Be Mochi 27
27
Bulu è kwa ngga evǝa ge e ken a Roma
1Atan a bè pa ara pyoro jan ja kwa ngga a mbǝ a ken a a sǝnsen mo Etali ángá, bè kpu Bulu ngge be ya efki a àtá ehwyatu hon du a bu mo Juliyo, chu mo yakàn akan, a tswa mo etso mo (yakàn mo tì) Kaisa Agostu. 2Jè kwa adi ngga ekeke éè vǝ bwa chá eten mo ya Adiramitiyu nwone è kpo nyaken chá be eten a tón sǝn, ya è no ngge be zǝn endyam, chá buetkwa mo sǝnsen mo Eshiya ángá. Aristaku ya a sǝnsen mo Makidoniya a eten a Tasalonika, è no ngge je.
3Zǝn ngga re, jè kengga a Sidon. Juliyo hon è tú Bulu edgyan, gè gwa Bulu ge e ken a zǝn be shushwa ye evǝa be e bwe e jwa ye adi be mò a gè nda anga. 4Jè vǝ a zǝn, kpo ken chá buetkwa mo Sayifuru adia fyo è kpo bwa anga chafya mo je. 5Atan a jè penyi ara sǝn hon twakwa ara tón mo nó chá sǝnsen mo Kilikiya ngge Pamfiliya ángá, jè kwa a eten a Mira a sǝnsen mo Likiya. 6A zǝn, chu mo yakàn mo Roma hon è ben ngga a mbǝ mo ya a Alezandiriya è nyaken a Etali, kǝnggwa, gè du je je kwa adi ngga hon ngge ge. 7Jè ti be tsǝnò embo, jè no adi kèn enwen-tswa ekenm, ngge a tswa ekan engǝm àywá, jè chà kengga tenten eten a Kinidu. Adia fyo hon è gwa ye je je e ken chá a jè dgyan ángá ra, jè kpo ken chá buetkwa mo ebin etù a Kiriti e no chá buetkwa mo Salmone ángá. 8A tswa ekan hon, jè no kpo ken anga a buetkwa mo sǝn hon, je kengga adi zǝn akan a be ngga è ndnya bwi anga, a bè fǝ́ anga, Zǝn Esese, è no tenten Lasiya, eten efifi akan.
9Ekpengga mo je àywá è twafǝ̀ ara adi kèn a tswa ngga, takpe è se ye mo kèn ekenm a tswa sǝn ra, ngge jè no a tswa etí. Adia ekpengga mo vǝ etsem mo be ya a Yahuda è tse bwi anga jegwa jegwa ángá è twafǝ̀ ara ángá, Bulu è twa be enyingga echa jan, 10“Be ndedon ya, m di jan ja tson chu ngge be etí ano je kenkèn ena, ngga mo je a bgen, be atkimo mo je ngge nya mo je a dì gaten.” 11Tea chu mo etso mo yakàn hon è ka ye pyoro mo Bulu è jan ye anga ra, nè buton mbwe fo kpwà fwa mo enyingga ngge yagwamo ngga ekeke hon. 12Adia Zǝn Esese a be ngga è ndnya bwi anga, è se ye mò enom adi engga mo viejwa ra ángá, atsǝn mo be a tswa mo ngga hon è dgyan anga je e ken e bishi chafya, ehwyà ja ken a zǝn a bè fǝ́ anga Foni, je è de ekpengga mo viejwa a zǝn. Ena a zǝn a be ngga ekeke ndnya bwi anga adi ebin etù mo Kiriti, zǝn a be nobǝ è di nó anga enggasansan chá mo Kpàn ngge Nodgó tangge chá mo Etkyen ngge Nodgó mo ebin etù hon.
Fyochu atan a jè no a tswa sǝn ángá
13Atan a fyo è no kpo bwa anga chá mo Kpàn enwen-tswa ángá, be enyingga è ka jan be ben ara mò a bè nda anga. Enona, bè vǝ efundnya edgwadgwa mo ngga hon vǝ etkyen nè kwa ara ekenm chá buetkwa mo tón mo Kiriti hon. 14Jè chá dgyen je fon ra, kǝnggwa fyo echakpokpo, a be fǝ́ anga Fyo Cha mo Etkyen ngge Notà, è vǝ chá ebin etù hon nè kpo bwa tsǝ je shi chá tswa mo sǝn hon. 15Fyochu hon è no kpo bwa anga, be enyingga hon è nyi ti be ngga hon ken chá a bè dgyan anga ra. Enona, jè gwa fyo hon è no tsǝ je ken anga. 16Abu ngga hon è no ti je no nyaken a buetkwa mo ebin etù nwofyan akan a bè fǝ́ anga Kauda, chá a fyo è kpo bwa ye anga ra ángá, jè ngǝ ekan àywá sangǝ je chà fuben ngga etivǝ́ mo je a zǝn fyo hon. 17Atan a be enyingga hon è vǝ ngga etivǝ́ kwashi ara a tswa ngga ekeke ángá, bè kpu be dgomo tè ngga ekeke hon gwa a ta mo nó chá tswa mbǝ evǝa be e tè e fǝn nó. Bè tsen etsentsen anga a fwa be e di a fu a chu akwabǝ mo Siriti. Enona, bè nggwa efudnya hon shi chá sǝnsen evǝa ge e du ngga hon e no e ken anga enwen-etswa e chu ye. 18Jè ngǝ ekan àywá adi etkyanm ngge fyochu hon. Zǝn ngga re, bè kpu be etkon ya ehwyà è no a tswa ngga hon ángá, kpu no nggwashi anga a tswa sǝn. 19Tsǝnò adi e ta, be enyingga è kpu be atkimo-mochi mo ngga ekeke hon no nggwafwa anga ngge bu mo be. 20Fyochu hon è chungǝ́ tén echungǝ́m nè bwe je diben je nò ngge be ngǝkpe ra mo be tsǝnò embo. Jè ka je shwa mo egam efwe ra.
21Chashin mo be tsǝnò embo, bi adi eno, bè dgyan be be de mode ra, Bulu è nyi etkyen nè jan, “Be ndedon, nye è cha ara dwa ngge pyoro a m̀ pa ángá, jà a gwa je Kiriti ra, kǝnggwa nyà a ti a vǝ́ ara chu nye adi moedìm ngge be mo enggwafwam ena. 22Tea m jan nye anga, nye e no ngge tsuruku echakpokpo, adia ende akan mo nye a fǝ ye ra, kpwà ngga ekeke hon a tkò a ge. 23Echizǝn e ngga nòmo ángá, maleka mo Ehwya, Ehwya a m no ḿ mbwe ngge nwene a m fen ángá, é bwa ywa a buetkwa mam, 24gé jan m jan, ‘Bulu, we tsen mbo etsǝn tsen ra, ge no kenm wa ywa a chafya mo Kaisa. Ehwya adi esese mbwe no ara o nya mo be ya e ken anga ngge bo na.’ 25Enona, be shushwa m ya, nye fu tsuruku, adia m tsǝ́ ara ekǝ̀n a chu Ehwya jan mò a bé jan m ángá a bwe a tén ebwem. 26Tea je di a fu a chu akwabǝ mo ebin etù akan.”
Ngga efkabwim hon
27Adi tsǝnò adi gwi chu ndwe mo kèn mo je hon, dgyén mo mbǝ hon è chà tsǝ ngga mo je hon ken anga a ge a sǝn a Adiriya. Atan a tswa-tsǝ è sen ara ángá, be enyingga hon è diyi ara jan bè tén ara ngge etu. 28Bè ti tutse mo embwadi evǝnvǝn, du shi chá a yi mo sǝn nè di jan evǝnm mo nó è kengga kpwafu gwé akan ngge gwi fà (120). Bè ken bishi, nè mbwadi nó efwe, bè di jan evǝnvǝn hon nè no kpwafu gwi chwen a ndwe (90). 29Adia jè tsen etsentsen anga jan ngga hon è no abu ga bu a chu ten ángá, bè nggwa be efundnya mo ngga edgwadgwa ndwe nggwashi a tswa sǝn chashin mo ngga hon evǝa ngga hon e kenkèn enwotswa, nè bgó ebgo evǝa zǝn ge e ngga e myashi. 30Be enyingga hon, è nda efwa anga be e tse e gwa ngga ekeke hon. Enona, bè ti ngga etivǝ́ du shi a tswa mo sǝn, nè no tú anga abu be nda anga ba nggwa efundnya mo ngga a shi a tswa sǝn chafya mo ngga ekeke hon abu ge e du ngga ekeke hon ge e ndnya. 31Ekǝnggwa Bulu è jan chu mo etso mo yakàn ngge be yakàn hon jan, “Ano be enyingga ena no be a tswa ngga ekeke ena ra, nya ga a didi nye ra.” 32Enona, be yakàn hon è senkwa be dgomo éè tefu ngga etivǝ́ no a ju ngga ekeke hon ángá nè twagwa nó nya.
33Abu zǝn è ngga anga enó, Bulu è bgó be jan be e de mode. Ge jan, “Nye no a tswa shwa edgyenfǝ ekam mo etú fà, nye de didi nye mode ra. 34Asuswana m jan nye anga, nye e de mode, adia mode hon a nwone a no nye nya no angǝ ángá. Ende akan mo nye nwene a zan-a-chu mbwe akan, a tkò ángá, fwa ye ra.” 35Atan a ge jan fwa ara fwa ena ángá, gè ti borodi nè chwano Ehwya chafya mo be binbin. Ekǝnggwa gè bwì nò ti kwa ara edem. 36Binbin mo be è ben ekǝ̀n-ebonm, nè de mode èé be. 37Binbin mo je, jè kengga gwé fà ngge gwi chwen a fà chu chwen a ngǝ (276) a tswa ngga a mbǝ ekeke hon. 38Atan a bè de mbo ara dgyèn ángá, bè wi be edgyan mo fwenfonmo nggwashi a tswa sǝn evǝa ngga hon e dgwa ye àywá ra.
39Atan a zǝn è ngga ara ángá, be enyingga hon è diyi be sǝnsen a bè no tenten a zǝn nó ángá ra, tea bè di zǝn akwabǝ. Bè tkyan be e nyi ngga hon è vǝ́ a chu akwabǝ hon ano be bwe a ti. 40Enona, bè sen nggwa gu be dgomo mo efundnya hon nggwashi a tswa sǝn. Bè fken be dgomo a bè ti tè monyingga hon no ángá. Atan eno, bè fkenggwa be motse a bè twanga ngga hon chá bè dgyan anga. Bè vǝ adanmo efundnya enggwanggwa è no chafya mo ngga ekeke hon ángá, vǝ́ etkyen evǝa fyo ge e tsǝ ngga hon e ken chá tón sǝn. 41Tea ngga ekeke hon è ken bu a chu embe mo akwabǝ hon nè difu ara a zǝn. Kǝnggwa chafya mo ngga ekeke hon è difu ara, nè chì ti ye ju efwe ra. Chashin mo ngga hon è kwa ara ebwíshanm adia echakpo mo efǝ́m mo mbǝ a fyochu è no tsǝ bwa bu nó anga.
42Be yakàn hon è té fuchin evǝa be e gu be ya àtá ehwyatu, afwa ba gwa mbǝ tse a ga. 43Tea adia chu mo yakàn hon è nda anga ge ti e vǝ́ Bulu ángá, gè cha ye dwa be ya yakàn hon be e bwe mò a bè ka anga ra. Gè jan egwa egwa e gwa a yi mbǝ, ge e kwafya e fǝ efǝ e shi a mbǝ evǝa ge e gwa e vǝ́ jengǝ̀. 44Be ya ehwyà è dan shi ángá, be e vǝ́ jengǝ̀ a chu mo be tumo mo ngga ekeke hon eno e ra a chu be ebwishanshan mo tumo hon. Adi ebwem enò, binbin mo be è vǝ́ etù a tswa adgye.
S'ha seleccionat:
Be Mochi 27: ICH
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
© 2024 Luke Initiative for Scripture Translation