehwya hon nwene a gè tsǝ́ekǝ̀n no a chu nó ángá. Ga Ehwya hon nwene e no be ya e fǝ ara ángá nya, ngge nwene e mmò mò efwe gwa anga a je a tswa mò e fwa ye ra.
18Ebrayi è ké cho no àywá, gè no abu ge mbwa a ti ye nwen efwe ra, tea adia gè nyishwa mbwe no a chu Ehwya ángá, ge nga ate mo be efi embo, abu bè jan ara ye jan, “Be ebi mbo a no embo.” 19Gè tswa didi ye ju adi chaebi mbwe ra, gè cha ye dwa jan ju ye no abu ḿ mo ende e fǝ ara ángá ra, bi adia je mbwe è tén ara ge e ken e ngga gwé akan (100), ngge adi gwa ye Sariya è twafǝ̀ ara je mo nwen embwam ángá, gè tsen ye tsuruku ra. 20Gè tsen ye tsuruku a chu vǝ-esenm a Ehwya è sen ngge ge ángá ra, tea gè tubi adi chaebi hon nè no Ehwya egǝ̀n. 21Gè yi ngge echakpo a tsuruku mbwe jan Ehwya no ngge echakpo ga bwe a ti mò a gè senvǝ jan ga bwe ángá. 22Ena a mò è bwe, “Ehwya è jan ga ya esese ebwem chafya mbwe” ángá. 23Fwa a bè bá jan, “Be cha ye abu ende e no ya esese ebwem” ángá, bè bá be nó a chu ye kpwà ara ra, 24tea a chu je gaten, a je ya a Ehwya a jan ja ya esese ebwem ya e tsǝ́ekǝ̀n no a chu Ehwya nwene è ti Yeso Etsodwe je nyi etkyen a dì ángá. 25Gè no a chu be ebgen mo je a Ehwya è chadwa jan be e gu Yeso, tea Ehwya è ti ye nyi etkyen a dì angǝ, evǝa je e no be nobǝ ya e no esese chafya mo Ehwya.
S'ha seleccionat:
Be ya a Roma 4: ICH
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
© 2024 Luke Initiative for Scripture Translation