Be ya a Roma 10
10
1Be nwenjwa m ya, mò a m dgyan a tsuruku mam ngge ebgo mam, a zǝn Ehwya a chu be ya mbwe m ya a Esǝrela, a, Ehwya ge e tivǝ́ be. 2M jan a yi fwa abu eyifwa mo be jan, be chifǝ anga be e bwe mochi mo Ehwya, tea fǝechim mo be hon fwa ye a chu eyiyi ra. 3Adia be yi be efǝ nwone e bwe nobǝ no zǝno esese ngge Ehwya anga ra. Be nda be e no zǝno esese ngge Ehwya adi efǝ mo be, enona, be cha be dwa mo efǝ a Ehwya è bwe, nwone a be nobǝ a no zǝno esese chafya mbwe ángá ra. 4Adia Kristi è bwekǝ̀n ara engà mo mò è bwe bè ti edon bwa ángá, evǝa egwa egwa e tsǝ́ekǝ̀n a chu Kristi, be bwe ye nga ara nobǝ esese a chafya mo Ehwya.
Ega a ḿ mo egwa egwa
5Mosa è bá mò a edon nda anga a chu ende e dgyan anga ge e no zǝno esese ngge Ehwya. Gè bá jan, “Ge no kenm ge e ba binbin mo moetum mo edon hon.”
6Tea a chu esese ebwem chafya mo Ehwya adi efka mo chaebi, fwa mo Ehwya jan, “We jan mbo a tsuruku mbo jan, ‘Ende a vǝ́ a kpe a ara?’ (Tú anga, ge e ti Kristi e shwa a sen.)
7“Eno e ra, ‘Ende a shi adi zǝn evǝnvǝn mo sǝnsen ángá a ara?’ ” (Evǝa ge e ti Kristi e gwa a je, a dì.)
8Mò a fwa mo Ehwya jan anga, a ena, “Fwa mo Ehwya hon no tenten a zǝn o, fwa hon no a kpevǝ mbo ngge a tsuruku mbo.” (Tú anga, fwa a chu chaebi a je du edgon mo nó anga.) 9Ge tú anga jan, ano nobǝ jan a kpevǝ mbwe gwa a je jan, “Yeso a Etsodwe,” ngge ge tsǝ́ekǝ̀n a tsuruku mbwe jan, Ehwya è ti ye nyi etkyen a dì angǝ, ga ben nya e no a fwa efwam ángá. 10Adia a ngge tsuruku a nobǝ e tsǝ́ekǝ̀n ngge be jan-gwa ara ye a chu zǝno mbwe chafya mo Ehwya, ngge ge jan nó a kpevǝ mbwe gwa ara je a chu chaebi mbwe, ba ti a vǝ́ ye. 11Efwe, fwa mo Ehwya jan, “Egwa egwa e tsǝ́ekǝ̀n a chu ye, ba no a didi be ye ebgenju ra.” 12Fwa hon ena tú anga, efwa mo etivǝm mo be ya a Yahuda ngge be ya e fwa be ya a Yahuda ra, té mò akan adia Etsodwe té akan, ngge ge no Etsodwe mo binbin mo be nobǝ. Ge bwe esese àywá a chu be binbin mo be nobǝ, ya e fǝ́ ti mbwe anga. 13Ge no tén abu fwa mo Ehwya jan anga, “Egwa egwa e fǝ́ Etsodwe dwa, ba ti a vǝ́ ye.”
14Echukǝnggwa, ano bwe a ge ba fǝ́ ende a be tsǝ́ be ekǝ̀n a chu ye ra dwa? Ngge ano bwe a ge ba tsǝ́ekǝ̀n a chu ende a be chà fo be fwa a chu ye ra? Ngge bwe engǝ ba fo Fwa Esese hon, ano ende akan chà du ye be edgon mo Fwa Esese hon ra? 15Bwe engǝ ba du edgon ano be tson be be ra? Fwa mo Ehwya jan, “Be kpwafu mo be ya e du edgon a chu Fwa Esese anga, se endà twafǝ̀ chu.”
16Bi adi enò, fwa ye binbin mo be ya a Esǝrela è tse Fwa Esese hon ra, adia efojan Eshaya e chu ye è jan, “Ende e tsǝ́ ara ekǝ̀n a chu fwa mo je ángá, a ara?” 17Ba anona, ano nobǝ fo ara fwa hon, kǝnggwa ge tsǝ́ekǝ̀n, fwa hon a be fo ángá, a Fwa Esese a chu Yeso Kristi. 18Tea me e ká eka, chú be ya a Esǝrela è chà fo be edgon hon ra? Eshwen bè fo ara nó. Afketa mo Ehwya jan,
“Aken mo be ya a m̀ tson bè chí
ángá è tkukwa gu ara
binbin mo zǝnchaje,
fwa è gwa a je a kpevǝ mo be ángá,
è tku kengga ara be
ekǝn-etkyen mo zǝnchaje.”
19Efwe m ká eka anga, chú, be ya a Esǝrela è foyi be edgon hon ra? Ekwafya, Mosa jan,
“Ma bwe nye, be ya a Esǝrela,
nye e ngǝ engǝbgen a chu be nobǝ
ya e kǝn be mò akan ra,
ma bwe nye, nye e fku tsuruku a chu
be efi ya e yi be mò akan ra.”
20Efwe Eshaya è tsen ye etsentsen ra, nè jan,
“Be ya è tkunda m ra,
è ben ara m.
M̀ fi chu m tú ara be ya è
ká be eka mam ra.”
21Tea a chu be ya a Esǝrela gè jan, “Ti anofon kengga edgó, m̀ ywa be bu mam ken a zǝn be ya e cha chu anga àywá, be buton fo be fwa m ra.”
S'ha seleccionat:
Be ya a Roma 10: ICH
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
© 2024 Luke Initiative for Scripture Translation